1, 2. Sambu na nki beto fwete sadisa bantu ya nkaka na kubaka mikumba na dibundu?

YEZU longaka mingi Kimfumu. Yandi bakaka mpi ntangu mingi ya kupesa balongoki na yandi formasio. Yezu songaka bo mutindu ya kulonga mpi ya kukeba bansadi ya Nzambi. Yo sadisaka balongoki na kukuma bonso bangungudi yina ke kebaka mameme. (Matayo 10:5-7) Filipo vandaka kulonga mingi, kansi yandi sadisaka mpi bana na yandi ya bankento na kukuma bansamuni. (Bisalu 21:8, 9) Beto fwete sadisa mpi bantu ya nkaka bubu yai. Sambu na nki?

² Na mabundu mingi, balongoki ya Biblia mingi me bakaka ntete ve mbotika. Beto fwete longa bo mambu mingi. Beto fwete sadisa bo na kubakisa mfunu ya kutanga ti kulonguka Biblia bo mosi, ya kusamuna mpi kulonga nsangu ya mbote. Beto fwete sadisa mpi bampangi-babakala yina me katuka kubaka mbotika na kukuma bansadi ya kisalu mpi na nima bankuluntu. Beto yonso kele ti mukumba ya kusadisa bampangi yai ya mpa.—Bingana 4:2.

3, 4. (a) Inki mutindu Polo monisaka nde kulonguka Biblia ke sadisaka na kusamuna mbote? (b) Na ntwala ya kusonga balongoki na kulonguka Biblia bo mosi, beto mosi fwete sala nki?

³ Bansadi yonso ya Yehowa fwete tanga mpi kulonguka Biblia sambu na kuzaba luzolo na yandi. Ntumwa Polo tendudilaka bampangi ya Kolose nde: “Beto me yambulaka ve na kusamba sambu na beno mpi na kulomba nde beno fuluka ti nzayilu ya sikisiki ya luzolo na yandi.” Sambu na nki yo lombaka nde bo tanga mpi bo longuka Masonuku? Sambu bo kuma mayele mpi kuzaba kutambula na “mutindu yina me fwana na Yehowa, sambu na kupesa yandi kiese kibeni.” Yo zolaka kusadisa bo mpi na kusala “konso kisalu ya mbote” yina Yehowa vandaka kulomba bo, mingi-mingi kulonga nsangu ya mbote. (Bakolosai 1:9, 10) Yo yina ntangu beto ke longuka ti muntu, beto fwete sadisa yandi na kubakisa nde kutanga mpi kulonguka Biblia mbala na mbala ta sadisa yandi na kukuma nsadi ya Yehowa.

⁴ Kana beto ke longukaka ve Biblia beto mosi, beto ta kuka ve kusonga balongoki ya Biblia nde kulonguka Biblia bo mosi kele mfunu mingi. Kansi, kana beto ke tanga Biblia mbala na mbala mpi ke yindulula yo, yo ta sadisa beto na luzingu mpi na kisalu ya kusamuna. Mu mbandu, kana muntu me yula beto ngiufula ya mpasi na kisalu ya kusamuna, beto ta pesa yandi mvutu ya me katuka na Biblia. Kana beto ke tanga mutindu Yezu, Polo, mpi Bakristu ya nkaka yambulaka ve kusamuna, yo ta pesa beto kikesa mpi beto ta landa kusamuna ata na bantangu ya mpasi. Diaka, kana beto ke songa bantu ya nkaka mambu yina beto me longuka na Biblia mpi mutindu yo me sadisaka beto, yo lenda pusa bo na kulonguka mpi Biblia mingi sambu na kubaka mambote bonso beto.

5. Inki mutindu beto lenda sadisa bantu ya mpa na kutangaka Biblia bo mosi?

⁵ Kansi nki mutindu nge lenda sadisa balongoki na nge na kulonguka Biblia mbala na mbala? Nge lenda songa bo mutindu ya kuzwa bamvutu na mukanda yina beno ke longuka. Nge lenda lomba yandi na kutanga mambu yina kele na appendice ya mukanda Inki Biblia Kelongaka Mpenza? mpi baverse yina kele na kati. Na nima, nge lenda songa yandi mutindu ya kuyidika balukutakanu sambu na kupesa bamvutu. Siamisa yandi na kutanga konso Nzozulu ya Nkengi mpi Réveillez-vous ! yina ke basika. Nge lenda songa  yandi mutindu ya kusala bansosa na mikanda na beto na nzila ya ordinatere (Watchtower Library) to na site Internet na beto (BIBLIOTHÈQUE EN LIGNE) sambu na kuzwa bamvutu na bangiufula yina bantu ke kudiyulaka. Kana yandi ke sadila bisadilu yai sambu na kulonguka yandi mosi, yandi ta wa kiese mpi yandi ta kuma ti mpusa ya kuzaba mambu mingi.

