Administrasio Mosi Sambu na Kulungisa Lukanu ya Nzambi

“Nzambi ke salaka mambu yonso mutindu kele mabanza na yandi ti luzolo na yandi.”​—EFEZO 1:11.

1. Sambu na nki mabundu yonso ya Bambangi ya Yehowa tavukana na Aprili 12, 2006?

NA Kitatu na nkokila, Aprili 12, 2006, bantu kiteso ya bamilio 16 tavukana sambu na kusungimina Madya ya Nkokila ya Mfumu. Na konso kisika yina lukutakanu yango tasalama, yo tavanda ti mesa mosi mpi na zulu na yo bo tatula mampa ya kukonda levire, yina kemonisa nitu ya Kristu, mpi vinu ya mbwaki, yina kemonisa menga na yandi yina kutyamukaka. Penepene ya nsuka ya diskure yina tatendula disongidila ya Lusungiminu ya lufwa ya Yezu, bo talutisa bidimbu yai​—ntetentete mampa, na nima vinu—​na bantu yonso yina tavanda pana. Na mabundu fyoti kibeni ya Bambangi ya Yehowa, muntu mosi to bantu mingi na kati ya bantu yina tavukana tadya mampa mpi tanwa vinu yango. Kansi, na mabundu mingi, ata muntu mosi ve tadya mampa mpi tanwa vinu. Sambu na nki kaka Bakristu fyoti mpamba, bayina kele ti kivuvu ya kukwenda na zulu, tadya mampa mpi tanwa vinu, kansi bantu mingi, disongidila bayina kele ti kivuvu ya kuzinga na ntoto, tasala yo ve?

2, 3. (a) Inki mutindu Yehowa yantikaka kuganga bima na kuwakana ti lukanu na yandi? (b) Sambu na nki lukanu Yehowa kugangaka ntoto mpi bantu?

² Yehowa kele Nzambi ya kevandaka ti lukanu. Sambu na kulungisa lukanu na yandi, yandi “ke salaka mambu yonso mutindu kele mabanza na yandi ti luzolo na yandi.” (Efezo 1:11) Ntetentete, yandi gangaka Mwana na yandi mosi kaka ya kubutukaka. (Yoane 1:1, 14, NW; Kusonga 3:14) Ebuna, na nzila ya Mwana yai, Yehowa kugangaka dibuta ya bana ya kimpeve mpi nsukansuka luyalanganu ya kemonanaka, yika mpi ntoto ti bantu na zulu na yo.​—Yobi 38:4, 7; Nkunga 103:19-21; Yoane 1:2, 3; Kolosai 1:15, 16.

³ Yehowa kugangaka ve ntoto bonso kisika mosi ya kumeka bantu sambu na kuzenga kana bo mefwana sambu yandi yika bo na ndonga ya bana na yandi ya kimpeve na zulu, mutindu mabundu mingi ya Kikristu kelongaka. Yandi gangaka yo ti lukanu mosi ya sikisiki, sambu “bantu kuzinga muna.” (Yezaya 45:18) Nzambi kugangaka ntoto sambu na muntu mpi muntu sambu na ntoto. (Nkunga 115:16) Ntoto ya mvimba zolaka kukuma paladisu, ya kufuluka ti bantu ya lunungu yina zolaka kuyidika yo mpi kutalaka yo mbote-mbote. Nzambi kupesaka ve ata fyoti bankwelani ya ntete kivuvu ya kukwenda nsukansuka na zulu.​—Kuyantika 1:26-28; 2:7, 8, 15.

