Kristu Ketwadisaka Dibundu na Yandi

“Mono ta vandaka ti beno bilumbu yonso tii na nsuka ya ntoto.”​—Matayo 28:20.

1, 2. (a) Ntangu yandi pesaka ntuma ya kukumisa bantu balongoki, inki kima Yezu yina kufutumukaka kusilaka balongoki na yandi? (b) Inki mutindu Yezu kutwadisaka dibundu ya Bukristu ya ntete ti ngolo yonso?

 NA NTWALA ya kutombuka na zulu, Yezu Kristu, Ntwadisi na beto ya mefutumukaka, kumonikaka na balongoki na yandi mpi yandi tubaka nde: “Nzambi me pesaka mono kiyeka yonso na zulu ti awa na nsi-ntoto. Yo yina, beno kwenda kukumisa bantu yonso balonguki na mono: Beno botika bo na zina ya Tata ti ya Mwana ti ya Mpeve-Santu, beno longa bo mpi na kulanda mambu yonso ya mono vandaka kusonga beno na kusala. Beno fweti zaba mbote nde mono ta vandaka ti beno bilumbu yonso tii na nsuka ya ntoto.”​—Matayo 23:10; 28:18-20.

² Yezu kupesaka kaka ve balongoki na yandi kisalu ya kukumisa bantu mingi balongoki yina kegulusaka luzingu, kansi yandi silaka mpi nde yandi tavanda ti bo. Disolo ya Bukristu ya ntete, yina kele na mukanda ya Bisalu, kesonga pwelele nde Kristu kusadilaka kiyeka yina Nzambi kupesaka yandi sambu na kutwadisa dibundu ya mpa yina kusalamaka ntama mingi ve. Yandi tindaka “nsadisi,” to mpeve santu, yina yandi silaka sambu na kupesa balongoki na yandi ngolo mpi kutwadisa kikesa na bo. (Yoane 16:7; Bisalu 2:4, 33; 13:2-4; 16:6-10) Yezu yina kufutumukaka kusadilaka bawanzyo yina kele na nsi ya kiyeka na yandi sambu na kusadisa balongoki na yandi. (Bisalu 5:19; 8:26; 10:3-8, 22; 12:7-11; 27:23, 24; 1 Piere 3:22) Dyaka, Ntwadisi na beto kutwadisaka dibundu na nsadisa ya babakala ya kufwana yina yandi ponaka na kusala bonso nto-kimvuka.​—Bisalu 1:20, 24-26; 6:1-6; 8:5, 14-17.

3. Inki bangyufula beto tatadila na disolo yai?

³ Ebuna nki beto lenda tuba sambu na ntangu na beto, yina kele ntangu ya “nsuka ya ntoto”? Inki mutindu Yezu Kristu ketwadisaka dibundu ya Bukristu bubu yai? Mpi nki mutindu beto lenda songa nde beto kendimaka lutwadisu yai?

Mfumu Kele ti Mpika ya Kwikama

4. (a) Banani kesala ‘mpika ya kwikama ti ya mayele’? (b) Inki bima Mfumu mepesaka mpika yango na kutala?

⁴ Ntangu yandi pesaka mbikudulu yina ketubila  kidimbu ya kuvanda na yandi awa ti beto, Yezu kutubaka nde: “Ebuna nani kele mpika ya [kwikama, NW] ti ya mayele? . . . yina ya mfumu na yandi me tulaka sambu na kupesa madia na bampika ya nkaka ya nzo na yandi na ntangu ya mbote. Kiese na mpika yina kana mfumu na yandi kwisa kukuta yandi ke sala mambu ya mutindu yina! Mono ke tubila beno mambu ya kieleka: Mfumu yina ta pesa mpika kiyeka ya kutalaka bima na yandi yonso.” (Matayo 24:45-47) “Mfumu” kele Ntwadisi na beto, Yezu Kristu, mpi yandi metulaka ‘mpika ya kwikama ti ya mayele’ (kimvuka ya Bakristu ya kupakulama yina kele na ntoto) sambu na kutala bima na yandi ya kele na ntoto.

5, 6. (a) Na mbikudulu yina ntumwa Yoane kubakaka, ‘bima nsambwadi ya wolo ya kutudila bamwinda’ mpi “bambwetete nsambwadi” kele bifwani ya inki? (b) Mutindu “bambwetete nsambwadi” ke na diboko ya kibakala ya Yezu ketendula inki?

