Makabu ya nkaka ke vandaka mfunu sambu yo ke katukaka na muntu mosi ya kele ti kiyeka to na muntu yina beto ke zitisaka mingi. Kansi, ata yo kele ya ntalu mingi ve, beto ke zolaka yo sambu yo me katuka na muntu ya dibuta na beto yina beto ke zolaka mingi to na nduku mosi ya beto ke tudilaka ntima. Yai mutindu Jordan yina beto me tubila na disolo ya me luta tadilaka dikabu yina Russell pesaka yandi. Inki mutindu diambu yai ke tadila nkudulu?

Ya ntete, Biblia ke tuba nde, “Nzambi tindaka Mwana na yandi mosi kaka ya kubutuka na nsi-ntoto sambu beto baka luzingu na nzila na yandi.” (1 Yoane 4:9) Diambu yai ke sala nde dikabu yai kuvanda mfunu mingi. Muntu mosi ve kele ti kiyeka kuluta Nzambi. Muyimbi bankunga mosi ya Mu-Ebreo sonikaka mutindu yai sambu na yandi: “Nge, yina zina na nge kele Yehowa, nge mpamba kele Muntu ya Kuluta Zulu na ntoto ya mvimba.” (Nkunga 83:18) Kele ve ti muntu ya me luta yina lenda pesa beto dibaku.

Ya zole, Nzambi kele “Tata na beto.” (Yezaya 63:16) Inki mutindu? Yandi me pesaka beto luzingu. Diaka, yandi ke lungisaka bampusa na beto na kwikama yonso mutindu tata ya zola ke salaka sambu na bana na yandi. Ntangu Nzambi tubilaka bantu na yandi ya nkaka ya ntama yina yandi bingaka Efrayimi, yandi yulaka nde: “Keti Efrayimi kele ve mwana ya mfunu sambu na mono, mwana ya mono ke zolaka mingi? . . . Mawi na mono me telama sambu na yandi. Mpi mono ta wila yandi kibeni mawa.” (Yeremia 31:20) Nzambi ke waka mutindu mosi sambu na bansadi na yandi bubu. Yandi kele ve kaka Ngangi na beto nkwa-ngolo yonso kansi yandi kele mpi Tata mpi Nduku na beto ya kwikama. Keti mambu yai ke kumisa ve dikabu yonso yina ke katuka na yandi mfunu mingi?

Makabu ya nkaka ke vandaka mfunu sambu bo pesaka yo na zola mpenza, kansi ve kaka sambu na kulungisa mukumba mosi. Muntu ya ke kaba na zola yonso ke vingilaka ve nde bo vutudila yandi.

Nzambi pesaka Mwana na yandi sambu na beto sambu yandi ke zolaka beto. Biblia ke tuba nde: “Yina mutindu zola ya Nzambi monanaka sambu na beto, nde Nzambi tindaka Mwana na yandi mosi kaka ya kubutuka.” Sambu na inki? “Sambu beto baka luzingu na nzila na yandi.” (1 Yoane 4:9) Keti bo pusaka Nzambi na kusala mpidina? Ata fioti ve! “Nkudulu yina Kristu Yezu futaka” ke monisaka “ntima ya mbote ya nene” ya Nzambi.—Baroma 3:24.

Sambu na nki nkudulu ke monisaka “ntima ya mbote ya nene” ya Nzambi? Biblia ke tendula nde: “Nzambi ke monisa zola na yandi sambu na beto na mutindu yai: Ntangu beto vandaka ntete bansumuki, Kristu fwaka sambu na beto.” (Baroma 5:8) Zola ya Nzambi ya kukonda bwimi pusaka yandi na kusadisa beto bantu ya kulemba, ya kukonda lusadisu mpi ya masumu. Beto me fwana ve na kubaka dikabu yina, mpi beto ta kuka ve ata fioti kufuta yandi. Dikabu yina ke monisa zola na yandi ya kuluta nene.

