1. Sambu na nki beto fwete kangama kaka na Yehowa?

YO ME fwana nde beto sambila kaka Yehowa sambu yandi muntu gangaka beto. (Kus. 4:11) Ata beto ke zolaka Yehowa mpi ke zitisaka yandi, beto lenda bwa na mutambu ya kukangama ve ya mvimba na yandi, mutindu yandi ke lombaka beto. Yo yina yo kele mfunu nde beto bakisa mutindu diambu ya mutindu yai lenda salama. Beto tadila ntete kukangama kaka na Nzambi ke tendula inki.

2. Mutindu Kubasika 34:14 ke monisa yo, inki beto ta sala kana beto ke kangama kaka na Yehowa?

² Kukangama kaka na Nzambi yina Biblia ke tubilaka ke tendula kuzola yandi mingi mpenza. Kana beto ke kangama kaka na Yehowa, beto ta sambila kaka yandi. Beto ta tula ve muntu to kima mosi na kisika ya ntete na luzingu na beto.—Tanga Kubasika 34:14.

3. Keti beto ke kangamaka na Yehowa kukonda kikuma?

³ Beto ke kangamaka ve na Yehowa kukonda kikuma. Sambu na nki? Sambu mambu yina Yehowa ke longaka beto ke sadisaka beto na kukangama kaka na yandi. Yo ke sadisaka beto na kusepela ti bikalulu na yandi ya kitoko. Beto me zaba mambu yina yandi ke zolaka mpi ke buyaka mpi beto me bakisaka bikuma na yo. Beto me zabaka lukanu na yandi sambu na bantu mpi ke pesaka maboko sambu na kulungana na yo. Beto ke bakisaka nde kuvanda banduku na yandi kele lukumu ya nene. (Nk. 25:14) Mambu yonso yina beto me bakisaka sambu na muntu yina gangaka beto ke kumisaka beto pene-pene ti yandi.—Yak. 4:8.

4. (a) Satana ke sadilaka nki sambu na kubebisa kukangama na beto na Nzambi? (b) Beto ta tubila nki na disolo yai?

⁴ Diabulu ke yala nsi-ntoto yai mpi yandi ke sadilaka yo sambu na kupesa bantu mpusa ya kulungisa banzala ya mbi  sambu bo kudipesa na biese. (Baef. 2:1-3; 1 Yoa. 5:19) Yandi ke zola nde beto kabula zola na beto, beto zola bima ya nkaka sambu zola na beto na Yehowa kuvanda ve ya mvimba. Beto tadila mitindu zole yina Satana lenda sala yo. Ya ntete, yandi ke pusaka beto na kusosa bimvwama mpi ya zole, yandi ke pusaka beto na kupona bansaka ya mbi.

5. Sambu na nki beto fwete yedisa ve zola ya mbongo?

⁵ Beto yonso ke vandaka na mfunu ya madia, bilele mpi nzo ya mbote. Kansi beto fwete yedisa ve zola ya mbongo. Bantu mingi na nsi-ntoto ya Satana kele “bantu ya ke zolaka mbongo” mpi bima ya kinsuni. (2 Tim. 3:2) Yezu zabaka nde bantu ta pusa balongoki na yandi na kuzola mbongo mingi. Yo yina yandi songaka bo nde: “Muntu mosi ve lenda sala bonso mpika sambu na bamfumu zole; sambu yandi ta menga mosi mpi ta zola ya nkaka to yandi ta kangama na mosi mpi ta vweza ya nkaka. Beno lenda sala ve bonso bampika sambu na Nzambi mpi sambu na Kimvwama.” (Mat. 6:24) Muntu yina ke sambilaka Yehowa mpi ke lutisa ntangu mingi ya kusosa bimvwama, lenda bwa na mutambu ya kusadila bamfumu zole. Yandi ta kangama ve kaka na Yehowa.

