Na 2 Bakorinto 12:2, 3, Polo tubilaka muntu mosi yina “bo nataka . . . na zulu ya tatu.” Muntu yango vandaka nani? Ntangu Polo sonikilaka bampangi ya Korinto, yandi monisaka nde Nzambi sadilaka yandi na kuvanda ntumwa. (2 Bak. 11:5, 23) Na nima, yandi tubilaka ‘bambona-meso mpi mambu yina Mfumu songaka yandi.’ Na baverse yai, Polo tubilaka ve bampangi ya nkaka. Yo yina, yo ke monana nde muntu yango vandaka Polo yandi mosi yina monaka bambona-meso mpi mambu yina bo songaka yandi.—2 Bak. 12:1, 5

Polo vandaka muntu yina ‘bo nataka na zulu ya tatu mpi na paladisu.’ (2 Bak. 12:2-4) Yandi sadilaka bangogo “bambona-meso” ya mambu yina ta salama.

Inki Polo monaka “na zulu ya tatu”?

Na Biblia, ngogo “zulu” lenda tendula, zulu yai ya beto ke mona. (Kuy. 11:4; 27:28; Mat. 6:26) Kansi bo lenda sadila mpi ngogo “zulu” na mutindu ya nkaka. Bantangu ya nkaka yo lenda tendula kimfumu ya bantu. (Dan. 4:20-22) Yo lenda tendula mpi luyalu ya Nzambi to Kimfumu yina Nzambi ke sadila.—Kus. 21:1.

Polo monaka “zulu ya tatu.” Yo ke tendula nki? Bantangu ya nkaka Biblia ke vutukilaka kima mosi mbala tatu sambu na kubenda dikebi to kumonisa mfunu na yo. (Yez. 6:3; Ezek. 21:27; Kus. 4:8) Yo ke monana nde ntangu Polo tubilaka “zulu ya tatu,” yandi zolaka kubenda dikebi na luyalu mosi ya kuluta mbote, ya kuluta kuzanguka, disongidila Kimfumu ya Mesia yina Yezu Kristu ta yala ti bantu 144 000. (Tala Étude perspicace des Écritures, Vol. 1, balut. 474, 476.) Ntumwa Piere sonikaka nde beto ke vingila “zulu ya mpa mpi ntoto ya mpa” yina Nzambi me silaka.—2 Pie. 3:13.

Inki beto ta tuba sambu na “paladisu” yina Polo ke tubila?

Ngogo “paladisu” lenda tendula mambu mingi: (1) Yo lenda tendula ntoto yina ta kuma Paladisu na bilumbu ke kwisa. (2) Yo lenda tendula mpi balusakumunu ya kimpeve yina Nzambi ta pesa bansadi na yandi na nsi-ntoto ya mpa. (3) Diaka, yo lenda tendula luzingu ya mbote yina kele na zulu na “paladisu ya Nzambi” yina Kusonga 2:7 ke tubila.—Tala Nzozulu ya Nkengi ya Yuli 15, 2015, lut. 8 par. 8.

Yo ke monana nde na 2 Bakorinto 12:4, Polo tubilaka mambu yai yonso tatu ntangu yandi tubilaka mambu yina yandi monaka.

Na bunkufi:

Ntembe kele ve nde “zulu ya tatu” yina 2 Bakorinto 12:2 ke tubila kele Kimfumu ya Mesia yina Yezu Kristu ta yala ti bantu 144 000, na “zulu ya mpa.”—2 Pie. 3:13.

Yo kele “zulu ya tatu” sambu Kimfumu kele luyalu mosi ya kuluta mbote mpi ya kuluta kuzanguka.

Ntembe kele ve nde “paladisu” yina “bo nataka” Polo na mbona-meso kele (1) Paladisu yina ta vanda na ntoto, (2) Paladisu ya kimpeve yina ta luta paladisu ya kimpeve ya bubu yai mpi (3) “Paladisu ya Nzambi” ya zulu yina ta landa kuvanda ntangu ntoto ta kuma paladisu.

Yo yina, nsi-ntoto ya mpa ta vanda zulu ya mpa mpi ntoto ya mpa. Yo ta vanda ngidika mosi ya mpa yina ta vanda Kimfumu ya zulu mpi bantu yina ta sadila Yehowa na paladisu awa na ntoto.