1-2. Mutindu Nkunga 34:8 ke monisa yo, nki beto fwete sala sambu na kumona nde Yehowa kele mbote?

YINDULA nde bo me pesa nge madia yina nge me diaka ntete ve. Nge lenda zaba mambu mingi ya me tala madia yango kana nge tala yo, nge wa nsudi na yo, nge zaba mutindu bo ke lambaka yo to nge lenda yula bantu ya nkaka kana bo ke sepelaka ti yo. Kansi nge mosi fwete meka yo sambu na kuzaba kana madia yango kele ntomo.

² Beto lenda longuka mambu ya ke monisa nde Yehowa kele mbote kana beto ke tanga Biblia, ke tanga mikanda na beto mpi kana beto ke wa bampangi ya nkaka ke tubila mambu ya mbote yina Yehowa me sadilaka bo. Kansi beto ta bakisa kibeni nde Yehowa kele mbote, kana beto mosi ke “meka” mpi ke mona nde yandi kele mbote. (Tanga Nkunga 34:8.) Beto baka mbandu yina ta sadisa beto na kuzaba mutindu beto lenda sala yo. Mu mbandu, beto ke zola kusadila Yehowa na kisalu ya ntangu yonso. Kansi sambu na kusala yo, yo ta lomba nde beto kumisa luzingu na beto pete. Mbala ya nkaka beto ke tangaka mbala na mbala lusilu ya Yezu yina ke tuba nde, kana beto tula Kimfumu na kisika ya ntete, Yehowa ta pesa beto bima yina beto kele ti yo mfunu. Kansi Yehowa me sadilaka beto yo ntete ve. (Mat. 6:33) Sambu beto ke ndima mambu yai ya Yezu tubaka, beto me sala bikesa ya kusadila ve mbongo mingi, beto me yidika manaka na beto ya kisalu sambu beto longa mingi nsangu ya mbote. Kana beto sala mutindu yai, beto ta mona nde Yehowa ta pesa beto kibeni bima yina beto kele na yo mfunu. Beto mosi ta “meka” sambu na kumona nde Yehowa kele mbote.

3. Mutindu Nkunga 16:1, 2 ke monisa yo, banani Yehowa ke sadilaka mambu ya mbote?

³ Yehowa kele ‘mbote sambu na bantu yonso,’ ata sambu na bantu yina ke zabaka yandi ve. (Nk. 145:9; Mat. 5:45) Kansi yandi ke salaka mambu ya mbote mingi-mingi na bantu yina ke zolaka yandi  mpi ke sadilaka yandi na ntima ya mvimba. (Tanga Nkunga 16:1, 2.) Beto tadila mambu ya mbote yina Yehowa me sadilaka beto.

4. Inki mutindu Yehowa ke sadilaka bantu yina ke yantikaka kukwenda pene-pene na yandi mambu ya mbote?

⁴ Ntangu yonso yina beto ke sadilaka mambu yina Yehowa ke longaka beto, beto ke monaka mutindu yo ke sadisaka beto. Mu mbandu, ntangu beto yantikaka kulonguka mambu mingi ya me tala Yehowa mpi kuzola yandi, yandi sadisaka beto na kuyambula kuyindula mpi kusala mambu yina yandi ke zolaka ve. (Bakol. 1:21) Ntangu beto kudipesaka na Yehowa mpi bakaka mbotika, yandi pesaka beto bima mingi ya mbote; mu mbandu kansansa ya mbote mpi dibaku ya kuvanda ti kinduku ya ngolo ti yandi.—1 Pie. 3:21.

