1. Inki mutindu bampangi ya nkaka ke waka ntangu bo ke longaka bantu ya nkaka nsangu ya mbote? (Tala mpi kifwanisu ya ke wakana ti paragrafe yai.)

 BETO Bansadi ya Yehowa, beto ke longaka bantu ya nkaka nsangu ya mbote sambu beto ke zolaka Tata na beto ya zulu mpi beto ke zolaka kusadisa bo na kuzaba yandi mpi. Bansamuni mingi ke sepelaka kulonga nsangu ya mbote, kansi bankaka ke sepelaka mpenza ve. Sambu na nki? Bankaka ke vandaka nsoni-nsoni mpi bo ke yindulaka nde bo ke vandaka ve balongi ya mbote. Bankaka ke waka ve mbote ntangu bo ke kwendaka na banzo ya bantu kukonda nde bo bingisa bo. Bankaka lenda wa boma nde bantu ta ndima ve nsangu na bo. Bankaka, bibuti na bo me longaka bo nde bo fwete sala ve mambu yina ta pesa bantu ya nkaka makasi. Ata bampangi yina ke zolaka Yehowa mingi kibeni, yo ke vandilaka bo mpasi na kulonga nsangu ya mbote na bantu yina bo me zaba ve. Kansi bo ke zabaka nde kulonga nsangu ya mbote ke vandaka mfunu mingi mpi bo ke salaka yo mbala na mbala. Yehowa ke sepelaka ti bo mingi kibeni.

2. Sambu na nki nge fwete lemba ve nitu kana bantangu ya nkaka nge ke sepela ve ti kisalu ya kulonga nsangu ya mbote?

² Keti bantangu ya nkaka nge mpi ke sepelaka ve kulonga nsangu ya mbote sambu nge ke nwanaka ti bangindu ya mutindu yina? Kana mpidina, kulemba ve nitu. Kana nge ke kuditudilaka ve ntima, yo lenda monisa nde nge kele muntu ya kudikulumusa mpi nde nge ke zolaka ve kubenda dikebi ya bantu na kimuntu na nge. Yo ke monisa mpi nde nge ke zolaka ve kuswana ti bantu. Diaka, ata muntu mosi ve ke zolaka nde bantu kundima yandi ve, mingi-mingi ntangu yandi ke sosa kusadila bo mambu ya mbote. Tata na nge ya zulu ke zaba mbote kibeni mambu ya mpasi yina nge ke kutana ti yo mpi yandi ke zola kusadisa nge. (Yez. 41:13)  Na disolo yai, beto ta tubila mambu tanu yina ta sadisa nge na kukatula bangindu yina mpi na kusepela ti kisalu ya kulonga nsangu ya mbote.

BAKA KIKESA NA NDINGA YA NZAMBI

3. Inki sadisaka profete Yeremia na kulonga bantu ya nkaka?

³ Banda na ntangu ya ntama, bansadi ya Nzambi vandaka kubaka kikesa na Ndinga na yandi, ntangu bo vandaka ti mikumba ya mfunu ya kulungisa. Beto baka mbandu ya profete Yeremia. Yandi waka boma ntangu Yehowa pesaka yandi mukumba ya kulonga nsangu ya mbote. Yandi tubaka nde: “Mono me zaba ve kutuba, sambu mono kele kaka leke.” (Yer. 1:6) Inki pesaka yandi kikesa? Mambu yina Nzambi songaka yandi pesaka yandi kikesa. Yandi tubaka nde: “Yo kumaka bonso tiya ya ke pela, yina bo me kanga na mikwa na mono, mpi mono lembaka na kubumba yo.” (Yer. 20:8, 9) Ata Yeremia vandaka ti teritware ya mpasi, mambu yina yandi zolaka kusonga bantu ya teritware na yandi pesaka yandi kikesa ya kulungisa mukumba yina.

4. Inki ke salamaka kana beto ke tanga Ndinga ya Nzambi mpi beto ke yindula mingi mambu yina beto ke tanga? (Bakolosai 1:9, 10)

⁴ Bakristu ke bakaka kikesa na Ndinga ya Nzambi. Ntangu ntumwa Polo sonikilaka dibundu ya Kolose mukanda, yandi songaka bo nde kana bo ke zaba mbote luzolo ya Nzambi, yo ta pusa bo na ‘kutambula na mutindu yina me fwana na Yehowa’ sambu bo landa “kubuta mbuma na konso kisalu ya mbote.” (Tanga Bakolosai 1:9, 10.) Kisalu yina ya mbote kele mpi kisalu ya kulonga nsangu ya mbote. Yo yina, kana beto ke tanga Ndinga ya Nzambi mpi beto ke yindula mingi mambu yina beto ke tanga, yo ke kumisaka ngolo lukwikilu na beto na Yehowa mpi yo ke sadisaka beto na kubakisa mbote-mbote mfunu ya kulonga nsangu ya mbote ya Kimfumu.

