1-2. Inki mambu ya mpasi bansadi mingi ya Yehowa ke kutana ti yo, mpi yo lenda sala nde bo kudiwa nki mutindu?

BETO tadila bambandu yai: Ya ntete, munganga me songa mpangi mosi ya leke nde yandi kele ti maladi yina ta lembisaka yandi mingi kibeni. Ya zole, bo me katula mpangi-bakala mosi ya bamvula kuluta 50 na kisalu, yandi me sala yonso sambu na kuzwa kisalu ya nkaka kansi yandi ke zwa ve. Ya tatu, mpangi-nkento mosi ya kwikama ya mununu ke kuka diaka ve kusala mingi na kisalu ya Yehowa.

² Kana nge ke kutana ti diambu mosi ya mpasi bonso yina beto me tubila, nge lenda yindula nde nge kele diaka ve mfunu. Mambu yai ya mpasi lenda katula nge kiese, yo lenda sala nde nge kudiwa diaka mbote ve mpi nge kuka diaka ve kuzinga mbote ti bantu ya nkaka.

3. Inki mutindu Satana mpi bantu mingi yina yandi ke sadilaka ke tadilaka luzingu ya bantu?

³ Nsi-ntoto yai ke tadilaka luzingu ya bantu mutindu Satana ke tadilaka yo. Satana ke sadilaka bantu mambu bonso nde bo kele ve mfunu. Yandi songaka Eva nde Eva ta zinga mbote kana yandi kolama na Nzambi ata yandi zabaka mbote nde kana Eva kukolama na Nzambi yandi ta fwa. Satana ke twadisaka mambu ya mumbongo, ya politiki mpi mabundu ya nsi-ntoto yai. Yo yina bantu mingi ya mumbongo, ya politiki mpi bamfumu ya mabundu ke zitisaka ve bantu mpi ke monaka ve mfunu ya luzingu ya bantu.

4. Inki beto ta tadila na disolo yai?

⁴ Kansi Yehowa ke zolaka nde beto kudiwa mbote mpi yandi ke  sadisaka beto na kukanga ntima na mambu ya mpasi yina ke pusaka beto na kuyindula nde beto kele ve mfunu. (Nk. 136:23; Bar. 12:3) Disolo yai ta tubila mutindu Yehowa ke sadisaka beto: (1) Ntangu beto ke bela, (2) ntangu beto kele na mpasi ya mbongo (3) mpi ntangu kinunu ke pusa beto na kuyindula nde beto lenda sala diaka ve mambu ya mfunu na kisalu ya Yehowa. Beto tubila ntete bikuma yina ke pusa beto na kundima nde konso muntu na kati na beto kele mfunu na meso ya Yehowa.

5. Inki ke ndimisa nge nde bantu kele mfunu mingi na meso ya Yehowa?

⁵ Ata Yehowa salaka beto na nsadisa ya mfututu ya ntoto, beto kele mfunu mingi kuluta mfututu ya ntoto. (Kuy. 2:7) Beto tadila bikuma yina ke ndimisa beto nde beto kele mfunu mingi na meso ya Yehowa. Yandi me gangaka beto ti makuki ya kulanda bikalulu na yandi. (Kuy. 1:27) Yo yina, yandi me kumisaka beto mfunu mingi kuluta bima yonso yina yandi me salaka mpi me pesaka beto kiyeka na ntoto mpi na zulu ya bambisi.—Nk. 8:4-8.

6. Inki kikuma ya nkaka ke ndimisa beto nde bantu ya kukonda kukuka kele mfunu na meso ya Yehowa?

⁶ Ata Adami salaka disumu, Yehowa ke landaka kumona bantu mfunu mingi. Beto kele mfunu mingi na meso na yandi yo yina yandi pesaka Yezu, mwana yina yandi ke zolaka mingi na kufwa sambu na masumu na beto. (1 Yoa. 4:9, 10) Kimenga ya Yezu me pesaka dibaku sambu Yehowa kufutumuna bantu yina fwaka sambu na disumu ya Adami. Yehowa ta futumuna “bantu ya lunungu ti bantu ya kukonda lunungu.” (Bis. 24:15) Ndinga ya Nzambi ke tuba nde beto kele mfunu mingi na meso ya Yehowa ata beto ke belaka, kele ve ti mbongo to beto me nuna.—Bis. 10:34, 35.

