Bo Melongaka Bo na Kuta Kimbangi Mbotembote

“Beno [tavanda bambangi, NW] na mono na bwala Yeruzalemi, na ntoto ya Yudea yonso, na ntoto ya Samaria yonso, tii na nsuka ya ntoto.”​—BISALU 1:8.

1, 2. Inki kisalu Piere kubakaka mpi nani kupesaka yandi yo?

 “YESU, muntu ya Nazareti . . . tindaka beto na kwenda kulonga [bantu ti kuta kimbangi mbotembote, NW] nde yandi muntu ya Nzambi solaka sambu na kusambisa bantu ya moyo ti bantu ya kufwa.” (Bisalu 10:38, 42) Na nsadisa ya bangogo yai, ntumwa Piere kutendudilaka Korneye ti dibuta na yandi kisalu yina yandi bakaka ya kulonga evanzile.

² Inki ntangu Yezu kupesaka kisalu yai? Yo fwete vanda nde Piere vandaka kuyindula mambu yina Yezu kutubaka na nima ya lufutumuku na yandi ntangu fyoti na ntwala ya kumata na zulu. Na dibaku yina, Yezu kusongaka balongoki na yandi ya kwikama nde: “Beno [tavanda bambangi, NW] na mono na bwala Yeruzalemi, na ntoto ya Yudea yonso, na ntoto ya Samaria yonso, tii na nsuka ya ntoto.” (Bisalu 1:8) Kansi, na ntwala nde Yezu kutuba mambu yai, Piere kuzabaka nde, sambu yandi vandaka longoki ya Yezu, yandi vandaka ti mukumba ya kuzabisa bantu yankaka mambu ya metala lukwikilu na yandi na Yezu.

Bamvula Tatu ya Formasio

3. Inki dyambu ya kuyituka Yezu kusalaka, mpi nki yandi songaka Piere ti Andre?

³ Bangonda mingi na nima ya mbotika na yandi na mvu 29 ya T.B., Yezu kulongaka na kisika yina Piere ti mpangi na yandi Andre vandaka kusala kisalu ya kuloba bambisi na Nzadi ya Galilea. Bo vandaka bo meloba dezia mpimpa ya mvimba kansi bo simbaka ve ata mbisi mosi. Ata mpidina, Yezu kusongaka bo nde: “Beno tula babukondi na beno na masa sambu na kusimba bambisi.” Ntangu bo salaka mambu yina Yezu kusongaka bo, “bo simbaka bambisi mingi. Babukondi zolaka kupasuka.” Ntangu Piere kumonaka dyambu yina ya kuyituka, yandi waka boma mingi, kansi Yezu kukitisaka yandi ntima nde: “Kumona boma ve. Yantika ntangu yai, nge ta simbaka bantu.”​—Luka 5:4-10.

4. (a) Inki mutindu Yezu kupesaka balongoki na yandi formasio sambu na kuta kimbangi? (b) Kisalu ya balongoki ya Yezu zolaka kuvanda nki kiteso kana beto fwanisa yo ti yina ya yandi mosi?

⁴ Na mbala mosi, Piere ti Andre, kumosi ti Yakobo mpi Yoane bana ya Zebedeo, kuyambulaka babwatu na bo mpi bo landaka Yezu. Na nsungi mosi ya bamvula kiteso ya tatu, bo vandaka kulanda Yezu na banzyetolo na yandi ya kusamuna mpi yandi longaka bo na kukuma balongi ya evanzile. (Matayo 10:7; Marko 1:16, 18, 20, 38; Luka 4:43; 10:9) Na nsuka ya formasio na bo, na Nisani 14  ya mvu 33 ya T.B., Yezu kusongaka bo nde: “Muntu yina ke tulaka ntima na mono, yandi ta salaka mpi bisalu yai ya mono ke salaka. Yandi ta salaka ata bisalu ya kuluta nene.” (Yoane 14:12) Balongoki ya Yezu zolaka kuta kimbangi mbotembote mutindu Yezu kusalaka, kansi bo zolaka kusala yo na kiteso mosi ya kuluta nene. Mutindu bo sukininaka ve na kubakisa yo, bo ti bantu yankaka yonso yina zolaka kukuma balongoki zolaka kuta kimbangi na “makanda yonso,” tii na “nsuka ya ngidika ya bima.”​—Matayo 28:19, 20, NW.