Bo Tulaka Ntembe na Lukanu ya Yehowa

4. Na luyantiku mpenza ya luzingu ya bantu, inki mutindu bo tulaka ntembe na mutindu Yehowa kesadilaka kimfumu na yandi?

⁴ Mwana mosi ya kimpeve ya Nzambi kusadilaka ve mbote dikabu ya kimpwanza ya kupona yina Nzambi kupesaka yandi, yo yina yandi kolamaka mpi yandi bakaka lukanu ya kukanga lukanu ya Yehowa nzila. Yandi bebisaka ngemba yina bantu yonso ya kelemfukaka na zola yonso na kimfumu ya Nzambi kevandaka na yo. Satana kunataka bankwelani ya ntete na kuyantika luzingu ya dipanda na ntwala ya Nzambi. (Kuyantika 3:1-6) Yandi tulaka ve ntembe na ngolo ya Yehowa, kansi  yandi tulaka ntembe na mutindu na Yandi ya kusadila kimfumu mpi na nswa na Yandi ya kuyala. Yo yina, ntembe ya kuluta mfunu ya metala kimfumu ya Yehowa kubasikaka awa na ntoto, na luyantiku mpenza ya luzingu ya bantu.

5. Inki ntembe yankaka kubasikaka, mpi yo vandaka kutadila mpi banani?

⁵ Dyambu yankaka ya kewakana mpenza ti ntembe ya ntetentete ya metala nswa ya Yehowa ya kuyala luyalanganu kele ntembe ya zole yina Satana kubasisaka na bilumbu ya Yobi. Satana kutulaka ntembe na kikuma yina kepusaka bigangwa ya Yehowa na kulemfukila Yandi mpi kusadila Yandi. Satana kutubaka nde bo vandaka kusala yo na bikuma ya bwimi mpi nde kana bo memekama bo tayambula Nzambi. (Yobi 1:7-11; 2:4, 5) Ata yandi basisaka ntembe yai sambu na yina metala kwikama ya muntu mosi yina vandaka kusadila Yehowa, yo vandaka kutadila mpi bana ya kimpeve ya Nzambi, nkutu ti Mwana ya Yehowa mosi kaka ya kubutukaka.

6. Inki mutindu Yehowa kumonisaka nde yandi kevandaka ya kwikama na lukanu na yandi mpi na zina na yandi?

⁶ Sambu Yehowa kevandaka ya kwikama na lukanu na yandi mpi na ntendula ya zina na yandi, yandi kudikumisaka Profete mpi Ngulusi. * Yandi songaka Satana nde: “Mono tatula kimbeni na kati na nge ti nkento mpi na kati ya nkuna na nge ti nkuna na yandi. Yandi tatatika nge na ntu, ebuna nge tatatika yandi na kisingini.” (Kuyantika 3:15, NW) Yehowa zolaka kupesa mvutu na ntembe ya Satana mpi kupesa bana ya Adami kivuvu ya kuguluka mpi ya kubaka luzingu na nzila ya Nkuna ya “nkento” na yandi, to kitini ya zulu ya organizasio na yandi.​—Roma 5:21; Galatia 4:26, 31.

“Kinsweki ya Santu ya Luzolo na Yandi”

7. Inki lukanu Yehowa kumonisaka na nzila ya ntumwa Polo?

⁷ Na mukanda na yandi na Bakristu ya Efezo, ntumwa Polo kutendulaka na mutindu mosi ya kitoko kibeni mutindu Yehowa ketwadisaka mambu sambu na kulungisa lukanu na yandi. Polo kusonikaka nde: “Yandi zabisaka beto kinsweki ya santu ya luzolo na yandi. Yo kele na kuwakana ti kyese na yandi ya mbote yina yandi kanaka yandi mosi sambu na administrasio mosi na nsuka kibeni ya bantangu ya metulamaka, disongidila, kuvukisa dyaka bima yonso kumosi na Kristu, bima yina kele na zulu ti bima yina kele na ntoto.” (Efezo 1:9, 10, NW) Lukanu ya lukumu ya Yehowa kele ya kusala luyalanganu mosi ya kele na bumosi mpi yina tavanda ti bigangwa ya kelemfukaka na luzolo yonso na kimfumu na yandi. (Kusonga 4:11) Ebuna, zina na yandi tasantisama, Satana tamonana muntu ya luvunu, mpi luzolo ya Nzambi talungana “na ntoto bonso na zulu.”​—Matayo 6:10.

