1, 2. Sambu na nki Bambangi ya Yehowa ke lwataka na mutindu ya mbote? (Tala kifwanisu ya luyantiku ya disolo.)

ZULUNALU mosi ya Pays-bas, tubilaka mutindu bamfumu ya mabundu ke lwataka na balukutakanu na bo. Yo tubaka nde: “Bo ke lwataka bilele ya kubakila mupepe, mingi-mingi kana ntangu kele ngolo.” Kansi zulunalu yango tubaka nde, Bambangi ya Yehowa ke lwataka ve mutindu yina na balukutakanu na bo ya nene. Yo tubaka diaka nde, babakala ke lwataka baveste ti bakravate, mpi bana-bankento ti bamama ke lwataka bilele ya mbote, yina nda na yo kele ya kufwana. Mbala mingi bantu ke sikisaka Bambangi ya Yehowa sambu na kulwata na bo. Ntumwa Polo tubaka nde Bakristu fwete lwata “kukonda kulutisa ndilu” mpi kulwata na bo fwete monisa nde bo kele ti “mayele ya kutadila mambu mbote.” (1 Timoteo 2:9, 10, noti na nsi ya lutiti) Ata Polo vandaka kutubila bankento, ndongisila yai ke tadila mpi bampangi-babakala.

² Kulwata mbote kele mfunu sambu na beto mpi sambu  na Yehowa, Nzambi yina beto ke sambilaka. (Kuyantika 3:21) Biblia ke monisa pwelele nde Yehowa, mfumu ya zulu ti ntoto, me pesaka bansadi na yandi minsiku sambu bo lwata mutindu yandi ke zolaka. Yo yina bilele na beto fwete sepedisa beto mosi kaka ve, kansi yo fwete sepedisa ntete-ntete Yehowa, Mfumu ya Kuluta Nene.

3. Nsiku yina Nzambi pesaka bantu ya Izraele ke longa beto nki na yina me tala bilele?

³ Bansiku ya nkaka ya Moize vandaka kutanina bantu ya Izraele na kusala ve pite bonso makanda yina vandaka pene-pene na bo. Nsiku monisaka nde Yehowa ke mengaka bilele yina ke monisaka ve pwelele nde muntu yina me lwata yo kele bakala to nkento. Bubu yai mpi bilele ya mutindu yina kele. (Tanga Kulonga 22:5.) Nsiku ke longa beto nde Yehowa ke zolaka ve bilele yina ke kumisaka bakala bonso nkento mpi nkento bonso bakala, to bilele yina ke monisaka ve pwelele nde muntu yina me lwata yo kele bakala to nkento.

4. Inki lenda sadisa Mukristu na kulwata na mutindu ya mbote?

⁴ Minsiku ya Biblia lenda sadisa beto na kulwata na mutindu ya mbote. Minsiku yai ke tadila bantu ya bisika yonso. Yo ke lomba ve nde bo sadila beto lisiti ya bilele yina beto fwete lwata to ve. Beto fwete landa kaka minsiku ya Biblia; nkutu yo ke kangaka beto ve nzila ya kulwata bilele yina beto ke zolaka. Beto tadila minsiku ya Biblia yina lenda sadisa beto na kuzaba “luzolo ya Nzambi yina kele ya mbote, yina yandi lenda ndima,” ntangu beto ke pona bilele.—Baroma 12:1, 2.

5, 6. Bilele na beto ke monisaka nki?

⁵ Na lutwadisu ya mpeve santu, ntumwa Polo sonikaka munsiku ya mfunu yina kele na 2 Bakorinto 6:4. (Tanga.) Bilele ke monisaka kimuntu na beto, mpi mutindu na beto ya kulwata ke sadisaka bantu na kuzaba beto. (1 Samuele 16:7) Bansadi ya Nzambi ke lwataka ve bilele kaka sambu yo kele kitoko to ke sepedisa bo. Minsiku ya Biblia fwete sadisa beto na kulwata ve bilele yina ke kanga nitu, ke monisa nitu, to ke tedimisa bampusa ya nitu. Yo ke tendula nde beto fwete lwata ve bilele yina ke bika nitu na nganda to ke monisa bitini ya nitu yina fwete monana ve. Ntangu bantu ke  tala beto, bo fwete wa ve nsoni to kutala na lweka sambu beto me lwata mbi.