6. Mambu yina Yezu songaka dibundu ya Laodisea ke longa beto inki?

⁶ Pene-pene na nsuka ya mvu-nkama ya ntete ya ntangu na beto, bampangi ya dibundu ya Laodisea vandaka kudisikisa nde: “Mono kele mvwama, mono me zwaka bimvwama, mpi mono kele na mfunu ata ya kima mosi ve.” Kansi na meso ya Yehowa mpi ya Yezu bo vandaka ‘bantu ya mawa, bansukami, bifwa-meso mpi kinkonga.’ Yezu pesaka bo bandongisila, ve sambu bo vandaka bamvwama kansi sambu zola na bo ya bimvwama vandaka kubebisa kinduku na bo ti Yehowa.  (Kus. 3:14-17) Kana beto me bakisa nde beto me kuma ti mpusa ya kuvanda ti bimvwama mingi, beto fwete katula mpusa yina kukonda kusukinina. (1 Tim. 6:7, 8) Kana beto sala mpidina ve, beto ta kuma kusadila bamfumu zole mpi Yehowa ta ndima ve lusambu na beto. Yandi ‘ke lombaka nde bantu kukangama kaka na yandi.’ (Kul. 4:24) Inki mutindu mbongo lenda baka kisika ya ntete na luzingu na beto?

7-9. Mbandu ya David ke longa beto nki?

⁷ Beto tadila mbandu ya David, nkuluntu mosi na États-Unis ya ke salaka ngolo. Yandi ke tuba nde yandi vandaka kudipesa mingi na kisalu. Yo yina na kisika yina yandi vandaka kusala, bo pesaka yandi kisalu ya mbote mpi mbongo mingi mpi yandi vandaka na kati ya bantu yina zabaka mbote kisalu yina na nsi na bo. Yandi ke tuba nde: “Na ntangu yina mono yindulaka nde mambote yina yonso vandaka lusakumunu ya Yehowa.” Keti kuyindula mutindu yina vandaka mbote?

⁸ David yantikaka kubakisa nde kisalu na yandi vandaka kubebisa kinduku na yandi ti Yehowa. Yandi ke tuba nde: “Na balukutakanu mpi na kisalu ya kusamuna, mono vandaka kuyindula mambu ya kisalu. Mono vandaka kuzwa mbongo mingi kansi ntu na mono kumaka ti mambu mingi kibeni, mavwanga kotaka na makwela na beto.”

⁹ David bakisaka nde yandi fwete tadila diaka mambu yina kele mfunu mingi sambu na yandi. Yandi ke tuba nde: “Mono bakaka lukanu ya kuyidika luzingu na mono.” David yidikaka manaka na yandi ya kisalu mpi songaka mfumu na yandi. Inki salamaka na nima? Bo katulaka yandi na kisalu. Inki yandi salaka? Yandi ke tuba nde, “Na kilumbu yina landaka, mono fulusaka formilere ya kukuma mupasudi-nzila nsadisi.” Sambu  na kuzwa bima ya kuzingila, David ti nkento na yandi kumaka kusala bisalu ya kutula bunkete. Na nima ya ntangu fioti, yandi kumaka mupasudi-nzila ya ntangu yonso, na nima nkento na yandi mpi kumaka mupasudi-nzila. Bampangi yai ponaka kisalu yina bantu mingi ke vwezaka, kansi kisalu yai kele ve kima ya kuluta mfunu sambu na bo. Ata bo ke zwaka diaka mbongo mingi ve, konso ngonda bo ke zwaka mbongo yina bo kele na yo mfunu sambu na kulungisa bampusa na bo. Bo ke tulaka kisalu ya Yehowa na kisika ya ntete mpi ke bakisaka nde Yehowa ke lungisaka bampusa ya bantu yina ke tulaka Kimfumu na kisika ya ntete.—Mat. 6:31-33.

10. Inki mutindu beto lenda tanina ntima na beto?

¹⁰ Yo vanda beto kele ti bima mingi to ve, beto fwete tanina ntima na beto. Inki mutindu? Beto fwete zola ve bimvwama. Beto fwete bika ve nde kisalu na beto kubaka kisika ya ntete na kisalu ya Yehowa. Inki mutindu nge lenda zaba nde kisalu na nge ke baka kisika ya ntete? Kudiyula nde: ‘Keti na balukutakanu mpi na kisalu ya kusamuna, mono ke yindulaka mbala na mbala mambu ya kisalu? Keti mono ke kudiyangisaka ntangu yonso sambu na kuzaba kana na bilumbu ke kwisa mono ta vanda ti mbongo? Keti mbongo mpi bimvwama ke bebisaka makwela na mono? Keti mono ta sepela kusala kisalu yina bantu ke monaka mfunu ve kana yo ke bikila mono ntangu ya kusala kisalu ya Yehowa?’ (1 Tim. 6:9-12) Ntangu nge ke tadila bangiufula yai, kuvila ve nde Yehowa ke zolaka beto mpi ke sila muntu yina ke kangamaka kaka na yandi nde: “Mono ta bikisa nge ve ata fioti mpi mono ta yambula nge ve ata fioti.” Yo yina ntumwa Polo tubaka nde: “Zola ya mbongo kuyala ve mutindu na beno ya kuzinga.”—Baeb. 13:5, 6.