5. Na nki mitindu beto lenda baka mambote ya formasio yina Yezu kupesaka balongoki na yandi?

⁵ Beto ke na kuzinga na “nsuka ya ngidika ya bima.” (Matayo 24:3, NW) Na kuswaswana ti balongoki ya ntete, beto lenda landa ve Yezu na kisalu ya kusamuna mpi kutala mutindu yandi kelonga bantu. Ata mpidina, beto lenda baka mambote ya formasio na yandi ntangu beto ketanga na Biblia mutindu yandi vandaka kulonga mpi bantuma yina yandi pesaka na balongoki na yandi. (Luka 10:1-11) Kansi, disolo yai tatubila dyambu yankaka ya mfunu yina Yezu kumonisaka na balongoki na yandi. Dyambu yango kele mutindu ya mbote ya kutadila kisalu ya kusamuna.

Kudibanza Sambu na Bantu

6, 7. Inki kikalulu kusalaka nde Yezu kusala kisalu na yandi mbotembote, mpi nki mutindu beto lenda landa mbandu na yandi na dyambu yango?

⁶ Sambu na nki Yezu kutaka kimbangi mbotembote mutindu yina? Kikuma mosi ya vandaka kupusa yandi na kusala yo kele dikebi ya ngolo yina yandi vandaka na yo sambu na bantu mpi kikalulu na yandi ya kudibanza sambu na bo. Muyimbi-bankunga kutubaka na ntwala nde Yezu tawa mawa ya “bansukami ti bantu yina ke na ngolo ve.” (Nkunga 72:13) Ntembe kele ve nde yandi lungisaka mbikudulu yai. Biblia ketuba mutindu yai sambu na dyambu yina kusalamaka kilumbu mosi: “Ntangu yandi monaka bantu mingi-mingi, yandi wilaka bo mawa, sambu bo vandaka me lemba, kikesa ve, bonso mameme me konda ngungudi ya kutala bo.” (Matayo 9:36) Ata bantu yina vandaka kusala masumu ya nene kubakisaka nde yandi vandaka kudibanza sambu na bo, yo yina bo vandaka kupusana penepene ti yandi.​—Matayo 9:9-13; Luka 7:36-38; 19:1-10.

⁷ Bubu yai, beto tata kimbangi mbotembote kana beto kemonisa kikalulu ya kudibanza sambu na bantu ya mutindu mosi. Na ntwala ya kubasika na kisalu ya bilanga, sambu na nki nge baka ve mwa ntangu fyoti sambu na kuyindula mutindu bantu kele mpenza ti mfunu ya nsangu yina nge kenatila bo? Yindula bampasi ya bo lenda vanda na yo yina Kimfumu mpamba tamanisa. Baka lukanu ya kuvanda na mabanza ya mbote na ntwala ya konso muntu, sambu nge kezaba ve nani tandima nsangu ya nge kenata. Mbala yankaka nge takutana ti muntu mosi ya mekatuka kusamba sambu muntu mosi yina kele bonso nge kukwisa kutala yandi sambu na kusadisa yandi!

