1-2. (a) Yehowa songaka bantumwa ya Yezu tatu na kusala nki mpi nki bo salaka? (b) Inki beto ta tubila na disolo yai?

NA NIMA ya paki ya mvu 32 ya ntangu na beto, ntumwa Piere, Yakobo mpi Yoane monaka mbona-meso mosi ya kuyituka. Na zulu ya ngumba mosi ya nda, mbala ya nkaka na ngumba Ermoni, Yezu kitukaka na ntwala na bo. “Luse na yandi semaka bonso ntangu, mpi bilele na yandi ya zulu kumaka kungenga bonso nsemo.” (Mat. 17:1-4) Na nsuka ya mbona-meso yina, bantumwa yina waka Nzambi ke tuba nde: “Yai Mwana na mono, ya mono ke zolaka mingi, yina mono me ndima. Beno wila yandi.” (Mat. 17:5) Mambu yina bantumwa yina tatu salaka na luzingu na bo monisaka nde bo wilaka Yezu. Beto fwete landa mbandu na bo.

² Na disolo yina me luta, beto longukaka nde kuwa ndinga ya Yezu ke tendula kuyambula kusala mambu ya nkaka. Na disolo yai, beto ta tubila mambu zole yina Yezu tubaka nde beto fwete sala.

3. Matayo 7:13, 14 ke monisa nde beto fwete sala nki?

³ Tanga Matayo 7:13, 14. Yezu tubilaka bakielo zole yina ke nataka na banzila zole; nzila ya “nene” mpi nzila yina kele “nkaka.” Nzila ya tatu kele ve. Beto fwete pona nzila yina beto ta kwenda. Yo kele lukanu ya kuluta mfunu yina beto fwete baka sambu nzila yina ke nataka na luzingu ya mvula na mvula kele kaka mosi.

4. Nzila ya “nene” kele nki mutindu?

 ⁴ Beto fwete vila ve luswaswanu yina kele na banzila yina zole. Nzila ya “nene” kele nzila yina bantu mingi ke kwendaka sambu yo kele ve nkaka. Diambu ya mawa kele nde, bantu mingi me bakaka lukanu ya kubikala na nzila yina mpi ya kusala mambu yina bantu mingi ya kele na nzila yango ke salaka. Bo ke zabaka ve nde Satana Diabulu ke salaka yonso sambu bantu kulanda nzila yina ya ke nataka na lufwa.—1 Bak. 6:9, 10; 1 Yoa. 5:19.

5. Inki bantu mingi me salaka sambu na kuzwa nzila ya “nkaka” mpi nki mutindu bo yantikaka kutambula na nzila yango?

⁵ Nzila ya “nene” me swaswana ti nzila ya “nkaka” mpi Yezu tubaka nde bantu fioti mpamba ke zwaka yo. Sambu na nki? Diambu ya ke benda dikebi kele nde, na verse yina ke landa, Yezu kebisaka balongoki na yandi sambu na baprofete ya luvunu. (Mat. 7:15) Bantu ya nkaka ke tubaka nde mabundu kele mingi mpi mingi na kati na yo ke tubaka nde bo ke longaka kieleka. Sambu mabundu kele mingi, bantu mingi me lembaka nitu to bo ke zabaka ve nki bo lenda sala. Yo yina, bo ke salaka ve bikesa ya kusosa nzila yina ke nataka na luzingu. Kansi bo lenda zwa nzila yina. Yezu tubaka nde: “Kana beno bikala na ndinga na mono, beno kele kibeni balongoki na mono, mpi beno ta zaba kieleka, ebuna kieleka ta katula beno na kimpika.” (Yoa. 8:31, 32) Yo kele mbote mutindu nge salaka ve bonso bantu ya nkaka kansi nge sosaka kieleka. Nge yantikaka kulonguka mbote-mbote Ndinga ya Nzambi sambu na kuzaba mambu yina yandi ke lomba beto na kusala mpi nge waka malongi ya Yezu. Na kati ya mambu yina nge longukaka, nge longukaka mpi nde Yehowa ke zolaka nde beto buya malongi ya mabundu ya luvunu mpi beto yambula kusala bafeti ya mabundu ya luvunu. Nge longukaka mpi nde, yo lenda vanda mpasi na kusala mambu yonso yina Yehowa ke lomba beto na kusala mpi na kuyambula bikalulu yina yandi ke zolaka ve. (Mat. 10:34-36) Mbala ya nkaka yo vandaka ve pete sambu nge soba. Ata mpidina, nge salaka yonso sambu na kusoba sambu nge ke zolaka Tata na nge ya zulu mpi nge ke zolaka kusepedisa yandi. Yandi ke sepelaka ti nge mingi kibeni.—Bing. 27:11.