11. Bansaka lenda sala beto nki?

¹¹ Yehowa ke zolaka nde beto sepela ti luzingu mpi bansaka lenda sadisa beto na kuvanda na kiese. Nkutu Ndinga ya Nzambi ke tuba nde: “Kima ya kuluta mbote sambu na muntu kele ve, katula kaka kudia, kunwa, mpi kuwa kiese sambu na kisalu na yandi ya ngolo.” (Lon. 2:24) Kansi, bansaka mingi lenda bebisa kinduku na beto ti Nzambi. Yo ke bebisaka bikalulu ya mbote ya bantu mpi ke pusaka bantu na kundima to kuzola mambu yina Nzambi ke buyaka.

12. Sambu na nki 1 Bakorinto 10:21, 22 ke siamisa beto na kupona bansaka ya mbote?

¹² Beto ke zolaka kukangama kaka na Yehowa, yo yina beto fwete dia ve na “mesa ya  Yehowa” mpi na “mesa ya bademo.” (Tanga 1 Bakorinto 10:21, 22.) Kudia ti muntu ke tendulaka mbala mingi kinduku. Kana beto ke pona bansaka yina ke pusaka bantu na kusala mubulu, kindoki, mansoni to banzala ya nkaka ya kinsuni, yo ta monisa nde beto ke dia madia na mesa ya bademo. Yo ta bebisa kimuntu na beto mpi kinduku na beto ti Yehowa.

13-14. Na kutadila Yakobo 1:14, 15, sambu na nki kuyedisa banzala ya mbi kele kigonsa? Pesa mbandu.

¹³ Beto lenda fwanisa bansaka ti madia. Ntangu muntu ke baka madia na dilonga, yandi lenda pona madia yina yandi ta tula na munoko. Kansi kana beto me mina dezia madia, beto ke vandaka diaka ve ti kiyeka na madia yango, nitu yo mosi ke sadilaka yo mutindu yo me zola, bima ya ke tungaka nitu yina kele na madia ke kumaka bitini ya nitu na beto. Kana beto dia madia ya mbote, beto ta vanda ti sante ya mbote kansi madia ya mbi lenda bedisa beto. Beto ta bakisa kaka na nima ya bantangu mingi nde beto kele ti sante ya mbote to ve.

¹⁴ Mutindu mosi mpi, beto kele ti kiyeka ya kupona bansaka, beto mosi ke ponaka bansaka yina beto ke zola. Kansi na nima, beto ke vandaka diaka ve ti kiyeka na mambu yina yo ta sala na luzingu na beto, bansaka ya mbote ta sadisa beto na kudiwa mbote kansi ya mbi ta bebisa bikalulu na beto. (Tanga Yakobo 1:14, 15.) Mbala ya nkaka, beto ta mona ve nswalu mambu ya mbi yina bansaka ya mbi ta sala na kimuntu na beto, kansi na nima ya bantangu yo lenda monana pwelele. Yo yina Biblia ke tuba nde: “Beno kudikusa ve: Bo ke sekaka Nzambi ve. Sambu konso kima yina muntu ke kuna, yandi ta katula yo mpi; sambu muntu yina ke kuna sambu na nsuni na yandi ta katula lufwa na nsuni na yandi.” (Bag. 6:7, 8) Yo kele mfunu nde beto buya bansaka yonso ya mbi yina Yehowa ke mengaka.—Nk. 97:10.