7. Inki bikuma ya nkaka ke ndimisa nde Yehowa ke monaka nde beto kele mfunu mingi na meso na yandi?

⁷ Beto kele ti bikuma ya nkaka ya kundima nde Yehowa ke monaka nde beto kele mfunu mingi na meso na yandi. Yandi me bendaka beto na yandi mpi yandi monaka mutindu beto ndimaka nsangu ya mbote. (Yoa. 6:44) Ntangu beto yantikaka kukwenda pene-pene na yandi, yandi kwisaka pene-pene na beto. (Yak. 4:8) Yehowa ke bakaka ntangu mpi ke salaka bikesa ya kulonga beto sambu na kumonisa beto nde beto kele mfunu mingi na meso na yandi. Yandi ke zabaka kimuntu na beto ya bubu yai mpi mutindu ya bantu yina beto lenda kuma na bilumbu ke kwisa. Bantangu ya nkaka, yandi ke pesaka beto ndola sambu yandi ke zolaka beto. (Bing. 3:11, 12) Mambu yai ke ndimisa kibeni nde beto kele mfunu mingi na meso ya Yehowa!

8. Inki mutindu Nkunga 18:27-29 ke sadisa beto na kuvanda ti mabanza ya mbote na bantangu ya mpasi?

⁸ Bantu ya nkaka monaka nde ntotila Davidi vandaka ve mfunu, kansi Davidi zabaka nde Yehowa vandaka kuzola yandi mpi kusadisa yandi. Yo sadisaka Davidi na kukanga ntima na mambu yina yandi vandaka kukutana ti yo. (2 Sam. 16:5-7) Ntangu beto ke lembaka nitu to ke kutanaka ti bampasi, Yehowa ke sadisaka beto na kukanga ntima to kununga bampasi yina. (Tanga Nkunga 18:27-29.) Yehowa ke sadisaka beto na kulanda kusadila yandi na kiese yonso ata beto ke kutana ti bampasi. (Bar. 8:31) Beto tadila ntangu yai mambu tatu ya mpasi yina lenda kumina beto mpi ntangu beto ke kutana ti yo, beto fwete yibuka nde Yehowa ke zolaka beto mpi beto kele mfunu mingi na meso na yandi.

9. Maladi lenda pusa beto na kuyindula nki mambu?

⁹ Ntangu beto ke bela, beto lenda kudiyangisa mingi mpi kumona nde beto kele ve mfunu. Beto lenda wa nsoni sambu bantu ya nkaka ke bakisa nde beto ta kuka diaka ve kusala mambu ya nkaka to sambu yo ke lomba kaka nde bantu ya nkaka kusadisa beto. Ata ntangu bantu ke  zaba ve maladi yina beto ke bela, beto lenda kudiyangisa sambu beto ke bakisa nde beto ta kuka diaka ve kusala mambu ya nkaka. Inki mutindu Yehowa ke pesaka beto kikesa na bantangu yai ya mpasi?

10. Mutindu Bingana 12:25 ke monisa yo, nki lenda sadisa beto ntangu beto ke bela?

¹⁰ Kana beto ke bela, “ndinga ya mbote” ke pesaka beto kikesa. (Tanga Bingana 12:25.) Na Biblia, Yehowa me sonikaka mambu mingi ya mbote yina ke yibusaka beto nde beto kele mfunu mingi na meso na yandi ata beto ke bela. (Nk. 31:19; 41:3) Kana beto ke tanga Ndinga ya Nzambi konso kilumbu, Yehowa ta sadisa beto na kununga basusi yina maladi ke nataka.