8. Ngogo ya bo mebalula nde “administrasio” ketendula inki?

⁸ ‘Kyese ya mbote’ ya Yehowa, to lukanu na yandi, talungana na nzila ya “administrasio mosi.” Polo kusadilaka ngogo mosi ya ketendula ntetentete “mutindu ya kutwadisa nzo.” Yo ketubila ve luyalu mosi, bonso Kimfumu ya Mesia, kansi yo ketubila mutindu mosi ya kutwadisa mambu. *  Mutindu ya kuluta mbote yina Yehowa zolaka kutwadisa mambu sambu na kulungisa lukanu na yandi kulombaka “kinsweki ya santu” yina zolaka kuzabana malembe-malembe na nima ya bamvula.​—Efezo 1:10, NW; 3:9, NW, banoti na nsi ya lutiti.

9. Inki mutindu Yehowa kumonisaka malembe-malembe kinsweki ya santu ya luzolo na yandi?

⁹ Na nzila ya bangwakana yina kulandanaka, Yehowa kumonisaka malembe-malembe mutindu lukanu na yandi ya metala Nkuna ya yandi silaka na Edeni zolaka kulungana. Kuwakana yina Yehowa kusalaka ti Abrahami kumonisaka nde Nkuna ya lusilu zolaka kukwisa na ntoto na ndonga ya dibuta ya Abrahami mpi “makanda yonso ya ntoto” (NW) zolaka kubaka lusakumunu na nzila ya nkuna yango. Kuwakana yina kumonisaka mpi nde bantu yankaka zolaka kuvukana ti kitini ya ntete ya nkuna yina. (Kuyantika 22:17, 18) Kuwakana ya Nsiku yina Yehowa kusalaka ti Izraele ya kinsuni kumonisaka lukanu na yandi ya kuvanda ti “kimfumu mosi ya banganga-Nzambi.” (Kubasika 19:5, 6, NW) Kuwakana yina yandi salaka ti Davidi kumonisaka nde Nkuna zolaka kuvanda Mfumu ya Kimfumu mosi tii kuna. (2 Samuele 7:12, 13; Nkunga 89:4, 5) Ntangu kuwakana ya Nsiku kunataka Bayuda na Mesia, Yehowa kumonisaka mambu yankaka ya metala kulungana ya lukanu na yandi. (Galatia 3:19, 24) Bantu yina zolaka kuvukana ti kitini ya ntete ya nkuna zolaka kusala ‘kimfumu ya banganga-Nzambi’ yina bo tubilaka na ntwala mpi bo zolaka kukotisa bo na “kuwakana ya mpa” (NW) bonso “Israele” ya mpa, Izraele ya kimpeve.​—Yeremia 31:31-34; Baebreo 8:7-9. *

10, 11. (a) Inki mutindu Yehowa kumonisaka Nkuna ya bo tubilaka na ntwala? (b) Sambu na nki Mwana mosi kaka ya kubutukaka ya Nzambi kukwisaka na ntoto?

¹⁰ Na kuwakana ti administrasio ya lukanu ya Nzambi, ntangu kulungaka  sambu Nkuna yina bo tubilaka na ntwala kukwisa na ntoto. Yehowa kutindaka wanzyo Gabriele sambu na kusonga Maria nde yandi tabuta mwana mosi ya bakala yina bo tabinga Yezu. Wanzyo kusongaka yandi nde: “Yandi ta vanda muntu ya nene. Zina na yandi ta vanda Mwana ya [Muntu ya Kuluta Kuzanguka, NW]. Mfumu-Nzambi ta tula yandi ntotila bonso vandaka nkaka na yandi Davidi. Yesu ta yalaka bantu ya Israele mvula na mvula; Kimfumu na yandi ta suka ve.” (Luka 1:32, 33) Na mutindu yina, Nkuna ya lusilu kuzabanaka pwelele.​—Galatia 3:16; 4:4.

