BANTU

Mambu yina Biblia ke tubaka: Nzambi ‘gangaka ve ntoto kaka sambu na mpamba, kansi yandi salaka yo sambu bantu kuzinga.’—YEZAYA 45:18.

NTOTO

Mambu yina Biblia ke tubaka: “Ndonga mosi ya bantu ke kwenda, mpi ndonga mosi ya bantu ke kwisa, kansi ntoto ke bikalaka kimakulu.”—LONGI 1:4.

MAMBU YINA YO KE TENDULA: Biblia ke tubaka nde ntoto ta fwa ve ata fioti mpi bantu ta zingaka kaka na kati. Kana mpidina, nsuka ya nsi-ntoto ke tendula nki?

TADILA MAMBU YAI: Biblia ke fwanisaka nsuka ya nsi-ntoto ya ke kwisa ti mambu yina salamaka na bilumbu ya Noa. Na ntangu yina, ntoto ‘fulukaka ti mubulu.’ (Kuyantika 6:13) Kansi Noa vandaka muntu ya lunungu. Yo yina Nzambi taninaka yandi ti dibuta na yandi, kansi yandi fwaka bantu ya mbi na nzila ya mvula mosi ya ngolo. Ntangu Biblia ke tubilaka mambu yina salamaka na bilumbu ya Noa, yo ke tubaka nde: “Nsi-ntoto ya ntangu yina fwaka ntangu yo fulukaka na masa.” (2 Piere 3:6) Yo vandaka nsuka ya nsi-ntoto ya ntangu yina. Kansi inki fwaka? Yo vandaka ve ntoto, kansi bantu ya mbi yina vandaka na ntoto. Yo yina, ntangu Biblia ke tubilaka nsuka ya nsi-ntoto, yo ke tubilaka ve ntoto yai ya beto ke zingaka na kati. Kansi nsuka ya bantu ya mbi yina kele na ntoto mpi ya bimvuka yonso yina bo me salaka.

BAMPASI MPI MAMBI

Mambu yina Biblia ke tubaka: “Kubika kaka fioti, mpi bantu ya mbi ta vanda diaka ve; nge ta tala kisika yina bo vandaka, mpi bo ta vanda ve pana. Kansi bantu ya kudikulumusa ta baka ntoto, mpi bo ta wa kiese kibeni na ngemba ya mingi.”—NKUNGA 37:10, 11.

MAMBU YINA YO KE TENDULA: Mvula ya ngolo yina nokaka na bilumbu ya Noa katulaka ve mambu ya mbi kimakulu. Sambu na nima, bantu ya mbi kumisaka diaka luzingu ya bantu mpasi. Kansi ntama mingi ve, Nzambi ta manisa mambu ya mbi. Muntu mosi yina sonikaka mpi mukanda ya bankunga tubaka nde: “Bantu ya mbi ta vanda diaka ve.” Nzambi ta manisa mambu ya mbi na nzila ya Kimfumu na yandi disongidila, luyalu yina ta yala nsi-ntoto ya mvimba. Yo ta yala banda na zulu. Yo ta yala bantu yina ke lemfukilaka Nzambi.

TADILA MAMBU YAI: Keti bantu ya ke yala nsi-ntoto bubu ta pesa Kimfumu ya Nzambi maboko? Biblia ke monisa nde bo ta sala yo ve. Na buzoba yonso, bo ta nwanisa Kimfumu ya Nzambi. (Nkunga 2:2) Ebuna nki ta salama? Kimfumu ya Nzambi ta baka kisika ya baluyalu yonso ya bantu, mpi “yo mpamba ta bikala kimakulu.” (Daniele 2:44) Kansi sambu na nki yo ke lomba nde luyalu ya bantu kusuka?

Mambu yina Biblia ke tubaka: “Muntu yina ke tambula kele ve ti kiyeka ya kutwadisa kitambi na yandi mosi.”—YEREMIA 10:23.

MAMBU YINA YO KE TENDULA: Nzambi gangaka ve bantu sambu bo kuditwadisa. Bo ke kuka ve kuyala bantu ya nkaka mpi kumanisa bampasi na bo.

TADILA MAMBU YAI: Mukanda mosi (Britannica Academic) ke monisa nde baluyalu ya bantu kele ve ti ngolo ya “kumanisa bampasi ya bantu mu mbandu, kinsukami, nzala, maladi, bisumbula ya lugangu, bitumba mpi mambu ya nkaka ya mubulu.” Yo ke tuba diaka nde: “Bantu ya nkaka . . . ke yindulaka nde kaka luyalu mosi mpamba muntu ta kuka kumanisa bampasi yina.” Kansi ata baluyalu yonso ya bantu kuvukana, bantu ta landa kuyala kele kaka bantu ya kukonda kukuka yina kele ve ti ngolo ya kumanisa bampasi yina beto me tanga. Kimfumu ya Nzambi mpamba kele ti ngolo ya kumanisa kimakulu bampasi yonso ya kele na nsi-ntoto.

Mutindu Biblia ke monisa yo, nsuka ya nsi-ntoto disongidila, ya bimvuka yonso ya bantu, kele ve kima yina bantu fwete wa boma. Kansi, yo kele kima yina beto fwete vingila na kiese sambu nsi-ntoto ya mpa mpi ya kitoko ya Nzambi ta baka kisika ya nsi-ntoto yai ya kubeba.

Mambu yai ta salama nki ntangu? Disolo yina ke landa ta tubila mvutu yina Biblia ke pesa.