DIKABU ya mfunu mingi fwete pusa beto na kumonisa ntonda. Yezu bulaka munsonso na dilongi yai ntangu yandi belulaka bantu kumi na maladi mosi ya mbi yina vandaka ve ti nkisi na ntangu yina. Muntu mosi na kati na bo, “vutukaka, mpi vandaka kupesa Nzambi nkembo na ndinga ya ngolo.” Yezu tubaka nde: “Keti bo yonso kumi kumaka ve bunkete? Ebuna, bantu yina ya nkaka uvwa kele na wapi?” (Luka 17:12-17) Inki dilongi beto ke baka? Beto lenda vila nswalu kibeni mambu ya mbote yina bantu ya nkaka me sadila beto!

Nkudulu me swaswana ti makabu yonso ya nkaka. Yo kele dikabu ya kuluta nene yina bo me pesaka. Ebuna, nki nge ta sala sambu na mambu yina Nzambi me salaka sambu na nge?

• Zaba muntu yina pesaka yo. Nkudulu ke natilaka ve bantu yonso luzingu ya mvula na mvula kaka mpidina. Kansi, Yezu tubaka mutindu yai na kisambu: “Luzingu ya mvula na mvula ke tendula nde, bo zaba nge, Nzambi mosi kaka ya kieleka, mpi muntu yina nge tindaka, Yezu Kristu.” (Yoane 17:3) Kana bo songa nge nde, muntu mosi gulusaka  nge ntangu nge vandaka mwana-fioti, keti nge ta zola ve kulonguka mambu mingi ya me tala muntu yango mpi kuzaba sambu na nki yandi gulusaka nge? Yehowa Nzambi, yina pesaka nkudulu, dikabu yina ke gulusaka, ke zola nde nge zaba kaka ve kana yandi kele nani, kansi yandi ke zola mpi nde nge vanda ti bangwisana ya ngolo ti yandi. Biblia ke longisila beto nde: “Beno kwenda pene-pene na Nzambi, ebuna yandi ta kwisa pene-pene na beno.”—Yakobo 4:8.

• Monisa lukwikilu na nkudulu. “Muntu yina ke monisa lukwikilu na Mwana kele na luzingu ya mvula na mvula.” (Yoane 3:36) Kumonisa lukwikilu ke tendula nki? Yo ke tendula kusala mambu; kumonisa lukwikilu na nkudulu ke lombaka kusala mambu. (Yakobo 2:17) Mambu ya nki mutindu? Dikabu lenda kuma ya nge kaka kana nge baka yo. Yo yina, nge fwete ndima nkudulu. Inki mutindu? Longuka na kuzaba mutindu Nzambi ke zola nde nge zinga, mpi sala mambu na kuwakana ti yo. * Samba Nzambi sambu na kulomba ndolula mpi kansansa ya mbote. Kwenda pene-pene na Nzambi mpi tula ntima ya mvimba nde na nzila ya nkudulu bantu yonso yina ke kwikilaka na yo ta baka kibeni luzingu ya mvula na mvula mpi ta vanda na ngemba, na lutaninu, mpi na kimvwama!—Baebreo 11:1.

• Kwenda na Lusungiminu ya lufwa ya Yezu. Yezu yantikisaka nkinsi mosi ya ke salamaka konso mvula sambu yo yibusa beto nkudulu. Yandi tubaka mutindu yai na yina me tala kusala nkinsi yina: “Beno landa kusala yo sambu na kuyibuka mono.” (Luka 22:19) Bambangi ya Yehowa ta sungimina lufwa ya Yezu na Kizole, Aprili 11, 2017, na nima ya kudinda ya ntangu. Manaka na yo, yina ta sala kiteso ya ngunga mosi, ta vanda ti diskure mosi yina ta pesa ntendula ya lufwa ya Yezu mpi mambote yina yo ta natila beto bubu yai tii na bilumbu ke kwisa. Na mvula me luta, bantu kuluta bamilio 20 na ntoto ya mvimba vukanaka na Lusungiminu. Beto ke binga nge na kiese yonso na kukwisa kuvukana ti beto sambu na kumonisa ntonda na dikabu ya kuluta nene ya Nzambi me pesaka.