Zola Kepusaka Bo

8. Na kulandaka mbandu ya Yezu, inki kepusaka balongoki na yandi na kusamuna nsangu ya mbote?

⁸ Nsangu ya mbote yina Yezu kulongaka vandaka kutadila kulungana ya luzolo ya Yehowa, kusantisama ya zina na Yandi, mpi kunungisama ya kimfumu na Yandi. Yai kele bantembe ya kuluta mfunu yina ketadila bantu. (Matayo 6:9, 10) Zola yina Yezu kuvandaka na yo sambu na Tata na yandi kupusaka yandi na kubikala ya kwikama tii na nsuka mpi na kuta mbotembote kimbangi ya Kimfumu, yina tamanisa bantembe yina yonso. (Yoane 14:31) Sambu balongoki ya Yezu ya bubu yai kele na zola ya mutindu mosi, bo kevandaka kikesa na ntangu bo kesalaka kisalu ya kusamuna. Ntumwa Yoane kutubaka nde: “Kana beto ke zolaka Nzambi, yo ke songa nde beto ke landaka bansiku na yandi.” Kusala kisalu ya kusamuna nsangu ya mbote mpi ya kukumisa bantu balongoki kele na kati ya bansiku yina beto fwete landa.​—1 Yoane 5:3; Matayo 28:19, 20.

9, 10. Katula zola yina beto kevandaka na yo sambu na Nzambi, inki zola yankaka kepusaka beto na kuta kimbangi mbotembote?

 ⁹ Yezu kusongaka balongoki na yandi nde: “Kana beno ke zolaka mono, beno ta landaka bansiku na mono. Muntu yina ke ndimaka bansiku na mono ti ke landaka yo, yandi muntu ke zolaka mono.” (Yoane 14:15, 21) Yo yina, zola yina beto kele na yo sambu na Yezu fwete pusa beto na kuta kimbangi na kyeleka mpi na kusala mambu yankaka yina Yezu kulombaka balongoki na yandi na kusala. Ntangu yandi monanaka na okazio mosi na nima ya lufutumuku na yandi, Yezu kulongisilaka Piere nde: “Keba bana-mameme na mono. . . . Keba mameme na mono. . . . Keba mameme na mono.” Yo lombaka nde nki kupusa Piere na kusala yo? Yezu kupesaka mvutu ntangu yandi yulaka Piere mbala mingi nde: “Keti nge ke zolaka mono? . . . Nge ke zolaka mono? . . . Nge ke zolaka mono?” Ee, zola ya Piere vandaka na yo sambu na Yezu zolaka kupusa yandi na kuta kimbangi mbotembote, sambu na kusosa “bana-mameme” ya Yezu, mpi na nima, kuvanda ngungudi na bo ya kimpeve.​—Yoane 21:15-17.

¹⁰ Bubu yai, beto kezingaka ve ti Yezu mutindu Piere kuzingaka ti yandi. Ata mpidina, beto kebakisaka mbotembote mambu yina Yezu kusalaka sambu na beto. Ntima na beto kemonisaka ntonda mingi sambu na zola ya nene yina kupusaka yandi na ‘kufwa sambu na kugulusa bantu yonso.’ (Baebreo 2:9; Yoane 15:13) Beto kekudiwaka mutindu Polo kudiwaka ntangu yandi sonikaka nde: “Kuzola yina ya Kristo ke zolaka beto yo ke yalaka beto . . . Kristo me fwaka sambu na bantu yonso, sambu bantu yina ke na moyo, bo zinga sambu na bo mosi diaka ve, kansi sambu na Kristo.” (2 Korinto 5:14, 15) Na ntangu beto kelungisaka kisalu ya kuta kimbangi mbotembote na masonga yonso, beto kemonisaka valere ya mingi na zola yina Yezu kumonisilaka beto, mpi beto kemonisaka nde beto kezolaka yandi. (1 Yoane 2:3-5) Yo tavanda mbote ve nde beto konda kudibanza sambu na kisalu ya kusamuna, bonso nde kimenga yina Yezu kupesaka kele na mfunu ve na meso na beto.​—Baebreo 10:29.

Tula Dikebi Kaka na Mambu ya Mfunu

11, 12. Inki kikuma Yezu kukwisilaka na ntoto, mpi dikebi na yandi ya ntetentete kuvandaka na nki kisalu?

