YEZU tubaka nde balongoki na yandi ta vanda na kiese ya kukatula bambuma mingi na ntangu yai ya nsuka. (Mat. 9:37; 24:14) Mambu yina yandi tubaka lunganaka na nziunga mosi ya Transcarpatie na Ukraine. Kaka na bambanza tatu ya pene-pene na teritware ya Transcarpatie, mabundu kele 50 mpi bansamuni kele kuluta 5 400. * Ya kieleka, bantu mingi na bambanza yai tatu kele Bambangi ya Yehowa.

Inki mambu bantu ke zolaka na teritware yai? Mpangi Vasile ya ke zingaka kuna ke tuba nde: “Awa, bantu ke zitisaka Biblia, ke zolaka lunungu, bantu ya mabuta ke zolanaka mingi mpi ke sadisanaka na masonga yonso. Yandi ke yika nde bo ke ndimaka ve ntangu yonso malongi na beto. Kansi ntangu beto ke songaka bo mambu yina kele na Biblia, bo ke widikilaka beto na dikebi yonso.”

Ya kieleka, bampangi ke kutanaka ti mambu ya mpasi ntangu bo ke samunaka na teritware yai sambu bo kele mingi kuluta bawi. Mu mbandu, na dibundu mosi bansamuni kele 134 kansi banzo kele kaka 50 na teritware ya dibundu yango. Inki mutindu bansamuni ke yikamaka na diambu yai?

Bampangi mingi ke kudipesaka na luzolo yonso na kukwenda kusamuna na bisika yina mpusa kele mingi. Mpangi Ionash yina kele ti bamvula 90 ke tuba nde: “Na teritware ya dibundu na beto nsamuni mosi fwete samuna na balupangu zole. Mono me kumaka kusamuna kaka na teritware ya dibundu na beto. Kansi na ntwala nde mono bela ngolo, mono vandaka kukwenda kusamuna na teritware yina bo me samunaka ntete ve na bakilometre kiteso ya 160, kuna mono vandaka kusamuna na ndinga ya bantu ya Hongrie.” Yo ke lombaka bikesa sambu bansamuni kukwenda kusamuna na bateritware ya nkaka. Mpangi Ionash ke yika nde: “Mono vandaka kutelema na 4h00 sambu na kubaka train mpi mono vandaka kusamuna tii na 18h00 ntangu train vandaka kuvutuka. Mono vandaka kusala mutindu yina mbala zole to tatu na mposo mosi.” Keti mpangi Ionash yindulaka nde bikesa na yandi vandaka mpamba? Yandi ke tuba nde: “Mono vandaka kusepela na mutindu yina ya kusamuna. Mono waka kiese sambu mono sadisaka dibuta mosi na kuzaba kieleka, bo vandaka kuzinga kisika yina dibundu vandaka ve.”

Ya kieleka, bampangi yonso ve na mabundu ya teritware yai ta kuka kukwenda na babwala ya ntama sambu na kusamuna. Kansi beto yonso, yo vanda bansamuni ya me kuma bambuta ke salaka bikesa ya kusamuna mbote-mbote na teritware ya dibundu na beto. Yo yina na 2017, na bambanza yai tatu ntalu ya bantu yonso yina vandaka na Lusungiminu, vandaka mbala zole kuluta ntalu ya bansamuni, to kati-kati ya ntalu ya bantu ya bambanza yina. Ntembe kele ve nde, na konso kisika yina beto kele, beto kele ti “mambu mingi ya kusala na kisalu ya Mfumu.”—1 Bak. 15:58.