DISOLO YA KULONGUKA 50
Wa Ndinga ya Ngungudi ya Mbote
“Bo ta wa ndinga na mono.”—YOA. 10:16.
NKUNGA 3 Ngolo na Beto mpi Kivuvu na Beto
MAMBU YINA DISOLO YAI KE TUBILA *
1. Inki lenda vanda kikuma yina salaka nde Yezu kufwanisa balongoki na yandi ti mameme?
YEZU fwanisaka kinduku na yandi ti balongoki na yandi ti kinduku ya ngolo yina ngungudi ke vandaka ti yo ti mameme na yandi. (Yoa. 10:14) Mbandu yai me fwana kibeni. Mameme ke zabaka ngungudi na bo mpi bo ke waka ndinga na yandi. Muntu mosi ya ke salaka ba voyage monaka kieleka ya diambu yina. Yandi tubaka nde: “Beto vandaka ti mfunu ya kufilme mameme mpi beto sosaka mpila ya kubenda bo pene-pene na beto. Kansi bo kwisaka ve sambu bo zabaka ve bandinga na beto. Na nima, ntangu mwana mosi ya fioti ya bakala yina vandaka ngungudi kwisaka, yandi bingaka bo mpi mbala mosi bo landaka yandi.”
2-3. (a) Inki mutindu balongoki ya Yezu ke waka ndinga na yandi? (b) Inki beto ta tadila na disolo yai mpi na yina ke landa?
2 Mambu yina muntu yina ke salaka ba voyage monaka, ke yibusa beto mambu yina Yezu tubaka sambu na mameme na yandi disongidila balongoki na yandi. Yandi tubaka nde: “Bo ta wa ndinga na mono.” (Yoa. 10:16) Kansi Yezu kele na zulu. Inki mutindu beto ta wa ndinga na yandi? Beto ke waka yandi ntangu beto ke sadilaka mambu yina yandi longaka.—Mat. 7:24, 25.
3 Na disolo yai mpi na yina ke landa, beto ta tubila mwa malongi yango. Mutindu beto ta mona yo, Yezu longaka beto nde beto fwete yambula kusala mambu ya nkaka mpi yandi longaka beto mambu yina beto fwete sala. Beto ta tadila ntete mambu zole yina ngungudi ya mbote songaka beto nde beto fwete sala ve.
“BENO BIKA KUDIYANGISA MINGI”
4. Mutindu Luka 12:29 ke monisa yo, nki lenda sala nde beto “kudiyangisa mingi”?
4 Tanga Luka 12:29. Yezu songaka balongoki na yandi na ‘kubika kudiyangisa mingi’ sambu na bima yina bo kele ti yo mfunu sambu na kuzinga. Beto ke zaba nde bandongisila ya Yezu ke vandaka mbote ntangu yonso. Beto ke zolaka kusadila yo, kansi bantangu ya nkaka yo lenda vanda mpasi na kusadila yo. Sambu na nki?
5. Sambu na nki bampangi ya nkaka lenda kudiyangisa sambu na bima yina bo kele ti yo mfunu?
5 Bampangi ya nkaka lenda kudiyangisa sambu na bima yina bo kele ti yo mfunu, mu mbandu madia, bilele mpi kisika ya kuzinga. Yo lenda vanda nde bo ke zingaka na insi yina bantu mingi kele bansukami mpi yo ke vandaka mpasi na kuzwa kisalu. Yo lenda vanda mpasi sambu bo zwa mbongo ya me fwana sambu na kusansa mabuta na bo. To yo lenda vanda nde muntu yina vandaka kusosa mbongo sambu na kusansa dibuta me fwaka mpi dibuta yina me bikala, kele ve ti mbongo ya kusumba bima yina bo kele ti yo mfunu. Diaka, yo lenda vanda nde bampangi mingi kele diaka ve ti kisalu sambu na maladi ya Coronavirus. (Lon. 9:11) Kana beto ke kutana ti bampasi ya mutindu yai to bampasi ya nkaka, nki mutindu beto ta sadila ndongisila ya Yezu ya kubika kudiyangisa?
