Delphine yina beto tubilaka na disolo yina me luta, ke tuba nde basusi vandaka kupusa yandi na kunwa malafu mingi. Biblia ke buyisaka ve kunwa malafu, kansi yo ke tuba nde: “Kuvanda ve na kati ya bantu yina ke nwaka vinu mingi kibeni.” (Bingana 23:20) Kusadila malafu na mutindu ya mbi ke vandaka kigonsa ya nene sambu na mavimpi, yo ke bebisaka mpi ke fwaka kinduku mpi konso mvula yo ke fwisaka bamilio ya bantu na kintulumukina. Kana bantu ke sadila bandongisila ya Biblia, bo lenda tina bampasi yai.

Delphine salaka mutindu yai. Ntangu yai yandi ke tuba nde: “Mono bakisaka nde malafu vandaka ve kumanisa basusi na mono. Mono sadilaka ndongisila yina kele na Bafilipi 4:6, 7, yina ke tuba nde: ‘Beno kudiyangisa ve sambu na konso kima yina, kansi . . . beno zabisa Nzambi mambu ya beno ke lomba.’ Konso mpimpa ntangu bangindu ya mbi mpi basusi vandaka kukwisila mono, mono vandaka kusamba Yehowa. Mono vandaka kusonga yandi mutindu mono vandaka kudiwa, mu mbandu makasi, mpasi mpi kukonda kivuvu mpi mono vandaka kubondila yandi sambu yandi sadisa mono na kudiwa mbote. Na suka, mono vandaka kusala yonso sambu na kulosa kibeni bangindu yina ya mbi. Kikalulu ya kusamba sadisaka mono na kutula dikebi na mambu yina mono vandaka na yo, kansi ve na mambu yina mono vandaka na yo ve. Mono bakaka lukanu ya kunwa diaka ve malafu. Sambu ngemba yina mono zwaka vandaka mfunu mingi, mono lenda vidisa yo ve.”

Mansoni kele na kati ya mambu yina ke nataka bampasi mingi. Kansi minsiku ya Biblia lenda sadisa beto na kutina bampasi yango sambu yo ke songaka beto mambu yina ke nataka na kusala mansoni, mu mbandu kuvanda ti bangwisana ya zola ti muntu yina kele ve nkwelani na nge mpi pornografi. Samuel leke mosi ya bakala ke tuba nde: “Yo vandaka mpasi ve na kuvanda ti bangwisana ya zola ti muntu yina kele ve nkwelani na nge. Bantangu ya nkaka mono vandaka kusepela ve ti mwana-nkento mosi, ata mpidina mono lendaka kubakisa nde yandi vandaka kuzola mono, ebuna yo vandaka kusala nde mono kuma ti bangwisana ya zola ti yandi.” Samuel bakisaka nde bo vandaka kufunda yandi mbala mingi nde yandi vandaka ti bangwisana ya zola ti muntu yina vandaka ve nkwelani na yandi ata ntangu yandi vandaka ve kusala yo, nsuka-nsuka yandi bakaka lukanu ya kukwenda na ntwala mpi ya kuvanda ti bangwisana ya zola na luzolo. Kansi kikalulu yina vandaka kuyangisa yandi. Ntangu yai yandi ke tuba nde: “Yo vandaka kikalulu mosi ya mbi sambu yo ke yedisaka bikalulu ya kusosa kaka mambote na nge mosi.”

Samuel tangaka disolo yina bo basisaka sambu na baleke na site internet jw.org. Diaka, yandi yindulaka mambu yina kele na Bingana 20:11: “Ata mwana [to, “mwana-bakala,” noti na nsi ya lutiti] ke zabanaka na mambu ya yandi ke salaka, kana bikalulu na yandi kele ya bunkete mpi ya mbote.” Inki mutindu yo sadisaka yandi? Samuel bakisaka nde kuvanda ti bangwisana ya zola ti muntu yina kele ve nkwelani na yandi vandaka ve diambu ya bunkete mpi yo vandaka mbote ve. Ntangu yai yandi ke tuba nde: “Mono me zabaka mpi nde leke yina ke vandaka ti bangwisana ya zola ti muntu yina kele ve nkwelani na yandi ke yedisaka bikalulu yina ke salaka nde muntu kuvanda nkwelani ya mbote ve. Mono yantikaka kuyindula mutindu nkento yina mono ta kwela ta kudiwa kana yandi mona nde mono kele ti bangwisana ya zola ti nkento ya nkaka. Yo pusaka mono na kubakisa nde kikalulu yina vandaka kigonsa. Ata yo ke vandaka mpasi ve na kuvanda ti bangwisana ya zola ti muntu yina kele ve nkwelani na nge, yo ke tendula ve nde yo kele mbote.” Samuel sobaka. Kubuya kuvanda ti bangwisana ya zola ti muntu yina kele ve nkwelani na yandi me sadisaka yandi mpi na kutina mansoni.

Antonio vandaka nkutu na kigonsa ya nene ya kusala mansoni: Yandi vandaka mpika ya pornografi. Ata yandi kwelaka nkento yina yandi vandaka kuzola mingi, yandi vandaka kutala pornografi mbala na mbala. Yandi ke tuba nde kuyindulula mambu yina kele na 1 Piere 5:8 sadisaka yandi kibeni. Yo ke tuba nde: “Beno tanina mabanza na beno, beno keba! Mbeni na beno, Diabulu, ke kwendaka kuzieta bonso ntambu ya ke ngana, yandi ke sosa kudia muntu.” Antonio ke tuba nde: “Bifwanisu yina ke monisaka bantu kinkonga kele bisika yonso na nsi-ntoto, mpi bifwanisu yango lenda bikala na mabanza. Verse yai sadisaka mono kibeni na kuyindula kisika bampukumuna yina ke katukaka. Yo lombaka nde mono yibuka na nswalu yonso nde bifwanisu yina ke monisaka bantu kinkonga ke katukaka na Diabulu. Bubu yai, mono ke zaba nde Yehowa mpamba muntu lenda sadisa mono na ‘kutanina mabanza na mono mpi na kukeba’ sambu mono nunga bima yina ke nwanisaka mabanza, ntima, mpi makwela na mono.” Antonio bakaka lusadisu yina yandi vandaka na yo mfunu, mpi nsuka-nsuka yandi me yambulaka kikalulu yina ya mbi. Yo me sadisaka yandi na kutina nkutu bampasi ya nene.

Ya kieleka, Biblia ke pesaka bandongisila ya mbote yina lenda sadisa beto na kutina bampasi ya nene. Ebuna sambu na bampasi yina me kumaka dezia ngolo mpi yina ke bakaka ntangu mingi? Beto tala mutindu Ndinga ya Nzambi lenda sadisa beto na kuyidika bampasi yai.