The year 2022 marks the 100th anniversary of Jehovah’s Witnesses in Colombia. a

Na 1922, Heliodoro Hernández, muntu mosi ya vandaka kutanga Biblia mingi, defaka bakopi mingi ya zulunalu Nzozulu ya Nkengi na muntu mosi ya yandi zabaka kansi ya vandaka ve Mbangi ya Yehowa. Kukonda kusukinina, Heliodoro bakisaka nde yandi me zwa dibundu ya kieleka mpi yandi yantikaka kulonga bantu ya nkaka. Yandi longaka bamvula zole. Na nima ya bamvula yina zole, yandi kutanaka ti Juan Estupiñán. Bo kumaka kulonga bantu nsangu ya mbote bo zole. Bo zole bo bakaka mbotika na 1932.

Na nima, la Société Watchtower tindilaka mpangi Hernández ti mpangi Estupiñán masini mosi ya vandaka kusadisa na kusonika mpi ya vandaka kusala ti bateri. Bo vandaka kutula badiskure yina vandaka kutubila mambu ya Biblia mu mbandu, “Luvunu ya Butatu Busantu Me Zabana” mpi “Nsuka ya Nsi-Ntoto.” Badiskure yai, bo vandaka kutudila yo bimvuka ya bantu yina vandaka kuzinga na Bangumba ya Andes. Dibundu ya Katolika vandaka ti bupusi mingi na zulu ya bantu yina vandaka kuzinga na bangumba yina. Yo yina mbala mingi bantu yango vandaka kutelamina mpangi Hernández ti mpangi Estupiñán.

Bamisionere yina bakaka formasio na Gileadi kumaka kuna na 1945. Mpangi Olaf Olson, mosi na kati ya bamisionere yina tubaka na disolo na yandi ya luzingu nde: “Mameme ya Yehowa kele mingi awa, mpi beto ke pesa yandi mersi mutindu yandi tindaka beto awa sambu na kuzwa bo mpi kudisa bo.”

Sambu na kuyidika kisalu mbote, bo kangulaka Betele mosi na Colombie. Yo yantikaka bisalu na yo na 1^er mai 1946. Mpangi Arthur Green vandaka mpangi ya ntete ya kusala na Betele yina. Yandi sonikaka nde: “Na nsadisa ya mpeve ya ngolo ya Yehowa, lusambu ya kieleka me yantika na Colombie.”

Bubu yai, Bambangi ya Yehowa kiteso ya 190 000 ke longa na kikesa yonso nsangu ya mbote na insi Colombie.

Bantu me zabaka Colombie sambu na ntoto na yo ya ke basisaka bima mbote mpi sambu na matadi na yo ya ntalu. Kansi insi yai kele kitoko, mingi-mingi sambu na “bima ya ntalu,” disongidila, bantu yina ke landa kupusana pene-pene ya Yehowa. Beto kele na kiese mutindu beto ke mona Yehowa ke landa kusakumuna kisalu ya kulonga nsangu ya mbote yina ‘ke fulusa nzo yai ti nkembo.’—Agai 2:7.