1-2. (a) Inki mutindu mambu yina kele na Yezaya 41:10 sadisaka mpangi Yoshiko? (b) Yehowa taninaka nsangu yai sambu na mambote ya banani?

MUNGANGA songaka mpangi Yoshiko nde yandi ta zinga diaka ve mingi. Inki Yoshiko salaka? Yandi yibukaka verse yina yandi ke zolaka mingi, Yezaya 41:10. (Tanga.) Yandi songaka munganga nde yandi ke wa ve boma, sambu Yehowa me simba yandi na diboko. * Verse yai lenda sadisa beto na kuvanda ti ngemba ya mabanza ntangu beto ke kutana ti bampasi. Sambu na kubakisa mutindu yo lenda sadisa beto, beto ta tadila kikuma yina Nzambi songaka Yezaya na kusonika mambu yai.

² Yehowa songaka Yezaya na kusonika mambu yai sambu na kupesa Bayuda yina kwendaka na kimpika na Babilone kikesa. Kansi, Yehowa taninaka nsangu yai sambu na mambote ya Bayuda yina vandaka na kimpika mpi ya bansadi na yandi yonso. (Yez. 40:8; Bar. 15:4) Bubu yai, sambu beto ke zinga na “bantangu ya mpasi” kibeni, beto kele na mfunu ya kikesa yina kele na mukanda ya Yezaya.—2 Tim. 3:1.

3. (a) Inki balusilu kele na Yezaya 41:10, mukapu ya mvu 2019? (b) Sambu na nki beto kele na mfunu ya balusilu yai?

³ Disolo yai ta tubila balusilu tatu yina kele na Yezaya 41:10, yina ta kumisa lukwikilu na beto ngolo: (1) Yehowa ta vanda ti beto, (2) yandi kele Nzambi na beto mpi (3) yandi ta sadisa beto. Bonso Yoshiko, beto kele na mfunu ya balusilu * yai sambu  na kununga bampasi ya beto ke kutana ti yo. Beto mpi ke kutana ti bampasi sambu na mambu ya mbi yina ke salama na nsi-ntoto. Bampangi ya nkaka ke kangaka ntima na mbangika. Beto tadila balusilu tatu.

4. (a) Inki kele lusilu ya ntete yina beto ta tubila? (Tala mpi noti na nsi ya lutiti.) (b) Inki mutindu Yehowa ke monisaka zola na yandi sambu na beto? (c) Nge ke kudiwaka nki mutindu sambu na bangogo yai ya Nzambi?

⁴ Ya ntete, Yehowa ke sila nde: “Kuwa boma ve, sambu mono kele ti nge.” * Yehowa ke monisa nde yandi kele ti beto sambu yandi ke tudilaka beto dikebi mpi ke zolaka beto mingi. Tala mutindu yandi ke monisa zola na yandi ya mingi sambu na beto. Yehowa ke tuba nde: “Nge kumaka na mfunu mingi na meso na mono, mono pesaka nge lukumu mpi mono zolaka nge.” (Yez. 43:4) Ata kima mosi ve na zulu to na ntoto lenda kanga Yehowa nzila na kuzola bansadi na yandi; kwikama na yandi sambu na beto ke sobaka ve. (Yez. 54:10) Zola mpi kinduku na yandi ke pesaka beto kikesa. Yandi ke taninaka beto mutindu yandi taninaka nduku na yandi Abrami (Abrahami). Yehowa songaka yandi nde: “Abrami, kuwa boma ve. Mono kele kitaninu na nge.”—Kuy. 15:1.

5-6. (a) Inki mutindu beto me zaba nde Yehowa ke tudilaka beto dikebi mpi ke sadisaka beto na bantangu ya mpasi? (b) Mbandu ya Yoshiko ke longa beto nki?

⁵ Beto ke zaba nde Yehowa ke tudilaka beto dikebi mpi ke sadisaka beto na bantangu ya mpasi sambu yandi ke sila nde: “Ntangu nge ta luta na kati ya bamasa, mono ta vanda ti nge, mpi ntangu nge ta luta na kati ya banzadi, yo ta dindisa nge ve. Ntangu nge ta tambula na kati ya tiya, nge ta zika ve, ludimi ya tiya ta yoka nge mpi ve.” (Yez. 43:2) Bangogo yai ke tendula nki?

