1. Inki ke ndimisa nge nde Ndinga ya Nzambi kele ngolo? (Tala kifwanisu ya luyantiku ya disolo.)

BANSADI ya Yehowa ke ndimaka nde ndinga na yandi, disongidila, mambu yina kele na Ndinga na yandi “kele ya moyo mpi ngolo.” (Baebreo 4:12) Beto me monaka mutindu Biblia me sadisaka beto mpi bantu ya nkaka. Na ntwala ya kukuma Bambangi ya Yehowa, bampangi ya nkaka vandaka kuyiba, bampika ya malafu mpi kusala pite. Bankaka vandaka bantu ya lukumu to vandaka ti mbongo mingi kansi bo vandaka kuzinga ve na kiese. (Longi 2:3-11) Diambu ya kiese kele nde bampangi mingi yina vandaka ve ti kivuvu mpi kondaka lutwadisu me zwaka yo bubu yai. Beto ke sepelaka kutanga mingi masolo “Biblia Ke Sobaka Luzingu ya Bantu” ya ke basikaka na Nzozulu ya Nkengi. Ata na nima ya kukuma Bakristu, beto fwete bika nde Biblia kusadisa beto na kulanda kukumisa ngolo kinduku na beto ti Yehowa.

2. Inki mutindu Ndinga ya Nzambi sadisaka Bakristu ya mvu-nkama ya ntete?

² Bansoba ya nene yina bantu ke salaka ntangu bo ke longukaka Biblia ke yitukisaka beto mpenza ve. Na mvu-nkama ya ntete, bampangi yina vandaka ti kivuvu ya kuzinga  na zulu salaka mpi bansoba ya nene. (Tanga 1 Bakorinto 6:9-11.) Ntangu Polo tubilaka masumu yina ta kanga bantu nzila ya kubaka Kimfumu ya Nzambi, yandi yikaka nde: “Bantu ya nkaka na kati na beno vandaka” kusala mambu yai. Ndinga ya Nzambi mpi mpeve santu sadisaka bo na kusoba. Ata na nima ya kukuma Bakristu, bankaka landaka kusala masumu yina bebisaka kinduku na bo ti Yehowa. Mu mbandu, Biblia ke tubila mpangi mosi ya bo me tulaka mafuta ya bo basisaka na dibundu. Na nima, yandi salaka bansoba mpi vutukaka diaka na dibundu. (1 Bakorinto 5:1-5; 2 Bakorinto 2:5-8) Kuzaba nde Biblia me sadisaka bampangi mingi na kusoba ke pesaka kikesa mingi.

3. Inki beto ta longuka na disolo yai?

³ Ndinga ya Nzambi kele ngolo mingi. Sambu Yehowa me pesaka beto Biblia, beto ke salaka bikesa na kusadila yo mbote. (2 Timoteo 2:15) Disolo yai ta tubila mambu yina beto fwete sala sambu ngolo ya Ndinga ya Nzambi kusadisa beto (1) na luzingu, (2) na kisalu ya kusamuna, mpi (3) ntangu beto ke longa na dibundu. Disolo yai ta sadisa beto na kumonisa zola mpi ntonda na Tata na beto yina ke longaka beto sambu na mambote na beto.—Yezaya 48:17.

4. (a) Inki mambu beto lenda sala sambu Ndinga ya Nzambi kutwadisa beto? (b) Inki ntangu nge ke tangaka Biblia?

⁴ Beto fwete tanga Biblia mbala na mbala sambu yo twadisa beto. Beto fwete sala bikesa sambu na kutanga yo konso kilumbu. (Yozue 1:8) Beto ke vandaka ti bisalu mingi, ata mpidina beto fwete bika ve nde kima mosi to mikumba na beto kukanga beto nzila ya kutanga Biblia. (Tanga Baefezo 5:15, 16.) Beto lenda tanga Biblia na suka, na kilumbu to na mpimpa. Beto ke kudiwaka bonso muyimbi-bankunga yina sonikaka nde: “Mono ke zolaka nsiku na nge mingi! Mono ke yindululaka yo kilumbu ya mvimba.”—Nkunga 119:97.

5, 6. (a) Sambu na nki beto fwete yindula mingi mambu ya beto ke tanga na Biblia? (b) Inki mambote beto ta baka? (c) Inki mambote kutanga mpi kuyindula mingi malongi ya Biblia me natilaka nge?

