“Bangibusa na Nge Kepesaka Mono Kiese”

“Mambu yonso ya bo sonikaka na Mukanda ya Nzambi, bo sonikaka yo sambu na kulonga beto.”​—ROMA 15:4.

1. Inki mutindu Yehowa kepesaka beto bangibusa, mpi sambu na nki beto kevandaka na mfunu na yo?

YEHOWA kepesaka bantu na yandi bangibusa sambu yo sadisa bo na kunwana ti mitungisi ya bantangu yai ya mpasi. Beto kebakaka bangibusa mingi ntangu beto ketangaka Biblia, kansi yankaka beto kebakaka yo na masolo to bakomantere yina bampangi kepesaka na balukutakanu ya Bukristu. Mambu mingi ya beto ketangaka to kewaka na mabaku yai kevandaka ve ya mpa. Ntembe kele ve nde, na bilumbu meluta, beto tadilaka dezia mambu ya mutindu mosi. Kansi, sambu mbala mingi beto kevilaka mambu, konso ntangu beto kevandaka na mfunu nde bo yibusa beto balukanu, bansiku, mpi bantuma ya Yehowa. Beto fwete sepelaka na bangibusa ya Nzambi. Yo kekumisaka mabanza na beto ya mpa na mutindu yo kesadisaka beto na kuyibuka bikuma ya kupusaka beto na kuvanda ti luzingu yina kesepedisaka Nzambi. Yo yina, muyimbi-bankunga kuyimbilaka Yehowa nde: “[Bangibusa, NW] na nge ke pesaka mono kiese.”​—Nkunga 119:24.

2, 3. (a) Sambu na nki Yehowa metaninaka masolo ya luzingu ya bantu yina Biblia ketubilaka tii na bilumbu na beto? (b) Inki masolo ya kele na Biblia beto tatadila na disolo yai?

² Ata bo mesonikaka yo bamvu-nkama mingi meluta, Ndinga ya Nzambi kesalaka ntangu yonso. (Baebreo 4:12) Yo ketaka masolo ya kyeleka ya luzingu ya bantu yina Biblia ketubilaka. Ata bikalulu mpi bangindu ya bantu mesobaka mingi mpenza banda na ntangu yina bo sonikaka Biblia, mbala mingi bampasi ya beto kekutanaka ti yo mefwanana ti yina bantu kukutanaka na yo na ntangu ya ntama. Masolo mingi ya Nzambi metaninaka na Biblia kepesaka beto bambandu ya mbote ya bantu yina vandaka kuzola Yehowa mpi yina kusadilaka yandi na kwikama yonso ata bo kutanaka ti mambu ya mpasi. Masolo yankaka kemonisaka bikalulu yina Nzambi kemengaka. Yehowa kusonikisaka masolo yai yonso na Biblia, yo vanda ya mbote to ya mbi, sambu yo yibusa beto malongi ya mfunu. Yo kele kaka mutindu ntumwa Polo kusonikaka: “Mambu yonso ya bo sonikaka na Mukanda ya Nzambi, bo sonikaka yo sambu na kulonga beto na mpila nde beto kukanga ntima, beto kuvanda na kikesa na kuvingila mambu yina ya Nzambi silaka beto.”​—Roma 15:4.

³ Bika beto tadila masolo tatu ya kele na Biblia: disolo ya Davidi ti Saule, disolo ya Ananiasi ti Safira, mpi disolo ya Yozefi ti nkento ya Potifare. Konso disolo kepesa beto malongi ya mfunu.

Kukwikama na Bangidika ya Nzambi

4, 5. (a) Inki dyambu kusalamaka na kati ya Ntotila Saule ti Davidi? (b) Inki Davidi kusalaka ntangu Saule vandaka kumenga yandi?