6. (a) Inki mutindu nge lenda sadisa balongoki na nge na kuzola Biblia mingi? (b) Inki mambote longoki ta baka kana yandi ke tanga Biblia mingi?

⁶ Ntangu beto ke longukaka ti bantu, beto ke sadisaka bo na kubakisa nde Biblia kele mfunu sambu na kuzaba Yehowa mbote-mbote. Na kisika ya kupusa bo na ngolo na kulonguka, beto lenda sadisa bo na kuzola kulonguka. Kana bo ke longuka Biblia mingi, bo ta kudiwa bonso muyimbi-bankunga yina tubaka nde: “Kupusana pene-pene ya Nzambi kele mbote. Mono me kumisa Yehowa Mfumu ya Kuluta Nene kitininu na mono.” (Nkunga 73:28) Ya kieleka, mpeve ya Yehowa ke sadisaka bantu yina ke zolaka kupusana pene-pene na yandi.

7. Inki mutindu Yezu sadisaka bantumwa na kulonga nsangu ya mbote? (Tala kifwanisu ya luyantiku ya disolo.)

⁷ Formasio yina Yezu pesaka bantumwa na yandi lenda longa beto mambu mingi. Yezu vandaka kusamuna ti bo mpi bo monaka mutindu yandi vandaka kulonga. Yandi tendudilaka bo pwelele mutindu bo fwete longa. (Matayo, kapu 10) ^[1] (Tala noti na nsuka ya disolo.) Ntangu fioti na nima, bantumwa zabaka mutindu ya kulonga bantu kieleka. (Matayo 11:1) Beto tadila mambu zole yina beto lenda longa bantu ya mpa na kisalu ya kusamuna.

8, 9. (a) Inki mutindu Yezu vandaka kusolula ti bantu na kisalu ya kusamuna? (b) Inki mutindu beto lenda sadisa bansamuni ya mpa na kulanda mbandu ya Yezu?

⁸ Kusolula ti bantu. Yezu vandaka ve kaka kulonga bimvuka ya bantu. Mbala mingi yandi vandaka kusolula ti muntu mosi mosi na mawete yonso. Mu mbandu, yandi solulaka mbote ti nkento mosi yina kwendaka kubaka masa na dibulu mosi, pene-pene ya mbanza Sikare. (Yoane 4:5-30) Yezu solulaka ti Matayo (Levi), kalaki mosi ya mpaku mpi lombaka yandi na kukuma longoki na yandi. Matayo ndimaka mpi na nima yandi bingisaka Yezu ti bantu ya nkaka na kudia na nzo na yandi. Yezu solulaka ti bantu mingi kuna.—Matayo 9:9; Luka 5:27-39.

⁹ Yezu solulaka mpi ti Natanaele na mawete yonso, ata Natanaele tubaka mambu ya mbi sambu na bantu ya Nazareti. Yo pusaka Natanaele na kusoba mutindu na yandi ya kutadila Yezu, muntu ya Nazareti. Na nima, Natanaele ndimaka nde Yezu kulonga yandi mambu  mingi. (Yoane 1:46-51) Mbandu ya Yezu ke longa beto nde kana beto ke solula ti bantu na mawete, bo ta ndima mambu ya beto ke tuba. ^[2] [Tala noti na nsuka ya disolo.] Kana beto ke longa bantu ya mpa na kusolula ti bantu na mawete yonso, bo ta kuma kuzola mingi kisalu ya kusamuna.

10-12. (a) Inki Yezu salaka ntangu bantu vandaka na mfunu ya kuwa nsangu ya mbote? (b) Inki mutindu beto lenda sadisa bansamuni ya mpa na kulonga mbote kieleka?