Tudila Yehowa ntima na kisika ya kudiyangisa mingi sambu na bima yina nge kele ti yo mfunu (Tala baparagrafe 6-8) *
6. Tubila mambu yina kuminaka ntumwa Piere kilumbu mosi.
6 Kilumbu mosi, ntumwa Piere ti bantumwa ya nkaka vandaka na maswa na Nzadi-Mungwa ya Galilea. Mupepe ya ngolo vandaka kubula ntangu bo monaka Yezu ke tambula na zulu ya masa. Piere tubaka nde: “Mfumu, kana yo kele nge, songa mono na kukwisa na zulu ya masa.” Ntangu Yezu songaka Piere nde: “Kwisa,” yandi basikaka na maswa mpi yandi “tambulaka na zulu ya masa, mpi kwendaka kisika Yezu vandaka.” Beto tala mambu yina salamaka na nima. “Ntangu yandi talaka mupepe ya ngolo, yandi waka boma. Mpi ntangu yandi yantikaka kudinda, yandi bokaka nde: ‘Mfumu, gulusa mono!’” Yezu tandulaka diboko na yandi, simbaka yandi mpi gulusaka yandi. Yo kele mfunu na kuvila ve nde kana Piere landaka kutala Yezu, yandi zolaka kulanda mpi kutambula na zulu ya masa. Kansi ntangu Piere talaka mupepe, yandi yantikaka kuwa boma mingi mpi yandi kumaka ti badute. Yo yina, yandi yantikaka kudinda.—Mat. 14:24-31.
7. Mbandu ya Piere ke longa beto nki?
7 Beto lenda baka malongi na mbandu ya Piere. Ntangu Piere basikaka na maswa mpi yantikaka kutambula na nzadi-mungwa, yandi yindulaka ve nde mupepe ta pesa yandi boma mpi nde yandi ta dinda. Yandi zolaka kulanda kutambula na zulu ya masa mpi kukuma kisika Mfumu na yandi vandaka. Kansi yandi kumaka ve kisika ya Mfumu na yandi vandaka sambu yandi waka boma ya mupepe. Bubu yai, beto fwete vanda ti lukwikilu sambu na kukanga ntima na bampasi kaka mutindu Piere vandaka ti mfunu ya lukwikilu sambu na kulanda kutambula na masa. Kana beto yambula kutudila Yehowa ntima mpi kana beto yambula kutudila balusilu na yandi ntima, lukwikilu na beto lenda lemba mpi yo lenda vanda bonso nde basusi ke dindisa beto. Ata beto ke kutana ti bampasi ya nki mutindu, beto fwete landa kutudila Yehowa ntima mpi kutula ntima na ngolo na yandi nde yandi ta sadisa beto. Inki mutindu beto lenda sala yo?
8. Inki ta sadisa beto na kudiyangisa ve mingi sambu na bima yina beto kele ti yo mfunu?
8 Na kisika ya kudiyangisa mingi sambu na bampasi na beto, beto fwete tudila Yehowa ntima. Kuvila ve nde Yehowa Tata na beto yina ke zolaka beto ke tuba nde yandi ta pesa beto bima yina beto kele ti yo mfunu kana beto tula mambu ya kimpeve na kisika ya ntete. (Mat. 6:32, 33) Ya kieleka, yandi ke salaka yo ntangu yonso. (Kul. 8:4, 15, 16; Nk. 37:25) Yehowa ke lungisaka bampusa ya bandeke mpi ya bintuntu. Yo yina, beto fwete kudiyangisa ve sambu na madia mpi bilele. (Mat. 6:26-30; Bafil. 4:6, 7) Kaka mutindu zola ke pusaka bibuti na kulungisa bampusa ya bana na bo, zola ke pusaka mpi Tata na beto ya zulu na kulungisa bampusa na beto ya kinsuni. Ya kieleka, beto ke ndima kibeni nde Yehowa ta pesa beto bima yina beto kele ti yo mfunu.
