Bupusi ya Yezu na Bantu ya Inza ya Mvimba

EDGAR GOODSPEED, mbaludi ya Biblia, kusonikaka nde: “Mambu yonso yina baevanzile ketubilaka, yina Yezu kutubaka na kingenga mpi na ntwala ya bantu yonso, yandi lendaka kutuba yo na bangunga zole mpamba. Kansi, mambu fyoti yango kusimbaka mpenza ntima, mpi yo pusaka bantu na kusadila yo na mpila nde ata muntu yankaka ve mevandaka na bupusi ya mutindu yina na inza ya mvimba.”

Ntangu Yezu Kristu kumanisaka kisalu na yandi na ntoto na mvu 33 ya T.B., balongoki na yandi kuvandaka kiteso ya 120, babakala ti bankento. (Bisalu 1:15) Kansi, bubu yai bantu kuluta bamiliare zole ketubaka nde bo kele Bakristu. Bankama ya bamilio yankaka kendimaka nde Yezu kele profete. Ya kyeleka, malongi na yandi kele na bupusi ya ngolo na luzingu ya bantu.

Ata bamfumu yina kele ve Bakristu kendimaka nde Yezu kele na bupusi na inza ya mvimba. Mu mbandu, Hyman Enelow, rabi mosi ya Muyuda, kusonikaka nde: “Yezu mekumaka muntu ya mezabanaka kuluta mingi, ya bantu kelongukaka kuluta mingi, ya mevandaka na bupusi ya kuluta mingi na disolo ya mabundu ya bantu yonso.” Enelow kuyikaka nde: “Nani lenda tesa kiteso ya bupusi yina Yezu kele na yo na luzingu ya bantu? Zola ya yandi monisaka, kikesa ya yandi pesaka bantu, mambu ya mbote ya yandi salaka, kivuvu mpi kyese ya yandi pesaka, ata muntu yankaka ve mesalaka mambu yai yonso na luzingu ya bantu. Na kati ya mambu ya nene mpi ya mbote yina bantu mesalaka, ata muntu mosi ve mefwananaka mpi mezabanaka mutindu Yezu mezabanaka na ntoto ya mvimba. Yandi mekumaka muntu ya bo ketubilaka kuluta  mingi na luzingu ya bantu.” Nkutu, prezida ya Inde, Mohandas K. Ghandi kutubaka nde: “Mu mezaba ve ata muntu yankaka ya mesalaka mambu mingi ya mbote sambu na bantu kuluta Yezu. Na kutuba ya mbote, Bukristu kele kwa yo ve mbi ata fyoti.” Kansi, yandi yikaka nde: “Mavwanga kekatukaka na beno Bakristu. Beno bantu kezitisaka ve malongi na beno mosi.”

Kikristu mesalaka mambu mingi ya mbi ya kewakanaka ve ti malongi ya Yezu. Cecil John Cadoux, muntu ya kelongukaka mambu ya Bukristu ya melutaka, kutubaka nde “bikalulu ya mbi ya ke na kukuma mingi malembe-malembe mpi ngolo na Dibundu ya mvimba kubendaka dikebi ya bamfumu ya Bakristu banda na . . . 140 ya T.B.” Yandi tubaka nde: “Ntembe kele ve nde kubwa ya bikalulu ya mbote ya Bakristu vandaka na yo ntama zolaka kunata bantu na kuyantika kusala mambu mutindu inza kesalaka.”

Kubeba yai ya bikalulu ya mbote kukumaka mpenza ngolo na mvu-nkama ya iya, ntangu Ntotila ya Roma, Constantin, kukumaka Mukristu. Cadoux kusonikaka nde: “Bantu yina kelongukaka mambu ya ntama kumonaka yo, mpi mingi na kati na bo kuwaka mpasi na ntima na kumona kiteso ya mbi yina Dibundu kusalaka na mutindu yo salaka bangwisana ti Constantin.” Banda na ntangu yina, Bakristu ya zina mpamba kesalaka mambu mingi ya nsoni ya kevwezaka zina ya Kristu.

Yo yina, bangyufula ya beto kekudiyufula kele yai: Inki mambu kibeni Yezu kulongaka? Mpi nki bupusi malongi na yandi fwete vanda na yo na luzingu na beto?

[Kifwanisu ya kele na lutiti 3]

“Mu mezaba ve ata muntu yankaka ya mesalaka mambu mingi ya mbote sambu na bantu kuluta Yezu.”​—Mohandas K. Gandhi

[Kifwanisu ya kele na lutiti 3]

“Ata muntu yankaka ve mevandaka na bupusi ya mutindu yina na inza ya mvimba.”​—Edgar Goodspeed

[Bangogo ya kemonisa kisina ya foto]

Bifwanisu ya Culver