Keti Nzambi Muntu Kele na Kisina ya Bampasi na Beto?

NTANGU mwana ya Marion ya nkento kubelaka maladi ya ngolo ya butomfu, Marion kusalaka kima mosi ya bantu mingi na kati na beto lendaka kusala. * Yandi sambaka Nzambi sambu na kulomba lusadisu. Marion ketuba nde: “Mono lendaka kuyibuka ve ntangu yankaka ya mono mekudiwaka kukonda ngolo mpi mono mosi bonso yina.” Na nima, maladi ya mwana na yandi kukumaka dyaka ngolo mingi, ebuna Marion yantikaka kukuma ti badute na Nzambi. Yandi kudiyulaka nde: “Sambu na nki mambu ya mutindu yai kekumina mono?” Yandi vandaka kubakisa ve nki mutindu Nzambi ya zola mpi ya mawa lendaka kuyambula yandi.

Bantu mingi kekutanaka ti bampasi bonso yai ya kukuminaka Marion. Na ntoto ya mvimba, bantu mingi kekudiwaka bonso nde Nzambi keyambulaka bo na ntangu ya mpasi. Ntangu bo fwaka ntekolo na yandi, Lisa kutubaka na nima nde: “Mono kelanda kaka na kunwana sambu na kuzaba ‘sambu na nki NZAMBI kepesaka nzila nde mambi kusalama.’ Mono mevidisaka mpenza ve lukwikilu na mono na Nzambi, kansi yo ke dyaka ve ngolo bonso na luyantiku.” Kiteso mosi, na nima ya lufwa ya bebe na yandi yina kufwaka na mutindu mosi ya yandi bakisaka ve, sambu na mavwanga mosi ya kukonda mfunu yina kubasikaka, nkento mosi kutubaka nde: “Nzambi kupesaka mono ve lusadisu na dyambu yina kubwilaka mono. Yandi monisaka mono ve ata kidimbu mosi ya zola to ya mawa.” Yandi yikaka nde: “Mono talolula ve Nzambi ata fyoti.”

Bantu yankaka kewilaka Nzambi makasi ntangu bo kemonaka mambu ya mbi yina kesalama na kisika ya bo kezingaka. Bo kemona mutindu bansi kebeba sambu na kinsukami mpi nzala ya ngolo, barefizie ya bitumba yina kele kukonda kivuvu, bana mingi kibeni ya kekuma bansyona sambu bibuti na bo kefwa na SIDA, mpi mafuku ya bantu ya kenyokwama sambu na bamaladi yankaka. Ntangu bantu mingi kekutanaka ti bampasi yai mpi yankaka, bo kepesaka foti na Nzambi sambu yo kemonanaka bonso nde yandi kesala ve ata kima mosi.

Kansi, yo kele kyeleka nde Nzambi ve muntu kele na kisina ya bampasi ya kenyokulaka bantu. Ya kyeleka, bikuma ya mbote kele mingi yina fwete tinda beto na kukwikila nde kubika fyoti Nzambi takatula bampasi yina bantu ke na kumona. Beto kelomba nge na kutanga disolo yina kelanda ebuna nge tabakisa nde Nzambi kekudibanzaka mpenza sambu na beto.

[Noti na nsi ya lutiti]