Na Yuli 1, 2021, Tribinale ya Distrike Metallourguitcheski na Tcheliabinsk zengilaka mpangi Souvorov bamvula sambanu ya boloko. Mpangi Souvorov kele ti bamvula 75. Kansi yandi ta kota ve boloko sesepi.

Vladimir Souvorov

• Mvula mpi Kisika Yina Yandi Butukaka: 1946, na Tcheliabinsk

• Disolo ya Luzingu na Yandi: Yandi vandaka machiniste mpi muntu ya teyatre. Yandi me vandaka mpi kilandi ya ntwadisi ya nzo mosi buna (maison de la culture soviétique). Yandi ke zolaka kusonika bankunga mpi kubula kidare

  Yandi kwelaka Valentina na 1973. Yandi bakaka mbotika mpi kumaka Mbangi ya Yehowa na 1993. Bo butaka mwana mosi ya bakala. Zina na yandi vandaka Igor. Mwana yango fwaka na 2014.

Na Yanuari 16, 2020, na Tcheliabinsk, bo fundaka mpangi Vladimir Souvorov. Yandi vandaka ti bamvula 75. Muntu ya ke salaka ba-anketi na nziunga ya Tcheliabinsk fundaka Vladimir nde yandi ke yidikaka mambu sambu bantu kusala mambu ya dibundu mu mbandu, kuyimba bankunga ya Nzambi, kusala bisambu mpi kutubila mambu ya Biblia.

Na Februari 2020, bapolisi yulaka Vladimir bangiufula mpi bo songaka yandi nde yandi fwete kwenda ve kisika ya nkaka. Na Yuni 17, 2020, bo tubaka nde yandi me fwa nsiku. Vladimir tubaka nde yandi kutanaka ti bampasi ya ngolo na mbangika yai. Kansi yandi ke tuba nde: “Nzambi na beto Yehowa me yambulaka beto ve ata fioti . . . Kinduku na beto ti Yehowa ke landa kukuma ngolo. Mono ti Valentina, beto ke mona nde Yehowa ke sadisa beto. Yandi ke pesa beto kikesa, yandi ke pesa beto ngolo mpi ke lembika beto na nzila ya bampangi na beto ya babakala mpi ya bankento, yo vanda bayina kele na dibundu na beto to bisika ya nkaka.”

Na Marsi 11, 2021, bo tubaka nde Valentina me fwa nsiku mpi bo zengilaka yandi boloko ya bamvula zole kaka na tribinale yina ke tadila na ntangu yai mambu ya Vladimir. Valentina kele ti bamvula 73. Bo zole, bo ke landa kutula ntima a nde Yehowa kele ti bo sambu na kusadisa bo.—Nkunga 118:6.