5. Inki mutindu beto lenda baka mambote ntangu beto ke tanga Biblia mpi ke longuka yo?

⁵ Sambu na kubaka kibeni mambote na Ndinga ya Nzambi, beto fwete tanga yo ve nswalu-nswalu, beto fwete longuka yo ve nswalu-nswalu mpi beto fwete yindula ve nswalu-nswalu mambu yina beto ke tanga. Beto fwete baka kibeni ntangu ya kusala mambu yina. Kana nge me tanga verse mosi mpi nge me bakisa yo ve mbote, kuluta yo ve nswalu. Kansi sadila Index des publications des Témoins de Jéhovah to Mukanda ya Bansosa Sambu na Bambangi ya Yehowa sambu na kusosa ntendula na yo. Kana nge ke baka kibeni ntangu ya kulonguka Ndinga ya Nzambi, nge ta kuma kundima kibeni nde yo kele kieleka. (1 Bate. 5:21) Kana nge ke ndima kibeni nde Ndinga ya Nzambi kele kieleka, nge ta vanda na  kiese ya kusonga bantu ya nkaka mambu yina nge me longuka.

YILAMA MBOTE SAMBU NA KISALU YA KULONGA NSANGU YA MBOTE

6. Sambu na nki beto fwete yilama mbote na ntwala ya kulonga nsangu ya mbote?

⁶ Kana nge ke yilama mbote na ntwala ya kulonga nsangu ya mbote, nge ta kudiwa mbote ntangu nge ta solula ti bantu. Yezu sadisaka balongoki na yandi na kuyilama na ntwala nde yandi tinda bo na kulonga nsangu ya mbote. (Luka 10:1-11) Sambu bo sadilaka mambu yina Yezu longaka bo, bo salaka mambu mingi ya mbote mpi yo pesaka bo kiese mingi.​—Luka 10:17.

7. Inki mutindu beto lenda yilama na ntwala ya kulonga nsangu ya mbote? (Tala mpi kifwanisu ya ke wakana ti paragrafe yai.)

⁷ Inki mutindu beto lenda yilama sambu na kulonga nsangu ya mbote? Beto fwete yindula mambu yina beto ta tuba mpi beto tuba yo na pete mpi na bangogo na beto mosi. Beto lenda yindula mpi na ntwala mambu yina bantu lenda tuba ntangu beto ke longa bo nsangu ya mbote mpi bamvutu yina beto ta pesa bo. Yo yina ntangu beto ke solula ti bantu, beto fwete sala yonso sambu na kuwa ve boma, beto fwete mweta mpi beto fwete vanda mawete.

8. Inki mutindu Bakristu kele bonso mabungu ya ntoto yina ntumwa Polo tubilaka na mbandu na yandi?

⁸ Ntumwa Polo tubilaka mukumba yina beto kele ti yo na kisalu ya kulonga nsangu ya mbote ntangu yandi tubaka nde: “Beto kele ti kimvwama yai na mabungu ya ntoto.” (2 Bak. 4:7) Kimvwama yango kele nki? Yo kele kisalu ya kulonga nsangu ya mbote ya Kimfumu, yina ke gulusaka luzingu ya bantu. (2 Bak. 4:1) Ebuna, mabungu ya ntoto kele nki? Yo kele bansadi ya Nzambi, yina ke longaka bantu ya nkaka nsangu ya mbote. Na bilumbu ya Polo, bantu ya mumbongo vandaka kusadila mabungu ya ntoto sambu na kunata bima ya valere. Mu mbandu madia, malafu mpi mbongo. Mutindu mosi, Yehowa me pesaka beto nsangu ya mbote yina kele mfunu mingi. Yehowa ke sadisaka beto, yandi ke pesaka beto ngolo yina beto kele ti yo mfunu sambu na kulanda kulonga nsangu ya mbote.

LOMBA YEHOWA KIKESA

9. Inki mutindu beto lenda katula boma ya bantu mpi boma nde bantu kubuya nsangu ya mbote? (Tala mpi kifwanisu ya ke wakana ti paragrafe yai.)