9. Mambu yina kuminaka mpangi-bakala mosi ti nkento na yandi ke longa beto nki?
9 Beto tadila mbandu mosi ya ke monisa mutindu Yehowa ke lungisaka bampusa na beto ya kinsuni. Mpangi-bakala mosi ti nkento na yandi yina kele na kisalu ya ntangu yonso kwendaka na camp ya ba réfugiés na kamio na bo ya ntama sambu na kubaka bampangi-bankento yina ke zingaka kuna sambu na kunata bo na lukutakanu mpi bo salaka ngunga mosi ti ndambu sambu na kukuma kuna. Mpangi bakala yina ke tuba nde: “Na nima ya lukutakanu, beto bingisaka bampangi-bankento yina na nzo sambu bo dia kansi beto bakisaka nde beto vandaka ve ti madia ya kupesa bo.” Inki bampangi yina salaka? Mpangi-bakala yina ke tuba nde: “Ntangu beto kumaka na nzo, beto kutaka basaki zole ya nene ya madia na ntwala ya kielo na beto. Beto zabaka ve muntu yina tulaka yo pana. Yehowa lungisaka bampusa na beto.” Bilumbu fioti na nima, kamio ya mpangi-bakala yina ti nkento na yandi fwaka. Yo vandaka kusadisa bo na kisalu ya kulonga nsangu ya mbote kansi bo vandaka ve ti mbongo ya kuyidika yo. Bo nataka kamio yango na kisika yina bo ke yidikaka bakamio sambu na kuzaba ntalu ya mbongo yina bo ta lomba sambu na kuyidika yo. Na nima, muntu mosi kwisaka mpi yulaka nde: “Yina kamio ya nani?” Mpangi-bakala yina tubaka nde yo kele kamio na yandi mpi nde yandi kele ti mfunu ya kuyidika yo. Muntu yina tubaka nde: “Kima ve. Nkento na mono kele ti mfunu ya kamio ya mutindu yai mpi kaka ya kulere yai. Nge ke zola nde mono pesa nge mbongo ikwa sambu mono sumba yo?” Mpangi-bakala yina tekilaka muntu yina kamio na yandi mpi muntu yina pesaka yandi mbongo yina sadisaka yandi na kusumba kamio ya nkaka. Yandi ke tuba nde: “Beto waka kiese mingi kibeni na nsuka ya kilumbu. Beto zabaka nde yo salamaka ve kaka mutindu yina kansi Yehowa muntu sadisaka beto.”
10. Inki mutindu Nkunga 37:5 ke siamisa beto na kudiyangisa ve sambu na bima yina beto kele ti yo mfunu?
10 Kana beto ke wa ngungudi ya mbote mpi beto ke kudiyangisa ve mingi sambu na bima yina beto kele ti yo mfunu, Yehowa ta lungisa bampusa na beto. (Tanga Nkunga 37:5; 1 Pie. 5:7) Yindula mambu ya mpasi yina beto me tubila na paragrafe 5. Yehowa lenda sadila mfumu ya dibuta to mfumu ya kisalu sambu na kusadisa beto na kulungisa bampusa na beto ya konso kilumbu. Kana mfumu ya dibuta ke kuka diaka ve kusala yo to kana beto kele diaka ve ti kisalu, Yehowa ta landa kusadisa beto na mutindu ya nkaka. Beto fwete ndima nde yandi ta pesa beto bima yina beto kele ti yo mfunu. Beto tadila ntangu yai diambu ya nkaka yina ngungudi ya mbote songaka beto na kusala ve.
“BENO BIKA KUSAMBISA”
Kana beto ke tula dikebi na bikalulu ya mbote ya bantu ya nkaka, yo ta sadisa beto na kusambisa bo ve (Tala baparagrafe 11, 14-16) *
11. Mutindu Matayo 7:1, 2 ke monisa yo, nki Yezu songaka beto na kusala ve mpi sambu na nki yo lenda vanda mpasi na kusala yo?
11 Tanga Matayo 7:1, 2. Yezu zabaka nde mbala mingi bantu ya kukonda kukuka ke tulaka dikebi na bifu ya bantu ya nkaka. Yo yina yandi tubaka nde: “Beno bika kusambisa.” Beto lenda sala bikesa ya kusambisa ve bampangi na beto. Kansi beto ta kuka ve kusala yo ntangu yonso sambu beto kele bantu ya kukonda kukuka. Kana beto me bakisa nde bantangu ya nkaka beto ke tula dikebi kaka na bifu ya bantu ya nkaka, nki beto fwete sala? Beto fwete widikila Yezu mpi beto fwete sala bikesa ya kubika kusambisa.
12-13. Inki mutindu mbandu ya Yehowa ke sadisa beto na kusambisa ve bantu ya nkaka?