⁵ Mukanda ya Kusonga kemonisa nde mpika ya kwikama ti ya mayele kele na nsi ya kimfumu ya Yezu Kristu. Na mbona-meso mosi ya “kilumbu ya Mfumu,” ntumwa Yoane kumonaka “bima nsambwadi ya wolo ya bo ke tulaka bamwinda. [Yandi monaka muntu mosi bonso mwana ya muntu, NW] me telama na kati ya bima yina.” Muntu yango “vandaka na bambwetete nsambwadi na diboko na yandi ya kibakala.” Ntangu Yezu kutendudilaka Yoane mbona-meso yango, yandi tubaka nde: “Disongidila ya kinsweki ya bambwetete nsambwadi ya nge ke mona na diboko na mono ya kibakala, ti ya bima nsambwadi ya wolo, yo yai: Bambwetete yina nsambwadi kele bawanzio ya badibundu nsambwadi, bima nsambwadi ya kutudila bamwinda kele badibundu nsambwadi.”​—Kusonga 1:1, 10-20.

⁶ ‘Bima nsambwadi ya wolo ya kutudila bamwinda’ kele kifwani ya mabundu yonso ya kyeleka ya Bukristu yina tavanda na “kilumbu ya Mfumu,” yina kuyantikaka na 1914. Ebuna “bambwetete nsambwadi” ketendula inki? Na luyantiku, yo vandaka kifwani ya bantu yonso yina kubutukaka na mpeve, disongidila, bankengi yonso ya kupakulama yina vandaka kutala mabundu na mvu-nkama ya ntete. a Bankengi kuvandaka na diboko ya kibakala ya Yezu, disongidila, yandi muntu vandaka kuyala ti kutwadisa bo. Ee, Kristu Yezu kutwadisaka kimvuka ya bantu yina bo vandaka kubinga nde mpika. Kansi, ntangu yai, ntalu ya bankengi ya kupakulama kele fyoti. Inki mutindu Kristu ketwadisa mabundu ya Bambangi ya Yehowa kuluta 93 000 na ntoto ya mvimba?

7. (a) Inki Mutindu Yezu kesadilaka Nto-Kimvuka sambu na kutwadisa mabundu na ntoto ya mvimba? (b) Sambu na nki beto lenda tuba nde bo keponaka bankengi ya Bakristu na nzila ya mpeve santu?

⁷ Bonso na mvu-nkama ya ntete, kimvuka mosi ya fyoti ya babakala ya kufwana na kati ya bankengi ya kupakulama kesalaka bubu yai bonso Nto-Kimvuka, bo ketubaka na zina ya kimvuka ya mpika ya kwikama mpi ya mayele. Ntwadisi na beto kesadilaka Nto-Kimvuka yai sambu na kupona babakala ya kufwana, bo vanda ya kupakulama na mpeve to ve, sambu na kusala bonso bankuluntu na mabundu. Sambu na kupona bantu yai, mpeve santu, yina Yehowa mepesaka Yezu kiyeka  ya kusadila, kesalaka kisalu ya mfunu. (Bisalu 2:32, 33) Ntetentete, bankengi yai fwete lungisa mambu yina kele na Ndinga ya Nzambi, yina bo sonikaka na ngolo ya mpeve santu. (1 Timoteo 3:1-7; Tito 1:5-9; 2 Piere 1:20, 21) Kupesa bazina ti kupona bantu kesalamaka na nima ya kisambu mpi na lutwadisu ya mpeve santu. Dyaka, bantu yina bo keponaka kemonisaka na luzingu na bo nde bo kebutaka mbuma ya mpeve yango. (Galatia 5:22, 23) Yo yina, bankuluntu yonso fwete sadila kiteso mosi ndongisila yai ya Polo, bo vanda bapakulami to ve: “Beno keba beno mosi, beno keba mbote-mbote mameme yina ya Mpeve ya Nzambi me pesaka beno na kutala.” (Bisalu 20:28) Bantu yai ya bo keponaka kebakaka lutwadisu yina kekatukaka na Nto-Kimvuka mpi bo kegungulaka dibundu na luzolo yonso. Yo kele mutindu yai Kristu kele ti beto bubu yai mpi kesala ngolo na kutwadisa dibundu.