⁴ Ntotila Saule kulemfukaka ve na Yehowa mpi yandi fwanaka ve na kuyala bantu ya Nzambi. Yo yina, Nzambi kubuyaka yandi mpi kutindaka profete Samuele na kupakula Davidi sambu yandi kuma ntotila ya Izraele na bilumbu kekwisa. Ntangu Davidi kufwaka Goliati mpi bantu kusikisaka yandi, Saule kumaka kumona Davidi bonso mbanda. Saule sosaka kufwa yandi mbala mingi. Na konso mbala, Davidi kugulukaka sambu Yehowa kuvandaka ti yandi.​—1 Samuele 18:6-12, 25; 19:10, 11.

⁵ Na nsungi ya bamvula mingi, yo lombaka nde Davidi kuzinga na bisika ya kubumbana. Ntangu yandi zwaka mabaku ya kufwa Saule, banduku na yandi kusyamisaka yandi na kufwa Saule, mpi bo tubilaka yandi nde Yehowa mepesa mbeni na nge na maboko na nge. Kansi  Davidi kubuyaka sambu yandi vandaka ya kwikama na Yehowa mpi sambu yandi vandaka kuzitisa mukumba ya Saule ya kuvanda ntotila ya kupakulama ya bantu ya Nzambi. Yehowa muntu kuponaka Saule na kuvanda ntotila ya Izraele, mpi na ntangu yina mefwana yandi zolaka kukatula mpi Saule. Davidi kumonaka nde yandi vandaka ve na nswa ya kufwa Saule. Na nima ya kusala mambu yonso yina yandi lendaka kusala sambu na kulembika kimbeni ya Saule, Davidi kusukisaka nde: “Na zina ya Mfumu Nzambi, Nzambi ya moyo, mono ke zaba nde Mfumu Nzambi yandi mosi ta fwa Saule kana ntangu na yandi me lunga to na bitumba. . . . Mono lenda sala yandi mbi ve ata fioti sambu Mfumu Nzambi yandi mosi solaka yandi na kuvanda ntotila!”​—1 Samuele 24:4-16; 26:7-20.

6. Sambu na nki disolo ya Davidi ti Saule kele mfunu sambu na beto?

⁶ Disolo yai kele ti dilongi mosi ya mfunu. Keti nge mekudiyulaka dezia, sambu na nki makambu yankaka kebasikaka na kati ya dibundu? Yo lenda vanda nde mpangi mosi kesala mambu na mutindu mosi ya mefwana ve. Dyambu yango lenda vanda ve disumu ya nene, kansi yo keyangisa nge. Inki nge fwete sala? Sambu nge kezola kusonga nde nge kekudibanzaka sambu na mpangi na nge mpi nge kezola kubikala ya kwikama na Yehowa, nge lenda baka lukanu ya kusolula ti yandi na mawete yonso, ti lukanu ya kuyidika dyambu yango. Kansi, inki nge tasala kana dyambu yango kemana ve? Na nima ya kusala mambu yonso ya nge lenda sala, nge lenda baka lukanu ya kubika dyambu yango na maboko ya Yehowa, mutindu Davidi kusalaka.

7. Na mbandu ya Davidi, inki beto fwete sala kana bo kesadila beto mambu ya nku to bo kenyokula beto?

⁷ To yo lenda vanda nde bo kesadila nge mambu ya nku to bo kenyokula nge sambu na dibundu na nge. Ziku na ntangu yai, nge kele ve ti mambu mingi ya kusala sambu na kumanisa yo to nkutu ata kima mosi ve ya kusala. Yo lenda vanda mpasi mpenza na kunwana ti dyambu yai, kansi mambu yina Davidi kusalaka ntangu Saule vandaka kusadila yandi mambu ya nku fwete longa beto. Bankunga yina Davidi kusonikaka kele ve kaka disolo ya kesimba ntima yina kemonisa bisambu ya masonga ya yandi salaka sambu Nzambi kugulusa yandi na maboko ya Saule, kansi yo kele mpi disolo ya kemonisa kwikama na yandi na Yehowa mpi susi ya yandi vandaka na yo sambu zina ya Nzambi kubaka lukumu. (Nkunga 18:2-7, 26-28, 31-33, 48-51; 57:2-12) Davidi kubikalaka ya kwikama na Yehowa ata Saule kulandaka na kusala mambu ya mbi na nsungi ya bamvula mingi. Beto mpi, beto fwete bikala ya kwikama na Yehowa mpi na organizasio na yandi ata beto kekutana ti mambu ya nku ya konso mutindu mpi ata bantu yankaka kesala konso mambu yina. Beto lenda bwisa ntima nde Yehowa mezaba dyambu yango mbote kibeni.​—Nkunga 86:2.