5. Inki mutindu Yehowa ke sadilaka beto mambu ya mbote na kisalu ya kulonga nsangu ya mbote?

⁵ Beto ke monaka mutindu Yehowa ke sadilaka beto mambu ya mbote na kisalu ya kulonga bantu nsangu ya mbote. Keti nge ke vandaka nsoni-nsoni? Bansadi ya Yehowa mingi ke vandaka bantu ya nsoni-nsoni. Mbala ya nkaka, na ntwala nde nge kuma nsadi ya Yehowa, nge yindulaka ve ata fioti nde nge lenda kwenda na nzo ya muntu yina nge me zaba ve mpi kulonga yandi nsangu ya Biblia. Kansi bubu yai, nge ke salaka yo mbala na mbala. Kima ya kuluta mfunu kele nde, Yehowa me sadisaka nge na kusepela ti kisalu ya kulonga bantu nsangu ya mbote. Nge me monaka mutindu Yehowa me sadisaka nge na mitindu mingi. Yandi sadisaka nge na kuvanda pima ntangu muntu mosi songaka nge mambu ya mbi na kisalu ya kulonga nsangu ya mbote. Yandi sadisaka nge mpi na kuyibuka verse ya me fwana sambu na kutangila muntu yina sepelaka ti nsangu. Yandi me pesaka nge ngolo ya kulonga nsangu ya mbote ata bantu ya nkaka ke buyaka kundima nsangu yango.—Yer. 20:7-9.

6. Inki mutindu mambu yina Yehowa ke longaka beto ke monisa nde yandi ke sadilaka beto mambu ya mbote?

⁶ Yehowa ke sadilaka beto mambu ya mbote ntangu yandi ke longaka beto mutindu ya kulonga nsangu ya mbote. (Yoa. 6:45) Na balukutakanu ya kati-kati ya mposo, beto ke landaka bambandu ya masolo ti muntu mpi beto lenda sadila yo na kisalu ya kulonga bantu nsangu ya mbote. Na luyantiku, beto lenda wa mwa boma ya kusadila bambandu yina. Kansi kana beto sadila yo, beto lenda bakisa nde bantu ya teritware na beto me sepela ti yo. Na balukutakanu ya dibundu mpi na balukutakanu ya distrike, bo ke longaka beto mitindu ya nkaka ya kulonga bantu nsangu ya mbote yina beto me mekaka ntete ve. Sambu na kusala yo, yo lenda lomba nde beto katuka na kisika ya kitoko yina beto ke salaka, kansi kana beto sala yo, Yehowa ta sakumuna beto. Beto tadila ntangu yai bima ya mbote yina Yehowa ke pesaka beto kana beto ke tudila yandi ntima mpi ke sala yonso sambu na kudipesa na kisalu na yandi ata beto ke kutana ti mambu ya nki mutindu na luzingu. Na nima beto ta tubila mutindu beto lenda sala mingi kisalu ya kulonga bantu nsangu ya mbote.

7. Inki mambote beto ta baka kana beto ke sala mingi kisalu ya kulonga nsangu ya mbote?

⁷ Beto ke kumaka banduku ya ngolo ya Yehowa. Beto tadila mbandu ya mpangi Samuel * yina kele nkuluntu. Yandi ke zingaka na Colombie ti nkento na yandi. Mpangi Samuel ti nkento na yandi vandaka bapasudi-nzila na dibundu na bo. Kansi bo zolaka kusala mingi kisalu ya kulonga bantu nsangu ya mbote na dibundu mosi yina mpusa ya bansamuni vandaka mingi. Sambu na kulungisa lukanu na bo, yo lombaka nde bo yambula bima ya nkaka. Mpangi Samuel ke tuba nde: “Beto sadilaka ndongisila yina kele na Matayo 6:33 mpi beto yambulaka kusumba bima yina beto vandaka ve ti mfunu na yo. Diambu ya mpasi vandaka kuyambula nzo na beto. Bo tungaka yo kaka mutindu beto vandaka kuzola mpi beto defaka ve mbongo sambu na kutunga yo.” Ntangu bo kwendaka na dibundu ya nkaka, bo vandaka ve ti mfunu ya mbongo mingi sambu na kuzinga kuluta ntangu  bo vandaka na nzo na bo. Mpangi Samuel ke tuba diaka nde: “Beto monaka mutindu Yehowa sadisaka beto mpi mutindu yandi pesaka mvutu na bisambu na beto. Beto ke monaka nde yandi ke sepelaka ti beto mpi nde yandi ke zolaka beto diaka mingi kuluta.” Keti nge lenda sala mingi kisalu ya kulonga nsangu ya mbote? Kana nge sala mutindu yina, ndima kibeni nde nge ta kuma nduku ya ngolo ya Yehowa mpi nde yandi ta pesa nge bima yina nge kele ti yo mfunu.—Nk. 18:25.