8. Inki mutindu Kristu kesadilaka bawanzyo na kutwadisa balongoki na yandi?

⁸ Yezu kesadilaka mpi bawanzyo ya kyeleka sambu na kutwadisa balongoki na yandi bubu yai. Kana beto landa mambu yina kele na kingana ya ble ti matiti ya mbi, ntangu ya kukatula bambuma zolaka kulunga na “ntangu ya nsuka ya ntoto.” Nani Mfumu zolaka kusadila sambu na kukatula bambuma yango? Kristu kutubaka nde: “Bantu yina ke katulaka bambuma kele bawanzio.” Yandi yikaka nde: “Mwana-muntu ta tinda bawanzio na yandi, ebuna bo ta katula na Kimfumu na yandi bantu yina yonso ke bendaka bantu ya nkaka na kusala masumu ti bantu yina yonso ke salaka mbi.” (Matayo 13:37-41) Dyaka, kaka mutindu wanzyo kutwadisaka makulu ya Filipo sambu na kukutana ti muntu mosi ya insi ya Etiopia yina kuvandaka tongu, banzikisa kele mingi bubu yai yina kesonga nde Kristu kesadilaka bawanzyo na yandi sambu na kutwadisa Bakristu ya kyeleka na kuzwa bantu ya masonga.​—Bisalu 8:26, 27; Kusonga 14:6.

9. (a) Na nzila ya nki Kristu ketwadisaka dibundu ya Bukristu bubu yai? (b) Inki ngyufula beto fwete tadila kana beto kezola kubaka mambote na lutwadisu ya Kristu?

⁹ Kuzaba nde Yezu Kristu ketwadisa balongoki na yandi bubu yai na nzila ya Nto-Kimvuka, ya  mpeve santu, ti ya bawanzyo kebwisa beto kibeni ntima! Ata munyokudi to mambu yankaka ya mutindu yina kukabula bansadi yankaka ya Yehowa ti Nto-Kimvuka sambu na ntangu fyoti, Kristu talanda kaka na kutwadisa bo na nzila ya mpeve santu mpi ya lusadisu ya bawanzyo. Kansi, beto tabaka mambote ya lutwadisu na yandi kaka kana beto kendima yo. Inki mutindu beto lenda monisa nde beto kendimaka lutwadisu ya Kristu?

“Beno Lemfuka . . . Beno Wila Bo”

10. Inki mutindu beto lenda monisa nde beto kezitisaka bankuluntu yina bo meponaka na dibundu?

¹⁰ Ntwadisi na beto mepesaka mabundu ‘makabu ya bantu,’ “bantu ya nkaka baevanzeliste, bantu ya nkaka [bangungudi, NW], bantu ya nkaka mpi balongi.” (Efezo 4:8, 11, 12) Mutindu ya beto kebakaka bo mpi mambu yina beto kesalaka bo kemonisaka pwelele kana beto kendimaka lutwadisu ya Kristu to ve. Yo kele mbote nde ‘beto pesa mersi’ sambu na babakala ya kufwana na kimpeve yina Kristu mepesaka. (Kolosai 3:15) Yo mefwana mpi nde beto zitisa bo. Ntumwa Polo kusonikaka nde: ‘Bambuta yina ke twadisaka Dibundu mbote-mbote bo lunga kubaka [lukumu, NW] na bo mbala zole.’ (1 Timoteo 5:17) Inki mutindu beto lenda monisa ntonda ti zola na bambuta, disongidila, bankuluntu to bankengi, na dibundu? Polo kevutula nde: “Beno lemfuka na bambuta na beno ya Dibundu, beno wila bo mpi.” (Baebreo 13:17) Ee, beto fwete lemfukila bo mpi beto wila bo.

11. Sambu na nki kuzitisa bankuluntu yina bo meponaka kele dyambu mosi ya kemonisaka nde beto kezinga na kuwakana ti mbotika na beto?

¹¹ Ntwadisi na beto kele muntu ya kukuka. Kansi bantu yina yandi mepesaka bonso makabu kele bantu ya kukonda kukuka. Yo yina, bo lenda sala bifu bantangu yankaka. Kansi, yo kele mfunu nde beto lemfuka ntangu yonso na ngidika ya Kristu. Na kuta masonga, kuzitisa kudipesa na beto ti mbotika ketendula nde beto fwete ndima kiyeka ya bantu yina mpeve santu keponaka na dibundu mpi kuwila bo na luzolo yonso. Ntangu beto kebakaka mbotika na ‘zina ya mpeve santu,’ beto kemonisaka na meso ya bantu nde beto kebakisaka ntendula ya mpeve santu mpi beto kendimaka kisalu yo kesalaka na balukanu ya Yehowa. (Matayo 28:19) Ntangu beto kebakaka mbotika ya mutindu yai yo kelombaka nde beto sala mambu yina kewakana ti mpeve mpi beto sala ve ata kima mosi ya lenda sala nde mpeve yango kusala dyaka ve na kati ya balongoki ya Kristu. Sambu mpeve santu kesalaka kisalu ya mfunu na kupesa bazina ti kupona bankuluntu, keti beto lenda vanda kibeni ya kwikama na kudipesa na beto kana beto kewakana ve ti bankuluntu yina bo meponaka na dibundu?