8. Bambangi ya Yehowa ya Mozambique kusalaka nki ntangu bantu kumekaka kwikama na bo?

⁸ Bakristu ya Mozambique kukangamaka na Yehowa na ntangu ya mimekamu mpi bo kepesa beto mbandu ya mbote. Na mvu 1984, barebele yina vandaka kusosa kubotula kimfumu vandaka kukota mbala na mbala na babwala na  bo sambu na kuyiba, kuyoka banzo tiya, mpi kufwa bantu. Bakristu yina ya kyeleka kuvandaka mpenza ve ata ti kima mosi ya kusala sambu na kudinwanina. Basoda vandaka kukotisa bantu ya kitini yina na ngolo na kisalu ya kisoda, to kupusa bantu yango na kupesa bo maboko na mitindu yankaka. Bambangi ya Yehowa vandaka kumona nde kusala mutindu yina kewakana ve ti nsiku ya kebuyisa Bakristu na kukota na mambu ya politiki. Kubuya ya bo buyaka kupesaka basoda yina makasi. Na nsungi yina ya mavwanga, bo fwaka Bambangi ya Yehowa kiteso ya 30, kansi ata kigonsa ya lufwa kukukaka ve na kufwa kwikama ya bansadi ya Nzambi. * Bonso Davidi, bo kangaka ntima na ntwala ya mambu ya nku, mpi nsukansuka bo nungaka.

Ngibusa Yina Kekebisa Beto

⁹ Bantu yankaka ya Biblia ketubilaka keyibusa beto bikalulu yina beto fwete buya. Ya kyeleka, Biblia kele ti masolo mingi ya bantu, ata ya bansadi ya Nzambi, yina kusalaka mambu ya mbi mpi kubukaka bambuma ya mambu ya bo salaka. (1 Korinto 10:11) Disolo mosi ya mutindu yina kele disolo ya Ananiasi ti Safira, bankwelani yina kuvandaka na dibundu ya Bukristu ya Yeruzalemi na mvu-nkama ya ntete.

9, 10. (a) Inki mutindu beto lenda baka mambote na bambandu yankaka ya kele na Biblia? (b) Inki dyambu ya mbi Ananiasi ti Safira kusalaka?

¹⁰ Na nima ya Pantekoti ya mvu 33 T.B., yo vandaka kulomba nde Bakristu kupesa lusadisu ya kinsuni na bansambidi ya mpa yina kubikalaka na Yeruzalemi sambu bantu yango kubaka mambote na mutindu bo vukanaka ti bantumwa. Bantu yankaka ya dibundu kutekaka bima na bo sambu na kulungisa bampusa ya bantu yonso. (Bisalu 2:41-45) Ananiasi ti Safira kutekaka kilanga na bo. Bo natilaka bantumwa ndambu ya mbongo yina bo tekaka yo, ebuna bo tubaka nde makabu na bo kuvandaka mbongo yonso ya bo tekaka kilanga. Ya kyeleka, Ananiasi ti Safira kuvandaka ti nswa ya kupesa makabu kiteso yina bo zolaka, kansi bo vandaka ti bangindu ya mbi. Bo vandaka kuzola kuyitukisa bantumwa mpi kumonana nde bo mepesa makabu mingi kuluta makabu yina bo pesaka. Na lutwadisu ya mpeve santu, ntumwa Piere kubasisaka luvunu na bo pwelele, mpi Yehowa kufwaka bo.​—Bisalu 5:1-10.