⁶ Yehowa ke sila ve nde yandi ta katula bampasi kansi yandi ta bika ve nde “banzadi” disongidila bampasi kudindisa beto to “ludimi ya tiya” disongidila bambangika kuvanda ntangu yonso. Yandi ke sila beto nde yandi ta vanda ti beto mpi ta sadisa beto na ‘kuluta na kati ya bamasa’ disongidila bampasi. Inki Yehowa ta sala? Yandi ta sadisa beto na kuwa ve boma mpi na kuvanda ya kwikama na  yandi ata beto ke kutana ti mpasi ya lufwa. (Yez. 41:13) Yoshiko, yina beto me tubila na luyantiku, ndimaka kieleka yai. Mwana na yandi ya nkento ke tuba nde: “Ngemba ya mabanza yina mama vandaka ti yo yitukisaka beto. Ya kieleka, beto bakisaka nde Yehowa pesaka yandi ngemba ya mabanza. Tii kilumbu yina yandi fwaka, mama vandaka kusonga minganga ti bambefo ya nkaka mambu ya Yehowa mpi balusilu na yandi.” Mbandu ya Yoshiko ke longa beto nki? Kana beto mpi ke tula ntima na lusilu yai ya Nzambi, “mono ta vanda ti nge,” beto ta vanda ti kikesa mpi ngolo ntangu beto ke kanga ntima na bampasi.

7-8. (a) Inki kele lusilu ya zole yina beto ta tubila mpi yo ke tendula nki? (b) Sambu na nki Yehowa songaka Bayuda yina vandaka na kimpika nde: ‘Beno kudiyangisa ve’? (c) Inki bangogo ya kele na Yezaya 46:3, 4 pesaka bansadi ya Nzambi kikesa?

⁷ Ya zole, Yehowa ke sila nde: “Kudiyangisa ve, sambu mono kele Nzambi na nge.” Bangogo yai ke tendula nki? Bangogo ya kisina ya bo me balula na “kudiyangisa ve” na verse yai, ke tendula “kutala-tala na nima sambu nge ke wa boma nde kima to muntu mosi lenda sala nge mbi” to “kuwa boma bonso muntu yina kele na kigonsa.”

⁸ Sambu na nki Yehowa songaka Bayuda yina kwendaka na kimpika na Babilone nde bo “kudiyangisa ve”? Sambu yandi zabaka nde bantu ya insi yina ta wa boma. Sambu na nki? Sambu na nsuka ya bamvula 70 ya kimpika ya Bayuda, basoda ya ngolo ya Medo-Persia ta nwanisa Babilone. Yehowa sadilaka basoda yai sambu na kubasisa bansadi na yandi na kimpika na Babilone. (Yez. 41:2-4) Ntangu bantu ya Babilone mpi ya makanda ya nkaka waka nde bambeni na bo me pusana, bo pesanaka kikesa mpi tuba nde: “Vanda ngolo.” Bo salaka mpi banzambi mingi ya biteki ti kivuvu nde yo ta tanina bo. (Yez. 41:5-7) Kansi, Yehowa lembikaka ntima ya Bayuda yina vandaka na kimpika na bangogo yai: “O Izraele, [na kuswaswana ti bantu ya makanda] nge kele nsadi na mono . . . Kudiyangisa ve, sambu mono kele Nzambi na nge.” (Yez. 41:8-10) Tala mambu ya Yehowa tubaka: “Mono kele Nzambi na nge.” Na bangogo yai, Yehowa ndimisaka bansadi na yandi ya kwikama nde yandi ta vila bo ve, yandi ta vanda kaka Nzambi na bo mpi bo ta vanda kaka bantu na yandi. Yandi songaka bo nde: “Mono ta nata beno . . . mpi ta gulusa beno.” Ntembe kele ve nde bangogo yai pesaka Bayuda yina vandaka na kimpika kikesa.—Tanga Yezaya 46:3, 4.

9-10. Sambu na nki beto fwete wa ve boma? Pesa mbandu.

⁹ Bubu yai bantu ke kudiyangisa mingi sambu na mambu ya mbi ya ke salama na nsi-ntoto. Ya kieleka, beto mpi ke kudiyangisaka sambu na yo. Kansi beto lenda wa ve boma. Yehowa ke tuba nde: “Mono kele Nzambi na nge.” Sambu na nki bangogo yai ke sadisa beto na kuwa ve boma?