¹¹ Yo lombaka nde Mwana mosi kaka ya kubutukaka ya Yehowa kukwisa na ntoto sambu bo meka yandi ngolo kibeni. Mvutu ya kukuka yina zolaka kupesana na ntembe ya Satana kuvandaka na maboko ya Yezu. Keti yandi zolaka kubikala ya kwikama na Tata na yandi? Dyambu yai vandaka kutadila kinsweki ya santu. Na nima, ntumwa Polo kutendulaka kisalu ya Yezu mutindu yai: “[Kinsweki ya santu ya kikalulu yai ya kukangama na Nzambi kele nene kibeni, NW]. Kristo kwisaka kumonika na nitu ya kimuntu, mpeve ya Nzambi nungisaka yandi, bawanzio monaka yandi na lukumu na yandi. Nsangu na yandi bo longaka yo na bantu yonso ya nsi-ntoto, bantu mingi mpi tulaka ntima na yandi, ebuna Nzambi tombulaka yandi na zulu.” (1 Timoteo 3:16) Ya kyeleka, na kwikama na yandi ya ngolo tii na lufwa, Yezu kupesaka mvutu ya nsuka na ntembe ya Satana. Kansi mambu yankaka ya kinsweki ya santu vandaka mezabana ntete ve.

“Kinsweki ya Santu ya Kimfumu ya Nzambi”

12, 13. (a) Inki kele kitini mosi ya “kinsweki ya santu ya kimfumu ya Nzambi”? (b) Mutindu Yehowa meponaka ntalu fyoti kibeni ya bantu sambu bo kwenda na zulu kutadilaka nki dyambu?

¹² Na nzyetolo mosi ya yandi salaka na Galilea sambu na kusamuna, Yezu kumonisaka nde kinsweki ya santu kewakana mpenza ti luyalu na yandi ya Kimfumu ya Mesia. Yandi tubilaka balongoki na yandi nde: “Bo mepesaka beno mayele ya kubakisa binsweki ya santu ya kimfumu ya zulu [“kimfumu ya Nzambi,” Marko 4:11, NW].” (Matayo 13:11, NW) Kitini mosi ya kinsweki yina vandaka kutadila mutindu Yehowa tapona “kibuka ya fyoti” (NW) ya bantu 144 000 yina tavukana ti Mwana na yandi bonso kitini ya nkuna, sambu na kuyala ti yandi na zulu.​—Luka 12:32; Kusonga 14:1, 4.

¹³ Sambu Nzambi kugangaka bantu sambu bo zinga na ntoto, yo lombaka nde yandi sala “lugangu mosi ya mpa” sambu bantu yankaka kukwenda na zulu. (2 Korinto 5:17, NW) Ntumwa Piere, yina kuvandaka mosi na kati ya bantu yina bo meponaka sambu na kuvanda ti kivuvu yai ya sipesiali ya kukwenda na zulu, kusonikaka nde: “Beto zitisa Nzambi yina kele Tata ya Mfumu na beto Yesu Kristo! Yandi wilaka beto mawa, yo yina yandi pesaka beto moyo ya mpa ntangu yandi tedimisaka Yesu Kristo na lufwa. Yo yina beto ke tula kaka ntima tii bubu yai na bima yina ya Nzambi me bumbaka sambu na bantu na yandi, ebuna beto ke mona kiese sambu na yo. Bima yina ke bebaka ve, yo mpi ke kumaka mvindu ve, yo mpi ke vilaka ve. Nzambi me bumbaka yo kuna na zulu sambu na beno.”​—1 Piere 1:3, 4.

