Keti nge ke yibuka mutindu nge bwaka ntangu nge vandaka mwana-fioti? Mbala ya nkaka nge lwalaka na diboko to nge kulukaka na dibolongo. Keti nge ke yibuka mutindu mama na nge sadisaka nge? Ziku yandi yobisaka mputa mpi kangisaka nge kitenda ya lele. Nge vandaka kudila kansi bangogo na yandi ya mawete mpi ya ke pesa kikesa lembikaka nge. Ntangu nge vandaka mwana-fioti, bo vandaka kusadisa nge ntangu yonso.

Kansi luzingu ke kumaka mpasi mingi ntangu beto ke kumaka bambuta. Bampasi ke kumaka ngolo, mpi yo ke vandaka mpasi na kuzwa lusadisu. Yo kele mawa na kumona nde bo lenda manisa ve bampasi yina bambuta ke kutanaka ti yo ti kitenda ya lele mpi mutindu mama ke bakaka mwana na yandi sambu na kulembika yandi. Beto tadila mwa bambandu.

• Keti bo me katulaka nge dezia na kisalu? Julian ke tuba nde ntangu bo katulaka yandi na kisalu, yandi kumaka kudiyangisa mingi. Yandi kudiyulaka nde, ‘Inki mutindu mono ta lungisa bampusa ya dibuta na mono? Mono me sala bamvula mingi na kompani yai, kansi sambu na nki bo me mona nde mono kele diaka ve mfunu?’

• Ziku nge ke kudiyangisa sambu makwela na nge me katuka kufwa. Raquel ke tuba nde: “Bangonda 18 me luta, bakala na mono yambulaka mono na kintulumukina mpi mawa ya ngolo simbaka mono. Mono waka bonso nde ntima na mono me zengana bitini zole. Mono waka mpasi na nitu mpi na mabanza. Yo pesaka mono boma.”

• Ziku nge ke belaka maladi mosi ya ngolo mpi kivuvu ya kubeluka kele ve. Ziku bantangu ya nkaka nge ke kudiwaka bonso Yobi yina tubaka nde: “Mono ke menga luzingu na mono; mono ke zola ve kulanda kuzinga.” (Yobi 7:16) Mbala ya nkaka nge ke kudiwaka bonso Luis, bakala mosi ya bamvula 80 ti ndambu, yina tubaka nde: “Bantangu ya nkaka mono ke monaka bonso nde mono ke vingila kaka lufwa.”

• Mbala ya nkaka muntu mosi ya nge vandaka kuzola mingi me fwa mpi nge kele kibeni ti mfunu ya lusadisu. Robert ke tuba nde: “Ntangu mwana na mono fwaka na kisumbula mosi ya avio, mono ndimaka ve mbala mosi. Na nima mono kumaka kuwa mpasi mpi Biblia ke fwanisa mpasi yina ti mpasi ya mbele ya nda ya bitumba yina me tobula [muntu].”—Luka 2:35.

Robert, Luis, Raquel, mpi Julian bakaka lusadisu ata na bantangu yina ya mpasi. Nzambi Nkwa-Ngolo Yonso Muntu pesaka bo lusadisu yina, kansi muntu ya nkaka ve. Inki mutindu yandi ke pesaka bantu lusadisu? Keti yandi ta pesa nge mpi lusadisu yina nge kele na yo mfunu?