⁵ Na nima ya kutanga Biblia, beto fwete yindula mingi mambu ya beto me tanga. (Nkunga 1:1-3) Kusadila minsiku ya Biblia ta sadisa beto na kutwadisa luzingu na beto na mayele ya Ndinga ya Nzambi. Yo vanda beto ke tanga Biblia na apareyi to na papie, lukanu na beto fwete vanda nde yo soba luzingu na  beto mpi yo pusa beto na kusala mambu ya mbote.

⁶ Inki mambote beto ta baka kana beto ke yindula mambu yina beto ke tanga na Biblia? Ntangu beto ke tanga Biblia, beto fwete pema mpi kudiyula nde: ‘Mambu yai ke longa mono nki sambu na Yehowa? Keti mono ke sadilaka mambu yai na luzingu na mono? Inki bansoba mono fwete sala?’ Kuyindula mingi mambu ya beto ke tanga na Biblia mpi kusamba sambu na yo ta sadisa beto na kusadila mambu yango. Ebuna, Biblia ta soba luzingu na beto.—2 Bakorinto 10:4, 5.

7. Inki mutindu beto lenda sadila mbote Ndinga ya Nzambi na kisalu ya kusamuna?

⁷ Beto fwete sadila mingi Ndinga ya Nzambi ntangu beto ke samuna mpi ke longa. Mpangi mosi yulaka nde, “Kana nge ke samuna nzo na nzo ti Yehowa, keti nge mpamba ta tuba to nge ta pesa yandi mpi dibaku ya kutuba?” Kana beto ke tangila muntu verse, pana beto ke pesa Yehowa dibaku ya kusolula ti yandi. Kutangila muntu verse yina nge me pona mbote me luta mambu yonso ya nkaka yina nge lenda tuba. (1 Batesalonika 2:13) Na kisalu ya kusamuna, keti nge ke salaka bikesa ya kutanga baverse mingi?

8. Sambu na nki na kisalu ya kusamuna beto fwete suka ve kaka na kutangila bantu baverse?

⁸ Beto fwete suka ve kaka na kutangila bantu baverse. Bantu mingi bubu yai ke bakisaka ve malongi ya Biblia. Bantu mingi mpi na mvu-nkama ya ntete vandaka ve kubakisa masonuku. (Baroma 10:2) Beto fwete yindula ve nde bantu ke bakisaka mbala mosi baverse yina beto ke tangilaka bo. Sambu na  kusadisa bo, beto lenda vutukila bangogo mpi bangindu ya mfunu ya verse mpi kutendula yo. Mpidina, Ndinga ya Nzambi ta simba mabanza mpi ntima ya bantu.—Tanga Luka 24:32.

9. Inki mutindu bangogo ya beto ke tubaka na ntwala ya kutanga verse lenda sadisa bantu na kuzitisa Biblia? Pesa mbandu.

⁹ Mambu yina beto ke tubaka na ntwala ya kutanga verse lenda sadisa mpi muntu na kuzitisa Biblia. Mu mbandu, beto lenda tuba nde, “Tala mambu yina Ngangi ke tuba na diambu yai.” Kana beto ke solula ti muntu yina kele ve Mukristu, beto lenda tuba nde, “Tala mambu yina Masonuku ya Santu ke tuba.” Kana beto ke solula ti muntu yina ke zolaka ve mambu ya mabundu, beto lenda yula yandi nde, “Keti nge me waka dezia mambu yai?” Kana beto ke yibuka nde bantu yonso kele ve kiteso mosi mpi ke kwikilaka ve na malongi ya mutindu mosi, beto ta sala bikesa sambu bangogo na beto ya luyantiku kubenda dikebi ya bantu.—1 Bakorinto 9:22, 23.

10. (a) Inki mpangi mosi salaka? (b) Na kisalu ya kusamuna, keti nge me monaka mutindu verse ya Biblia me sadisa muntu?