14. (a) Inki mutindu “kinsweki ya santu ya kimfumu ya Nzambi” vandaka kutadila bantu yina vandaka ve Bayuda? (b) Sambu na nki beto kekukaka kubakisa ‘mambu yai ya mudindu ya Nzambi’?

¹⁴ Kitini yankaka ya kinsweki ya santu ya metala luyalu ya Kimfumu yina takwisa kuvandaka luzolo ya Nzambi ya kukotisa bantu yina kele Bayuda ve na kati ya ntalu fyoti ya bantu yina bo zolaka kubinga sambu na kuyala ti Kristu na zulu. Polo kutendulaka kitini yai ya “administrasio” ya Yehowa, to mutindu ya kutwadisa kulungana ya lukanu na yandi, na bangogo yai: “Na ntangu ya ntete, Nzambi vandaka kuzabisa bantu [kinsweki yai, NW] ve, kansi ntangu yai yandi me zabisaka yo na bantumwa na yandi ti na baprofete na yandi [ya santu, NW], na lusadisu ya mpeve na yandi. Mambu yango yo yai: Sambu na Yesu Kristo, bantu yina kele Bayuda ve bo ke bakaka mambote ya Nzambi kisika mosi ti Bayuda; bo kele ntangu yai nitu mosi ti Bayuda, ebuna mambu yina ya Nzambi tubaka nde yandi ta pesa bantu na yandi, bo ke bakaka yo mpi kisika mosi ti Bayuda. Bo me zabisa beno mambu yai yonso na nsangu ya mbote.” (Efezo 3:5, 6) Nzambi kumonisaka ntendula ya kitini yai ya kinsweki ya santu na ‘bantumwa ya santu.’ Mutindu mosi bubu yai, kukonda lusadisu ya mpeve santu, beto zolaka kubakisa ve ‘mambu yai ya mudindu ya Nzambi.’​—1 Korinto 2:10, NW; 4:1; Kolosai 1:26, 27.

15, 16. Sambu na nki Yehowa kuponaka bamfumu yina tayala ti Kristu na kati ya bantu?

 ¹⁵ Biblia ketuba nde “bantu mile nkama mosi makumi iya na iya” yina Yoane kumonaka metelama ti “Mwana-Dimeme” na Ngumba ya Sioni na zulu, bo ‘mesumbaka bo na ntoto,’ bo me “sumbamaka na kati ya bantu bonso mayita sambu na Nzambi mpi sambu na Mwana-Dimeme,” Kristu Yezu. (Kusonga 14:1-4, NW) Yehowa kuponaka mwana ya ntete na kati ya bana na yandi ya zulu sambu na kukuma kitini ya ntetentete ya nkuna ya yandi silaka na Edeni, kansi sambu na nki yandi ponaka bantu yina tayala ti Kristu na kati ya bantu? Ntumwa Polo ketendula nde ntalu yai ya fyoti ya bantu, bo ‘solaka bo mutindu yandi [Yehowa] kanaka ntete,’ “na kuwakana ti kyese ya mbote ya luzolo na yandi.”​—Roma 8:17, 28-30; Efezo 1:5, 11, NW; 2 Timoteo 1:9.

¹⁶ Lukanu ya Yehowa kele ya kusantisa zina na yandi ya nene mpi ya santu, mpi ya kunungisa nswa na yandi ya kuyala. Na nsadisa ya “administrasio” na yandi, to mutindu na yandi ya kutwadisa mambu, ya mayele mingi kuluta, Yehowa kutindaka Mwana na yandi ya ntete na ntoto, kisika bo mekaka yandi ngolo kibeni tii na lufwa. Dyaka, Yehowa kubakaka lukanu nde luyalu ya Kimfumu ya Mesia ya Mwana na yandi tavanda ti bantu yina kunwaninaka mpi kimfumu na Yandi tii na lufwa.​—Efezo 1:8-12; Kusonga 2:10, 11.