Makabu ya nkaka ke vandaka mfunu sambu muntu yina pesaka yo salaka kibansa ya nene. Ntangu muntu me ndima kukaba na luzolo yonso kima yina kele mfunu mingi sambu na yandi mpi me pesa beto yo, beto ke zolaka dikabu yina mingi kibeni sambu na bibansa yina yandi salaka.

Nzambi “pesaka Mwana na yandi mosi kaka ya kubutuka.” (Yoane 3:16) Yandi lendaka kupesa beto konso muntu yina yandi ke zolaka mingi. Na nsungi ya bamvula mingi ntangu Nzambi vandaka kusala luyalanganu, Yezu salaka ti yandi mpi kumaka “muntu yina yandi vandaka kuzola mingi.” (Bingana 8:30) Yezu kele ‘Mwana yina Nzambi ke zolaka’ mpi “kifwani ya Nzambi yina ke monanaka ve.” (Bakolosai 1:13-15) Bangwisana na bo ya ngolo me luta bangwisana yonso yina bantu me salaka.

Kansi, Nzambi “kangaka ve nzila nde Mwana na yandi kumona mpasi.” (Baroma 8:32) Yehowa pesaka beto kima na yandi ya kuluta mbote. Yandi futaka ntalu mingi kibeni.

Makabu ya nkaka ke vandaka mfunu sambu yo ke lungisa mpenza mpusa ya muntu, ata mpusa ya mfunu kibeni. Mu mbandu, kana nge vandaka kubela ngolo mpi muntu mosi me futa mbongo sambu bo sansa nge, nge ta monisa ntonda mpenza! Dikabu yina ta vanda mfunu mingi kibeni, mpidina ve?

“Kaka mutindu na Adami bantu yonso ke fwaka, mutindu mosi mpi na Kristu bantu yonso ta baka luzingu.” (1 Bakorinto 15:22) Sambu beto kele bana ya Adami, beto yonso ke “fwaka;” beto lenda tina ve bampasi ya maladi mpi ya lufwa to kuwakana diaka ti Nzambi mpi kuvanda diaka ve ti makambu na ntwala na yandi. Muntu ya masumu lenda kuka ve kudigulusa to kugulusa bantu ya nkaka. Biblia ke tuba nde: “Muntu mosi ve na kati na bo lenda sumba diaka mpangi na yandi ata fioti to kupesa Nzambi nkudulu sambu na yandi . . . Bo ke kukaka ve ntangu yonso kufuta yo.” (Nkunga 49:7, 8) Nkudulu kele ntalu mingi kibeni mpi yo lombaka nde Nzambi kusadisa beto na kupesa yo. Kana Nzambi ve beto zolaka kukuka ve.

Na zola na yandi ya nene, Yehowa futaka na luzolo yonso mbongo sambu beto baka “lusansu” ya ke gulusa luzingu yina beto vandaka na yo mfunu, sambu na nzila ya Yezu, “bantu yonso ta baka luzingu.” Inki mutindu nkudulu ke lungisa yo? “Menga ya Mwana na yandi Yezu ke katula masumu na beto yonso.” Ya kieleka, kutula lukwikilu na menga ya Yezu yina tiamukaka  ke kangudila beto nzila ya kubaka ndolula ya masumu na beto mpi luzingu ya mvula na mvula. (1 Yoane 1:7; 5:13) Ebuna nkudulu ta sala nki sambu na bantu ya beto vandaka kuzola mingi yina me fwaka? “Sambu lufwa kwisaka na nzila ya muntu mosi, lufutumuku ya bafwa mpi ke kwisa na nzila ya muntu mosi [Yezu].”—1 Bakorinto 15:21. *

Kele ve ti dikabu yina me pesamaka na muntu yina kele ti kiyeka mingi kuluta to na zola ya mingi kuluta kimenga ya Yezu. Muntu mosi ve me pesaka beto bima mingi mutindu Yehowa Nzambi me pesaka beto. Mpi ata dikabu mosi ve yina ke lungisa mpusa ya ngolo kuluta kimenga yina ke katula beto na kimpika ya disumu mpi ya lufwa. Ya kieleka, beto lenda fwanisa ve ata fioti nkudulu ti konso dikabu yina.