8. Mambu yina mpangi Ivan ti nkento na yandi Viktoria tubaka ke longa nge nki?

⁸ Beto ke vandaka na kiese na kisalu ya Yehowa. Mpangi Ivan ti nkento na yandi Viktoria kele bapasudi-nzila na insi Kyrgyzstan. Beto tala mambu yina bo ke tuba. Bo kumisaka luzingu na bo pete sambu bo sala konso kisalu yina bo lenda sala na kisalu ya Yehowa, mu mbandu kisalu ya kutunga. Mpangi Ivan ke tuba nde: “Beto vandaka kudipesa ya mvimba na konso kisalu yina beto vandaka kusala. Na nsuka ya kilumbu, beto vandaka kulemba kansi beto vandaka na ngemba mpi na kiese sambu beto zabaka nde beto me sadila ngolo na beto na kisalu ya Kimfumu. Beto vandaka mpi na kiese sambu beto zwaka banduku ya mpa mpi sambu beto kutanaka ti mambu mingi ya mbote.”—Mar. 10:29, 30.

9. Inki mpangi-nkento mosi yina kutanaka ti mambu ya mpasi salaka sambu na kusala mingi na kisalu ya Yehowa mpi nki mambote yandi bakaka?

⁹ Beto ke vandaka na kiese ya kusala kisalu ya Yehowa ata beto ke kutana ti mambu ya mpasi. Mu mbandu, mpangi-nkento Mirreh yina kele mununu mpi mufwidi ke zingaka na Afrika ya Westi. Yandi yambulaka kisalu na yandi ya kimunganga mpi yandi kumaka mupasudi-nzila. Mpangi Mirreh ke belaka maladi ya ngolo yina ke salaka nde yandi kuka ve kutambula mpi yandi lenda sala kaka ngunga mosi na kisalu ya kulonga nzo na nzo. Kansi yandi ke salaka bantangu mingi na kisalu ya kulonga nsangu ya mbote na shario ya mikanda yina yandi ke tulaka na kisika ya bantu kele mingi. Yandi ke vandaka ti bantu mingi yina yandi ke vutukilaka mpi balongoki ya Biblia mingi. Yandi ke solulaka ti bankaka na telefone. Sambu na nki mpangi Mirreh ke zolaka kusala mingi na kisalu ya Yehowa? Yandi ke tuba nde: “Mono ke zolaka Yehowa mpi Kristu Yezu mingi. Mono ke sambaka Yehowa mbala na mbala sambu yandi sadisa mono na kusala mingi na kisalu na yandi.”—Mat. 22:36, 37.

10. Mutindu 1 Piere 5:10 ke monisa yo, bantu yina ke salaka mingi na kisalu ya Yehowa ke bakaka nki mambote?

¹⁰ Yehowa ke longaka beto mambu mingi. Mpangi Kenny yina kele mupasudi-nzila na insi Maurice bakisaka nde yo kele kieleka. Ntangu yandi longukaka kieleka, yandi yambulaka iniversite, yandi bakaka mbotika mpi yandi yantikaka kusala kisalu ya ntangu yonso. Yandi ke tuba nde: “Mono salaka yonso sambu na kusadila mambu yina profete Yezaya tubaka nde: ‘Mono yandi yai! Tinda mono!’” (Yez. 6:8) Mpangi Kenny me pesaka maboko na bisalu mingi ya kutunga. Yandi me pesaka mpi maboko na kisalu ya kubalula mikanda na ndinga na bo. Yandi ke tuba diaka nde: “Bo longaka mono mutindu ya kusala mbote bisalu na mono.” Kansi yandi longukaka mambu mingi kibeni kuluta mutindu ya kusala bisalu yango. Yandi ke tuba diaka nde: “Mono bakisaka bandilu na mono mpi mono zabaka bikalulu yina yo lombaka nde mono yedisa sambu na kuvanda nsadi ya mbote ya Yehowa.” (Tanga 1 Piere 5:10.) Nge mpi lenda soba mambu ya nkaka na luzingu na nge sambu Yehowa kulonga nge diaka na mitindu mingi ya nkaka.