11. Inki mutindu Yehowa sadisaka mpangi mosi?

¹¹ Beto tadila mbandu ya mpangi Jorge. Ntangu Jorge vandaka leke, yandi belaka maladi mosi yina vandaka kulembisa yandi mingi, yo pusaka yandi na kuyindula nde yandi kele diaka ve mfunu. Jorge ke tuba nde: “Mono zabaka ve nde maladi na mono ta pusa mono na kuwa nsoni sambu yo ta bendaka mingi dikebi ya bantu na kimuntu na mono. Sambu maladi na mono kumaka diaka ngolo, mono kumaka kudiyangisa sambu mono zabaka nde luzingu na mono ta soba. Mono kudiyangisaka mingi mpi mono lombaka Yehowa na kusadisa mono.” Inki mutindu Yehowa sadisaka yandi? Jorge ke yika nde: “Sambu mono vandaka kukuka ve kutanga bantangu mingi, bo songaka mono na kutangaka baverse fioti mpamba ya mukanda ya Nkunga yina ke tubila mutindu Yehowa ke sadisaka bansadi na yandi. Mono vandaka kutanga mbala na mbala baverse yango konso kilumbu mpi yo vandaka kupesa mono kikesa mpi kivuvu. Na nima ya bantangu, bantu yantikaka kumona nde mono kumaka kiese-kiese. Bo tubaka nkutu nde kiese na mono vandaka kupesa bo kikesa. Mono bakisaka nde Yehowa pesaka mvutu na bisambu na mono. Yandi sadisaka mono na  kukuma ti mabanza ya mbote sambu na luzingu na mono. Mono kumaka kutula dikebi mingi na bangindu ya Biblia ya ke monisa mutindu Yehowa ke tadilaka mono ata mono ke belaka.”

12. Kana nge ke bela, nki nge lenda sala sambu Yehowa kusadisa nge?

¹² Kana nge ke bela, kuvila ve nde Yehowa ke zaba mpasi na nge. Lomba yandi na kusadisa nge na kutadila maladi na nge na mutindu ya mbote. Na nima, sosa na Biblia bangindu ya mbote yina Yehowa me tulaka sambu na nge. Tula dikebi mingi na baverse yina ke monisa nde Yehowa ke monaka nde beto kele mfunu mingi. Kana nge ke sala mpidina, nge ta bakisa nde Yehowa ke zolaka mingi bantu yonso yina ke sadilaka yandi na kwikama yonso.—Nk. 84:11.

13. Inki mutindu tata ya dibuta lenda kudiwa kana bo me katula yandi na kisalu?

¹³ Tata yonso ya dibuta ke zolaka kupesa bantu ya dibuta na yandi bima yina bo kele na yo mfunu. Kansi yindula nde, bo me katula mpangi mosi na kisalu, ata yandi me sala ve diambu mosi ya mbi. Yandi me sala yonso sambu na kuzwa kisalu ya nkaka kansi yandi ke zwa ve. Mambu ya mutindu yai lenda sala nde mpangi yai kudimona nde yandi kele mfunu ve. Inki mutindu kutula ntima na balusilu ya Yehowa lenda sadisa yandi?

14. Sambu na nki Yehowa ke lungisaka ntangu yonso balusilu na yandi?

¹⁴ Yehowa ke lungisaka ntangu yonso balusilu na yandi. (Yoz. 21:45; 23:14) Yandi ke salaka yo sambu na bikuma mingi. Kikuma ya ntete kele sambu na zina na yandi to lukumu na yandi. Yehowa me silaka nde yandi ta sadisa bansadi na yandi ya kwikama, yo yina yandi ke zabaka nde yandi fwete lungisa lusilu na yandi. (Nk. 31:1-3) Diaka, Yehowa ke zaba mbote nde beto bantu ya dibuta na yandi, ta kudiyangisa mingi kana yandi ke pesa beto ve bima yina beto kele na yo  mfunu. Yandi silaka nde yandi ta pesa beto bima yina beto kele na yo mfunu sambu na kuzingila mpi bima yina ta sadisa beto na kulanda kusadila yandi. Ata kima mosi ve ta kanga yandi nzila ya kulungisa lusilu yai.—Mat. 6:30-33; 24:45.

15. (a) Inki mpasi Bakristu ya mvu-nkama ya ntete kutanaka ti yo? (b) Inki kivuvu Nkunga 37:18, 19 ke pesa beto?

¹⁵ Kana beto ke yibuka bikuma yina ke pusaka Yehowa na kulungisa balusilu na yandi, yo ta ndimisa beto nde yandi ta sadisa beto ntangu beto kele ve ti mbongo. Beto tubila mambu yina kuminaka Bakristu ya mvu-nkama ya ntete. Ntangu bo kumaka kuniokula ngolo bampangi ya Yeruzalemi, ‘bantu yonso panzanaka’ kaka bantumwa bikalaka. (Bis. 8:1) Yindula bampasi yina bampangi kutanaka ti yo. Mu mbandu, mpasi ya mbongo. Bampangi vandaka diaka ve ti banzo mpi bisalu. Ata mpidina, Yehowa yambulaka bo ve mpi bo taninaka kiese na bo. (Bis. 8:4; Baeb. 13:5, 6; Yak. 1:2, 3) Yehowa sadisaka Bakristu yai ya kwikama mpi yandi ta sadisa beto.—Tanga Nkunga 37:18, 19.