15. Inki dikabu Yehowa me pesaka beto sambu yo pesa beto kiese?

¹⁵ Bambangi ya Yehowa mingi ke zolaka kutala JW Télédiffusion. Mpangi-nkento Marilyn tubaka nde: “JW Télédiffusion me sadisaka mono na kuvanda na kiese mpi mono ke talaka bavideo na yo yonso sambu yo ke vandaka mbote. Kana mono me lemba mpi ke kudiwa mono mosi, mono ke landaka badiskure ya lusambu ya suka ya lenda pesa mono kikesa. Yo ke sadisaka mono na kudiwa pene-pene ya Yehowa mpi ya dibundu na yandi. JW Télédiffusion me sobaka kibeni luzingu na mono.” Keti nge ke bakaka mambote na dikabu yai ya Yehowa? Katula manaka ya JW Télédiffusion yina ke basikaka konso ngonda, site Internet na beto kele ti bavideo mingi, bima ya kuwidikila mpi bankunga ya kitoko.

16-17. Sambu na nki beto fwete keba na bantangu yina beto ke lutisaka na bansaka mpi nki mutindu beto lenda sala yo?

¹⁶ Katula kupona bansaka ya mbote, beto fwete tula mpi dikebi na bantangu yina beto ke lutisaka na bansaka. Kana ve, beto ta kuma kulutisa ntangu mingi na bansaka na kisika ya kudipesa mingi na kisalu ya Yehowa. Bantu mingi ke kudiyalaka ve na diambu yai, bo ke kukaka ve kuzaba bantangu yina bo fwete lutisa na bansaka. Mpangi Abigaile, yina kele ti bamvula 18 ke tuba nde: “Kutala televizio ke sadisaka mono na kubaka diaka kikesa na nima ya kusala mingi. Kansi kana mono keba ve, mono lenda lutisa ntangu mingi na ntwala ya televizio.” Mpangi Samuele, yina kele leke ke tuba nde: “Bantangu ya nkaka mono ke talaka bavideo mingi ya nkufi na Internet. Mono ke yantikaka ntete kutala mosi mpi na nima mono ke bakisaka nde mono me lutisa bangunga tatu to iya.”

¹⁷ Inki mutindu nge lenda zaba bantangu yina nge ke lutisaka na bansaka? Ya ntete, na  mbala ya nima yina nge ta sala yo, sosa kuzaba bantangu yina nge ke lutisa. Nge lenda sonika mpi ntalu ya bangunga yina yo me baka nge na mposo mosi. Sonika bantangu yina nge ta lutisaka na kutala televizio, na kukota na Internet, to kubula bansaka na telefone. Kana nge me mona nde bansaka ke baka nge ntangu mingi, soba. Tula mambu ya kuluta mfunu na kisika ya ntete mpi na nima bika mwa ntangu sambu na bansaka. Diaka, samba Yehowa na kusadisa nge sambu nge lungisa lukanu yina nge me baka. Kana nge sala mpidina, nge ta vanda ti ntangu mpi ngolo ya kusala kulonguka na nge mosi, kuvukana na lusambu ya dibuta, balukutakanu ya dibundu mpi kusamuna sambu na kusadila Yehowa. Mpidina bansaka ta pesa nge kiese sambu nge me tula ntete Yehowa na kisika ya ntete.

18-19. Inki mutindu beto lenda monisa nde beto ke kangama kaka na Yehowa?

¹⁸ Na nima ya kutubila nsuka ya nsi-ntoto ya Satana, ntumwa Piere tubaka nde: “bampangi ya mono ke zolaka mingi, sambu beno ke vingila mambu yai, beno sala ngolo kibeni sambu nsuka-nsuka yandi kwisa kukuta beno kukonda ditono, kukonda mvindu, mpi na ngemba.” (2 Pie. 3:14) Kana beto ke lemfuka na ndongisila yai mpi ke sala yonso sambu na kubikala bunkete na mabanza mpi na kimpeve, beto ta monisa nde beto ke kangama kaka na Yehowa.

¹⁹ Satana mpi nsi-ntoto na yandi ta landa kupusa beto na kutula bima ya nkaka na kisika ya ntete. (Luka 4:13) Kansi beto ta bika ve muntu to kima mosi kubaka kisika ya ntete na luzingu na beto. Lukanu na beto kele ya kukangama kaka na Yehowa sambu yo me fwana nde beto kangama kaka na yandi.