⁶ Kana bilele na beto kele mbote, bunkete, mpi beto me lwata yo na mutindu ya mbote, bantu ta mona nde beto kele bansadi ya Yehowa, Mfumu ya Kuluta Nene, mpi bo ta zitisa beto mingi. Yo lenda pusa bo na kusosa kuzaba Nzambi na beto, kuzitisa mpenza dibundu na beto, mpi kuwa nsangu na beto ya ke gulusaka bantu.

7, 8. Inki ntangu yo kele mfunu mingi na kulwata bilele ya me fwana?

⁷ Beto ke lwataka mbote sambu na kuzitisa Nzambi na beto ya santu, bampangi na beto mpi bamfinangani na beto. Beto ke salaka yo mpi sambu na kupesa lukumu na Yehowa mpi na nsangu yina beto ke longaka. (Baroma 13:8-10) Kulwata mbote kele mfunu mingi ntangu beto ke kwendaka na balukutakanu mpi na kisalu ya kusamuna. Beto ke lwataka mutindu bansadi ya Nzambi fwete lwata. (1 Timoteo 2:10) Mutindu ya kulwata lenda vanda mbote na kisika mosi kansi mbi na kisika ya nkaka. Yo yina Bambangi ya Yehowa ya bisika yonso ke lwataka ve bilele yina ta budisa bantu ya nkaka sakuba.

 ⁸ Tanga 1 Bakorinto 10:31. Ntangu beto ke kwenda na balukutakanu ya nene, beto fwete lwata mbote mpi na mutindu ya me fwana. Beto fwete lwata ve bonso bantu ya nsi-ntoto yina ke lutisaka ndilu. Yo vanda na ntwala to na nima ya lukutakanu ya nene, mpi na bisika yina beto ke lala, beto fwete lwata na mutindu ya me fwana mpenza. Mpidina, beto ta vanda na kiese ya kumonisa nde beto kele Bambangi ya Yehowa mpi beto lenda ta kimbangi konso ntangu.

9, 10. Inki mutindu Bafilipi 2:4 lenda sadisa beto na mutindu na beto ya kulwata?

⁹ Tanga Bafilipi 2:4. Sambu na nki beto fwete yindula na ntwala mutindu bampangi ta kudiwa ntangu bo ta mona kulwata na beto? Sambu bansadi ya Nzambi ke salaka bikesa sambu na kuzitisa ndongisila yai: “Yo yina, beno fwa bitini ya nitu na beno yina kele na ntoto sambu na pite, mambu ya mvindu, nzala ya ngolo ya kuvukisa nitu ya bo lenda yala ve.” (Bakolosai 3:2, 5) Bampangi ya nkaka me yambulaka luzingu ya mansoni, kansi mbala ya nkaka bampusa yina ya mbi ke kwisila bo kaka. Kana beto keba ve, kulwata na beto lenda kanga bo nzila ya kuzitisa ndongisila yai ya Biblia. (1 Bakorinto 6:9, 10) Beto fwete sala ve ata fioti mambu yina lenda pukumuna bo diaka.

¹⁰ Ntangu beto kele kisika mosi ti bampangi, beto ke vandaka na lutaninu sambu ata muntu mosi ve lenda pusa bankaka na kusala mansoni. Mutindu na beto ya kulwata fwete pesa ve bankaka bangindu ya mbi, yo vanda na balukutakanu to na kisika ya nkaka. Beto kele ti nswa ya kupona bilele yina beto fwete lwata. Kansi beto fwete lwata bilele yina ta sadisa bampangi ya nkaka na kutuba mambu ya mbote, kuvanda ti mabanza ya mbote, mpi bikalulu ya bunkete na ntwala ya Nzambi. (1 Piere 1:15, 16) Zola ya kieleka “ke salaka ve mambu ya nsoni, yo ke sosaka ve mambote na yo mosi.”—1 Bakorinto 13:4, 5.