11, 12. (a) Inki mambu beto fwete yibuka na yina metala kuta masonga? (b) Inki mambote beto lenda baka kana beto keta masonga?

¹¹ Kana beto kezola kukusa sambu beto monana bantu ya mbote na meso ya bantu yankaka, bika nde disolo ya Ananiasi ti Safira kuyibusa beto mambu yina beto fwete sala ve ata fyoti. Beto lenda kusa bantu, kansi beto lenda kusa ve Yehowa. (Baebreo 4:13) Mbala mingi, Biblia  kelongisilaka beto na kuta masonga, sambu bantu ya luvunu takota ve ata fyoti na inza ya lunungu. (Bingana 14:2; Kusonga 21:8; 22:15) Beto fwete zaba mpenza kikuma ya fwete pusa beto na kusala mutindu yina: Satana Dyabulu muntu kele na kisina ya mambu yonso ya luvunu.​—Yoane 8:44.

¹² Kuvanda ti kikalulu ya kuta masonga na luzingu kenataka mambote mingi. Na kati ya mambote yango beto lenda tanga: kansansa ya mbote mpi kyese ya kuzaba nde bankaka ketudila beto ntima. Mbala mingi, bo mebakaka Bakristu na kisalu, to bo mekatulaka bo ve na kisalu, sambu bo vandaka masonga. Kansi, dyambu ya kuluta mfunu kele nde kuvanda masonga kekumisaka beto banduku ya Nzambi Nkwa-Ngolo Yonso.​—Nkunga 15:1, 2.

Kutanina Kikalulu ya Bunkete

13. Inki dyambu Yozefi kukutanaka ti yo, mpi yandi salaka inki?

¹³ Yozefi kuvandaka mwana ya Yakobi. Bo tekaka yandi na kimpika ntangu yandi vandaka ti bamvula 17. Nsukansuka yandi kumaka kusala na nzo ya mfumu mosi ya Ezipte. Zina ya mfumu yango Potifare. Ebuna, nkento ya Potifare kumaka kuzola Yozefi mingi. Yandi vandaka kuzola kulala ti Yozefi sambu Yozefi vandaka kitoko kibeni. Mpi konso kilumbu yandi vandaka kusonga Yozefi nde: “Kwisa beto lala.” Yozefi kuvandaka ntama kibeni ti dibuta na yandi, mpi kuna ata muntu mosi ve kuzabaka yandi. Yandi lendaka kusala pite ti nkento yina mpi ata muntu ve zolaka kuzaba. Kansi nsukansuka, ntangu nkento ya Potifare kusimbaka yandi na bilele, Yozefi kutinaka.​—Kuyantika 37:2, 18-28; 39:1-12.

14, 15. (a) Sambu na nki disolo ya Yozefi kele mfunu sambu na beto? (b) Sambu na nki mpangi-nkento mosi kupesaka ntonda na mutindu yandi landaka bangibusa ya Nzambi?

¹⁴ Yozefi kuyelaka na dibuta yina vandaka kuzitisa Nzambi, mpi yandi zabaka nde bantu zole yina mekwelanaka ve lenda vukisa ve nitu. Yandi yulaka nde: “Nki mutindu mono lenda sala mambu ya mbi mutindu yai? Nki mutindu mono lenda sala masumu na Nzambi?” Yozefi kuzabaka munsiku yina Yehowa kutudilaka bantu ya kukwela kaka nkento mosi, mutindu Nzambi kutubaka yo na Edeni. Ntembe kele ve nde yandi bakaka desizio na yandi na kutadila nzayilu yina. (Kuyantika 2:24) Bansadi ya Nzambi lenda baka mambote kana bo yindulula mambu yina Yozefi kusalaka na ntangu yandi kutanaka ti dyambu yai. Bubu yai bantu kevandaka mpenza ve ti bansiku ya kebuyisaka kuvukisa nitu, yo yina baleke yina kebuyaka kudipesa na luzingu ya mansoni, banduku na bo kesekaka bo. Na bisika mingi, bambuta yina mekwelanaka ve kevukisaka nitu ti bantu yina kele ve bankwelani na bo. Yo yina, disolo ya Yozefi kele lukebisu mosi ya mekwisa na ntangu ya mbote sambu na beto. Na meso ya Nzambi pite ti bizumba kele masumu. (Baebreo 13:4)  Bantu mingi yina mesalaka mansoni kendimaka nde beto kele mpenza ti bikuma ya mbote ya kubuya yo. Na kati ya mambu ya mbi yina yo kenataka, beto lenda tanga kukonda luzitu, kansansa yina ketungisa beto, zwa, kubaka divumu mpi maladi yina kesambukilaka na kuvukisa nitu. Kaka mutindu Biblia keyibusa beto, muntu yina kesalaka pite “ke salaka masumu yina ke bebisaka nitu na yandi mosi.”​—1 Korinto 5:9-12; 6:18; Bingana 6:23-29, 32.

