DISOLO YA KULONGUKA 7
NKUNGA 15 Lukumu na Yezu!
Inki Mambote Nge Ke Bakaka Mutindu Yehowa Ke Lolulaka Beto?
“Nge ke lolulaka na masonga yonso.”—NK. 130:4.
NA BUNKUFI
Beto ta longuka mwa bambandu ya kifwani ya Biblia yina ta sadisa beto na kumonisila diaka Yehowa ntonda mingi mutindu yandi ke lolulaka beto.
1. Sambu na nki yo ke vandaka mpasi na kubakisa kima yina muntu ke zola kutuba ntangu yandi me tuba nde: “Mono me lolula nge”?
“MONO ME LOLULA NGE.” Kana muntu me songa nge mambu yai, yo ke bwisaka mpenza ntima, mingi-mingi kana nge ke zaba nde nge tubaka to nge salaka kima mosi ya pesaka muntu yango mpasi. Kansi bangogo “mono me lolula nge” ke tendula kibeni nki? Keti muntu ya ke songa nge yo ke zola kutuba nde kinduku na beno kele kaka ngolo ata nge tubaka to nge salaka kima yina pesaka yandi mpasi? To keti yo ke tendula kaka nde yandi ke zola diaka ve kutubila diambu yina? Yo ke vandaka mpasi na kubakisa mbote mambu ya muntu ke zola kutuba ntangu yandi me tuba nde: “Mono me lolula nge.”
2. Biblia ke tuba nde Yehowa ke lolulaka nki mutindu? (Tala mpi noti na nsi ya lutiti.)
2 Mutindu Yehowa ke lolulaka beto me swaswana kibeni ti mutindu beto ke lolulaka bantu. Ata muntu mosi ve lenda lolula muntu mutindu Yehowa ke lolulaka. Muyimbi-bankunga tubaka sambu na Yehowa nde: “Nge ke lolulaka na masonga yonso, sambu bantu kuwa nge boma.” a (Nk. 130:4) Ya kieleka, Yehowa ke lolulaka “na masonga yonso.” Yandi muntu ke songaka beto mambu yina kulolula ke tendulaka mpenza. Na baverse ya nkaka, bantu yina sonikaka Biblia sadilaka ngogo mosi ya Kiebreo sambu na kutubila kaka mutindu Yehowa ke lolulaka kansi ve mutindu bantu ke lolulaka.
3. Sambu na nki mutindu Yehowa ke lolulaka me swaswana ti mutindu beto ke lolulaka? (Yezaya 55:6, 7)
3 Kana Yehowa me lolula muntu, yandi ke vwansaka kibeni masumu ya muntu yango mpi kinduku na yandi yina bebaka ti muntu yango, ke vutukaka mutindu yo vandaka ntete. Yehowa ke lolulaka kibeni na masonga mpi na ntima ya mvimba.—Tanga Yezaya 55:6, 7.
4. Inki mutindu Yehowa ke sadisaka beto na kubakisa ntendula ya kulolula na masonga yonso?
4 Kana mutindu Yehowa ke lolulaka beto me swaswana ti mutindu beto ke lolulaka bantu, nki mutindu beto bantu ya kukonda kukuka lenda bakisa kibeni ntendula ya kulolula na masonga yonso? Yehowa ke sadilaka bambandu ya kifwani ya kitoko sambu na kusadisa beto na kubakisa mutindu yandi ke lolulaka. Na disolo yai, beto ta tadila mwa bambandu yango. Yo ta sadisa beto na kubakisa mutindu Yehowa ke katulaka masumu na beto mpi mutindu yandi ke vutulaka diaka kinduku ya mbote ti beto. Ntangu beto ke tadila bambandu yango, yo ta sadisa beto na kukumisa ngolo zola na beto sambu na Yehowa Tata na beto mpi na kumonisila yandi ntonda mingi mutindu yandi ke lolulaka beto na mitindu mingi.