¹¹ Ntangu Yezu kuvandaka na ntwala ya Ponse Pilate, yandi tubaka  nde: “Kisalu ya mono butukilaka ti ya mono kwisilaka awa na nsi-ntoto, yo kele sambu na kutuba kitemwe [“kimbangi,” NW] na mambu yina kele ya kieleka.” (Yoane 18:37) Yezu kubikaka ve nde ata kima mosi kuvalangasa dikebi yina yandi vandaka kutula na kisalu na yandi ya kuta kimbangi na kyeleka. Kuta kimbangi na kyeleka kuvandaka kisalu yina Nzambi kuzolaka nde yandi sala.

¹² Ya kyeleka, Satana kumekaka Yezu na dyambu yai. Ntangu fyoti na nima ya mbotika ya Yezu, Satana kusongaka Yezu nde yandi takumisa yandi muntu ya nene na inza, mpi tapesa yandi “bimfumu yonso ya nsi-ntoto ti lukumu na yo.” (Matayo 4:8, 9) Na nima, Bayuda zolaka kukumisa yandi ntotila. (Yoane 6:15) Bubu yai bantu yankaka lenda yindula nde kana Yezu ndimaka kusala mambu yina ya bo vandaka kusonga yandi, yo zolaka kunatila bantu mambote mingi, ziku bo lenda yindula nde kana Yezu kukumaka ntotila na ntangu yina yandi vandaka muntu, yandi zolaka kusadila bantu mambu mingi ya mbote. Kansi, Yezu kubuyaka ngindu ya mutindu yina. Dikebi na yandi ya ntetentete kuvandaka na kisalu ya kuta kimbangi na kyeleka.

13, 14. (a) Inki mambu kuvalangasaka ve dikebi yina Yezu vandaka kutula na kisalu na yandi ya kuluta mfunu? (b) Ata Yezu kuvandaka nsukami na kinsuni, inki dyambu yandi salaka?

¹³ Dyaka, bimvwama kuvalangasaka ve dikebi ya Yezu. Yo yina, yandi zingaka ve bonso mvwama. Nkutu yandi vandaka ve ti kisika ya kulala. Kilumbu mosi, yandi tubaka nde: “Bamikengi ke na mabulu na bo sambu na kulala, bandeke ke na babuyamba na bo, kansi Mwana-muntu ke na kisika ve ya yandi lenda kwenda kulala.” (Matayo 8:20) Ntangu Yezu kufwaka, kima mosi kaka ya valere ya yandi vandaka na yo kuvandaka lele yina basoda ya Roma kubudilaka zeke. (Yoane 19:23, 24) Ebuna, keti beto lenda tuba nde Yezu kunungaka ve na luzingu na yandi? Ata fyoti ve!

¹⁴ Yezu kusalaka mambu mingi kibeni kuluta konso nki lusadisu yina muntu ya kele na mbongo mingi lendaka kupesa. Polo kutubaka nde: “Beno zaba nki Mfumu na beto Yesu Kristo salaka sambu na beno: Yandi vandaka mvwama kansi yandi kumaka nsukami sambu na beno na mpila nde na kinsukami na yandi, beno kuma bamvwama.” (2 Korinto 8:9; Filipi 2:5-8) Ata yandi vandaka nsukami na kinsuni, Yezu kukangudilaka bantu ya kudikulumusa nzila ya kubaka luzingu ya mvula na mvula mpi ya kukuka. Ya kyeleka, beto kepesa yandi matondo mingi! Beto kele mpi na kyese sambu na matabisi yina yandi bakaka na mpila yandi tulaka dikebi na yandi yonso na kusala luzolo ya Nzambi!​—Nkunga 40:9; Bisalu 2:32, 33, 36.

