SAMBU NA BANKWELANI
2: Kusala Kumosi
MAMBU YINA YO KE TENDULA
Kana bakala ti nkento ke sala kumosi na makwela, bo ke kumaka bonso piloti ti kilandi na yandi yina ke sala na avio mosi. Ata ntangu bo me kutana ti mambu ya mpasi, konso nkwelani ke sosaka mambote na “bo zole” kansi ve ya “yandi mosi.”
MUNSIKU YA BIBLIA: “Bo kele diaka ve zole, kansi nsuni mosi.”—Matayo 19:6.
“Bakala ti nkento fwete sala kumosi sambu makwela na bo kununga.”—Christopher.
SAMBU NA NKI YO KELE MFUNU
Ntangu bampasi me basika, bakala ti nkento yina ke sala ve kumosi ke sosaka kutula dikebi na bifu ya nkwelani ya nkaka na kisika ya kuyidika bampasi yango. Mambu ya fioti ke kumaka mambu ya nene.
“Kusala kumosi kele mfunu mingi na makwela. Kana mono ti bakala na mono vandaka ve kusala kumosi, beto zolaka kuvanda kaka bonso bantu yina ke zingaka na shambre mosi kansi ve bonso bankwelani, mpi yo zolaka kuvanda mpasi na kubaka balukanu ya mfunu.”—Alexandra.
MAMBU YA NGE LENDA SALA
KUDITADILA
-
Keti mono ke tadilaka mbongo yina mono ke zwaka bonso “ya mono mosi”?
-
Sambu na kupema mbote, keti mono ke zolaka ve kuvanda ti nkwelani na mono?
-
Keti mono ke buyaka kukangama ti bampangi ya nkwelani na mono, ata yandi ke kangamaka ngolo ti bo?
SOLULA TI NKWELANI NA NGE
-
Na nki mambu ya makwela beto ke salaka mbote kumosi?
-
Inki mambu beto fwete tomisa?
-
Inki mambu beto fwete sala sambu na kutomisa kikalulu ya kusala kumosi?
BANDONGISILA
-
Yindula nde beno ke sala nsaka ya bo ke bingaka tennis; nge kele na simu yai mpi nkwelani na nge na simu yina ya nkaka. Na kisika ya kusala mutindu yina, inki mambu nge lenda sala sambu nge ti nkwelani na nge beno kuma na simu mosi?
-
Na kisika ya kutuba nde, ‘Inki mutindu mono lenda nunga?’ tuba nde ‘Inki mutindu beto zole lenda nunga?’
“Kuyindula ve nani me sala mbote mpi nani me sala mbi. Yo ta sadisa ve na kutula ngemba mpi bumosi na makwela na beno.”—Ethan.
MUNSIKU YA BIBLIA: “Beno sosa kaka ve mambote na beno mosi, kansi mpi mambote ya bantu ya nkaka.”—Bafilipi 2:3, 4.