YEHOWA KE KATULAKA MASUMU NA BETO
5. Inki ke salamaka kana Yehowa me lolula masumu na beto?
5 Mbala mingi, Biblia ke fwanisaka masumu ti bizitu ya kilo. Ntotila Davidi tubaka mambu yai sambu na masumu yina yandi salaka: “Bifu na mono kele na zulu ya ntu na mono; bonso kizitu ya kilo, yo me lutila mono mpila ya kunata yo kele ve.” (Nk. 38:4) Kansi Yehowa ke lolulaka masumu ya bantu yina ke balulaka ntima. (Nk. 25:18; 32:5) Ngogo ya Kiebreo ya bo me balula nde “lolula” ke tendula ntete-ntete “kunangula” to “kunata.” Beto lenda fwanisa Yehowa ti muntu mosi ya ngolo yina ke nangula na mutindu ya kifwani kizitu ya masumu yina kele na mapeka na beto mpi ke nata yo.
“Lolulaka” (Nk. 32:5)
6. Na nki mutindu Yehowa ke nataka masumu na beto ntama?
6 Biblia ke sadilaka mbandu ya nkaka ya kifwani sambu na kutubila mutindu Yehowa ke nataka masumu na beto ntama ti beto. Nkunga 103:12 ke tuba nde: “Mutindu kisika yina ntangu ke basikaka kele ntama ti kisika yina ntangu ke dindaka, mutindu mosi mpi, yandi me tulaka mambu na beto ya mbi ntama ti beto.” Esti kele ntama mingi kibeni ti westi. Bisika yai ke kutanaka ve ata fioti. Yo ke tendula nde Yehowa ke nataka masumu na beto ntama kibeni kuluta mutindu beto lenda yindula. Yo ke ndimisa beto nde Yehowa ke lolulaka beto kibeni na masonga yonso!
“Mutindu kisika yina ntangu ke basikaka kele ntama ti kisika yina ntangu ke dindaka” (Nk. 103:12)
7. Biblia ke tuba nde Yehowa ke salaka masumu na beto nki? (Mika 7:18, 19)
7 Ata Yehowa ke nataka masumu na beto ntama ti beto na mutindu ya kifwani, keti yandi ke bumbaka yo na kisika mosi? Ve. Ntotila Ezekiasi sonikaka sambu na Yehowa nde: “Nge me losa masumu na mono yonso na nima ya mukongo na nge.” Noti na nsi ya lutiti ke tuba nde “nge me katula masumu na mono yonso na meso na nge.” (Yez. 38:9, 17; noti na nsi ya lutiti.) Mbandu yai ya kifwani ke monisa nde Yehowa ke losaka ntama kibeni masumu ya bantu yina me balula ntima mpi yandi ke talaka yo diaka ve. Beto lenda balula mpi mambu yina Ezekiasi tubaka nde: “Nge me sala nde [masumu na mono] kukuma bonso nde yo salamaka ve.” Na Mika 7:18, 19, Biblia ke sadila mbandu ya nkaka ya kifwani sambu na kubula munsonso na mutindu Yehowa ke lolulaka. (Tanga.) Verse yai ke tuba nde Yehowa ke losaka masumu na beto na bisika ya mudindu ya nzadi-mungwa. Na ntangu ya ntama, kana bo me losa kima mosi na bisika ya mudindu ya nzadi-mungwa, bo lendaka diaka ve kuzwa yo.
“Nge me losa masumu na mono yonso na nima ya mukongo na nge” (Yez. 38:17)
“Nge ta losa masumu na bo yonso na bisika ya mudindu ya nzadi-mungwa” (Mika 7:19)
8. Inki beto me longuka tii pana?
8 Bambandu yai ya kifwani ke longa beto nde kana Yehowa me lolula beto, yandi ke katulaka beto kizitu ya masumu na beto. Ya kieleka, mutindu Davidi tubaka yo, “kiese na bantu yina bo me lolula mambu na bo ya ke fwaka nsiku mpi yina bo me fika masumu na bo; kiese na muntu yina Yehowa ta yibuka diaka ve disumu na yandi.” (Bar. 4:6-8) Yo ke tendula kibeni kulolula na masonga yonso!