11. Inki bikesa bampangi-bankento na Corée du Sud salaka sambu na kulonga mingi nsangu ya mbote mpi nki mambote bo bakaka? (Tala mpi kifwanisu ya lutiti ya zulu.)

¹¹ Ata Bambangi ya Yehowa yina ke sadilaka yandi banda bamvula mingi ke vandaka ti mfunu nde bo longa bo mutindu ya mpa ya kulonga nsangu ya mbote. Na nsungi ya maladi ya coronavirus, bankuluntu na dibundu mosi na Corée du Sud sonikaka nde: “Bampangi ya nkaka yina vandaka kuyindula nde bo ta kuka ve kulonga nsangu ya  mbote sambu na sante na bo me kuma kusala yo bubu yai na nzila ya video. Bampangi-bankento tatu yina kele ti bamvula 80 ti ndambu longukaka mutindu ya kusadila ordinatere sambu na kulonga nsangu ya mbote konso kilumbu na nzila ya video.” (Nk. 92:14, 15) Keti nge ta zola kusala mingi kisalu ya kulonga nsangu ya mbote mpi kumeka sambu na kuzaba kana Yehowa kele mbote? Beto tadila mwa mambu yina nge lenda sala sambu na kulungisa lukanu yina.

12. Yehowa ke tuba nki sambu na bantu yina ke tudilaka yandi ntima?

¹² Tudila Yehowa ntima. Yehowa ke tuba nde yandi ta pesa beto bima mingi ya mbote kana beto ke tudila yandi ntima mpi kana beto ke sala yonso yina beto lenda sala na kisalu na yandi. (Mal. 3:10) Mpangi Fabiola na Colombie monaka mutindu Yehowa lungisaka mambu yina Yehowa tubaka. Yandi zolaka kukuma mupasudi-nzila ya ntangu yonso ntangu fioti na nima ya kubaka mbotika. Kansi yandi muntu vandaka kusadisa bakala na yandi mpi bana na yandi tatu na mambu ya mbongo. Ntangu yandi zolaka kuyambula kisalu na yandi, yandi sambaka Yehowa mingi sambu na kusadisa yandi. Yandi ke tuba nde: “Yo ke bakaka bantangu mingi sambu bo ndima nde muntu kuyambula kisalu. Kansi ntangu mono lombaka bo na kubaka pansio, bo ndimaka ngonda mosi na nima. Yo vandaka kibeni diambu ya kuyituka.” Bangonda zole na nima, yandi kumaka mupasudi-nzila. Bubu yai, yandi kele ti bamvula 70 ti ndambu mpi yandi me salaka kisalu ya kimupasudi-nzila bamvula kuluta 20. Yandi me sadisaka bantu nana na kubaka mbotika. Yandi ke tuba nde: “Ata bantangu ya nkaka mono ke vandaka ya kulemba,  Yehowa ke sadisaka mono konso kilumbu na kulanda kusala kisalu na mono ya kimupasudi-nzila.”

13-14. Inki bambandu lenda sadisa beto na kutudila Yehowa ntima mpi na kulungisa balukanu na beto?