15. Inki kima meluta kimvwama na valere?

¹⁵ Bubu yai, Bakristu yina kesalaka kikesa sambu na kulanda mbandu ya Yezu kebuyaka mpi nde mpusa ya kusosa kimvwama kuvalangasa dikebi na bo. (1 Timoteo 6:9, 10) Bo kendimaka nde bimvwama lenda tomisa luzingu, kansi bo kezabaka mpi nde sambu na kubaka luzingu ya mvula na mvula yo kelombaka ve nde bo vanda bamvwama. Kana Mukristu mefwa, kimvwama na yandi ya kinsuni kevandaka dyaka ve na valere mutindu lele ya Yezu kuvandaka dyaka ve na valere na ntangu yandi fwaka. (Longi 2:10, 11, 17-19; 7:12) Kana Mukristu mefwa, kima mosi kaka ya kevandaka na valere ya kyeleka yina yandi kevandaka na yo kele bangwisana na yandi ti Yehowa mpi ti Yezu Kristu.​—Matayo 6:19-21; Luka 16:9.

Kulemba Ve Sambu na Kimbeni

16. Inki Yezu kusalaka na ntangu yandi kutanaka ti kimbeni?

¹⁶ Kimbeni kupusaka ve Yezu na kukatula dikebi na yandi na kisalu ya kuta kimbangi na kyeleka. Yandi lembaka ve ata na ntangu yandi zabaka nde kubika fyoti kisalu na yandi na ntoto kusuka na lufwa mosi ya kimenga. Polo kutubaka mutindu yai sambu na Yezu: “Yandi kangaka ntima ntangu bo fwaka yandi na zulu ya [nti ya mpasi, NW]. Yandi [vwezaka nsoni, NW] sambu yandi vandaka kutala kaka kiese yina vandaka kuvingila yandi. Ebuna ntangu yai, yandi me vanda na diboko ya [kitata] ya kiti ya kimfumu ya Nzambi.” (Baebreo 12:2) Simba nde Yezu ‘kuvwezaka nsoni.’ Yandi kudiyangisaka ve sambu na mambu yina bambeni kuyindudilaka yandi. Dikebi na yandi ya ntetentete kuvandaka na kusala luzolo ya Nzambi.

17. Inki dilongi beto lenda baka na kukanga ntima ya Yezu?

¹⁷ Sambu na kumonisa dilongi yina beto kebaka na kukanga ntima ya Yezu, Polo kelongisila Bakristu  nde: “Beno yindula mutindu yandi kangaka ntima na kimbeni yina ya bantu ya masumu kotilaka yandi. Yo yina, beno lemba ve, kansi beno tula kikesa.” (Baebreo 12:3) Ya kyeleka, beto lenda lemba kana beto kekutana mbala na mbala ti kimbeni mpi ti bantu yina keseka beto. Beto lenda lemba nitu na kulanda kubuya bima ya inza yina kebenda beto, mbala yankaka sambu bampangi na beto ya kinsuni keseka beto mpi kepusa beto na kukuma bantu ya nene. Kansi, bonso Yezu, beto ketulaka ntima na lusadisu ya Yehowa na ntangu beto kekangamaka na lukanu na beto ya kutula Kimfumu na kisika ya ntete na luzingu na beto.​—Matayo 6:33; Roma 15:13; 1 Korinto 2:4.

18. Inki dilongi ya mbote beto lenda baka na bangogo yina Yezu kusongaka Piere?

¹⁸ Kubuya ya Yezu vandaka kubuya nde dikebi na yandi kuvalangana kumonanaka ntangu yandi yantikaka kutubila balongoki na yandi mambu ya metala lufwa na yandi yina kukumaka penepene. Piere kupesaka Yezu kikesa na kuvanda “mbote” (NW) sambu na yandi mosi mpi na kundima nde dyambu ya mutindu yina “ta bwila” yandi ve. Yezu kubuyaka na kuwa konso dyambu yina lendaka kulembisa ngolo ya lukanu yina yandi vandaka na yo ya kusala luzolo ya Yehowa. Yandi pesaka Piere mukongo mpi yandi tubaka nde: “Nge Satana, katuka awa na meso na mono! Nge ke zola kukanga mono nzila, sambu nge ke banza mabanza ya kinzambi ve kansi mabanza ya kimuntu!” (Matayo 16:21-23) Bika nde beto mpi kuvanda ntangu yonso na lukanu ya mutindu mosi ya kubuya mabanza ya bantu. Na kisika ya kulanda yo, bika nde mabanza ya Nzambi kutwadisa beto ntangu yonso.