6. Mutindu Nkunga 119:9, 10, 45, 133 ke monisa yo, nki lenda sadisa beto na kulanda kutambula na nzila ya nkaka?

⁶ Kana beto me yantika kutambula na nzila ya nkaka, nki lenda sadisa beto na kubikala na nzila yango? Beto baka mbandu yai. Na bansi ya nkaka, bo ke kangisaka bibende na balweka ya nzila yina kele na ngumba sambu yo tanina bashofere mpi bakamio. Bibende yina ke sadisaka bo na kukwenda ve kibeni pene-pene ya balweka yina nzila me suka. Ata shofere mosi ve ta bokuta mpi kutuba nde bibende yina ke sala nde yandi tambula ve mbote to nde yo ke pesa yandi mpasi. Bansiku ya Yehowa yina kele na Biblia kele bonso bibende yina bo me tula na balweka ya nzila. Yo ke sadisaka beto na kulanda kutambula na nzila ya nkaka.—Tanga Nkunga 119:9, 10, 45, 133.

7. Inki mutindu Yehowa ke zola nde baleke kutadila nzila ya nkaka?

⁷ Baleke, keti bantangu ya nkaka beno ke monaka nde bansiku ya Yehowa kele ngolo mingi? Satana ke zola nde beno yindula mutindu yina. Yandi ta sosa kupusa beno na kutula dikebi na mambu yina bantu yina kele na nzila ya nene ke salaka sambu yo lenda monana bonso nde bo ke vandaka ti luzingu ya kiese. Yandi ke zola nde beno yindula nde beno kele ve ti luzingu ya kiese bonso banduku na beno ya nzo-nkanda to bantu yina beno ke mona na Internet. Diaka, Satana ke zola nde beno yindula nde bansiku ya Yehowa ke  kanga beno nzila ya kuvanda ti luzingu ya kiese. * Kansi beno vila ve diambu yai: Satana ke zolaka ve nde bantu yina ke tambula na nzila yina ya nene kuzaba mambu yina ke vingila bo na ntwala. Kansi Yehowa me songaka beno mbote-mbote luzingu ya kitoko yina beno ta vanda ti yo kana beno ke landa kutambula na nzila ya nkaka.—Nk. 37:29; Yez. 35:5, 6; 65:21-23.

8. Inki malongi baleke lenda baka na mbandu ya mpangi Olaf?

⁸ Beto tadila malongi yina beno baleke lenda baka na mbandu ya mpangi Olaf yina kele mpi leke. * Banduku na yandi ya nzo-nkanda pusaka yandi na kusala mansoni. Ntangu yandi tendudilaka bo nde Bambangi ya Yehowa ke zitisaka bansiku ya bikalulu ya mbote yina kele na Biblia, bana-bankento ya nkaka ya nzo-nkanda na bo salaka diaka yonso sambu yandi vukisa nitu ti bo. Kansi mpangi Olaf salaka yo  ve ata fioti. Yandi kutanaka diaka ti diambu ya nkaka ya mpasi. Mpangi Olaf ke tuba nde: “Balongi na mono pusaka mono na kukota iniversite sambu bantu ta zitisaka mono. Bo songaka mono nde kana mono kota ve iniversite, mono ta vanda ve ti luzingu ya mbote.” Inki sadisaka mpangi Olaf na kusala ve diambu yina balongi na yandi vandaka kupusa yandi na kusala? Yandi ke tuba nde: “Mono salaka kinduku ya ngolo ti bampangi na dibundu. Bo kumaka bonso bampangi na mono ya dibuta. Mono yantikaka mpi kulonguka mingi Biblia. Yo sadisaka mono na kundima kibeni nde mono kele na kieleka. Yo yina, mono bakaka lukanu ya kubaka mbotika.”

9. Bantu yina ke zola kubikala na nzila ya nkaka fwete sala nki?

⁹ Satana ta sosa kukatula nge na nzila yina ke nata na luzingu. Yandi ke zola nde nge landa bantu mingi yina kele na nzila ya nene ya “ke nataka na lufwa.” (Mat. 7:13) Ata mpidina, beto ta bikala na nzila ya nkaka kana beto ke landa kuwa Yezu mpi kana beto ke bakisa nde nzila yango ke taninaka beto. Sesepi beto tadila kima ya nkaka yina Yezu songaka beto na kusala.