11, 12. Inki mutindu Longi 3:1, 17 ke sadisa beto na kuvanda bukati-kati?

¹¹ Ntangu bansadi ya Nzambi ke ponaka bilele ya kulwata, bo ke zabaka nde “konso kisalu mpi konso diambu kele ti ntangu na yo.” (Longi 3:1, 17) Beto ke zingaka na bisika ya kuswaswana; bisika ya nkaka kele madidi ngolo mpi ya nkaka kele ntangu ngolo. Bankaka kele ti mbongo mingi mpi bankaka kele bansukami. Mambu yai lenda sala nde kulwata na beto kuvanda ve kiteso mosi. Kansi minsiku ya Yehowa kele kiteso mosi sambu na bantu yonso.—Malaki 3:6.

 ¹² Kana ntangu kele ngolo, yo ke vandaka mpasi na kulwata mbote mpi na luzitu. Bampangi ke sepelaka ntangu beto ke lwataka ve bilele yina ke kangaka nitu ngolo to ke monisaka mpenza nitu. (Yobi 31:1) Diaka, kana beto ke yobila ti bantu na dibungu to na kisika ya nkaka, bilele na beto fwete vanda ya mbote. (Bingana 11:2, 20) Ata bantu mingi na nsi-ntoto ke yobilaka ti bilele yina ke monisaka nitu, beto fwete lwata bilele yina ke pesa Yehowa, Nzambi na beto ya santu, lukumu.

13. Inki mutindu munsiku ya kele na 1 Bakorinto 10:32, 33 lenda sadisa beto na kupona bilele?

¹³ Munsiku ya nkaka mpi ke sadisaka beto na kulwata mbote. Beto fwete sosa ve kulwadisa kansansa ya bantu ya nkaka. (Tanga 1 Bakorinto 10:32, 33.) Beto fwete lwata ve bilele yina lenda budisa bampangi to bantu ya nkaka dibaku. Ntumwa Polo sonikaka nde: “Konso muntu na kati na beto kupesa mpangi na yandi kiese sambu na mambote na yandi mpi sambu na kupesa yandi kikesa.” Yandi tendulaka nde: “Sambu ata Kristu kudisepedisaka ve.” (Baroma 15:2, 3) Bonso Yezu, beto fwete bakisa nde kusala luzolo ya Nzambi mpi kusadisa bankaka kele mfunu mingi kuluta mambu yina beto mosi ke zolaka. Yo yina kana bilele yina beto ke zolaka ke kanga bantu nzila ya kuwa nsangu, beto fwete lwata yo ve.

14. Inki mutindu bibuti lenda longa bana na kulwata bilele yina ke pesa Nzambi nkembo?

¹⁴ Bibuti fwete longa bana na bo na kuzitisa minsiku ya Biblia. Bibuti fwete zikisa nde bilele na bo ti ya bana mpi mutindu na bo ya kuyidika nitu ke pesa Nzambi kiese. (Bingana 22:6; 27:11) Inki mutindu bibuti lenda longa bana na bo na kuzitisa Nzambi na beto ya santu mpi minsiku na yandi? Bibuti fwete pesa bana na bo mbandu ya mbote. Bo fwete longa mpi bana na bo na mawete yonso mutindu ya kuzaba bilele ya mbote mpi bisika yina bo lenda sumba yo. Bana fwete pona ve bilele kaka sambu bo ke zolaka yo. Kansi, bo fwete pona bilele yina ke pesa Yehowa, Nzambi yina bo ke monisaka, lukumu.

15. Inki lenda sadisa beto na kusala mambu ya mbote?

¹⁵ Biblia lenda sadisa beto na kusala mambu ya mbote yina ta pesa Nzambi lukumu. Bilele na beto ke monisaka mambu yina beto ke zolaka. Mutindu na beto ya kulwata mpi bilele na beto lenda swaswana ti ya bantu ya nkaka. Ata mpidina, yo fwete vanda bunkete, kukonda mindondo, mpi yo fwete wakana ti mambu yina beto ke sala mpi insi yina beto kele.

