Bangyufula ya Batangi

Keti sanduku ya kuwakana kuvandaka kaka ti matadi zole, to yo vandaka mpi ti bima yankaka?

Na ntangu bo kangulaka tempelo ya Salomo na mvu 1026 N.T.B., “Sanduku ya Kuwakana vandaka kaka na matadi yina zole ya Moize tulaka ntangu Mfumu Nzambi wakanaka na bantu ya Israele kuna na ngumba ya Sinai, ntangu bo basikaka na nsi ya Ezipte.” (2 Bansangu 5:10) Kansi, yo vandaka ve mutindu yina ntangu yonso.

Bantu ya Izraele kukotaka na ntoto ya zelo na zelo ya Sinai “na kilumbu ya ntete ya ngonda ya tatu katuka ntangu bo basikaka na nsi ya Ezipte.” (Kubasika 1 9:1, 2) Na nima, Moize kumataka na Ngumba Sinai mpi Nzambi kupesaka yandi matadi zole ya Nsiku. Yandi ketuba nde: “Ebuna mono kwisaka kulumuka na yo. Mono tulaka yo na sanduku ya mono salaka, kaka mutindu Mfumu Nzambi songaka mono; yo kele kaka muna tii bubu yai.” (Kulonga 10:5) Sanduku yai ya Yehowa kuzabisaka Moize na kusala sambu na kubumba matadi ya Nsiku, kuvandaka sambu na ntangu fyoti. (Kulonga 10:1) Bo manisaka ve kutunga sanduku ya kuwakana yina bo zolaka kusadila tii penepene na nsuka ya mvu 1513 N.T.B.

Ntangu fyoti na nima ya kubasika na Ezipte, bantu ya Izraele yantikaka kubokuta sambu na madya. Yo yina, Yehowa kupesaka bo mana. (Kubasika 12:17, 18; 16:1-5) Na ntangu yina, Moize kusongaka Aroni nde: “Tula balitre zole ya mana na dibungu, ebuna Mfumu Nzambi ta bumba yo sambu na bana na beto.” Disolo ketuba nde: “Aroni salaka mutindu Mfumu Nzambi songaka Moize; yandi tulaka dibungu yango ya mana na ntwala ya sanduku yina vandaka kusonga kuwakana ya Nzambi ti bantu [kisika bo vandaka kutanina mikanda ya mfunu], na mpila nde Mfumu Nzambi kukeba yo.” (Kubasika 16:33, 34) Ntembe kele ve nde lere Aroni kuvukisaka mana na kati ya dibungu na ntangu yina, bo tulaka yo na ntwala ya Sanduku yango sambu yo vingila tii kuna Moize tasala Sanduku mpi kutula matadi na kati na yo.

Mutindu beto tubaka yo dezia, bo tungaka sanduku ya kuwakana na mvu 1513 N.T.B. Bo tulaka nti ya Aroni na Sanduku yina bamvula mingi na nima, na nima ya kukolama ya Kore ti bantu yankaka. Ntumwa Polo ketubila “sanduku ya kuwakana . . . , yina na kati na yo kuvandaka na dibungu ya wolo yina vandaka ti mana mpi nti ya Aroni yina basisaka matiti mpi ti matadi ya kuwakana.”​—Baebreo 9:4, NW.

Mana kele ngidika yina Nzambi kusalaka na nsungi ya bamvula 40 ya bana ya Izraele kulutisaka na ntoto ya zelo na zelo. Yandi vandaka kupesa yo dyaka ve ntangu bo yantikaka ‘kudya mampa’ ya ntoto ya lusilu. (Yozue 5:11, 12) Bo tulaka nti ya Aroni na kati ya sanduku ya kuwakana sambu na lukanu mosi​—sambu na kupesa atasio na bana na bo yina lenda kolama. Dyambu yai kemonisa nde nti yango kubikalaka na kisika yina na nsungi yonso ya bo lutisaka na ntoto ya zelo na zelo. Yo yina, yo mefwana mpenza na kutuba nde bo basisaka nti ya Aroni ti dibungu ya wolo ya vandaka ti mana na kati ya sanduku ya kuwakana mwa ntangu fyoti na nima ya kukota na Ntoto ya Lusilu mpi mwa ntangu fyoti na ntwala ya kukangula tempelo ya Salomo.