KISALU na beto kele mfunu mingi kibeni. Kansi bantu ya nkaka ya beto ke longaka ke bakisaka yo ve. Ata bantu ke sepelaka ti malongi ya Biblia, bantangu ya nkaka, bo ke monaka nde bo fwete longuka ve Ndinga ya Nzambi ti beto.

Beto baka mbandu ya Gavin. Yandi vandaka kukwenda na balukutakanu, kansi yandi vandaka kuzola ve kulonguka Biblia. Gavin ke tuba nde, yandi vandaka kuzola ve bantu kubakisa nde yandi me zaba mambu fioti mpamba ya Biblia. Yandi vandaka kuzola ve kudikotisa na dibundu mosi to bantu kukusa yandi. Keti nge ke yindula nde bo lendaka kusadisa Gavin? Yindula mambote yina malongi ya Biblia lenda natila muntu. Yehowa zabisaka bantu ya Izraele nde: “Mambu ya mono ke tuba ta kulumuka bonso malulu, bonso mvula ya fioti na zulu ya matiti.” (Kulonga 31:19, 30; 32:2) Beto tubila fioti malulu mpi beto fwanisa yo ti kisalu ya kusamuna. Yo lenda sadisa beto na kusadisa mbote “bantu ya mitindu yonso.”—1 Timoteo 2:3, 4.

Malulu ke salamaka malembe-malembe. Malulu ke salamaka malembe-malembe ntangu matuti ke losaka matonsi ya fioti-fioti ya masa. Inki mutindu mambu yina Yehowa vandaka kutuba vandaka ‘kukulumuka bonso malulu’? Yandi vandaka kutubila bantu na yandi na mawete mpi na zola yonso. Beto ke landaka mbandu na yandi ntangu beto ke zitisaka balukwikilu ya bantu ya nkaka. Beto ke sadisaka bo na kuyindulula mpi kubaka balukanu bo mosi. Kana beto ke monisila bantu dikebi ya mutindu yai, bo ta ndima na luzolo yonso mambu ya beto ke tuba, mpi kisalu na beto ta buta mbuma ya mbote.

Malulu ke pesaka kikesa. Kisalu na beto ya kusamuna ta pesa bantu kikesa kana beto ke sosa mutindu ya kusadisa bo na kuzaba mbote kieleka. Mpangi Chris muntu lombaka Gavin na mbala ya ntete na kulonguka Biblia; yandi sosaka ve kundimisa Gavin mambu na kingolo-ngolo. Kansi yandi sosaka mutindu ya kusadisa Gavin na kusepela kusolula mambu ya Biblia. Mpangi Chris zabisaka Gavin nde, Biblia kele ti nsangu mosi ya mfunu mpi kuzaba yo ta sadisa yandi na kubakisa balukutakanu mbote. Na nima, Chris tendulaka nde bambikudulu ya Biblia sadisaka yandi na kundima kibeni nde malongi ya Biblia kele ya kieleka. Nsuka-nsuka, bo kumaka kusolula mingi mpi kutubila kulungana ya bambikudulu. Masolo yina pesaka Gavin kikesa mpi na nima yandi ndimaka kulonguka Biblia.

Malulu kele mfunu mingi na luzingu. Na nsungi ya kisiwu na Izraele, ntangu ke vandaka mingi mpi mvula lenda noka ve bangonda mingi. Kana malulu kele ve, banti fwete yuma mpi kufwa. Yehowa tubaka nde bilumbu na beto ta vanda bonso kisiwu ya ngolo, disongidila bantu ta vanda ti “nzala ya kuwa ndinga ya Yehowa.” (Amosi 8:11) Yandi silaka nde Bakristu yina bo me tulaka mafuta ta vanda “bonso malulu ya me katuka na Yehowa” ntangu bo ta longaka nsangu ya mbote ya Kimfumu, mpi “mameme ya nkaka” ta pesaka bo maboko. (Mika 5:7; Yoane 10:16) Yehowa ke tindaka beto na kulonga bantu yina ke sosa kuzaba kieleka sambu na kupesa bo luzingu. Keti beto ke bakaka nsangu yai na mbalu?

Malulu kele lusakumunu ya ke katukaka na Yehowa. (Kulonga 33:13) Kisalu na beto ya kusamuna lenda natila bantu yina ke ndimaka nsangu balusakumunu. Kulonguka Biblia vandaka lusakumunu sambu na Gavin. Yo sadisaka yandi na kuzwa bamvutu na bangiufula na yandi yonso. Yandi yelaka nswalu na kimpeve, bakaka mbotika, mpi ntangu yai yandi ke longaka nsangu ya mbote ya kimfumu ti nkento na yandi Joyce.

Kufwanisa kisalu na beto ti malulu lenda sadisa beto mpi na kubakisa nde bikesa yina konso muntu ke salaka kele na mbalu mingi. Inki mutindu? Kaditonsi ya malulu ke vandaka mfunu mingi ve. Kansi, kana yo me bwa mingi, ntoto ke kumaka masa-masa. Mutindu mosi, beto lenda mona nde mambu yina konso muntu ke sala kele fioti. Kansi bikesa yina bamilio ya bansadi ya Yehowa ke salaka ke sadisaka beto na kuta kimbangi na “makanda yonso.” (Matayo 24:14) Keti Yehowa ke sakumunaka bantu na nzila ya kisalu na beto? Ee, nsangu ya mbote kele bonso malulu; beto ke longaka yo na mawete yonso, yo ke pesaka bantu kikesa, mpi yo ke sadisaka bo na luzingu!