¹⁰ Kulonga bantu yina kele ti luzolo ya kuwidikila. Yezu vandaka ti mambu mingi ya kusala. Kansi ntangu bantu vandaka kuzola kuwidikila yandi, yandi vandaka kulutisa ntangu ti bo sambu na kulonga bo mambu mingi. Mu mbandu, kilumbu mosi na lweka ya nzadi, bantu vukanaka sambu na kuwidikila Yezu. Yandi kotaka ti Piere na maswa, telamaka na ntwala na bo mpi longaka bo. Na nima, yandi salaka kima mosi sambu na kupesa Piere dilongi. Yezu salaka kimangu yina sadisaka Piere na kukanga bambisi mingi mpenza. Ebuna yandi songaka Piere nde: “Yantika ntangu yai nge ta kangaka bantu ya moyo.” Na mbala mosi, Piere mpi bantu yina vandaka ti yandi “vutulaka bamaswa na ntoto, bo yambulaka bima yonso, mpi bo landaka” Yezu.—Luka 5:1-11.

¹¹ Nikodemo mpi zolaka nde Yezu kulonga yandi mambu mingi. Kansi yandi vandaka muntu ya Sanedreni mpi yandi vandaka kuwa boma kana bantu kumona yandi ke solula ti Yezu. Yo yina yandi kwendaka kusosa Yezu na mpimpa. Yezu kulaka yandi ve, kansi Yezu bakaka ntangu ya kutendudila yandi bakieleka mingi ya mfunu. (Yoane 3:1, 2) Yezu vandaka kuzola kusadila ntangu na yandi sambu na kulonga bantu kieleka mpi kukumisa lukwikilu na bo ngolo. Beto mpi fwete vutukila bantu na bantangu yina bo lenda yamba beto, mpi beto fwete baka ntangu ya kusadisa bo na kubakisa Biblia.

¹² Kana nge ke samuna ti nsamuni ya mpa, nge lenda sadisa yandi na kuzaba mutindu ya kuvutukila bantu yina me ndima nde yandi vutukila bo. Beto lenda lomba mpi bansamuni yai ya mpa na kusamuna ti beto ntangu beto ke vutukila bantu mpi ke tala balongoki na beto. Yo ta sadisa bo na kuzaba kulonga mpi bo ta wa kiese ya kusadisa bantu na kuzaba Yehowa. Na nima, bo ta vanda na kiese ya kuvutukila bantu mpi kulonga bo Biblia. Bo ta kuma ntima-nda mpi ta lemba ve nswalu kana bo ke kutana ve ti bantu yina bo ke vutukila.—Bagalatia 5:22; tala lupangu, “ Yandi Lembaka Ve.”

13, 14. (a) Mbandu ya bansadi ya Nzambi ya ntama yina sadisaka bampangi na bo ke longa nge nki? (b) Inki mutindu nge lenda sadisa bansamuni ya mpa mpi batoko na kuzola bampangi?

¹³ Yehowa ke zolaka nde bansadi na yandi kuzolana mingi mpi kusadisana. (Tanga Luka 22:24-27; 1 Piere 1:22.) Biblia ke monisa nde Yezu kudipesaka ya mvimba, nkutu yandi tambikaka luzingu na yandi, sambu na kusadisa bantu ya nkaka. (Matayo 20:28) Dorkasi “vandaka kusala bisalu mingi ya mbote mpi kupesa bantu makabu mingi ya mawa.” (Bisalu 9:36, 39) Maria “salaka ngolo” sambu na kusadisa bampangi ya babakala ti ya bankento na Roma. (Baroma 16:6) Inki mutindu  beto lenda sadisa bansamuni ya mpa na kubakisa nde kusadisa bampangi kele mfunu mingi?

¹⁴ Beto lenda nata bansamuni ya mpa ntangu beto ke kwenda kutala bampangi ya minunu mpi bampangi ya ke bela. Kana bibuti ke kwenda kutala bampangi yai, yo ta vanda mbote na kunata mpi bana na bo. Bankuluntu lenda lomba mpi batoko to bansamuni ya mpa na kufidisa bo ntangu bo ke natila minunu madia to ntangu bo ke yidika nzo ya mpangi mosi ya mununu. Ntangu batoko mpi bansamuni ya mpa ke mona mutindu bampangi ke sadisana, bo mpi ta landa mbandu na bo. Mu mbandu, nkuluntu mosi vandaka kukwenda kusamuna na bwala mosi. Yandi vandaka mpi kutala bampangi ya bwala yina mbala na mbala. Toko mosi ya bakala yina vandaka kukwenda ti yandi landaka mbandu ya mbote ya nkuluntu yina. Yo pusaka yandi mpi na kusadisa bampangi ya nkaka.—Baroma 12:10.