16. Inki lenda pusa beto na kudiyula kana beto kele kaka mfunu na meso ya Yehowa?

¹⁶ Kana beto me nuna, beto lenda kuma kuyindula nde beto ta kuka diaka ve kusala mingi na kisalu ya Yehowa. Ziku ntotila Davidi mpi yindulaka mutindu yai ntangu yandi kumaka mununu. (Nk. 71:9) Inki mutindu Yehowa lenda sadisa beto?

17. Mbandu ya mpangi Jheri ke longa beto nki?

¹⁷ Beto tadila mbandu ya mpangi nkento Jheri. Bo bingisaka yandi na lukutakanu yina bo vandaka kulonga mutindu ya kutanina Nzo ya Kimfumu, ntete yandi sepelaka ve kukwenda. Yandi tubaka nde: “Mono kele mununu mpi mufwidi, mono ke zaba ve ata kima mosi na yina me tala kutanina Nzo ya Kimfumu. Mono kele ve na mfunu.” Kilumbu mosi na ntwala nde  lukutakanu yina kuyantika, yandi sambaka Yehowa. Na kilumbu yina landaka, ntangu yandi kumaka na Nzo ya Kimfumu, yandi vandaka kudiyula kana yo kele kibeni mfunu nde yandi landa malongi yina. Ntangu lukutakanu vandaka kusalama, mpangi mosi yina vandaka kulonga monisaka nde kima ya kuluta mfunu kele kumonisa mpusa ya kundima nde Yehowa kulonga beto. Mpangi Jheri ke yika nde: “Mono kuditubilaka nde, ‘mono kele ti mpusa yina.’ Mono dilaka sambu mono bakisaka nde Yehowa pesaka mvutu na kisambu na mono. Yehowa vandaka kundimisa mono nde mono kele mfunu na meso na yandi mpi nde yandi kele ti luzolo ya kulonga mono kisalu yina ya mfunu.” Jheri ke sukisa nde: “Ntangu mono vandaka kukwenda na lukutakanu yina, mono vandaka mawa-mawa mpi mono vandaka kudiyangisa, kansi na nima ya lukutakanu, mono bakaka kikesa mpi mono monaka nde mono kele mfunu.”

18. Inki mutindu Biblia ke monisa nde Yehowa ke sepelaka na mambu yina beto ke salaka ata beto me nuna?

¹⁸ Ata beto me kuma minunu, beto lenda ndima nde Yehowa kele ti bisalu mingi ya kupesa beto. (Nk. 92:12-15) Yezu longaka nde Yehowa ke sepelaka ti bikesa yina beto ke monisaka na kisalu na yandi, yo vanda beto ke sala mingi to ve. (Luka 21:2-4) Yo yina tula dikebi na mambu yina nge lenda sala. Mu mbandu, nge lenda longa bantu mambu ya Yehowa, kusamba sambu na bampangi mpi kusadisa bampangi na kulanda kusambila Yehowa. Yehowa ke bingaka nge nduku na yandi ya kisalu, sambu nge ke vandaka ti mpusa ya kulemfukila yandi kansi ve sambu na mambu yina nge ke salaka.—1 Bak. 3:5-9.

19. Inki kivuvu Baroma 8:38, 39 ke pesa beto?

¹⁹ Beto kele na kiese mingi mutindu beto ke sambilaka Yehowa, Nzambi yina ke monaka nde bantu yina ke sambilaka yandi kele mfunu mingi. Yandi salaka beto sambu beto sadila yandi, mpi kusambila yandi ke pesaka beto kiese mingi mpi ke tomisaka luzingu na beto. (Kus. 4:11) Ata nsi-ntoto ke mona nde beto kele ve mfunu, Yehowa ke monaka nde beto kele mfunu mingi. (Baeb. 11:16, 38) Yo vanda beto ke bela, me konda mbongo to me nuna, beto fwete vila ve nde ata kima mosi ve lenda kabula beto na zola ya Tata na beto ya zulu.—Tanga Baroma 8:38, 39.