¹⁰ Beto tadila diambu yai: Jim ti Ben ke sala nzietelo na avio yina me kutana ti mipepe ya ngolo. Ntangu mupepe ke nikisaka avio, muntu ya ke nataka avio ke tuba na ndinga ya ngolo nde: “Beno kanga mikaba ngolo sambu beto me kuma na kisika mupepe kele ngolo.” Jim me wa boma mingi. Kansi muntu yina ke nata avio me yika nde: “Mono ke tuba nde beno kudiyangisa ve.” Jim me nikisa ntu mpi me tuba nde: “Inki kivuvu yandi ke zola kupesa beto?” Yandi me bakisa nde Ben ke wa ve boma ata fioti. Jim me yula yandi nde: “Sambu na nki nge ke wa ve boma?” Ben me seka mpi me tuba nde: “Sambu mono me zaba  mbote muntu yai ya ke nata avio. Yandi kele papa na mono!” Na nima Ben me tuba nde: “Bika mono zabisa nge mambu mingi sambu na papa. Mono ke songa nge nde kana nge zabaka yandi mbote mpi mutindu yandi ke nataka avio, nge zolaka ve kuwa boma.”

11. Inki malongi beto lenda baka na mbandu ya Ben ti Jim?

¹¹ Inki dilongi beto lenda baka na mbandu yai? Bonso Ben, beto ke waka ve boma sambu beto ke zaba mbote kibeni Yehowa, Tata na beto ya zulu. Beto ke zaba nde yandi ta sadisa beto na kukanga ntima na bampasi yina kele bonso mipepe ya ngolo yina beto ke kutana ti yo na bilumbu yai ya nsuka. (Yez. 35:4) Kana beto ke tudila Yehowa ntima, beto ta wa ve boma mutindu bantu ya nkaka ke waka. (Yez. 30:15) Beto ke salaka bonso Ben ntangu beto ke zabisaka bantu ya nkaka bikuma yina ke pusaka beto na kutudila Nzambi ntima. Na nima, bo mpi lenda tula ntima nde Yehowa ta sadisa bo na bampasi yonso yina bo ke kutana ti yo.

12. (a) Inki kele lusilu ya tatu yina beto ta tubila? (b) Bangogo “diboko” ya Yehowa ke yibusa beto nki?

¹² Ya tatu, Yehowa ke sila nde: “Mono ta pesa nge kikesa, ee, mono ta sadisa nge.” Yezaya tendulaka mutindu Yehowa pesaka bansadi na yandi kikesa to ngolo na bangogo yai: “Yehowa . . . ta kwisa ti ngolo, mpi diboko na yandi ta yala sambu na yandi.” (Yez. 40:10) Mbala mingi Biblia ke sadilaka ngogo “diboko” na mutindu ya kifwani sambu na kumonisa ngolo. Yo yina, bangogo yai ‘diboko ya Yehowa ta yala’ ke yibusa beto nde Yehowa kele Ntotila ya ngolo. Yandi sadilaka ngolo na yandi sambu na kukeba mpi kunwanina bansadi na yandi ya ntama mpi ke landa kupesa kikesa mpi kutanina bayina ke tudilaka yandi ntima  bubu yai.—Kul. 1:30, 31; Yez. 43:10, noti na nsi ya lutiti.

13. (a) Na nki ntangu Yehowa ke landa kusila na kupesa beto kikesa? (b) Inki lusilu ke pesa beto ngolo mpi kivuvu?

¹³ Ntangu bambeni ke bangika beto, Yehowa ke landa kusila beto nde: “Mono ta pesa nge kikesa.” Na bansi mingi, bambeni ke sala ngolo sambu na kubuyisa kisalu ya kusamuna to kukanga bisalu ya dibundu na beto. Ata mpidina, beto ke kudiyangisaka ve kuluta ndilu sambu na mambu yina. Yehowa me silaka nde yandi ta pesa beto ngolo mpi kivuvu. Yandi ke sila beto nde: “Ata kinwaninu mosi ve ya bo ta sadila sambu na kunwanisa nge ta nunga.” (Yez. 54:17) Bangogo yai ke yibusa beto mambu tatu ya mfunu.