⁹ Bantangu ya nkaka, beto lenda wa bantu boma to beto lenda wa boma nde bo ndima ve nsangu ya mbote. Inki mutindu beto lenda katula boma yina? Beto tadila kisambu yina bantumwa  salaka ntangu bo buyisaka bo na kulonga nsangu ya mbote. Bo waka ve boma, kansi bo lombaka Yehowa na kusadisa bo na ‘kulanda kutuba ndinga na yandi ti kikesa yonso.’ Na mbala mosi, Yehowa pesaka mvutu na kisambu yina. (Bis. 4:18, 29, 31) Kana beto mpi ke wa bantu boma bantangu ya nkaka, beto fwete lomba Yehowa lusadisu. Lomba Yehowa na kusadisa nge na kuyedisa zola na nge sambu na bantu, sambu nge wa ve boma ya kulonga bo nsangu ya mbote.

10. Inki mutindu Yehowa ke sadisaka beto na kulungisa mukumba na beto ya kuvanda Bambangi na yandi? (Yezaya 43:10-12)

¹⁰ Yehowa me ponaka beto na kuvanda Bambangi na yandi mpi yandi ke sila nde yandi ta pesa beto kikesa. (Tanga Yezaya 43:10-12.) Beto tadila mitindu iya yina yandi ke pesaka beto kikesa. Ya ntete, Yezu ke vandaka ti beto konso ntangu yina beto ke longaka nsangu ya mbote. (Mat. 28:18-20) Ya zole, Yehowa me tulaka bawanzio sambu na kusadisa beto. (Kus. 14:6) Ya tatu, Yehowa ke pesaka beto mpeve santu na yandi sambu yo sadisa beto na kuyibuka mambu yina beto longukaka. (Yoa. 14:25, 26) Ya iya, Yehowa me pesaka beto bampangi na dibundu sambu beto longa nsangu ya mbote ti bo. Lusadisu yina Yehowa ke pesaka beto mpi yina bampangi yina ke zolaka beto ke pesaka beto, ke sadisaka beto na kuvanda kikesa mpi na kulanda kulonga nsangu ya mbote.

YIKAMA TI BANTU MPI VANDA TI BANGINDU YA MBOTE SAMBU NA BO

11. Inki nge lenda sala sambu na kuzwa bantu mingi ntangu nge ke longa nsangu ya mbote? (Tala mpi kifwanisu ya ke wakana ti paragrafe yai.)

¹¹ Keti nge ke lembaka nitu ntangu nge ke kutaka ve bantu mingi na banzo na bo? Nge lenda kudiyula nde: ‘Bantu ya teritware na mono kele na wapi ntangu yai?’ (Bis. 16:13) ‘Keti bo kele na kisalu to bo me kwenda kusumba bima to kuteka?’ Kana mpidina, nge lenda zwa bantu mingi kana nge longa nsangu ya mbote na bala-bala. Mpangi Joshua ke tuba nde: “Mono ke zwaka bantu mingi ntangu mono ke longaka nsangu ya mbote na bazandu mpi na bisika ya bantu mingi.” Yandi ti nkento na yandi Bridget ke kutaka mpi bantu mingi na banzo ntangu bo ke kwendaka na bankokila to na Lumingu na nima ya midi.​—Baef. 5:15, 16.

12. Inki mutindu beto lenda zaba mambu yina bantu ke kwikilaka mpi yina ke yangisa bo?

¹² Kana bantu ke sepela ve ti nsangu ya mbote, sosa kuzaba mambu yina bo ke kwikilaka mpi  mambu yina ke yangisa bo. Mpangi Joshua ti nkento na yandi Bridget ke sadilaka ngiufula yina ke vandaka na luyantiku ya trakiti sambu na kuyantika kusolula ti bantu. Mu mbandu, ntangu bo ke sadilaka trakiti Inki Mutindu Nge Ke Monaka Biblia? bo ke tubaka nde: “Bantu ya nkaka ke yindulaka nde Biblia kele mukanda ya Nzambi, kansi bankaka ke yindulaka ve mpidina. Ebuna nge, nge ke yindula nki?” Mbala mingi yo ke salaka nde bo yantika kusolula ti muntu yina bo ke longa nsangu ya mbote.

13. Sambu na nki beto ke lungisaka kaka mukumba na beto ata bantu ke ndima ve nsangu ya mbote? (Bingana 27:11)

¹³ Ata bantu ke ndima ve nsangu ya mbote yina beto ke longa bo, beto ke lungisaka kaka mukumba na beto. Sambu na nki? Sambu beto me longa nsangu ya mbote mutindu Yehowa mpi Yezu ke lomba beto. (Bis. 10:42) Ata kana beto me zwa ve muntu mosi ya kulonga nsangu ya mbote to kana bantu ke ndima ve nsangu ya mbote, beto lenda vanda kaka na kiese sambu beto me zaba nde Tata na beto ya zulu ke sepela ti beto.​—Tanga Bingana 27:11.

