NA NSADISA ya masini, muntu mosi ya mayele monaka nde kisumbula mosi ta salama na bilumbu ke kwisa. Yandi monaka nde na nsungi mosi buna mupepe mosi ya ngolo ya kigonsa ta bula insi mosi yina bantu kele mingi. Sambu yandi vandaka kudiyangisa sambu na luzingu ya bantu yina, yandi kebisaka bo mbala na mbala na ntwala nde mupepe yina kubula.

Mutindu mosi, Yehowa ke kebisa bantu yonso ya ntoto na “mupepe” ya kigonsa yina me luta mipepe yonso. Inki mutindu yandi ke salaka yo? Inki ke ndimisa beto nde Yehowa ke bikilaka bantu ntangu ya me fwana sambu na kuyilama? Sambu na kubaka mvutu, beto tadila ntete balukebisu yina Yehowa pesaka na ntangu ya ntama.

Na ntangu ya ntama, Yehowa kebisaka bantu na “mipepe,” to bandola, yina yandi pesaka bantu yina fwaka bansiku na yandi na luzolo yonso. (Bing. 10:25; Yer. 30:23) Konso ntangu, yandi vandaka kuzabisa bantu yina na ntwala mpi kusonga bo bansoba yina bo fwete sala na kuwakana ti luzolo na yandi. (2 Bant. 17:12-15; Neh. 9:29, 30) Sambu na kusadisa bantu na kusoba, mbala mingi yandi vandaka kusadila bansadi na yandi ya kwikama na kuzabisa bantu bandola yina yandi ke kana kupesa mpi kusonga bo na kuyilama kukonda kusukinina.—Amo. 3:7.

Nzambi sadilaka Noa sambu na kukebisa bantu na ntwala. Bamvula mingi na ntwala, Noa waka ve boma ya kuzabisa bantu ya mbi nde Mvula ya Ngolo ta noka. (Kuy. 6:9-13, 17) Yandi songaka bo mpi mambu yina bo fwete sala sambu na kuguluka, yo yina Biblia bingaka yandi “nsamuni ya lunungu.”—2 Pie. 2:5.

Ata Noa salaka bikesa, bantu yina zingaka na ntwala ya Mvula ya Ngolo buyaka nsangu ya Nzambi. Bo vandaka ve ti lukwikilu. Nsuka-nsuka, Mvula ya Ngolo “kwisaka mpi fwaka bo yonso.” (Mat. 24:39; Baeb. 11:7) Yo yina, bo lendaka ve kutuba nde Nzambi kebisaka bo ve na ntwala.

Na dibaku ya nkaka, Yehowa kebisaka bantu mwa ntangu fioti na ntwala nde “mupepe” ya ndola na yandi kuyantika. Ata mpidina, yandi bikilaka bantu ntangu ya me fwana sambu na kusoba. Mu mbandu, yandi kebisaka bantu ya Ezipte na ntwala ya kupesa bo Bandola Kumi. Yehowa tindaka Moize ti Aroni na kukebisa Farao ti bantu na yandi na ndola ya nsambwadi, disongidila mvula ya matadi yina bebisaka insi. Sambu mvula nokaka na kilumbu yina landaka, keti Nzambi bikilaka bo ntangu ya me fwana sambu na kuditanina na mupepe mpi kuzwa kisika ya kubumbana? Biblia ke tuba nde: “Konso muntu na kati ya bansadi ya Farao yina waka ndinga ya Yehowa boma nataka nswalu bansadi na yandi ti bitwisi na yandi na banzo, kansi konso muntu yina tulaka ve na ntima mambu yina Yehowa tubaka bikisaka bansadi na yandi ti bitwisi na yandi na nseke.” (Kub. 9:18-21) Yo ke pwelele nde Yehowa kebisaka bantu mpi bantu yina lemfukaka na nsangu yina gulukaka.

