Kulonguka na Nge ya Biblia Lenda Vanda Mbote mpi Kupesa Nge Kiese

TALA NA

YOZUE vandaka ti mukumba ya kutwadisa dikanda ya Izraele na Ntoto ya Lusilu. Yo vandaka mukumba mosi ya mpasi kibeni. Kansi, Yehowa pesaka Yozue ngolo mpi kikesa ntangu yandi tubaka nde: ‘Vanda kikesa mpi ngolo mingi.’ Yehowa tubaka nde kana Yozue kutanga mpi kuzitisa Nsiku na yandi, Yozue ta baka balukanu ya mbote mpi ta nunga.—Yozue 1:7, 8.

Beto ke zinga na “bantangu ya mpasi mpi ya nku” mpi luzingu lenda vanda mpasi. (2 Timoteo 3:1) Kana beto ke zola kununga bonso Yozue, beto fwete landa bandongisila yina Yehowa pesaka yandi. Beto fwete tanga Biblia mbala na mbala mpi kusadila mambu yina beto ke longuka sambu na kubaka balukanu ya mbote.

Kansi bampangi ya nkaka lenda zaba ve mutindu ya kulonguka to kulonguka lenda pesa bo ve kiese. Beto fwete zaba nde kulonguka Biblia kele mfunu mingi. Lupangu “ Meka Bangindu Yai,” kele ti bandongisila yina ta sadisa nge na kulonguka mbote mpi kuzola yo mingi.

Muyimbi-bankunga tubaka nde: “Twadisa mono na kati ya nzila ya bantuma na nge, sambu mono ke waka kiese na kati na yo.” (Nkunga 119:35) Nge mpi lenda wa kiese na kulonguka Ndinga ya Nzambi. Nge ta zwa mambu mingi ya mbote kana nge ke landa kulonguka Biblia.

Ata nge ta twadisa ve dikanda ya Izraele bonso Yozue, nge mpi ke kutana ti bampasi. Yo yina, bonso Yozue, longuka mpi zitisa Ndinga ya Nzambi. Kana nge sala mpidina, nge ta baka balukanu ya mbote mpi nge ta nunga.

MEKA BANGINDU YAI

Samba na ntwala ya kulonguka. Biblia kele ti mabanza ya Yehowa mpi bo me sonikaka yo sambu na mambote na nge. Yo yina ntangu nge ke tanga Biblia, lomba Yehowa na kusadisa nge na kubakisa mambu ya nge ke tanga, nge yibuka yo mpi nge sadila yo sambu na kubaka balukanu ya mbote na luzingu.—Esdrasi 7:10.
Kudiyula bangiufula ntangu nge ke tanga Biblia mpi mikanda na beto. Kudiyula bangiufula bonso, ‘Kitini yai ke longa mono nki sambu na Yehowa? Inki mutindu yo ke wakana ti ntu-diambu ya Biblia? Inki mutindu mono lenda sadila malongi yai sambu na kusadisa bantu ya nkaka?’
Yindula mingi mambu yina nge ke tanga. Pema mwa fioti mpi yindula mambu yina nge ke tanga. Kudiyula nde: ‘Mono ke kudiwa nki mutindu? Sambu na nki mono ke kudiwa mutindu yina? Keti yo ke wakana ti mambu yina kuminaka mono, yina ke kumina mono mpi yina lenda kumina mono na bilumbu ke kwisa? Inki mutindu mono lenda sadila minsiku to bandongisila yai ya Biblia.’ (Yobi 23:5; Nkunga 49:3) Ntangu nge ke yindula mingi, tala kana nge lenda tendula kikuma yina Yehowa buyisaka bansadi na yandi mambu ya nkaka. To yindula bampasi yina zolaka kukumina muntu yina bo me tubila kana yandi salaka ve mambu yina Yehowa ke zolaka.—Kulonga 32:28, 29.
Mona mambu na mabanza ntangu nge ke tanga. Mu mbandu, keti nge lenda mona na mabanza mambu yina salamaka ntangu bampangi ya Yozefi tekaka yandi na bantu ya Ismaele? (Kuyantika 37:18-28) Inki nge ke mona, nki mambu nge ke wa mpi nsudi ya nki nge ke wa? Kuditula na kisika ya bantu yina bo ke tubila. Inki mambu bo vandaka kuyindula mpi nki mutindu bo kudiwaka? Ntangu nge ke mona mambu na mabanza, kulonguka na nge ta kuma mbote kibeni.
Sadila bisadilu ya kulongukila yina dibundu ya Yehowa me basisaka. Yo ta sadisa nge na kusala bansosa ya mbote. Longuka mutindu ya kusadila bisadilu yina kele na ndinga na beno, yo vanda na Internet to na mukanda. Kuwa ve nsoni na kulomba bampangi ya nkaka na kusadisa nge na kusadila bisadilu yango mbote-mbote. Mu mbandu, Index ya mikanda na beto to Mukanda ya Bansosa Sambu na Bambangi ya Yehowa ta sadisa nge na kuzwa bangindu ya nkaka ya bantu-diambu mpi baverse mingi ya Biblia. Sadila Bangindu ya Ngika yina kele na Biblia—Mbalula ya Nsi-Ntoto ya Mpa kana yo kele na ndinga yina nge me zaba. Yo kele ti bansangu ya mfunu ya me tala bansi, ndonga yina mambu salamaka, bakilo, bitesilu mpi bansangu ya nkaka.
Simba mambu ya mfunu. Yo ta sadisa nge na kuyibuka mambu yina nge me katuka kulonguka. Kima ya kuluta mfunu kele kuzabisa bantu ya nkaka mambu yina nge longukaka. Keti kele ti diambu yina nge lenda sadila na kisalu ya kusamuna? Kana nge ke sala mambu yai, nge ta yibuka mambu ya mfunu mpi bantu ya nkaka ta baka mambote na kulonguka na nge.

NZOZULU YA NKENGI—NIMERO YA KULONGUKA