12 Beto lenda yindula mingi mbandu ya Yehowa sambu yo sadisa beto. Yandi ke tulaka dikebi na mambu ya mbote yina bantu ke salaka. Yindula mambu yina yandi salaka ntangu ntotila Davidi salaka masumu ya nene. Mu mbandu, yandi salaka bizumba ti Bat-sheba mpi nkutu yandi fwaka bakala na yandi. (2 Sam. 11:2-4, 14, 15, 24) Yo salaka nde Davidi yandi mosi, dibuta na yandi mpi bankento na yandi kuniokwama. (2 Sam. 12:10, 11) Na dibaku ya nkaka, Davidi tudilaka ve Yehowa ntima ya mvimba ntangu yandi tangaka ntalu ya basoda ya Izraele. Mbala ya nkaka Davidi salaka mutindu yina sambu yandi kumaka lulendo ntangu yandi monaka ntalu ya basoda na yandi mpi yandi tulaka ntima na ntalu ya basoda yango. Inki salamaka? Bantu ya Izraele 70 000 fwaka na kipupa.—2 Sam. 24:1-4, 10-15.
13 Kana nge vandaka kuzinga na Izraele na ntangu yina, nki mutindu nge zolaka kutadila Davidi? Keti nge zolaka kuyindula nde Yehowa fwete lolula yandi ve? Kansi Yehowa yindulaka ve mutindu yina. Yehowa tulaka dikebi na mutindu Davidi kangamaka na yandi bamvula yina yonso mpi na mutindu yandi balulaka ntima na masonga yonso. Yo yina, Yehowa lolulaka Davidi sambu na masumu ya nene yina yandi salaka. Yehowa zabaka nde Davidi vandaka kuzola yandi mingi kibeni mpi nde yandi vandaka kuzola kusala mambu ya mbote. Beto ke pesa Yehowa mersi mingi sambu yandi ke tulaka dikebi na bikalulu na beto ya mbote mpi na mambu ya mbote yina beto ke salaka.—1 Bant. 9:4; 1 Bans. 29:10, 17.
14. Inki ke sadisaka Bakristu na kusambisa ve bantu ya nkaka?
14 Yehowa ke lombaka beto ve na kusala mambu na mutindu ya kukuka. Beto mpi, beto fwete vingila ve nde bantu ya nkaka kusala mambu na mutindu ya kukuka mpi beto fwete tula dikebi na bikalulu na bo ya mbote. Yo ke vandaka pete na kumona bifu ya bantu ya nkaka mpi na kusambisa bo. Kansi muntu ya kimpeve ke landaka kukangama ti bantu ya nkaka ata yandi ke zaba bifu na bo. Diama yina bo me yidika ve mpi yina bo me zenga ve ke semaka ve mingi kansi muntu ya mayele ke zabaka nde kana bo zenga yo mpi bo yidika yo, yo ta kuma kitoko, yo ta sema mingi mpi yo ta kuma na valere mingi. Bonso Yehowa mpi Yezu, beto fwete tula ve dikebi kaka na bifu ya bantu ya nkaka kansi beto fwete tula dikebi na bikalulu na bo ya mbote.
15. Inki mutindu kuyindula mambu yina bantu ke kutana ti yo lenda sadisa beto na kusambisa bo ve?
15 Katula kutula dikebi na bikalulu ya mbote ya bantu ya nkaka, nki lenda sadisa beto diaka na kusambisa bo ve? Sosa kuyindula mambu yina bo ke kutana ti yo. Beto tadila mbandu yai. Kilumbu mosi na tempelo, Yezu monaka mufwidi mosi ya nsukami ke tula mbongo zole ya fioti ya bibende ya ntalu fioti na kesi ya makabu. Yandi yulaka ve nde: “Sambu na nki yandi me tula ve mbongo mingi?” Yezu tulaka ve dikebi na ntalu ya mbongo yina mufwidi yina tulaka. Kansi yandi tulaka dikebi na mambu yina salaka nde mufwidi yina kutula mbongo yina mpi yandi sikisaka yandi sambu na mambu yonso yina yandi salaka.—Luka 21:1-4.