10. Na Matayo 5:23, 24, Yezu tubaka nde beto fwete sala nki?

¹⁰ Tanga Matayo 5:23, 24. Na baverse yina, Yezu tubilaka diambu mosi yina vandaka mfunu mingi sambu na Bayuda yina vandaka kuwa yandi. Yindula fioti: Muntu mosi kele na tempelo mpi yandi ke zola kupesa mbisi na nganga-nzambi sambu na kimenga. Na ntangu yina, kana muntu yango me yibuka nde yandi kele ti makambu ti mpangi na yandi, yandi fwete yambula kimenga mpi yandi fwete “kwenda.” Sambu na nki? Sambu yo lombaka nde yandi sala ntete diambu mosi ya mfunu mingi na ntwala ya kupesa kimenga na yandi na Yehowa. Yezu tubaka pwelele nde: “Ntete, tula ngemba ti mpangi na nge.”

11. Inki Yakobi salaka sambu na kutula ngemba ti Ezau?

¹¹ Mbandu ya Yakobi ke longa beto malongi mingi ya mfunu na yina me tala kutula ngemba. Kiteso ya bamvula 20 lutaka, banda Yakobi katukaka na bwala na bo mpi na nima Nzambi songaka yandi na nzila ya wanzio na kuvutuka na bwala na bo. (Kuy. 31:11, 13, 38) Kansi kima mosi vandaka kuyangisa yandi. Yaya na yandi Ezau vandaka kuzola kufwa yandi. (Kuy. 27:41) Yakobi “waka boma mingi mpi kudiyangisaka” sambu yandi yindulaka nde mbala ya nkaka mpangi na yandi vandaka kaka ti makasi. (Kuy. 32:7) Inki Yakobi salaka sambu na kutula ngemba ti mpangi na yandi? Ntete, yandi sambaka Yehowa mingi sambu na yo. Na nima, yandi tindilaka Ezau bima. (Kuy. 32:9-15) Nsuka-nsuka, ntangu Yakobi monaka Ezau, yandi salaka kima mosi yina monisaka nde yandi zitisaka Ezau. Yandi fukamaka na ntwala ya Ezau mbala mosi ve, mbala zole ve kansi mbala nsambwadi. Yakobi vandaka muntu ya kudikulumusa, yandi zitisaka Ezau mpi yandi tulaka ngemba ti yandi.—Kuy. 33:3, 4.

12. Mbandu ya Yakobi ke longa beto nki?

¹² Beto ke baka dilongi na mutindu Yakobi yilamaka sambu na kukutana ti mpangi na yandi mpi mambu yina yandi salaka ntangu yandi kutanaka ti mpangi na yandi Ezau. Ti kudikulumusa yonso, Yakobi lombaka Yehowa lusadisu. Yandi salaka yonso sambu na kutula ngemba ti mpangi na yandi mpi yo monisaka nde yandi sadilaka mambu yina yandi tubaka na kisambu. Ntangu Yakobi ti Ezau kutanaka, Yakobi swanaka ve ti Ezau sambu na kuzaba nani vandaka ti foti mpi nani vandaka ve ti foti. Lukanu ya Yakobi vandaka ya kutula ngemba ti mpangi na yandi. Inki mutindu beto lenda landa mbandu ya Yakobi?

13-14. Kana beto me sala mpangi mosi diambu ya mbi, nki beto fwete sala?

¹³ Beto bantu yina ke tambulaka na nzila ya ke nataka na luzingu, beto fwete tula ngemba ti bampangi na beto. (Bar. 12:18) Inki beto fwete sala kana beto me bakisa nde beto me sala mpangi mosi diambu ya mbi? Bonso Yakobi, beto fwete samba Yehowa mingi. Beto lenda songa yandi na kusadisa beto na kutula ngemba ti mpangi yina.

¹⁴ Beto fwete yindula mpi mambu yina beto ta sala. Beto lenda kudiyula bangiufula yai: ‘Keti mono lenda ndima nde mono kele ti foti mpi kulomba pardo sambu na kutula ngemba? Inki mutindu Yehowa mpi Yezu ta wa kana mono sala yonso sambu na kutula ngemba ti mpangi na mono?’ Bamvutu na bangiufula yina lenda pusa beto na kuwa Yezu mpi na kudikulumusa ntangu beto ke solula ti mpangi na beto sambu na kutula ngemba. Sambu na kusala yo, beto lenda landa mbandu ya Yakobi.