14. Sambu na nki beto fwete vanda na kiese kana nsamuni mosi me zwa muntu mosi yina ke sepela ti nsangu ya mbote?

¹⁴ Beto fwete vanda mpi na kiese kana nsamuni mosi me zwa muntu mosi ya ke sepela ti nsangu ya mbote na teritware. Nzozulu ya Nkengi fwanisaka kisalu ya kulonga nsangu ya mbote ti kusosa mwana mosi yina me vila. Bantu mingi ke sosaka yandi na bisika ya mutindu na mutindu. Kana mwana yina me monana, kaka ve muntu yina monaka yandi mpamba muntu ke sepelaka kansi bantu yonso. Mutindu mosi mpi, bantu yonso na dibundu ke sadisaka sambu na kukumisa bantu balongoki ya Yezu. Beto yonso ke vandaka mfunu sambu na kulonga bantu yonso na teritware nsangu ya mbote mpi beto ke vandaka na kiese kana muntu mosi me yantika kukwisa na balukutakanu.

ZOLA YEHOWA MPI BANTU

15. Inki mutindu Matayo 22:37-39 lenda sadisa beto na kukuma kusepela mingi ti kisalu ya kulonga nsangu ya mbote? (Tala mpi ya lutiti ya zulu.)

¹⁵ Beto ta kuma kusepela mingi ti kisalu ya kulonga nsangu ya mbote kana beto ke yibuka ntangu yonso nde yo kele mutindu ya mbote ya kumonisa nde beto ke zolaka Yehowa mpi bantu. (Tanga Matayo 22:37-39.) Yindula kiese ya mingi yina Yehowa ke waka ntangu beto ke longaka nsangu ya mbote mpi yindula mutindu bantu ke vandaka na kiese ntangu bo ke yantikaka kulonguka Biblia. Kuvila ve nde bantu yina ke waka  nsangu ya mbote mpi ke bakaka lukanu ya kusadila Yehowa lenda zinga mvula na mvula.​—Yoa. 6:40; 1 Tim. 4:16.

16. Inki mutindu beto lenda vanda na kiese na kisalu ya Yehowa ata kana beto me kangama na nzo? Pesa bambandu.

¹⁶ Keti nge me kangamaka na nzo sambu na kikuma mosi buna? Kana mpidina, yindula mambu yina nge lenda sala sambu na kumonisa nde nge ke zolaka Yehowa mpi nge ke zolaka bantu. Mpangi Samuel ti nkento na yandi Dania kangamaka kaka na nzo na nsungi ya coronavirus. Na ntangu yina ya mpasi, mbala na mbala bo vandaka kulonga bantu nsangu ya mbote na nzila ya telefone, bo vandaka kusonikila bo mikanda mpi bo vandaka kulonguka Biblia ti bantu na nzila ya Zoom. Mpangi Samuel vandaka mpi kulonga nsangu ya mbote na bantu yina yandi vandaka kukutana ti bo na opitale ntangu bo vandaka kusansa yandi sambu na maladi ya kansere. Yandi ke tuba nde: “Ntangu beto ke kutana ti bampasi, beto lenda kudiyangisa mingi, beto lenda lemba kibeni mpi lukwikilu na beto lenda mekama. Yo yina, kisalu ya Yehowa lenda pesa beto kiese.” Na bantangu yina ya mpasi, mpangi Dania bwaka mpi yandi kangamaka kaka na mbeto bangonda tatu. Na nima, yandi kumaka kusadila velo ya bikata bangonda 6. Yandi ke tuba nde: “Mono salaka yonso yina makuki na mono vandaka kupesa mono nzila ya kusala. Mono vandaka kulonga nsangu ya mbote na munganga yina vandaka kusansa mono mpi na bantu yina vandaka kunatila beto bima na nzo. Mono vandaka mpi kusolula mbote na telefone ti nkento mosi yina ke salaka na kompani mosi ya ke tekaka bima yina minganga ke sadilaka.” Mambu yina mpangi Samuel ti nkento na yandi Dania kutanaka ti yo salaka nde bo sala diaka ve mingi na kisalu ya Yehowa mutindu bo vandaka kusala ntete. Kansi, bo vandaka na kiese sambu bo vandaka kusala yonso yina bo lendaka kusala.

17. Inki mutindu mambu yonso yina beto me tubila na disolo yai lenda sadisa nge?

¹⁷ Kana nge me sadila mambu yonso yina beto me longuka na disolo yai, yo ta sadisa nge mbote. Konso kima yina beto me longuka kele bonso epise mosi yina bo me tula na madia. Kana madia me kota ba-epise yonso, yo ke vandaka ntomo. Kana beto me sadila mambu yonso yina beto me longuka, beto ta vanda ya kuyilama mbote sambu na kukatula bangindu yina ya mbi mpi na kusepela mingi ti kisalu ya kulonga nsangu ya mbote.