Bo ke monisa basoda ya zulu, yina fwaka Yeruzalemi mpi ta fwa nsi-ntoto yai ya mbi ya Satana na Armagedoni. Yai kele ntendula ya mpa. Sambu na nki yo lombaka nde beto soba mutindu na beto ya kubakisa mbona-meso yai?

Na ntwala ya mvu 607 N.T.B., Yehowa songaka Ezekiele na mbona-meso mambu yina ta salama na Yeruzalemi na ntwala nde bo fwa yo. Ezekiele monaka na mbona-meso mambu mingi ya mbi ke salama na mbanza. Na nima, yandi monaka babakala sambanu, mpi konso muntu vandaka ti “kinwaninu na maboko na yandi sambu na kubuka mbanza.” Yandi monaka mpi muntu mosi na kati na bo “me lwata lele ya lino,” mpi me simba “kima yina sekretere ke tulaka tinta.” (Ezekiele 8:6-12; 9:2, 3) Bo tindaka muntu yango na kukwenda na mbanza mpi kutula “kidimbu na bambunzu ya bantu yina ke dila mpi ke bokuta sambu na mambu yonso ya nzanzi yina ke salama na mbanza.” Ebuna, bo songaka babakala yina sambanu na kufwa bantu yonso ya mbanza, yina bo tulaka ve kidimbu. (Ezekiele 9:4-7) Mbona-meso yai ke longa beto nki? Muntu yina vandaka ti kima yina sekretere ke tulaka tinta ke monisa nani?

Ezekiele monaka mbona-meso yai na 612 N.T.B. Bamvula tanu na nima, mbikudulu yai lunganaka na mbala ya ntete ntangu Yehowa bikaka nde basoda ya Babilone kufwa Yeruzalemi. Ya kieleka, Yehowa sadilaka basoda ya Babilone sambu na kupesa bansadi na yandi yina kolamaka ndola.  (Yeremia 25:9, 15-18) Kansi nki kuminaka Bayuda ya bulemfu yina vandaka kuwa mpasi sambu na mambu ya mbi yina bantu vandaka kusala na mbanza? Yehowa gulusaka bo.

Na mbona-meso yina, Ezekiele tulaka ve ata muntu mosi kidimbu to kuvukana ti bantu yina fwaka mbanza. Kansi bawanzio bantu vandaka kutwadisa kisalu ya kufwa Yeruzalemi. Mbikudulu yai ke sadisa beto na kubakisa mambu yina ke salamaka na zulu. Yehowa zabisaka bawanzio na kutwadisa kisalu ya kufwa bantu ya mbi mpi kugulusa bantu ya mbote. *

Mbikudulu yai ta lungana diaka na bilumbu ke kwisa. Ntete beto vandaka kutuba nde muntu yina me simba kima ya sekretere ke tulaka tinta ke monisa Bakristu yina bo me tulaka mafuta, yina kele ntete na luzingu awa na ntoto. Beto vandaka mpi kutuba nde, bantu ke bakaka kidimbu sambu na kuguluka ntangu bo ke waka mpi ke ndimaka nsangu ya mbote yina beto ke longaka. Kansi na bilumbu me luta, beto monaka pwelele nde beto fwete soba mutindu na beto ya kutendula mbikudulu yai. Beto longukaka na Matayo 25:31-33 nde Yezu mpamba muntu ke sambisaka bantu. Yandi ta sala yo na bilumbu ke kwisa, na nsungi ya mpasi ya nene. Na ntangu yango, bantu yina yandi ta tula na ndonga ya mameme ta guluka, kansi bo ta fwa bayina yandi ta tula na ndonga ya bankombo.

Mbona-meso ya Ezekiele ke longa beto mambu yai tanu:

1.  Na ntwala nde Yeruzalemi kufwa, Ezekiele, Yeremia, mpi Yezaya kebisaka bantu sambu na mambu yina fwete salama. Bo vandaka bonso bankengidi. Bubu yai, Yehowa ke sadilaka kimvuka mosi ya fioti ya Bakristu yina bo me tulaka mafuta sambu na kulonga bansadi na yandi mpi kukebisa bantu na ntwala nde mpasi ya nene kuyantika. Yo yina, bantu yonso ya Nzambi, disongidila bansadi ya Kristu, ke salaka kisalu yai ya kukebisa bantu.—Matayo 24:45-47.

2.  Ezekiele tulaka ve bantu yina gulukaka kidimbu. Bubu yai mpi, bansadi ya Nzambi ke tulaka ve bantu yina ta guluka kidimbu. Kansi bo ke longaka bantu, mpi ke zabisaka bo mambu ya mpasi yina ta salama na bilumbu ke kwisa. Bawanzio ke sadisaka beto ntangu beto ke samunaka na ntoto ya mvimba.—Kusonga 14:6.

3.  Bantu yina gulukaka na bilumbu ya Ezekiele vandaka ve ti bidimbu na bambunzu na bo. Bubu yai mpi, bantu yina ta guluka ke vandaka ve ti kidimbu na bambunzu na bo. Inki bantu fwete sala sambu na kuguluka na mpasi ya nene? Ntangu bo ke wa balukebisu, bo fwete landa mbandu ya Kristu, kupesa luzingu na bo na Nzambi, mpi kupesa bampangi ya Kristu maboko na kisalu ya kulonga nsangu ya mbote. (Matayo 25:35-40) Kana bo sala mambu yai, bo ta tula bo kidimbu na nsungi ya mpasi ya nene, disongidila, bo ta guluka.

4.  Muntu yina me simba kima ya sekretere ke tulaka tinta kele Yezu. Na nsungi ya mpasi ya nene, Yezu ta tula bantu ya kibuka ya nene kidimbu ntangu yandi ta tula bo na ndonga ya mameme. Na nima, bo ta baka dibaku ya kuzinga mvula na mvula na ntoto.—Matayo 25:34, 46. *

5.  Bubu yai babakala sambanu yina vandaka ti binwaninu ya kubuka mbanza ke monisa basoda ya zulu ti mfumu na bo Yezu. Ntama mingi ve bo ta fwa bantu ya mbi mpi ta manisa mambi yonso.—Ezekiele 10:2, 6, 7; Kusonga 19:11-21.

Malongi ya beto me baka na mbona-meso yai ke sadisa beto na kutula ntima nde Yehowa ta gulusa bantu ya mbote ntangu yandi ta fwa bantu ya mbi. (2 Piere 2:9; 3:9) Yo ke yibusa beto mpi nde kisalu ya kusamuna ya beto ke sala bubu yai kele mfunu mingi. Bantu yonso fwete wa nsangu ya lukebisu na ntwala nde nsuka kukwisa!—Matayo 24:14.