Inki Ntangu Nsuka Ta Kwisa? Mambu Yina Yezu Tubaka
Mutindu beto me mona yo na disolo ya me luta, ntangu Biblia ke tubilaka nsuka ya nsi-ntoto, yo ke zolaka ve kutuba nde ntoto yai ya beto ke zinga na kati na yo mpi bantu yonso ta fwa. Kansi yo ke tubilaka nsuka ya bimvuka yina bantu me salaka mpi ya bantu yonso yina ke pesaka yo maboko. Keti Biblia ke tubilaka ntangu yina bimvuka yina ya bantu ta fwa?
TADILA MAMBU ZOLE YINA YEZU TUBAKA SAMBU NA NSUKA:
“Yo yina, beno landa na kukengila sambu beno me zaba ve kilumbu mpi ngunga.”—MATAYO 25:13.
“Beno keba, beno bikala ya kusikama, sambu beno me zaba ve nki ntangu ntangu ya bo me tulaka ta bwa.”—MARKO 13:33.
Yo ke monisa nde ata muntu mosi ve awa na ntoto me zaba mbote-mbote ntangu yina nsi-ntoto ta fwa. Kansi, Nzambi me tulaka “ntangu,” disongidila ‘kilumbu mpi ngunga yina’ nsuka ta kwisa. (Matayo 24:36) Keti yo ke tendula nde beto lenda zaba ve ata fioti nde nsuka me kuma pene-pene? Ve. Yezu songaka balongoki na yandi na kutula dikebi na mambu yina ta monisa nde nsuka me kuma pene-pene.
KIDIMBU
Mambu yai ya ke landa ta vanda kidimbu ya ta monisa nde nsi-ntoto me kuma na nsuka. Yezu tubaka nde: “Insi mosi ta nwanisa insi ya nkaka mpi kimfumu mosi ta nwanisa kimfumu ya nkaka, mpi nzala ta vanda mpi ntoto ta nikana na bisika ya mutindu na mutindu.” (Matayo 24:3, 7) Yandi tubaka mpi nde “kipupa” disongidila, bamaladi yina ke bakaka bantu mingi ta vanda na ntoto. (Luka 21:11) Keti nge ke mona nde mambu yai ya Yezu tubilaka ke lungana?
Bubu yai, bantu ke niokwama sambu na bitumba, nzala, kunikana ya ntoto mpi maladi ya mutindu na mutindu. Mu mbandu na 2004, ntoto nikanaka ngolo na Nzadi-Mungwa ya Inde. Yo salaka nde masa kufuluka, yo kota na bambanza mpi yo fwa kiteso ya bantu 225 000. Na nsungi ya bamvula tatu, maladi ya coronavirus yina panzanaka na ntoto ya mvimba fwaka bantu kiteso ya bamilio 6.9 na ntoto ya mvimba. Yezu tubaka nde mambu ya mutindu yai ta monisa nde nsuka ya nsi-ntoto yai me kuma pene-pene.
“BILUMBU YA NSUKA”
Biblia ke bingaka bantangu yina bantu ta zinga na ntwala nde nsuka kukwisa nde “bilumbu ya nsuka.” (2 Piere 3:3, 4) 2 Timoteo 3:1-5 ke tuba nde na bilumbu ya nsuka, bantu ta zitisa ve minsiku ya bikalulu ya mbote. (Tala lupangu “ Na Ntwala ya Nsuka ya Nsi-Ntoto.”) Keti bubu yai nge ke mona mpi nde yo kele ti bantu yina me fuluka ti bwimi, lukasi, nku mpi ke monisilana ve zola? Mambu yai ke monisa mpi nde beto ke zinga kibeni na nsuka ya nsi-ntoto.
Ntangu yai, bilumbu ya nsuka ta sala bantangu ikwa? Biblia ke tuba nde “ntangu fioti” kaka. Na nima, Nzambi ta fwa “bantu yina ke fwaka ntoto.”—Kusonga 11:15-18, noti na nsi lutiti; 12:12.
PALADISU ME KUMA PENE-PENE
Nzambi me tulaka dezia kilumbu mpi ntangu yina yandi ta fwa nsi-ntoto yai ya mbi. (Matayo 24:36) Kansi, tala nsangu yai ya nkaka ya mbote: Nzambi “ke zola ve nde ata muntu mosi kufwa.” (2 Piere 3:9) Yandi ke pesa beto dibaku ya kuzaba bansiku na yandi mpi ya kuzitisa yandi. Sambu na nki? Sambu yandi ke zola nde beto guluka na nsuka ya nsi-ntoto yai mpi beto zinga na nsi-ntoto ya mpa, ntangu ntoto ya mvimba ta kuma paladisu.
Nzambi me yidika mambu sambu kisalu ya kulonga bantu kusalama na ntoto ya mvimba sambu na kusadisa bo na kuzaba mambu yina bo fwete sala sambu na kuvanda na nsi-ntoto yina ya mpa yina Kimfumu na yandi ta yala. Yezu tubaka nde bantu ta longa nsangu ya mbote ya Kimfumu ya Nzambi “na ntoto ya mvimba.” (Matayo 24:14) Na nsi-ntoto ya mvimba, Bambangi ya Yehowa salaka bangunga bamiliare na kisalu ya kusamuna mpi ya kulonga bantu nsangu yina kele na Biblia ya ke pesa bantu kivuvu. Yezu tubaka nde kisalu yai ta salama na ntoto ya mvimba na ntwala nde nsuka kukwisa.
Ntangu yina bantu ke yala me kuma na nsuka. Kansi nsangu ya mbote kele nde, nge lenda guluka na nsuka ya nsi-ntoto yai mpi kuzinga na Paladisu yina Nzambi silaka. Disolo yina ke landa ta tubila mambu yina nge fwete sala sambu na kuzinga na nsi-ntoto yina ya mpa.
Mambu yina Yezu tubaka na ntwala sambu na “bilumbu ya nsuka” ke pesa beto kikuma ya kuvanda ti kivuvu
Nge Lenda Sepela Mpi Ti
NZOZULU YA NKENGI
Inki Ntangu Kimfumu ya Nzambi Ta Yala Ntoto?
Balongoki ya nkaka ya kwikama ya Yezu zolaka kuzaba yo mpi. Inki mvutu Yezu pesaka bo?
BAMVUTU NA BANGIUFULA YA BIBLIA
Inki Kele Kidimbu ya “Bilumbu ya Nsuka” to “Ntangu ya Nsuka”?
Biblia tubilaka mambu mingi yina kana yo ta salama na ntangu mosi ta monisa nde beto kele na bilumbu ya nsuka.