12. Inki bambandu ya bantu yina kuzitisaka ve kiyeka Yude ketanga, mpi yo kelonga beto inki?

¹² Masonuku kele ti bambandu yina kelongaka beto mfunu ya bulemfu. Ntangu yandi vandaka kutubila bantu yina kukondaka luzitu na babakala yina bo ponaka na dibundu, longoki Yude kutangaka bambandu tatu ya kekebisa beto, yandi tubaka nde: “Mawa na bo! Bo ke landaka mambu yina ya Kaini salaka; bo me kotaka na nzila ya luvunu sambu bo me kudipesaka na mbongo, mutindu Balami salaka; bo me kudizengilaka ndola ya lufwa sambu bo ke salaka mubulu, mutindu Kore mpi salaka mubulu.” (Yude 11) Kaini kubuyaka ndongisila ya zola ya Yehowa mpi yandi landaka na luzolo yonso nzila ya kumenga yina kunataka yandi na kufwa mpangi na yandi. (Kuyantika 4:4-8) Ata Nzambi kukebisaka yandi mbala mingi, Balami kumekaka na kusinga bantu ya Nzambi sambu na kubaka mbongo. (Kutanga 22:5-28, 32-34; Kulonga 23:5) Kore kuvandaka ti kiyeka ya mbote kibeni na Izraele, kansi yandi vandaka kumona yo fyoti. Yandi bendaka bantu na kusala mubulu kontre Moize, nsadi ya Nzambi yina kulutaka bantu yonso ya ntoto na kudikulumusa. (Kutanga 12:3; 16:1-3, 32, 33) Mpasi kubwilaka Kaini, Balami, ti Kore. Bambandu yai kelonga beto pwelele nde beto fwete ndima ndongisila ya bantu yina Yehowa kesadilaka na bisika ya kiyeka mpi beto fwete zitisa bo.

13. Inki mambote profete Yezaya kutubilaka sambu na bantu yina kelemfukilaka bankuluntu yina bo meponaka?

¹³ Nani tazola ve kubaka mambote na ngidika ya nene ya kuvanda ti bankengi yina Ntwadisi na beto metulaka na dibundu ya Bukristu? Profete Yezaya kutubilaka mambote ya ngidika yai ntangu yandi tubaka nde: “Kilumbu kele ya ntotila mosi ta telama yina ta yalaka bantu na masonga, bantu na yandi mpi ta sambisaka bantu na nzila ya mbote. Bo yonso ta vanda bonso bisika ya kutinina mupepe ya ngolo ti mvula; bo ta vanda bonso banzadi na ntoto ya kuyuma, bonso madidi ya ditadi ya nene na ntoto ya zelo na zelo.” (Yezaya  32:1, 2) Konso nkuluntu fwete vanda ‘kisika’ ya lutaninu mpi ya kutinina bigonsa ya mutindu yai. Ata kulemfuka na kimfumu kele mpasi sambu na beto, beto sala ngolo, na nzila ya kisambu, na kulemfukila kimfumu yina Nzambi metulaka na kati ya dibundu.

Mutindu Bankuluntu Kelemfukilaka Lutwadisu ya Kristu

14, 15. Inki mutindu bantu yina ketwadisaka dibundu kemonisaka nde bo kelemfukaka na lutwadisu ya Kristu?

¹⁴ Konso Mukristu (kuluta mingi bankuluntu) fwete zitisa lutwadisu ya Kristu. Bankengi, to bankuluntu, kele ti ndambu ya kiyeka na dibundu. Kansi bo kesosaka ve ‘kuyala lukwikilu ya bampangi na bo bakristu’ na kumekaka kutudila bo bandilu na luzingu. (2 Korinto 1:24, NW) Bankuluntu kezitisaka bangogo yai ya Yezu: “Beno zaba nde bamfumu ke yalaka bantu na kingolo-ngolo. Beno zaba mpi nde bantu ya nene ke songaka bo nde bo ke na kiyeka. Kansi yo ta vanda mpidina ve na kati na beno.” (Matayo 20:25-27) Bankuluntu kelungisaka mukumba na bo, bo kemekaka na kusadila bantu yankaka na masonga yonso.