YEHOWA KE VWANSAKA MASUMU NA BETO
9. Inki bambandu ya kifwani Yehowa ke sadilaka sambu na kusadisa beto na kubakisa mutindu yandi ke lolulaka beto?
9 Yehowa ke sadilaka bambandu ya nkaka ya kifwani sambu na kusadisa beto na kubakisa mutindu yandi ke vwansaka na nsadisa ya kimenga ya Yezu masumu ya bantu yina ke balulaka ntima. Yehowa ke yobisaka masumu na beto mpi ke dipaka yo na mutindu ya kifwani. Yo ke salaka nde muntu yina me sala masumu kukuma bunkete. (Nk. 51:7; Yez. 4:4; Yer. 33:8) Yehowa yandi mosi ke tubila mambote yina kusala mutindu yai ke nataka: “Ata masumu na beno kele mbwaki bonso menga, yo ta kuma mpembe bonso mvula ya mpembe; ata yo kele mbwaki bonso lele ya mbwaki ya ngolo, yo ta kuma bonso lene.” (Yez. 1:18) Yo ke vandaka mpasi mingi na kukatula batashe ya mbwaki ya ngolo na lele. Kansi Yehowa ke sadila mbandu yai ya kifwani sambu na kundimisa beto nde yandi lenda yobisa mbote-mbote masumu na beto mpi yo monana diaka ve.
“Ata masumu na beno kele mbwaki bonso menga, yo ta kuma mpembe bonso mvula ya mpembe” (Yez. 1:18)
10. Inki mbandu ya nkaka ya kifwani Yehowa ke sadila sambu na kutubila mutindu yandi ke lolulaka beto?
10 Mutindu beto monaka yo na disolo ya me luta, masumu kele bonso “bamfuka.” (Mat. 6:12 noti na nsi ya lutiti; Luka 11:4) Yo yina konso ntangu yina beto ke salaka disumu, na mutindu mosi buna beto ke yikaka mfuka na zulu ya mfuka. Beto ke vandaka ti mfuka ya Yehowa ya mingi mpenza! Kansi ntangu Yehowa ke lolulaka beto, na mutindu mosi buna yandi ke katulaka mfuka na yandi yina beto kele ti yo. Yandi ke lombaka beto ve na kufuta mfuka ya masumu yina yandi me lolulaka beto dezia. Mbandu yai ya kifwani ke monisa kiese ya mingi yina beto ke waka kana Yehowa me lolula masumu na beto!
“Lolula masumu na beto” (Mat. 6:12)
11. Ntangu Biblia ke tubaka nde Yehowa ke ‘vwansaka’ masumu na beto, yo ke tendulaka nki? (Bisalu 3:19)
11 Yehowa ke sukaka ve kaka na kukatula bamfuka na beto to masumu na beto, kansi yandi ke vwansaka yo mpi. (Tanga Bisalu 3:19.) Beto baka mbandu mosi: Kana muntu me katula mfuka na yandi yina nge vandaka ti yo, yandi lenda barrer na papie ntalu ya mbongo yina nge zolaka kufuta yandi. Kansi nge lenda mona kaka ntalu ya mbongo yina ata yandi me barrer yo. Ku barrer me swaswana kibeni ti kuvwansa. Sambu na kubakisa mbandu yai, beto vila ve nde na ntangu ya ntama, bo vandaka kuvukisa carbone, kole mpi masa sambu na kusala tinta yina bo vandaka kusadila mingi. Muntu lenda panza bisono yina ti musu ya masa. Yo yina kana muntu me “vwansa” mfuka na yandi yina nge kele ti yo, yo ke tendula nde yo me waluka kibeni. Bantu lenda mona diaka ve mambu yina bo sonikaka pana. Yo kele bonso nde nge bakaka ve mfuka yina. Yo ke pesa beto kiese mingi na kuzaba nde Yehowa ke sukaka ve kaka na kukatula masumu na beto, kansi yandi ke vwansaka yo kibeni!—Nk. 51:9.