¹⁰ Bampangi mingi me bakisaka nde baverse yina beto ke tangilaka bantu me sadisaka bo. Mu mbandu, mpangi mosi vandaka kusolula ti bakala mosi ya mununu yina ke tangaka bazulunalu na beto banda ntama. Kilumbu mosi, na kisika ya kupesa yandi Nzozulu ya Nkengi ya mpa, yandi tangilaka yandi 2 Bakorinto 1: 3, 4. Yo ke tuba nde: “Tata ya mawa mingi mpi Nzambi yina ke lembikaka bantu yonso; yandi ke lembikaka beto na bampasi na beto yonso.” Baverse yai simbaka ntima ya muntu yina, yandi lombaka mpangi na kutanga yo diaka. Na nima, yandi songaka mpangi nde yandi ti nkento na yandi ke zola nde Nzambi kulembika bo. Baverse yai pusaka yandi na kulonguka Biblia. Ya kieleka, kutangila bantu baverse na kisalu ya kusamuna kele mfunu mingi!—Bisalu 19:20.

11. Inki mukumba bampangi yina ke longaka na dibundu kele ti yo?

¹¹ Beto ke zolaka kukwenda na balukutakanu ya dibundu to ya nene sambu na kusambila Yehowa. Malongi ya beto ke waka na balukutakanu ke sadisaka beto mingi. Yo yina, kulonga na dibundu kele dibaku ya nene mpi mukumba ya ngolo. (Yakobo 3:1) Bampangi ya ke longaka na dibundu fwete longa malongi ya ke katuka na Biblia. Kana nge kele ti dibaku yai, nki mutindu nge lenda sadila Biblia sambu na kusimba ntima ya bantu?

12. Inki bikesa mutubi fwete sala sambu na kulonga malongi ya Biblia?

¹² Diambu ya kuluta mfunu na diskure kele baverse ya Biblia. (Yoane 7:16) Yo yina mitubi fwete keba nde bambandu ya bo ke pesa kubenda ve dikebi ya bantu kuluta baverse ya Biblia. Diaka, beto fwete yibuka nde kutanga baverse ya Biblia me swaswana ti kulonga malongi ya Biblia. Ya kieleka, kana beto ke tanga baverse mingi, bantu ta simba ve malongi. Yo yina beto fwete pona baverse mbote. Na nima ya kutanga yo, beto fwete tendula, kupesa mbandu mpi kumonisa mutindu bantu lenda sadila yo na luzingu na bo. (Nehemia 8:8) Kana diskure yina kele ti pula, tanga pula mpi baverse yina kele na kati. Sosa kubakisa kuwakana yina kele na kati ya ntu-diambu ti baverse yina. Pona baverse  yina nge ta sadila sambu na kutendula mbote disolo. (Dilongi 21, 22, mpi 23 ya mukanda Baka Mambote na Malongi ya Nzo-Nkanda ya Kisalu ya Teokrasi ke tendula mbote mutindu ya kusala yo.) Kima ya kuluta mfunu kele kusamba Yehowa sambu yandi sadisa nge na kulonga mbote malongi ya Biblia.—Tanga Esdrasi 7:10; Bingana 3:13, 14.

13. (a) Inki mutindu verse mosi ya bo tangaka na lukutakanu simbaka ntima ya mpangi-nkento mosi? (b) Inki mutindu baverse ya beto ke tangaka na balukutakanu me sadisaka nge?

¹³ Mpangi-Nkento mosi na Australie kutanaka ti mambu mingi ya mpasi na kileke. Na nima yandi kumaka Mbangi ya Yehowa, ata mpidina yandi vandaka kundima ve nde Yehowa ke zolaka yandi. Verse mosi ya bo tangaka na lukutakanu simbaka ntima na yandi. Yandi yindulaka verse yina mingi, salaka bansosa mpi yo pusaka yandi na kutanga baverse ya nkaka. Yandi kumaka kundima nde Yehowa ke zolaka yandi. * Keti na lukutakanu ya dibundu to ya nene nge me waka mpi verse mosi yina simbaka kibeni ntima na nge?—Nehemia 8:12.

14. Inki mutindu beto lenda monisa nde beto ke zolaka Biblia mpi ke bakaka yo na valere?

¹⁴ Keti beto fwete tonda ve Yehowa mutindu yandi me pesaka beto Biblia? Yandi me lungisaka lusilu na yandi ya kutanina Biblia. (1 Piere 1:24, 25) Yo yina beto fwete tanga Biblia konso kilumbu, kusadila malongi na yo mpi kusadisa bantu ya nkaka. Kusala mpidina ta monisa nde beto ke vandaka na ntonda mpi ke zolaka Biblia, mpi Yehowa Nzambi, yina pesaka beto yo.