¹⁵ Biblia kelongisila Bakristu nde: “Beno yindula bambuta [yina ketwadisaka, NW] beno . . . Beno yindula mambu ya mbote yina me katuka na luzingu na bo, beno landa lukwikilu na bo.” (Baebreo 13:7) Biblia kelomba beto ve na kusala yo sambu bankuluntu kele bantwadisi. Yezu kutubaka nde: “Beno ke kaka na mfumu [“ntwadisi,” NW] mosi mpamba, nde Mesia.” (Matayo 23:10) Beto fwete landa mbandu ya lukwikilu ya bankuluntu, sambu bo kelandaka mbandu ya Kristu, Ntwadisi na beto ya kyeleka. (1 Korinto 11:1) Beto tadila mitindu fyoti yina bankuluntu kesalaka kikesa na kuvanda bonso Kristu na luzingu na bo ti bantu yankaka na dibundu.

16. Ata yandi vandaka ti kiyeka mingi, inki mutindu Yezu vandaka kubaka balongoki na yandi?

¹⁶ Ata Yezu kulutaka bantu ya kukonda kukuka na mambu yonso mpi yandi vandaka ti kiyeka ya nene kibeni ya Tata na yandi kupesaka yandi, yandi vandaka kuzaba kisika ya kusuka na bangwisana na yandi ti balongoki na yandi. Yandi vandaka kunyata ve balongoki na yandi ti mazaya ya kuyitukisa. Yezu vandaka kuditula na kisika ya balongoki na yandi mpi yandi vandaka kuwila bo mawa, na mutindu yandi vandaka kubakisa bampusa na bo ya kimuntu. (Matayo 15:32; 26:40, 41; Marko 6:31) Yandi vandaka kulomba ve balongoki na yandi na kupesa mambu yina meluta kiteso ya ngolo na bo, mpi yandi vandaka kutudila bo ve kizitu ya kuluta yina bo lendaka kunata. (Yoane 16:12) Yezu kuvandaka ‘muntu ya pima mpi ya ntima ya mbote.’ Yo yina, yo keyitukisa ve kana bantu mingi vandaka kumona nde yandi vandaka kusadisa bo na kupema.​—Matayo 11:28-30.

17. Inki mutindu bankuluntu fwete monisa kikalulu ya kukonda lulendo yina Kristu vandaka na yo na bangwisana na bo ti bantu yankaka na dibundu?

¹⁷ Kana Kristu, muntu yina kele Ntwadisi, kumonisaka kikalulu ya kukonda lulendo, bantu yina ketwadisaka dibundu fwete monisa yo mingi kuluta! Ya kyeleka, bo fwete keba sambu na kusadila ve konso kiyeka yina bo mepesaka bo na mutindu mosi ya mbi. Bo fwete ‘kudisongaka ve sambu na mambu yina ya bo zaba’ sambu na kuyitukisa bankaka. (1 Korinto 2:1, 2) Kansi, bo fwete salaka kikesa na kutuba bangogo ya kyeleka ya Masonuku na mutindu mosi ya petepete ti ya masonga. Dyaka, bankuluntu kesalaka ngolo na kuvanda ti bukatikati na mambu yina bo kelombaka bankaka na kusala mpi na kubakisa bampusa na bo. (Filipi 4:5) Sambu bo mezaba nde konso muntu kevandaka ti bandilu, bo kevilaka yo ve na bangwisana na bo ti bampangi na bo. (1 Piere 4:8) Keti bankuluntu ya kudikulumusa ti ya ntima-pima kepesaka ve kibeni kikesa na ntima? Ee, bo kesalaka yo.

18. Inki bankuluntu lenda longuka na mutindu Yezu vandaka kubaka bana ya fyoti?

¹⁸ Bantu vandaka kumona ve mpasi na kusolula ti Yezu, nkutu ti bana ya fyoti. Tala mvutu ya yandi  pesaka balongoki na yandi ntangu bo nganinaka bantu yina “kwisaka kunata bana ya fioti” na Yezu. Yandi tubaka nde: “Beno bikisa bana bo kwisa awa na mono. Beno kanga bo nzila ve.” Ebuna “ntangu yandi me baka bana na maboko na yandi imene, yandi tulaka bo maboko, ebuna yandi sakumunaka bo mosi-mosi.” (Marko 10:13-16) Yezu kuvandaka muntu ya tiya-tiya mpi ya ntima-mbote, mpi yandi vandaka kubenda bantu yankaka. Bantu vandaka kuwa ve Yezu boma. Ata bana ya fyoti vandaka na kyese na kuvanda ti Yezu. Bampangi mpi fwete solula kukonda mpasi ti bankuluntu, mpi sambu bo kevandaka tiya-tiya na kumonisa zola mpi ntima-mbote, bantu yankaka, nkutu ti bana ya fyoti, kewaka kyese na kuvanda ti bo.