¹³ Longuka bambandu ya bantu yina tudilaka Yehowa ntima. Biblia kele ti bambandu mingi ya bantu yina kudipesaka ya mvimba na kisalu ya Yehowa. Bambandu mingi ke monisa nde Yehowa sakumunaka bansadi na yandi na nima ya kusala diambu yina ke monisa nde bo vandaka kutudila yandi ntima. Mu mbandu, Yehowa sakumunaka Abrahami ntangu yandi yambulaka nzo na yandi “ata yandi zabaka ve kisika yina yandi vandaka kukwenda.” (Baeb. 11:8) Yehowa sakumunaka Yakobi ntangu yandi nwanaka ti wanzio. (Kuy. 32:24-30) Ntangu bantu ya Izraele vandaka kukota na Ntoto ya Lusilu, banganga-nzambi kotaka na Nzadi ya Yordani. Masa telamaka kisika mosi mpi yo sadisaka bantu ya Izraele na kusabuka.—Yoz. 3:14-16.

¹⁴ Nge lenda baka mpi malongi na bambandu ya Bambangi ya Yehowa ya bilumbu na beto yina tudilaka Yehowa ntima mpi lungisaka balukanu na bo. Mu mbandu, mpangi Payton ti nkento na yandi Diana vandaka kutanga masolo ya bampangi yina vandaka kusala mingi na kisalu ya Yehowa; mu mbandu masolo yina kele na kitini “Bo Kudipesaka na Luzolo Yonso.” * Mpangi Payton ke tuba nde: “Ntangu beto vandaka kutanga masolo na bo, yo vandaka bonso nde beto ke tala muntu mosi ke dia madia ya kitoko. Sambu beto vandaka kutala yo mingi, beto kumaka mpi ti mpusa ya ngolo ya ‘kumeka sambu na kumona kana Yehowa kele mbote.’” Nsuka-nsuka mpangi Payton ti Diana kwendaka kusala kisika yina mpusa vandaka mingi. Keti nge me tangaka masolo yina? Keti nge me talaka bavideo Prédication dans des régions isolées : Australie mpi Prédication dans des régions isolées : Irlande yina basikaka na jw.org? Bavideo yai lenda sadisa nge na kusosa mitindu mingi ya kusala mingi kisalu ya kulonga nsangu ya mbote.

15. Inki mutindu banduku ya mbote ke sadisaka beto?

¹⁵ Kangama ti bampangi yina ke tulaka Kimfumu na kisika ya ntete. Yo ke vandaka pete na kudia madia yina beto me diaka ntete ve kana beto ke kangama ti bantu yina ke diaka yo. Mutindu mosi, kana beto ke kangama ti bantu yina me kudipesaka ya mvimba na kisalu ya Yehowa, yo ta pusa beto mpi na kudipesa ya mvimba na kisalu ya Yehowa. Mpangi Kent ti nkento na yandi Veronica me bakisaka nde mambu yai kele kieleka. Mpangi Kent ke tuba nde: “Banduku mpi bampangi na beto ya dibuta vandaka kusonga beto na kusadila Yehowa na mitindu ya nkaka. Beto bakisaka nde kana beto ke kangama ti bampangi yina ke tulaka Kimfumu na kisika ya ntete, yo ta pusa beto na kusala kisalu ya nkaka sambu na kusadila Yehowa.” Bubu, yai mpangi Kent ti Veronica kele bapasudi-nzila ya nene na Serbie.

16. Mutindu mbandu ya Yezu ya kele na Luka 12:16-21 ke monisa yo, sambu na nki beto fwete ndima kuyambula bima ya nkaka?

¹⁶ Ndima kuyambula bima ya nkaka sambu na kusala mingi na kisalu ya Yehowa. Beto fwete yambula ve bima yonso yina beto kele ti yo sambu na kusepedisa Yehowa. (Lon. 5:19, 20) Kansi, kana beto ke buya kusala mingi na kisalu ya Nzambi kaka sambu beto ke zola ve kuyambula bima na beto ya nkaka, beto lenda sala kifu yina muntu yina Yezu tubilaka na mbandu na yandi salaka. Yandi buyaka Nzambi kaka sambu yandi vandaka kusala ngolo sambu na kuvanda ti bima mingi ya mbote. (Tanga Luka 12:16-21.) Mpangi Christian na France ke tuba nde: “Mono vandaka ve kusadila mingi ntangu na mono mpi ngolo na mono sambu na Yehowa mpi sambu na dibuta na mono.” Yandi ti nkento na yandi bakaka lukanu ya kukuma bapasudi-nzila. Sambu na kusala yo, yo lombaka nde bo yambula bisalu na bo. Sambu na kuzwa bima yina bo vandaka ti yo mfunu, bo yantikaka kusala kisalu ya kutula bunkete mpi bo kumaka kusepela ti mbongo fioti yina bo vandaka  kuzwa. Keti bo ke vandaka na kiese mutindu bo yambulaka bima na bo yina? Mpangi Christian ke tuba nde: “Beto ke vandaka na kiese mingi ntangu beto ke longaka nsangu ya mbote mpi ntangu beto ke monaka balongoki ya Biblia mpi bantu yina beto ke vutukilaka ke longuka mambu ya Yehowa.”

