Ntumwa Polo sonikilaka Bakristu ya Tesalonika nde: “Kana muntu ke lemfuka ve na mambu ya beto me sonika na mukanda yai, beno tula yandi kidimbu.” (2 Bate. 3:14) Ntete, beto vandaka kutuba nde bankuluntu bantu fwete sala yo. Kana mpangi mosi ke zitisa diaka ve minsiku ya Biblia ata bo ke pesa yandi bandongisila mbala na mbala, bankuluntu ta sala diskure sambu dibundu kukeba na muntu yango. Na nima, bansamuni ta vukana diaka ve ti muntu yina bo me tula kidimbu.

Kansi, beto fwete soba mutindu na beto ya kubakisa diambu yai. Yo ke monana nde mambu yina Polo ke tuba kele mpangi mosi-mosi na dibundu ta sala yo na mabaku ya nkaka. Yo yina, yo ta vanda mfunu ve nde bankuluntu kusala diskure ya lukebisu. Sambu na nki nsoba yai na mutindu na beto ya kubakisa mambu? Beto tadila baverse yina kele na ntwala mpi na nima ya ndongisila yai ya Polo.

Polo monaka nde bampangi ya nkaka “ke tambula na mutindu ya kisaka-saka.” Bo vandaka kulemfuka ve na bandongisila ya Nzambi. Na mbala ya ntete yina Polo kwendaka kutala bo, yandi zabisaka bo nde: “Kana muntu ke zola kusala ve, yandi dia mpi ve.” Kansi, bampangi ya nkaka vandaka kuzola ve kusala bisalu sambu na kuzwa bima ya kuzingila ata bo vandaka ti ngolo ya kusala kisalu. Diaka, bo vandaka kudikotisa na mambu ya bantu ya nkaka. Inki mutindu bo fwete zinga ti bantu yai ya vandaka kuditwadisa kisaka-saka?​—2 Bate. 3:6, 10-12.

Polo tubaka nde “beno tula yandi kidimbu.” Ngogo ya Kigreki ya bo me sadila awa ke tendula kukeba mingi na muntu yina. Polo ke tuba mambu yai sambu na dibundu ya mvimba kansi ve bankuluntu mpamba. (2 Bate. 1:1; 3:6) Yo ke tendula nde mpangi mosi-mosi ya ke mona nde mpangi mosi ke lemfuka ve na bandongisila ya Biblia ta baka lukanu ya ‘kuvukana diaka ve’ ti muntu yai ya kisaka-saka.

Keti yo ke tendula nde bo ta kuma kutadila mpangi yai bonso muntu ya bo me katulaka na dibundu? Ve, sambu Polo ke yika nde: “Beno landa kukebisa yandi bonso mpangi.” Bampangi ta landa kuvukana ti mpangi yai ya bo me tula kidimbu na balukutakanu mpi na kisalu ya kusamuna kansi bo ta vukana ve ti yandi na bafeti to sambu na kulutisa ntangu. Sambu na nki? Polo ke tuba nde: “Sambu yandi wa nsoni.” Kutula mpangi yango kidimbu lenda sala nde yandi wa nsoni ya mambu yina yandi ke sala mpi luzingu yina yandi me kuma ti yo.​—2 Bate. 3:14, 15.

Inki mutindu beto lenda sadila ndongisila yai bubu? Ntete, yo fwete monana pwelele nde luzingu ya mpangi kele ya “kisaka-saka,” mutindu Polo tubaka yo. Polo vandaka kutubila ve mambu yina mpangi mosi ke sala, yina beto ke sepelaka ve ti yo, kansi mambu yango ke fwa ve bansiku ya Yehowa. Yandi vandaka mpi kutubila ve bampangi yina me sala kima mosi yina pesaka beto mpasi. Kansi, yandi vandaka kutubila kibeni bampangi yina ke landa kusala mambu ya ke monisa pwelele nde bo ke lemfuka ve na bandongisila ya Nzambi yina kele na Biblia.

Bubu yai, kana beto me bakisa nde mpangi mosi ke zola ve kulemfukila Nzambi, a beto ta kangamaka diaka ve ti yandi na bantangu ya kulutisa ntangu. Sambu yo kele lukanu na beto mosi, beto ta tubila yo ve ti bampangi yina kele ve bantu ya dibuta na beto. Beto ta landaka kuvukana ti mpangi yango na balukutakanu mpi na kisalu ya kusamuna. Kana yandi me soba mpi me kuma ti bikalulu ya mbote, beto ta kuma diaka kukangama ti yandi.