Nge Fwete Pona Minsiku ya Nge Tazitisa

KETI nge kele muntu ya kezolaka kuzitisa minsiku? To nge kemonaka bikalulu ya mbote bonso kima mosi ya memanaka ngala? Ya kyeleka, konso muntu kevandaka ti mwa mutindu ya minsiku ya ketwadisaka yandi, yina yandi kekwikilaka nde yo ke na mfunu. Diksionere mosi (The New Shorter Oxford English Dictionary) ketuba nde munsiku lenda tendula “bansiku ya bo salaka sambu na kisalu ya mbote.” Minsiku kevandaka na bupusi na badesizio na beto mpi yo kesadisaka beto na kupona nki mutindu beto fwete twadisa luzingu na beto. Minsiku lenda sala bonso busole yina kesongaka bantu nzila ya bo fwete landa.

Mu mbandu, Yezu kusyamisaka balongoki na yandi na kuzitisa Nsiku ya Wolo yina kele na Matayo 7:12: “Beno sala bantu ya nkaka mambu yonso yina ya beno zola nde bo sala beno.” Balongoki ya Confucius kezitisaka minsiku yina bo kebingaka nde li mpi ren. Munsiku ya li kelombaka bo na kusala mambu ya mbote ebuna munsiku ya ren kelombaka bo na kusadila bantu mambote kukonda kulomba bo lufutu, mpi na kumonisa bikalulu bonso ntima ya mbote, kudikulumusa, luzitu, mpi kwikama. Ata bantu yina kesambilaka ve kevandaka na mwa mambu mingi ya mfunu mpi minsiku yina bo kelandaka na luzingu na bo.

Minsiku ya Nki Mutindu Nge Fwete Zitisa?

Kansi, beto fwete zaba nde minsiku lenda vanda ya mbote to ya mbi. Mu mbandu, bamvula yai, dibanza ya bantu mingi mekumaka kaka “mono ntete.” Bilumbu yai kikalulu ya bwimi mekumaka mingi mpenza. Mbala mingi yo kenataka bantu na kusosa bima ya kinsuni na lukashi kibeni. Direktere mosi ya TV ya Chine kutubaka nde: “Beto kele na minsiku zole mpamba. Ya ntete kele kuzola kaka kubaka kima ya nge kesosa. Ya zole kele kusosa mbongo.”

Kikalulu ya “mono ntete” lenda vanda bonso ema. Kansi, nki mutindu ema kesimbaka ntunga ya busole yina kesongaka bantu nzila? Kana bo metula yo kisika mosi, ntunga ya busole yai kesongaka dyaka ve nzila mbote. Mutindu mosi, kikalulu ya “mono ntete” lenda pusa muntu na kutwadisa ntunga na yandi na nzila mosi ya mbi, disongidila, yo lenda pusa yandi na kukonda kuzitisa bansiku, mpi na kutula bampusa na yandi na kisika ya ntete.

Keti nge tayituka na kuzaba nde kikalulu ya bwimi meyantika bubu yai ve? Kikalulu yai kuyantikaka na kilanga ya Eden, ntangu bibuti na beto ya ntete kubuyaka na kuzitisa nsiku ya bikalulu ya mbote yina Ngangi na beto kupesaka bo. Yo bebisaka busole na bo yina kesongaka bikalulu ya mbote ya kulanda. Sambu bo kele bana ya Adami ti Eva, bantu kevandaka ti kikalulu ya mutindu mosi sambu na luzingu, ntama mingi ve bantu bingaka yo nde kikalulu ya “mono ntete.”​—Kuyantika 3:6-8, 12.

Kikalulu yai kemonana na bantu mingi mingimingi na ntangu yai ya bambikudulu ya Biblia kebinga nde “bilumbu ya nsuka,” ya ke “mpasi mingi na kuzinga.” (NW) Bantu mingi “kezola bantu yankaka ve.” Yo yina, mpila ya kuyituka kele ve na  kumona nde beto kemekamaka mingi na kulanda kikalulu yai ya “mono ntete.”​—2 Timoteo 3:1-5.

Ziku nge lenda ndima dibanza ya mwana-bakala yai na zina ya Olaf yina tindaka mukanda na biro ya filiale ya Bambangi ya Yehowa ya Eropa. Yandi sonikaka nde: “Yo ke mpasi na kuvanda ntangu yonso na bikalulu ya mbote, mingimingi sambu na beto baleke. Pardo beno landa na kuyibusa beto mfunu ya kulanda minsiku ya Biblia.”

Olaf kumonisaka nde yandi vandaka na luswasukusu. Mnsiku ya Nzambi lenda sadisa beto, ata beto kele baleke to bambuta, na kuvanda na bikalulu ya mbote. Yo lenda sadisa beto mpi na kununga kikalulu ya “mono ntete,” ata bantu kebingaka kikalulu yango ya bwimi mutindu yina to ve. Kana nge zola kuzaba mambu mingi yina tamonisa nge nki mutindu minsiku ya Biblia lenda sadisa nge, nge lenda tanga disolo yai kelanda.

[Bifwanisu ya kele na lutiti 4]

Bubu yai bantu mingi kekudibanzaka ve ata fyoti sambu na bampusa ya bantu yankaka