“Sambu bo vwansa masumu na beno” (Bis. 3:19)
12. Mbandu ya kifwani ya dituti ya nene ke tendula nki sambu na beto?
12 Yehowa ke sadila mpi mbandu ya nkaka ya kifwani ya mutindu mosi sambu na kutubila mutindu yandi ke vwansaka kibeni masumu na beto. Yandi ke tuba nde: “Mono ta dipa mambu na nge ya mbi bonso ti dituti mpi masumu na nge bonso ti dituti ya nene.” (Yez. 44:22) Ntangu Yehowa ke lolulaka masumu na beto, yo kele bonso nde yandi ke sadilaka dituti mosi ya nene sambu na kufika masumu yango sambu beto yonso, ti yandi mosi mpi, kumona yo diaka ve.
“Mono ta dipa mambu na nge ya mbi bonso ti dituti” (Yez. 44:22)
13. Kana Yehowa me lolula masumu na beto, nki beto fwete yindula ve?
13 Yo ke tendula nki sambu na beto? Kana Yehowa me lolula masumu na beto, beto fwete yindula ve nde tashe ya disumu ya beto salaka ta katuka diaka ve luzingu na beto ya mvimba mpi beto fwete kudiyangisa diaka ve sambu na yo. Kimenga ya Yezu Kristu me futaka kibeni mfuka ya masumu na beto. Kana Yehowa me lolula masumu na beto, yo kele bonso nde beto salaka yo ve ata fioti. Kana beto me balula ntima na masumu na beto, Yehowa ke lolulaka beto mutindu yai.
YEHOWA KE VUTULAKA KINDUKU YA MBOTE TI BETO
Mutindu Tata na beto ya zulu ke lolulaka beto ke sadisaka beto na kuvanda ti kinduku ya mbote ti yandi (Tala paragrafe 14)
14. Sambu na nki beto fwete ndima nde Yehowa ke lolulaka beto kibeni na ntima ya mvimba? (Tala mpi bifwanisu.)
14 Kana Yehowa me lolula beto, yandi ke vutulaka kinduku ya mbote ti beto. Yo ke sadisaka beto na kudiyangisa diaka ve. Beto fwete wa ve boma nde Yehowa me kangila beto makasi mpi nde yandi ke sosa kupesa beto ndola. Yandi ta sala yo ve ata fioti. Sambu na nki beto fwete tudila Yehowa ntima kana yandi me tuba nde yandi me lolula beto? Yehowa songaka profete Yeremia nde: “Mono ta lolula kifu na bo, mpi mono ta yibuka diaka ve masumu na bo.” (Yer. 31:34) Ntumwa Polo vutukilaka mpi mambu yai ntangu yandi tubaka nde: “Mono ta yibuka diaka ve masumu na bo.” (Baeb. 8:12) Kansi yo ke tendula kibeni nki?
“Mono ta yibuka diaka ve masumu na bo” (Yer. 31:34)
15. Ntangu Yehowa ke tubaka nde yandi ke yibuka diaka ve masumu na beto, yo ke tendulaka nki?
15 Na Biblia, ngogo “kuyibuka” ke tendulaka ve ntangu yonso kuyindula to kukonda kuvila kima mosi ya salamaka. Kansi yo lenda tendula mpi kusala kima mosi. Muntu ya mbi yina bo tulaka na nti ya mpasi na lweka ya Yezu songaka yandi nde: “Yezu, yibuka mono ntangu nge ta kwisa na Kimfumu na nge.” (Luka 23:42, 43) Yandi vandaka ve kaka kusonga Yezu na kuyindula yandi na ntangu yango. Mvutu ya Yezu monisaka nde yandi ta futumuna yandi. Yo yina kana Yehowa me tuba nde yandi ke yibuka diaka ve masumu na beto, yo ke tendula nde yandi ta sala beto ve ata kima mpi yandi ta pesa beto ve ndola sambu na yo.