16. Sambu na nki beto fwete sala bikesa sambu na kulwata mbote?

¹⁶ Kuzwa bilele ya mbote mpi ya kukonda mindondo ke vandaka ve ntangu yonso pete. Bamagazini mingi ke tekaka kaka bilele ya mpa yina bantu mingi ke sepela ti yo. Yo yina yo ke lombaka  ntangu mpi bikesa mingi sambu na kuzwa bashemize, bajupe, barobe, babluze, baveste mpi bapantalo ya mbote yina ke kanga ve nitu. Bampangi na beto ta sepela ntangu bo ta mona bikesa yina beto ke sala sambu na kulwata bilele ya kitoko mpi ya me fwana. Sambu beto ke zolaka kupesa Tata na beto ya zulu nkembo, beto ke salaka yonso sambu na kulwata bilele yina ta pesa yandi lukumu.

17. Inki lenda sala nde mpangi-bakala kubika mandefo to ve?

¹⁷ Keti bampangi-babakala fwete bika mandefo? Nsiku ya Moize lombaka babakala na kubika mandefo. Kansi, Bakristu kele ve na nsi ya Nsiku ya Moize mpi Nzambi ke lombaka bo ve na kuzitisa yo. (Levi 19:27; 21:5; Bagalatia 3:24, 25) Na bisika ya nkaka, bantu ke ndimaka nde babakala kuvanda ti mandefo ya kuzenga mbote, mpi yo ke kangaka mpenza ve bantu nzila ya kuwa nsangu na beto. Na bisika ya mutindu yina, bampangi ya nkaka ya kele ti mikumba ke vandaka ti mandefo. Ata mpidina, bampangi ya nkaka ke katulaka mandefo. (1 Bakorinto 8:9, 13; 10:32) Na bisika ya nkaka, bantu ke ndimaka ve nde babakala kubika mandefo mpi bansamuni ke bikaka ve mandefo. Na bisika ya mutindu yina, kana mpangi-bakala kubika mandefo yo lenda kanga yandi nzila ya kukumisa Nzambi mpi ya kuvanda “muntu ya bo lenda funda ve ata na kima mosi.”—1 Timoteo 3:2, 7; Baroma 15:1-3.

18, 19. Inki mutindu Mika 6:8 lenda sadisa beto?

¹⁸ Beto ke tonda Yehowa sambu yandi me tubaka ve na siki-siki yonso bilele yina beto fwete lwata to ve mpi mutindu yina beto fwete yidika nitu. Kansi, yandi me pesaka beto kimpwanza ya kupona na bukati-kati bilele na beto na kuwakana ti minsiku ya Biblia. Yo yina, bilele mpi mutindu na beto ya kuyidika nitu fwete monisa nde beto kele ti bukati-kati mpi beto ke sadilaka Nzambi.—Mika 6:8.

¹⁹ Beto ke zabaka nde Yehowa kele Nzambi ya bunkete mpi ya santu; minsiku na yandi ke twadisaka beto na mutindu ya mbote kibeni. Kana beto ke monisa bukati-kati mpi ke kudikulumusa, beto ta zitisa minsiku na yandi na luzingu na beto. Bukati-kati ta sadisa beto mpi na kuzitisa mawi mpi bangindu ya bantu ya nkaka.

20. Inki mutindu kulwata na beto mpi mutindu na beto ya kuyidika nitu lenda sadisa bankaka?

²⁰ Kulwata na beto fwete monisa pwelele nde beto kele bansadi ya Yehowa. Yehowa kele ti minsiku na yandi mpi beto ke sepelaka kuzitisa yo. Beto ke sikisa bampangi yonso yina ke lwataka mbote mpi ke vandaka ti bikalulu ya mbote. Bo ke bendaka bantu ya ntima-masonga na kundima nsangu ya Biblia yina ke gulusaka bantu. Diaka, bo ke pesaka Yehowa nkembo mpi kiese. Kana beto ke lwata mbote, beto ta landa kupesa lukumu na muntu yina me lwataka “bunene ti lukumu.”—Nkunga 104:1, 2.