Masolo yai ya kulandana me sadisa beto na kupesa mvutu na ngiufula yai, Nzambi kele nani? Beto me mona na Biblia nde Yehowa kele zina ya Nzambi mpi nde zola kele kikalulu na yandi ya kuluta mfunu. Beto me longuka mpi mambu yina yandi me salaka mpi yina yandi ta sala diaka sambu na bantu. Kele ti mambu mingi ya me tala Nzambi yina nge lenda longuka, kansi nge lenda sosa kuzaba mambote yina nge ta baka kana nge longuka mambu yango.

Yehowa ke sila nde “kana nge sosa yandi, yandi ta bika nde nge mona yandi.” (1 Bansangu 28:9) Nge ta baka dikabu ya kitoko kibeni kana nge sosa mpi nge zaba Nzambi, disongidila nge ta vanda ti “kinduku ya ngolo ti Yehowa”! (Nkunga 25:14) Inki mambote kinduku yai lenda natila nge?

Kiese ya kieleka. Biblia ke bingaka Yehowa “Nzambi ya kiese.” (1 Timoteo 1:11) Kuvanda nduku na yandi mpi kulanda banzila na yandi ta natila nge kiese ya kieleka, yina lenda vanda mbote sambu na mawi, mabanza, mpi nitu na nge. (Nkunga 33:12) Nge ta vanda mpi ti luzingu ya kiese kana nge ke buya bikalulu ya mbi, ke yedisa bikalulu ya mbote, mpi ke landa kuzinga mbote ti bantu ya nkaka. Nge ta bakisa nde mambu yai ya muyimbi-bankunga tubaka kele ya kieleka: “Sambu na mono, kupusana pene-pene ya Nzambi kele mbote.”​—Nkunga 73:28.

Yandi ta lungisa bampusa na nge mpi ta tudila nge dikebi. Yehowa silaka bansadi na yandi nde: “Mono ta pesa nge ndongisila ntangu disu na mono ke tala nge.” (Nkunga 32:8) Yo ke tendula nde Yehowa ke tudilaka bansadi na yandi yonso dikebi mpi ke lungisaka bampusa na bo. (Nkunga 139:1, 2) Kana nge yedisa kinduku ya mbote ti Yehowa, nge ta mona nde yandi ta sadisaka nge ntangu yonso.

Luzingu ya mbote na bilumbu ke kwisa. Yehowa Nzambi ke sadisa nge na kuvanda ti luzingu ya mbote mpi ya kiese bubu yai, mpi yandi me sala na mpila nde nge vanda ti luzingu ya mbote na bilumbu ke kwisa. (Yezaya 48:17, 18) Biblia ke tuba nde: “Luzingu ya mvula na mvula ke tendula nde, bo zaba nge, Nzambi mosi kaka ya kieleka, mpi muntu yina nge tindaka, Yezu Kristu.” (Yoane 17:3) Na ntangu yai ya mpasi, kivuvu yina Nzambi ke pesa kele bonso longo (ancre) yina ke salaka nde beto landa kuvanda “ngolo.”—Baebreo 6:19.

Yai kele mwa mambu ya mfunu ya ke sadisa beto na kuzaba mbote Nzambi mpi na kukumisa ngolo kinduku na beto ti yandi. Beto ke lomba nge na kusolula ti Mbangi mosi ya Yehowa to kukota na site Internet jw.org sambu na kuzaba mambu mingi ya mfunu.