Kimfumu Tanata Mambote ya Kyeleka

19. Ata Yezu vandaka kusala mambu ya kuyituka, inki dyambu kulutaka mfunu mingi na kisalu na yandi?

¹⁹ Yezu kusalaka mambu mingi ya kuyituka sambu na kumonisa nde yandi vandaka Mesia. Yandi futumunaka nkutu bafwa. Bisalu yina yandi salaka vandaka kubenda bibuka ya bantu, kansi Yezu kukwisaka ve na ntoto kaka sambu na kusala kisalu ya kusadisa bantu. Yandi kwisaka sambu na kuta kimbangi na kyeleka. Yandi zabaka nde mambote ya kinsuni ya yandi pesaka kuvandaka ya ntangu fyoti, sambu ata bantu yina yandi futumunaka kufwaka dyaka. Kaka kisalu ya kuta kimbangi na kyeleka zolaka kupesa yandi nzila ya kusadisa bantu mingi na kubaka luzingu ya mvula na mvula.​—Luka 18:28-30.

20, 21. Inki bukatikati Bakristu ya kyeleka kevandaka na yo na yina metala kusala bisalu ya mbote?

²⁰ Bubu yai, bantu mingi kesosaka kulanda mbandu ya bisalu ya mbote yina Yezu kusalaka. Bo ketungaka balupitalu, to bo kesalaka bisalu yankaka sambu na kusadisa bansukami na inza. Nkutu, bo kekuditambikaka na mambu mingi, yo yina beto kesikisa bo sambu na masonga na bo. Kansi, lusadisu yonso ya bo kepesaka kevandaka ya ntangu fyoti mpenza. Lusadisu yina tazinga kimakulu takatuka kaka na Kimfumu. Yo yina, mutindu Yezu kusalaka, Bambangi ya Yehowa ketulaka dikebi na bo yonso na kuta kimbangi na kyeleka yina metala Kimfumu yango.

²¹ Ntembe kele ve nde Bakristu ya kyeleka kesalaka bisalu ya mbote. Polo kusonikaka nde: “Ntangu yonso ya beto ke mona mpila, beto sala bantu yonso mbote, [kansi mingimingi na, NW] bampangi na beto bakristo.” (Galatia 6:10) Na bantangu ya mpasi to kana muntu kele na mfunu ya kima mosi, beto kevandaka ve na dute na ‘kusala mbote’ na bamfinangani na beto to na bampangi na beto Bakristu. Ata mpidina, beto ketulaka ntetentete dikebi na beto na kisika yina yo fwete vanda: na kisalu ya kuta kimbangi na kyeleka.

Baka Dilongi na Mbandu ya Yezu

22. Sambu na nki Bakristu kesamunaka na bamfinangani na bo?

²² Polo kusonikaka nde: “Kana mono ke zabisaka ve Nsangu ya Mbote mono zolaka kumona mawa!” (1 Korinto 9:16) Yandi tulaka dikebi na yandi yonso na nsangu ya mbote sambu yandi zabaka nde kulonga nsangu yina tapesa luzingu na yandi mosi ti na bantu yina vandaka kuwa yandi. (1 Timoteo 4:16) Beto ketadilaka kisalu na beto mutindu mosi. Beto kezolaka kusadisa bamfinangani na beto mpi kumonisa zola na beto na Yehowa. Beto kezolaka kusonga zola na beto na Yezu mpi kumonisa ntonda na beto na zola ya mingi yina yandi monisaka sambu na beto. Yo yina, beto kesamunaka nsangu ya mbote mpi beto kezingaka ‘bonso kele luzolo ya Nzambi, kansi beto kezingaka ve bonso nzala ya kimuntu ketinda beto na kusala.’​—1 Piere 4:1, 2.