17. Sambu na nki beto lenda vanda na kyese na mutindu Kristu ti bamfumu yina tayala ti yandi kuzingaka ntete bonso bantu?

¹⁷ Yehowa kumonisaka zola na yandi ya nene sambu na bana ya Adami na mutindu yandi tindaka Mwana na yandi na ntoto mpi na mutindu yandi ponaka bantu yina tayala ti Mwana na yandi na luyalu ya Kimfumu na kati ya bantu. Inki mutindu bantu yankaka yina kuvandaka ya kwikama na Yehowa, banda na Abele mata, zolaka kubakila yo mambote? Sambu bo mebutukaka bampika ya disumu ti ya lufwa, bantu ya kukonda kukuka zolaka kuvanda na mfunu nde Yehowa kubelula bo na kimpeve mpi na kinsuni sambu bo kuma bantu ya kukuka, na kuwakana ti lukanu na yandi ya kisina sambu na bantu. (Roma 5:12) Yo kepesa kikesa kibeni na bantu yonso yina kekinga na kuzinga mvula na mvula na ntoto na kuzaba nde Ntotila na bo tamonisila bo zola mpi tabakisaka bo na mawete yonso, kaka mutindu yandi salaka yo na balongoki na yandi ntangu yandi vandaka kusala kisalu na yandi na ntoto! (Matayo 11:28, 29; Baebreo 2:17, 18, NW; 4:15; 7:25, 26) Yo kebwisa bo mpenza ntima na kuzaba nde bantotila mpi banganga-Nzambi yina tayala ti Kristu na zulu kuvandaka ntete babakala ti bankento ya lukwikilu yina kunwanaka ti bifu na bo mosi mpi yina kukutanaka ti bampasi ya luzingu, bonso beto!​—Roma 7:21-25.

Lukanu ya Yehowa Yina Kelunganaka Kaka

18, 19. Sambu na nki bangogo ya Polo yina kele na Efezo 1:8-11 mekuma pwelele sambu na beto, mpi nki beto tatadila na disolo yina kelanda?

¹⁸ Ntangu yai, beto mebakisa mpenza ntendula ya bangogo yina Polo kusonikilaka Bakristu ya kupakulama, mutindu yo kele na Efezo 1:8-11. Yandi tubaka nde Yehowa kuzabisaka bo “kinsweki ya santu ya luzolo na yandi,” nde yandi ‘solaka bo’ sambu na kuyala ti Kristu, mpi nde ‘muntu yina kesalaka mambu yonso mutindu kele mabanza na yandi ti luzolo na yandi’ kuponaka bo “katuka na luyantiku.” Beto kebakisa nde dyambu yai mefwana na “administrasio” ya kitoko ya Yehowa ya kutwadisa mambu sambu na kulungana ya lukanu na yandi. Yo kesadisa beto mpi na kubakisa sambu na nki kaka Bakristu fyoti mpamba yina kevukanaka na Madya ya Nkokila ya Mfumu kedyaka mampa mpi kenwaka vinu.

¹⁹ Na disolo yina kelanda, beto tamona ntendula ya Lusungiminu ya lufwa ya Kristu sambu na Bakristu yina kele ti kivuvu ya kukwenda na zulu. Beto talonguka mpi sambu na nki bamilio ya bantu yina kele ti kivuvu ya kuzinga mvula na mvula na ntoto fwete tula dikebi ya ngolo na ntendula ya Lusingiminu.

[Banoti na nsi ya lutiti]

Mvutukila

• Sambu na nki Yehowa kugangaka ntoto mpi kutulaka muntu na zulu na yo?

• Sambu na nki yo vandaka mfunu nde Mwana mosi kaka ya kubutukaka ya Yehowa kumekama na ntoto?

• Sambu na nki Yehowa kuponaka bamfumu yina tayala ti Kristu na kati ya bantu?

[Bangyufula ya disolo ya kulonguka]