16. Biblia ke fwanisaka beto ti banani?
16 Biblia ke sadilaka mbandu ya nkaka ya kifwani sambu na kusadisa beto na kubakisa kimpwanza yina beto ke kumaka na yo kana Yehowa me lolula beto. Beto kele “bampika ya disumu” sambu beto kele bantu ya kukonda kukuka. Kansi ntangu Yehowa ke lolulaka beto, beto ke kumaka bonso bampika yina bo me ‘katula na kimpika ya disumu.’ (Bar. 6:17, 18; Kus. 1:5) Ya kieleka, kana beto me zaba nde Yehowa me lolula beto, beto ke vandaka na kiese bonso muntu mosi ya bo me katula na kimpika.
“Bo me katulaka beno na kimpika ya disumu” (Bar. 6:18)
17. Na nki mutindu beto ke belukaka ntangu Yehowa ke lolulaka beto? (Yezaya 53:5)
17 Tanga Yezaya 53:5. Mbandu ya nsuka ya kifwani yina beto ta longuka ke fwanisa beto ti bantu yina ke belaka maladi mosi ya ngolo ya ke nataka na lufwa. Yehowa me belulaka beto na mutindu ya kifwani na nsadisa ya kimenga ya Mwana na yandi yina yandi me pesaka. (1 Pie. 2:24) Kimenga ya Yezu ke yidikaka mbote-mbote kinduku na beto ti Yehowa yina ke bebaka sambu na masumu ya beto ke salaka. Kana muntu mosi yina vandaka kubela maladi ya ngolo me beluka, yandi ke waka kiese mingi kibeni. Beto ke waka mpi kiese mingi kana Yehowa me belula beto na kimpeve mpi me ndima beto diaka.
“Beto belukaka sambu na bamputa na yandi” (Yez. 53:5)
MUTINDU YEHOWA KE LOLULAKA BETO KE TENDULA NKI SAMBU NA BETO?
18. Bambandu ya kifwani ya Biblia ya ke tubila mutindu Yehowa ke lolulaka beto ke longa beto nki? (Tala mpi lupangu “Mutindu Yehowa Ke Lolulaka Beto.”)
18 Inki beto me longuka na bambandu ya kifwani ya Biblia ya ke tubila mutindu Yehowa ke lolulaka beto? Beto me longuka nde yandi ke lolulaka masumu na beto na ntima ya mvimba mpi ke yibukaka yo diaka ve ata fioti. Yo ke sadisaka beto na kuvanda ti kinduku ya mbote ti Tata na beto ya zulu. Diaka beto ke vilaka mpi ve nde kikalulu ya Yehowa ya kulolula na masonga yonso, kele dikabu yina yandi ke pesaka beto sambu yandi ke zolaka beto mingi mpi sambu na ntima ya mbote na yandi ya nene kansi ve sambu beto me fwana nde yandi lolula beto.—Bar. 3:24.
19. (a) Sambu na nki beto fwete monisila Yehowa ntonda mingi? (Baroma 4:8) (b) Inki beto ta longuka na disolo ya ke landa?
19 Tanga Baroma 4:8. Beto yonso fwete monisila Yehowa Nzambi ntonda mingi sambu yandi ke lolulaka “na masonga yonso.” (Nk. 130:4) Kansi sambu Yehowa kulolula beto, beto mpi fwete sala kima mosi ya mfunu. Yezu tubaka nde: “Kana beno ke lolula ve bantu bifu na bo, Tata na beno yina kele na zulu mpi ta lolula ve bifu na beno.” (Mat. 6:14, 15) Yo yina, yo kele mfunu mingi nde beto landa mbandu ya Yehowa na mutindu yandi ke lolulaka. Kansi nki mutindu beto lenda sala yo? Disolo ya ke landa ta sadisa beto na kuzaba mambu yina beto lenda sala.
NKUNGA 46 Beto Ke Tonda Nge, Yehowa
a Ngogo ya Kiebreo ya kisina ya bo me sadila na verse yai sambu na ngogo ‘kulolula,’ ke monisa nde yo kele mutindu mosi kaka ya kulolula na masonga yonso ata mitindu ya nkaka ya kulolula kele. Bambalula ya nkaka ya Biblia ke swaswanisaka yo ve ti mitindu ya nkaka ya kulolula. Kansi Biblia—Mbalula ya Nsi-Ntoto ya Mpa ke swaswanisaka yo pwelele na Nkunga 130:4.