15. Sambu na nki bankuluntu fwete sadisa bampangi-babakala na kuyela na kimpeve?

¹⁵ Yehowa me pesaka bampangi-babakala mukumba ya kulonga Ndinga na yandi na dibundu. Yo yina ntangu bampangi-babakala ke sala badiskure, bo fwete longa mbote. Kana nge kele nkuluntu, nge lenda widikila nsadi ya kisalu mosi ntangu yandi ke yidika diskure mpi kusadisa yandi na kuyidika yo mbote. (Nehemia 8:8) ^[3]—Tala noti na nsuka ya disolo.

16, 17. (a) Inki mutindu Polo sadisaka Timoteo na kuyela? (b) Inki mutindu bankuluntu lenda sadisa bampangi yina ta kuma bankuluntu na bilumbu ke kwisa?

¹⁶ Dibundu ya Yehowa ke zola nde bampangi mingi kubaka formasio sambu bo kuma bankuluntu. Polo pesaka Timoteo formasio, mpi lombaka yandi na kusadisa bampangi ya nkaka. Polo songaka yandi nde: “Landa kubaka ngolo na ntima ya mbote ya nene yina kele na Kristu Yezu; mpi mambu yina nge waka na mono yina bambangi mingi mpi tubilaka, mambu yai pesa yo na bantu ya kwikama, ebuna bo mpi ta fwana kibeni na kulonga bantu ya nkaka.” (2 Timoteo 2:1, 2) Polo vandaka nkuluntu mpi ntumwa; yandi longaka Timoteo mambu mingi, mu mbandu mutindu ya kulonga mbote mpi ya kusadisa bampangi na mabundu.—2 Timoteo 3:10-12.

¹⁷ Polo salaka bantangu mingi ti Timoteo sambu na kulonga yandi mbote-mbote. (Bisalu 16:1-5) Bankuluntu fwete landa mbandu ya Polo, bo lenda nata  bansadi ya kisalu ya me yela na baviziti ya kingungudi. Yo ta sadisa bansadi ya kisalu na kulonguka mutindu bankuluntu ke longaka bampangi, ke monisaka ntima-nda, zola, mpi ke tudilaka Yehowa ntima ntangu bo ke gungulaka mameme.—1 Piere 5:2.

18. Sambu na nki beto fwete pesa bampangi ya nkaka formasio?

¹⁸ Na bilumbu yai ya nsuka, beto fwete sadisa bansamuni mingi ya mpa na kusamuna mbote. Bampangi ya nkaka mpi kele na mfunu ya kubaka formasio sambu na kutwadisa mabundu. Luzolo ya Yehowa kele nde bansadi na yandi yonso kubaka formasio ya mbote, mpi yandi me pesaka beto dibaku ya kusadisa bansamuni ya mpa. Yo yina beto fwete sala bikesa sambu na kulonga bankaka, mutindu Yezu ti Polo salaka. Beto fwete pesa bampangi mingi formasio sambu mambu ya kusala kele diaka mingi na kisalu ya kusamuna na ntwala nde nsuka kukwisa.

19. Sambu na nki nge fwete tula ntima nde nge ta pesa bampangi ya nkaka formasio ya mbote?

¹⁹ Kupesa bansamuni ya mpa formasio ke bakaka ntangu mingi mpi ke lombaka bikesa. Kansi beto ke tula kivuvu nde Yehowa ti Yezu ta sadisa beto na kupesa bo formasio ya mbote kibeni. Ntangu beto ta mona bampangi yina beto pesaka formasio “ke sala ngolo mpi ke sala kikesa kibeni” na dibundu to na kisalu ya kusamuna, beto ta wa kiese mingi. (1 Timoteo 4:10) Beto mosi mpi fwete landa kuyela na kimpeve, kukuma ti bikalulu mingi ya mbote, mpi kukuma banduku ya ngolo ya Yehowa.