²³ Bonso Yezu, beto kevalangasaka ve dikebi na beto na ntangu bantu kesekaka to kebuyaka nsangu na beto na makasi yonso. Beto kelonguka dilongi mosi na dyambu ya kuyituka yina Yezu kusalaka  na ntangu yandi lombaka Piere ti Andre na kulanda yandi. Beto kebakisa nde kana beto kelemfukila Yezu mpi, beto kelosa babukondi na beto ya kifwani na bamasa yina kemonanaka bonso nde yo kevandaka ve ti bambisi, kisalu na beto ya kuloba lenda buta bambuma. Bakristu mingi yina kesalaka kisalu ya kuloba bantu kekangaka bambisi mingi ya kifwani na nima ya kusala bamvula mingi na bateritware yina kemonanaka bonso nde yo kebutaka ve bambuma. Bankaka mezwaka mpila ya kukwenda kuloba na bisika yina kele ti bambisi mingi mpi bo kekangaka bambisi mingi na bisika yango. Ata beto kesala konso nki kisalu yina, beto tayambula ve na kulosa babukondi na beto ya kifwani. Beto kezaba nde Yezu metuba ntete ve nde kisalu ya kusamuna mesuka na konso kitini yina ya ntoto.​—Matayo 24:14.

²⁴ Bambangi ya Yehowa kuluta bamilio sambanu ke na kudipesa mingi na kisalu na bo na bansi kuluta 230. Nzozulu ya Nkengi ya Februari 1, 2005, tapesa lapolo ya kisalu ya mvula ya mvimba yina bo salaka na mvu ya kisalu 2004. Lapolo yango tamonisa nde Yehowa kesakumuna mpenza kisalu ya kusamuna. Na ntangu yina mebikala sambu na ngidika yai ya bima, bika nde beto landa na kusala na ntima mosi mambu yai ya kele na bangogo ya Polo yina kepesa kikesa: “Longa nsangu ya Nzambi, tula ngolo na kuzabisa yo.” (2 Timoteo 4:2) Bika beto landa na kuta kimbangi mbotembote tii kuna Yehowa tatuba nde kisalu memana.

Banda na mvula yai, Lapolo ya Mvula ya Kisalu ya Bambangi ya Yehowa ya Inza ya Mvimba tabasikaka dyaka ve na Nzozulu ya Nkengi ya Yanuari 1. Kansi, yo tabasikaka na Nzozulu ya Nkengi ya Februari 1.

Keti Nge Lenda Pesa Mvutu?

• Inki mutindu beto lenda baka mambote ya formasio yina Yezu kupesaka balongoki na yandi?

• Inki mutindu Yezu vandaka kutadila bantu yina yandi vandaka kulonga?

• Inki kepusaka beto na kuta kimbangi mbotembote?

• Bonso Yezu, inki mutindu beto lenda tula dikebi na beto yonso na kusala luzolo ya Nzambi?

[Bangyufula ya disolo ya kulonguka]

23, 24. (a) Inki dilongi beto kebaka na dyambu ya kuyituka yina metala bambisi? (b) Banani ke na kuta kimbangi mbotembote bubu yai?

[Kifwanisu ya kele na lutiti 25]

Kikuma ya ntetentete ya Yezu kukwisilaka na ntoto kuvandaka sambu na kuta kimbangi na kyeleka

[Bifwanisu ya kele na lutiti 26]

Bambangi ya Yehowa ketulaka ntetentete dikebi na bo na kuta kimbangi mbotembote