Na Oktobri 28, 2020, Tribinale ya Dimitrovgrad na provense ya Oulianovsk buyaka nde bo basisa mpangi Konstantin Bajenov na boloko na ntwala ya bamvula ya boloko yina bo zengilaka yandi mpi bo lombaka yandi na kufuta amande sambu na kusumba bamvula ya boloko yina bikalaka. Mpangi Bajenov kele ti bilumbu kumi sambu na kulomba nde tribinale kutadila diaka lukanu yai.

Na Yuni 2018, ntangu bo tulaka ntete mpangi Bajenov na boloko sambu na mwa ntangu, yandi vandaka kuwa boma ya mambu yina lendaka kukumina yandi. Ata mpidina, yandi yantikaka kusonika na kaye mosi baverse yonso ya Biblia yina yandi vandaka kuyibuka. Yandi sonikaka baverse kiteso ya 500. Nsuka-nsuka, yandi zwaka Biblia mpi yandi tangaka yo na bangonda iya. Mpangi Bajenov vandaka kusonika mikanda mpi na mikanda yango yandi vandaka kutula baverse ya ke pesaka kikesa yina yandi vandaka kuzwa ntangu yandi vandaka kutanga Biblia. Yandi vandaka mpi kuyimba bankunga na beto ya Kimfumu mpi yandi vandaka kubondila Yehowa na kusadisa yandi.

Mpangi Bajenov salaka bilumbu kuluta 340 na boloko yina bo tulaka yandi sambu na mwa ntangu. Na Septembri 2019, ntangu tribinale zengilaka yandi bamvula tatu mpi bangonda sambanu ya boloko, yandi yambulaka ve kulonguka Biblia mpi kusamba Yehowa na boloko. Yehowa sadisaka yandi na kusala Nkinsi ya Kuyibuka Lufwa ya Yezu na boloko. Kinduku na yandi ti Yehowa sadisaka yandi na kulanda kukanga ntima ti kiese na bampasi. Beto landa kusamba sambu na mpangi Bajenov.