Nzambi kebisaka Farao ti bantu na yandi na ntwala ya kupesa bo ndola ya kumi. Ata mpidina, bo buyaka lukebisu yina na buzoba yonso. (Kub. 4:22, 23) Yo yina, bana na bo ya ntete fwaka. Yo vandaka diambu ya mpasi kibeni! (Kub. 11:4-10; 12:29) Keti Nzambi kebisaka bo na ntangu ya me fwana? Ee. Na ntangu ya me fwana, Moize kebisaka bantu ya Izraele na ndola ya kumi mpi songaka bo mambu yina bo fwete sala sambu na kugulusa mabuta na bo. (Kub. 12:21-28) Keti bantu mingi lemfukaka na lukebisu yina? Biblia  ke monisa nde bantu bamilio tatu; bantu ya Izraele mpi “kimvuka mosi ya nene ya bantu ya mutindu na mutindu” yina vandaka bantu ya Ezipte, gulukaka na ndola ya Nzambi mpi basikaka na Ezipte.—Kub. 12:38; noti na nsi ya lutiti.

Bambandu yai ke monisa nde ntangu yonso Yehowa ke pesaka bantu ntangu ya me fwana sambu na kulemfuka na balukebisu na yandi. (Kul. 32:4) Sambu na nki Nzambi vandaka kukebisa bantu na ntwala? Ntumwa Piere tendulaka nde Yehowa “ke zola ve nde ata muntu mosi kufwa, kansi yandi ke zola nde bantu yonso kubalula ntima.” (2 Pie. 3:9) Ya kieleka, Nzambi ke kudibanzaka sambu na bantu. Yandi zolaka nde bantu yina kubalula ntima mpi kulemfuka na ntwala nde yandi pesa bantu ndola.—Yez. 48:17, 18; Bar. 2:4.

Bubu yai mpi, bantu yonso fwete lemfuka nswalu na lukebisu yina Nzambi ke pesa. Ntangu Yezu vandaka na ntoto, yandi tubaka nde nsi-ntoto yai ta fwa na “mpasi ya nene.” (Mat. 24:21) Sambu na ndola yina ke kwisa, Yezu tubilaka pwelele mambu yina ta salama yina ta sadisa balongoki na kuzaba nde nsuka ya nsi-ntoto me finama. Yo yina, Yezu tubilaka mambu yina ke salama bubu yai na ntoto ya mvimba.—Mat. 24:3-12; Luka 21:10-13.

Na kuwakana ti mbikudulu yina, Yehowa ke kebisa bantu yonso na kundima luyalu na yandi ya zola. Yandi ke zola nde banda bubu bantu ya bulemfu kuzinga mbote mpi kubaka balusakumunu na nsi-ntoto ya mpa. (2 Pie. 3:13) Sambu na kusadisa bantu na kukwikila na balusilu na yandi, Yehowa ke zabisaka bo “nsangu . . . ya mbote ya Kimfumu” yina ke gulusaka yina Yezu tubaka nde “bo ta samuna [yo] na ntoto ya mvimba sambu na kuta kimbangi na makanda yonso.” (Mat. 24:14) Nzambi me sadisaka bansadi na yandi na “kuta kimbangi,” to na kulonga nsangu na yandi na bansi kiteso ya 240. Yehowa ke zola nde bantu mingi kulemfuka na lukebisu na yandi sambu bo guluka na “mupepe” ya ndola na yandi yina ke kwisa.—Sef. 1:14, 15; 2:2, 3.

Yo kele ve mfunu na kudiyula kana Yehowa ke bikilaka bantu ntangu ya me fwana sambu na kulemfuka na balusambisu na yandi sambu ntangu yonso yandi ke kebisaka bantu na ntwala. Kansi, ngiufula ya mfunu kele nde: Keti bantu ta lemfuka na lukebisu ya Nzambi na mwa ntangu yai ya me bikala? Bika nde beto landa kusadisa bantu mingi na kuguluka na nsuka ya nsi-ntoto yai.