KAPU 22 ya Kuyantika ke monisa nde Nzambi songaka Abrahami na kukwenda na kisika mosi ya ntama sambu na kutambika mwana na yandi. Biblia ke tuba nde: “Abrahami bakaka bankuni ya dikabu ya kuyoka mpi tulaka yo na dipeka ya mwana na yandi Izaki. Na nima yandi bakaka tiya mpi mbele na maboko na yandi, ebuna bo kwendaka bo zole.”—Kuyantika 22:6.

Biblia ke monisa ve mutindu bantu vandaka kutula (kupedisa) tiya na ntangu ya ntama. Keti Abrahami ti Izaki bakaka tiya mpi bo tambulaka ti tiya yango? Muntu mosi ya ke longukaka mambu ya Biblia ke tuba nde yo kele mpasi na kusala nzietelo ti tiya mpi “tiya kulanda kupela tii na kisika yina muntu ke kwenda.” Ziku Abrahami ti mwana na yandi nataka kaka bima yina bo lendaka kupedisila tiya.

Bankaka ke tubaka nde, na ntangu ya ntama kutula tiya vandaka ve diambu ya pete. Bantu vandaka kuzola kubaka makala ya tiya na bantu yina kele pene-pene na bo na kisika ya kutula tiya bo mosi. Bantu mingi ya mayele ke monaka nde Abrahami bakaka makala yina kele ti tiya na kati mpi salaka nzietelo ti yo. Yandi tulaka yo na kima mosi buna, mbala ya nkaka na nzungu to dibungu yina vandaka ti bansinga mpi yandi vandaka kutambula ti yo. (Yezaya 30:14) Ebuna, yandi lendaka kubaka makala yina ya tiya mpi kutula tiya na bankuni na konso kisika yina yandi me zola.