15. Inki mutindu munsiku yina kele na Baefezo 4:2, 3 ke sadisa beto na kutula ngemba ti bampangi?

¹⁵ Yindula mambu yina zolaka kusalama kana Yakobi sosaka kuswana ti Ezau sambu na kuzaba nani vandaka ti foti mpi nani vandaka ve ti foti. Mambu zolaka kusuka mbi. Ntangu beto ke tula ngemba ti mpangi, beto fwete vanda ti kikalulu ya kudikulumusa. (Tanga Baefezo 4:2, 3.) Bingana 18:19 ke tuba nde: “Mpangi yina bo me sala mbi ke kumaka makambu ngolo kuluta mbanza ya ngolo, mpi kele ti kuswana yina kele bonso banti ya bo ke kangilaka nzo ya ngolo.” Mpangi yina beto me sala mbi kele bonso ‘nzo yina ya ngolo’ kansi kana beto me lomba yandi pardo yo lenda sadisa yandi na kulolula beto.

16. Inki beto fwete yindula mbote-mbote na ntwala ya kutula ngemba mpi sambu na nki?

¹⁶ Beto fwete yindula mpi mbote-mbote mambu yina beto ta songa mpangi yina mpi mutindu beto ta tuba yo. Kana beto me yindula mbote-mbote, beto fwete solula ti mpangi yina waka mpasi sambu na mambu yina beto sadilaka yandi mpi beto fwete sadisa yandi na kuvutukila diaka kinduku na beto ti yandi. Yandi lenda tuba mambu yina ke sepedisa beto ve. Beto lenda wa makasi kukonda mpasi mpi beto lenda sosa kudinungisa. Kansi, kana beto sala mutindu yina, yo ta sadisa beto ve ata fioti na kutula ngemba. Kuvila ve nde, kutula ngemba ti mpangi kele mfunu mingi kuluta kusosa  kuzaba nani kele ti foti mpi nani kele ve ti foti.—1 Bak. 6:7.

17. Mbandu ya mpangi Gilbert ke longa nge nki?

¹⁷ Mpangi Gilbert salaka yonso sambu na kutula ngemba. Yandi ke tuba nde: “Mono vandaka kuwakana ve ti mwana na mono ya nkento. Na nsungi ya bamvula kuluta zole, mono salaka yonso sambu na kusolula ti yandi sambu na kutula ngemba mpi sambu na kuvutukila diaka kinduku na beto ti yandi.” Inki mpangi Gilbert salaka diaka? Yandi ke tuba nde: “Na ntwala ya kusolula ti mwana na mono yina ya nkento, mono sambaka mpi mono yidikaka mabanza na mono sambu mono wa ve makasi ata kana yandi me tuba diambu ya mbi. Yo lombaka nde mono vanda ya kuyilama na kulolula. Mono bakisaka nde mono fwete sosa ve kumonisa nde mono vandaka ve ti foti mpi na kubakisa nde lukanu na mono vandaka ya kutula ngemba.” Inki mbuma yo butaka? Mpangi Gilbert ke tuba nde: “Bubu yai, mono kele ti ngemba ya mabanza sambu mono kele ti kinduku ya mbote ti bantu yonso ya dibuta na mono.”

18-19. Kana beto me sadila mpangi mosi diambu ya mbi, nki beto fwete sala mpi sambu na nki?

¹⁸ Inki nge fwete sala kana nge me bakisa nde nge me sala mpangi mosi diambu ya mbi? Sadila nsiku ya Yezu ya kutula ngemba. Songa Yehowa diambu yango na kisambu mpi ndima nde mpeve santu na yandi ta sadisa nge na kuvanda muntu yina ke tulaka ngemba. Kana nge sala mpidina, nge ta vanda na kiese mpi nge ta monisa diaka nde nge ke wila Yezu.—Mat. 5:9.

¹⁹ Beto ke pesa Yehowa mersi mutindu yandi ke twadisaka beto na zola yonso na nzila ya “mfumu ya dibundu” Yezu Kristu. (Baef. 5:23) Bonso ntumwa Piere, Yakobo mpi Yoane, beto fwete ‘wila Yezu.’ (Mat. 17:5) Beto me mona mutindu ya kusala yo kana beto ke tula ngemba ti mpangi yina beto me sadila diambu ya mbi. Kana beto sala mpidina mpi kana beto bikala na nzila ya nkaka yina ke nataka na luzingu, beto ta baka balusakumunu mingi bubu yai mpi beto ta vanda ti kiese ya kukonda nsuka na bilumbu ke kwisa.