14. Sambu na nki beto lenda yituka ve ntangu bambeni ke nwanisa beto?

¹⁴ Ya ntete, sambu beto kele balongoki ya Yezu, beto ke zabaka nde bo ta menga beto. (Mat. 10:22) Yezu tubaka na ntwala nde balongoki na yandi ta kutana ti bambangika ya ngolo na bilumbu ya nsuka. (Mat. 24:9; Yoa. 15:20) Ya zole, Mbikudulu ya Yezaya tubaka na ntwala nde bambeni ta menga beto diaka mingi mpi bo ta sadila binwaninu ya mutindu na mutindu sambu na kunwanisa beto. Bo lenda sadila luvunu, kukusila beto makambu mpi kunwanisa beto. (Mat. 5:11) Yehowa ta kanga ve bambeni nzila na kusadila binwaninu yai sambu na kunwanisa beto. (Baef. 6:12; Kus. 12:17) Kansi beto fwete wa ve boma. Sambu na nki?

15-16. (a) Inki kele diambu ya tatu yina beto fwete vila ve mpi nki mutindu Yezaya 25:4, 5 ke ndimisa yo? (b) Inki mutindu Yezaya 41:11, 12 ke monisa mambu yina ta kumina bambeni na beto?

¹⁵ Beto tadila diambu ya tatu yina beto fwete vila ve. Yehowa tubaka nde “kinwaninu mosi ve” yina bo ta sadila sambu na kunwanisa beto “ta nunga.” Bonso kibaka ke taninaka beto na mipepe ya ngolo, Yehowa mpi ke taninaka beto na “mupepe ya bamfumu ya  nku.” (Tanga Yezaya 25:4, 5.) Bambeni ta kuka ve kuniokula beto kimakulu.—Yez. 65:17.

¹⁶ Yehowa ke pesaka beto diaka kikesa ya kutudila yandi ntima ntangu yandi ke tendudilaka beto mambu yina ta kumina bantu yina “ke wila [beto] makasi ya ngolo.” (Tanga Yezaya 41:11, 12.) Ata bambeni kusadila binwaninu ya ngolo ya nki mutindu to ata bitumba me kuma ngolo nki mutindu, ndola na bo ta vanda kaka kiteso mosi: Bambeni yonso ya bansadi ya Nzambi, “ta kuma bima ya mpamba mpi ta fwa.”

17-18. (a) Inki mutindu kutanga Biblia ke sadisaka beto na kutula ntima ya mvimba na Nzambi? Pesa mbandu. (b) Inki mutindu mukapu ya mvu 2019 lenda sadisa beto na kuyindula mingi?

¹⁷ Beto ta tudila Yehowa ntima ya mvimba kana beto ke zaba yandi mbote kibeni. Mutindu mosi mpamba ya kuzaba Yehowa mbote kele kutanga Biblia na dikebi yonso mpi kuyindula mingi mambu ya beto ke tanga. Biblia kele ti masolo ya kieleka yina ke monisa mutindu Yehowa taninaka bansadi na yandi na ntangu ya ntama. Masolo yai ke pesa beto kivuvu nde yandi ta keba beto mpi bubu yai.

¹⁸ Mona na mabanza mbandu yai ya kitoko yina Yezaya ke sadila sambu na kumonisa mutindu Yehowa ke taninaka beto. Yandi ke fwanisa Yehowa ti ngungudi mpi bansadi na yandi ti mameme. Yezaya tubaka nde, Yehowa “ti diboko na yandi, yandi ta vukisa bana-mameme, mpi yandi ta nata bo na ntulu na yandi.” (Yez. 40:11) Ntangu beto ke monaka na mabanza mutindu Yehowa me baka beto na maboko, beto ke kudiwaka na lutaninu mpi na ngemba. Sambu na kusadisa beto na kuvanda na ngemba ya mabanza ntangu beto ke kutana ti bampasi, mpika ya kwikama mpi ya mayele me pona Yezaya 41:10 sambu yo vanda mukapu ya mvu 2019, “Kudiyangisa ve, sambu mono kele Nzambi na nge.” Yindula mingi bangogo yai ya ke pesa kikesa. Yo ta pesa nge kikesa ntangu nge ta kutana ti bampasi.