19. Inki beto fwete sala sambu na kuvanda ti “mabanza ya Kristo,” mpi nki kikesa beto fwete sala?

¹⁹ Kana bankuluntu kuzaba Kristu Yezu mbote, bo talanda mpi mbote mbandu na yandi. Polo kuyulaka nde: “Nani zaba mabanza ya Mfumu Nzambi? Nani lenda pesa yandi bandongisila?” Na nima yandi yikaka nde: “Kansi beto, beto ke na mabanza ya Kristo.” (1 Korinto 2:16) Sambu na kuvanda ti mabanza ya Kristo, beto fwete longuka mutindu yandi vandaka kuyindula mpi mambu yonso yina ketala kimuntu na yandi sambu na kuzaba inki beto fwete sala kana dyambu mosi mebasika. Sambu na kuzaba Ntwadisi na beto mbote-mbote mutindu yina, yo kelombaka kulonguka ti dikebi yonso masolo yina kele na Baevanzile mpi kufulusa mbala na mbala mabanza na beto ti nzayilu ya luzingu ya Yezu mpi mbandu na yandi. Kana bankuluntu kesala kikesa na kulanda lutwadisu ya Kristu tii na kiteso yina, bampangi na dibundu talanda mbandu na bo kukonda mpasi. Mpi bankuluntu kevandaka na kyese ya kumona bantu yankaka kelanda bitambi ya Ntwadisi ti kyese yonso.

Landa na Kuvanda na Nsi ya Lutwadisu ya Kristu

20, 21. Inki lukanu beto fwete baka na ntangu beto kevingila inza ya mpa ya Nzambi mesilaka beto?

²⁰ Yo kele mfunu nde beto yonso kubikala na nsi ya lutwadisu ya Kristu. Mutindu beto mekuma penepene ti nsuka ya ngidika ya bima yai, beto lenda fwanisa luzingu na beto ti ya bana ya Izraele ntangu bo vandaka na Nseke ya Moabi na mvu 1473 ya N.T.B. Bo vandaka na kyelo ya Ntoto ya Lusilu, mpi na nzila ya profete Moize, Nzambi kutubaka nde: “Nge [Yozue] muntu ta nata bantu yai na kubaka ntoto ya Mfumu Nzambi zengaka nde yandi ta pesa na bankaka na bo.” (Kulonga 31:7, 8) Yozue vandaka ntwadisi yina Nzambi kuponaka. Sambu na kukota na Ntoto ya Lusilu, yo lombaka nde bantu ya Izraele kulemfuka na lutwadisu ya Yozue.

²¹ Biblia ketubila beto nde: “Beno ke kaka na mfumu [“ntwadisi,” NW] mosi mpamba, nde Mesia.” Kaka Kristu muntu tatwadisa beto na inza ya mpa yina Nzambi mesilaka beto, kisika lunungu tavanda. (2 Piere 3:13) Yo yina, bika beto baka lukanu ya kulemfuka na lutwadisu na yandi na luzingu na beto ya mvimba.

[Noti na nsi ya lutiti]

Keti Nge Keyibuka?

• Inki mutindu Kristu kutwadisaka dibundu na mvu-nkama ya ntete?

• Inki mutindu Kristu ketwadisaka dibundu na yandi bubu yai?

• Sambu na nki beto fwete lemfukila bantu yina ketwadisaka dibundu?

• Na nki mambu bankuluntu fwete monisa nde Kristu kele Ntwadisi na bo?

[Bangyufula ya disolo ya kulonguka]

[Kifwanisu ya kele na lutiti 15]

Kristu ketwadisaka dibundu na yandi, mpi bankengi kele na diboko na yandi ya kibakala

[Bifwanisu ya kele na lutiti 16]

“Beno lemfuka na bambuta na beno ya Dibundu, beno wila bo mpi”

[Kifwanisu ya kele na lutiti 19]

Yezu vandaka tiya-tiya mpi bantu vandaka ve na boma na kusolula ti yandi. Bakristu yina kele bankuluntu kesalaka kikesa ya kuvanda bonso yandi