Yilama sambu na mvu funda yina meluta mfunu!

LUYALU ya Mvu Funda ya Yezu tanatila bantu balusakumunu mingi. Na lutwadisu ya Yezu yina tasalama na zola yonso, bantu takatuka na luzingu na bo yai ya mawa sambu na kukuma na luzingu ya lukumu mpi ya kukuka. Yindula nki yo tatendula sambu na nge. Mavimpi ya mbote mpenza! Yindula fyoti ntangu nge tatelamaka konso suka ti ngolo ya kuluta yina nge vandaka na yo mazono. Babakala ti bankento mingi, ti bana kekinga na kuzinga na ntangu yina ya kyese. Bo metulaka kivuvu na bo yonso na luyalu yina, mpi bo kesambaka sambu na yo. Kulonguka na bo ya Biblia mendimisaka bo nde bo lenda baka balusakumunu yina.

Kansi, na ntwala ya kuyantika Luyalu na yandi ya Mvu Funda, Yezu Kristu fwete katula ntete bantu yonso yina kele bambeni ya luyalu na yandi. Yandi tasala dyambu yai na bitumba yina Biblia kebinga nde Armagedoni. (Kusonga 16:16) Bakristu ya kyeleka yina kele na ntoto tanwana ve na bitumba yina. Yo kele bitumba ya Nzambi. Yo tasalama ve na kisika mosi mpamba ya ntoto. Biblia ketuba nde yo tasalama na bisika yonso ya ntoto. Yo tafwa bambeni ya luyalu ya Kristu. Ata mosi ve tatina!​—⁠Yeremia 25:⁠33.

Na nima, Yezu tatula dikebi na yandi na Satana Dyabulu ti na bademo na yandi. Yindula mutindu mambu yango taluta, bonso musoniki ya mukanda ya Kusonga kemonisa yo: “Mono monaka wanzio mosi [Yezu Kristu] katukaka na zulu, ke kwisa kukulumuka; na diboko na yandi yandi me simba fungula ya Dibulu ya Nda ti muniololo mosi ya nene. Yandi simbaka dragoni, nioka yina ya ntama, disongidila nde Satana, ebuna yandi kangaka yandi na muniololo yina bamvula mile mosi.” (Kusonga 20:​1, 2) Nsukansuka, Satana ti bademo na yandi bo tafwa bo kimakulu.​—⁠Matayo 25:⁠41.

“Ndonga [“kibuka,” NW] mosi ya bantu mingi; [yina] ata muntu mosi ve lunga kutanga,” taguluka na Armagedoni. (Kusonga 7:⁠9) Kristu tatwadisa bantu yai sambu bo baka mpenza mambote mingi na “banto ya masa ya moyo,” mutindu ngungudi kenataka mameme na yandi na masa ya luzingu. (Kusonga 7:17) Bantu yina taguluka na Armagedoni kele bayina ya Satana ti bademo na yandi kukaka ve na kukangisa bo nzila na kuyela na bo ya kimpeve. Bantu yai tabaka lusadisu fyotifyoti sambu na kukatula bangindu na bo ya kusala masumu tii kuna bo takuma bantu ya kukuka!

Na luyalu ya Kristu yina tasalama na zola yonso, luzingu takuma mbote. Yehowa Nzambi, na nsadisa ya Yezu Kristu, takatula kisina yonso ya mpasi ti mawa. Yandi “ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve.” (Kusonga 21:⁠4) Profete Yezaya kemonisa mutindu mambu yango tasalama ntangu yandi ketuba nde: “Meso ya bantu ya kufwa-meso ta mona, makutu ya bantu ya kufwa-makutu ta kanguka. Bantu ya makulu-kifu ta pumbuka bonso mbambi, bababa ta kuma kutuba na ndinga ya ngolo ti kiese.” (Yezaya 35:​5, 6) Sambu na yina metala bafwa, “bambuta ti baleki,” bo tafutumuka ti kivuvu ya kufwa dyaka ve!​—⁠Kusonga 20:⁠12.

Ata ntangu yai, ‘kibuka ya bantu mingi’ yina taguluka na Armagedoni ke na kuvukana kisika mosi. Bo keyilama sambu na Luyalu ya Mvu Funda ya Kristu. Ata bo kezaba ve nki ntangu luyalu yango tayantika, bo ketula ntima nde na ntangu yina Nzambi yandi mosi metulaka, yo tayantika. Nge lenda vanda na kati na bo, kansi yo kelomba nde nge mpi kuyilama. Yo kelomba ve nde nge tekateka bima na nge yonso sambu nge kwenda na bwala mosi buna, kansi yo kelomba nge baka nzayilu ya sikisiki ya Yehowa Nzambi ti ya balukanu na yandi na nsadisa ya kulonguka ya Biblia. Bambangi ya Yehowa tavanda na kyese ya kumonisa nge nki mutindu kulonguka Biblia lenda sadisa nge ti dibuta na nge. Bo tasala yo ya ofele mpi na kingolongolo ve. Bantu yina kebasisaka zulunalu yai tavanda na kyese mingi ya kupesa nge dyaka bansangu yankaka.

[Lupangu ya kele na lutiti 7]

Bamvula funda, ya kyeleka to ya kifwani?

Mukanda ya Kusonga yonso bo mesonikaka yo na ndinga ya kifwani, ebuna yo kebasisa ngyufula mosi. Inki beto lenda tuba sambu na Luyalu ya Mvu Funda ya Kristu yina bo ketubila na Kusonga? Keti yo kele nsungi mosi ya kyeleka to ya kifwani?

Bidimbu kele mingi ya kemonisa nde bo ketubila kibeni nsungi mosi ya bamvula funda ya kyeleka. Tala fyoti dyambu yai: Ntumwa Polo kebinga Luyalu ya Mvu Funda ya Kristu, ntangu yandi tasambisa bantu, nde kilumbu mosi. (Bisalu 17:31; Kusonga 20:⁠4) Ntumwa Piere kusonikaka nde kilumbu mosi (ya bangunga 24) sambu na Yehowa kele bonso bamvula funda sambu na bantu. (2 Piere 3:⁠8) Pana yo kezola kutuba nde “kilumbu” ya kusambisa yai tasalama na bamvula funda ya kyeleka. Dyaka, na Kusonga 20:​3, 5-7, beto ketanga mbala iya ya kuswaswana bangogo “bamvula mile mosi.” Dyambu yai kemonisa nde nsungi yango kele ti nsuka.