17. Sambu na nki yo lenda vanda mpasi na kusadila metode ya mpa ya kisalu ya kulonga?

¹⁷ Sadila bametode ya mpa ya kisalu ya kulonga. (Bis. 17:16, 17; 20:20, 21) Mpangi-nkento Shirley kele mupasudi-nzila na États-Unis. Yo lombaka nde yandi soba mutindu ya kusala kisalu na yandi ya kimupasudi-nzila na nsungi ya maladi ya coronavirus. Ntete, yo vandaka mpasi sambu yandi yantika kulonga na nzila ya telefone. Ntangu yandi bakaka formasio na viziti ya nkengi ya nziunga, yandi yantikaka kulonga na nzila ya telefone mbala na mbala. Yandi ke tuba nde: “Na luyantiku, mono vandaka kuwa boma kansi ntangu yai mono ke salaka yo kukonda mpasi. Beto ke solula ti bantu mingi kuluta ntangu beto vandaka kulonga nzo na nzo.”

18. Inki lenda sadisa beto kana beto ke kutana ti diambu mosi ya mpasi ya ke sala nde beto sala ve mingi kisalu ya kulonga?

¹⁸ Baka lukanu mpi sala yonso sambu na kulungisa yo. Ntangu beto ke kutanaka ti bampasi, beto ke sambaka Yehowa sambu yandi sadisa beto mpi beto ke yindulaka mbote-mbote mambu yina beto fwete sala sambu na bampasi yango. (Bing. 3:21) Mpangi Sonia kele mupasudi-nzila ya ntangu yonso na kimvuka yina ke tubaka ndinga ya Romani na Eropa. Yandi ke tuba nde: “Mono ke sonikaka lukanu mosi yina mono me baka na papie mpi mono ke tulaka papie yango na kisika yina mono ta mona kukonda mpasi. Mono me salaka banzila zole mpi mono me tulaka yo na mesa na mono. Kana mono ke baka lukanu, mono ke talaka banzila yina mpi mono ke yindulaka nki nzila ta sadisa mono na kulungisa lukanu yina mono me baka.” Mpangi Sonia ke salaka yonso sambu na kutanina kiese na yandi ntangu yandi ke kutana ti bampasi. Yandi ke tuba nde: “Konso diambu ya mpasi yina mono ke kutana ti yo lenda vanda bonso kibaka yina ke kanga mono nzila ya kulungisa balukanu na mono to pont yina ke sadisa mono na kulungisa yo.”

19. Inki beto fwete sala?

¹⁹ Yehowa ke sakumunaka beto na mitindu mingi. Beto lenda monisa nde beto ke sepelaka mingi ti mambu ya mbote yina yandi ke sadilaka beto kana beto ke sala yonso sambu na kukumisa yandi. (Baeb. 13:15) Beto lenda sosa mitindu ya mpa ya kusala mingi kisalu ya kulonga mpi Yehowa ta sakumuna beto diaka mingi kuluta. Konso kilumbu beto fwete sala yonso sambu na ‘kumeka mpi kumona nde Yehowa kele mbote.’ Beto ta vanda bonso Yezu yina tubaka nde: “Madia na mono kele kusala luzolo ya muntu yina tindaka mono mpi kumanisa kisalu na yandi.”—Yoa. 4:34.