16. Mbandu ya mpangi Veronica ke longa nge nki?
16 Mbandu ya mpangi Veronica ke monisa sambu na nki yo kele mfunu na kuyindula mambu yina bantu ya nkaka ke kutana ti yo. Mama mosi yina vandaka ve ti bakala vandaka dibundu mosi ti mpangi Veronica mpi mama yango vandaka kuzinga ti mwana na yandi ya bakala. Mpangi Veronica ke tuba nde: “Yo vandaka kumonana bonso nde bo vandaka ve kukwisa na balukutakanu mbala na mbala mpi bo vandaka ve kulonga nsangu ya mbote mbala na mbala. Yo yina mono vandaka ti bangindu ya mbi sambu na bo. Kansi kilumbu mosi, mono longaka nsangu ya mbote ti mama yina. Yandi songaka mono nde mwana na yandi ke belaka maladi ya ntu. Yandi vandaka kusala yonso sambu na kulungisa bampusa na bo ya kimpeve mpi kusosa bima yina bo vandaka ti yo mfunu. Bantangu ya nkaka, yandi vandaka kusala balukutakanu na dibundu ya nkaka sambu na maladi ya mwana na yandi.” Mpangi Veronica ke tuba nde: “Mono zabaka ve nde yandi vandaka kukutana ti bampasi ya mutindu yina. Ntangu yai, mono me kumaka kuzola mpangi-nkento yina mingi mpi kuzitisa yandi mingi sambu na bikesa yina yandi ke salaka sambu na kusadila Yehowa.”
17. Yakobo 2:8 ke songa beto na kusala nki mpi nki mutindu beto lenda sala yo?
17 Inki beto fwete sala kana beto me bakisa nde beto me sambisa mpangi mosi? Beto vila ve nde beto fwete zola bampangi. (Tanga Yakobo 2:8.) Diaka, beto fwete samba Yehowa na masonga yonso sambu yandi sadisa beto na kusambisa ve bantu ya nkaka. Beto lenda baka lukanu ya kulutisa ntangu ti mpangi yina beto sambisaka sambu na kusala mambu yina ke wakana ti bisambu na beto. Yo lenda sadisa beto na kuzaba yandi. Beto lenda longa nsangu ya mbote ti yandi to beto lenda binga yandi sambu yandi dia ti beto. Kana beto me zaba yandi mbote, beto ta sala yonso sambu na kulanda mbandu ya Yehowa mpi ya Yezu ya kutula dikebi na bikalulu na yandi ya mbote. Kana beto sala mutindu yina, beto ta monisa nde beto ke zitisa nsiku ya ngungudi ya kuluta mbote ya kubika kusambisa.
18. Inki mutindu beto lenda monisa nde beto ke wa ndinga ya ngungudi ya mbote?
18 Kaka mutindu mameme ke waka ndinga ya ngungudi na bo, balongoki ya Yezu mpi ke waka ndinga na yandi. Kana beto ke sala bikesa ya kudiyangisa ve mingi sambu na bima yina beto kele ti yo mfunu mpi kana beto ke sambisa ve bantu ya nkaka, Yehowa mpi Yezu ta sakumuna bikesa yina beto ke sala. Yo vanda beto kele na kati ya “kimvuka ya fioti” to na kati ya “mameme ya nkaka,” beto fwete landa kuwa ndinga ya ngungudi ya mbote mpi kulemfukila yandi. (Luka 12:32; Yoa. 10:11, 14, 16) Na disolo ya ke landa, beto ta tubila mambu zole yina Yezu songaka balongoki na yandi na kusala.
NKUNGA 101 Beto Sala na Bumosi
^ par. 5 Ntangu Yezu tubaka nde mameme na yandi ta wa ndinga na yandi, yandi zolaka kutuba nde balongoki na yandi ta wa malongi na yandi mpi bo ta sadila yo na luzingu na bo. Na disolo yai, beto ta tadila malongi zole yina Yezu longaka. Dilongi ya ntete, beto fwete bika kudiyangisa sambu na bima yina beto kele ti yo mfunu mpi ya zole, beto fwete bika kusambisa bantu ya nkaka. Beto ta tubila mutindu beto lenda sadila malongi yango.
^ par. 51 NTENDULA YA BIFWANISU: Mpangi mosi kele diaka ve ti kisalu, yandi kele ve ti mbongo ya me fwana sambu na kudisa dibuta na yandi mpi yandi ke sosa nzo ya nkaka. Kana yandi keba ve, yandi lenda tula dikebi kaka na bampasi yina mpi yo lenda sala nde yandi tula ve Yehowa na kisika ya ntete.
^ par. 53 NTENDULA YA BIFWANISU: Mpangi mosi me kwisa na lukutakanu na retare. Kansi yandi kele mpi ti bikalulu ya mbote, mu mbandu yandi ke longa nsangu ya mbote na dibaku ya mbote, yandi ke sadisa mpangi mosi ya mununu mpi yandi ke tula bunkete na Nzo ya Kimfumu.