¹⁵ Jenny * kele Mbangi ya Yehowa mpi yandi mekwelaka ntete ve. Yandi kele ti kikuma ya kumonisa ntonda na yandi sambu na bangibusa ya Nzambi. Na kisika yandi kesalaka, nduku na yandi mosi ya kisalu yina vandaka kitoko kibeni vandaka kusala mambu ya kemonisa nde yandi vandaka kuzola Jenny. Sambu Jenny vandaka kusala ve ata kima mosi, yandi kumaka kusala dyaka mambu mingi ya mutindu yina. Jenny kendima nde: “Mu vandaka kunwana sambu na kubikala bunkete, sambu yo kelebaka kana mwana-bakala mosi ketudila nge dikebi.” Ata mpidina, yandi bakisaka nde mwana-bakala yina vandaka kusosa kaka na kuyika yandi na lisiti ya bana-bankento yina yandi melalaka ti bo. Ntangu yandi monaka nde lukanu na yandi ya kubuya kuyantikaka kulemba, yandi bondilaka Yehowa na kusadisa yandi na kubikala ya kwikama. Jenny keyibuka nde, ntangu yandi vandaka kusala bansosa na Biblia ti na mikanda ya Bukristu, yandi zwaka bangibusa yina kusadisaka yandi na kubikala meso ya kukangula. Disolo ya Yozefi ti nkento ya Potifare kele na kati ya bangibusa yango. Yandi kesukisa nde: “Kana mu kelanda na kuyibuka mutindu mu kezolaka Yehowa, mu fwete wa ve boma nde mu tasala mambu yai ya mbi mpi kusumuka na meso ya Nzambi.”

Tula Dikebi na Bangibusa ya Nzambi!

16. Inki mutindu beto lenda baka mambote na kuvutukila mpi kuyindulula luzingu ya bantu yina Biblia ketubilaka?

¹⁶ Kana beto kesala ngolo sambu na kubakisa sambu na nki Yehowa kusonikisaka masolo yankaka na Biblia sambu na beto, beto lenda kuma kuzola minsiku na yandi mingi. Inki yo kelonga beto? Inki bikalulu ya mbote ya bantu ya Biblia ketubilaka beto fwete landa mpi bikalulu ya mbi ya beto fwete buya? Ndinga ya Nzambi ketaka masolo ya bantu mingi kibeni. Bantu yonso yina kezolaka malongi ya Nzambi fwete zola mayele yina kepesaka luzingu, mpi bo fwete zola malongi ya beto lenda baka na bambandu yina Yehowa mebumbaka mbote-mbote sambu na beto. Mbala mingi zulunalu yai kevandaka ti masolo ya ketubilaka bantu ya mutindu yina, mpi masolo yango kevandaka ti malongi sambu na beto. Yo kele mbote mpenza nde beto baka mwa ntangu sambu na kuvutukila masolo yai.

17. Inki mutindu nge ketadilaka bangibusa ya Yehowa, mpi sambu na inki?

¹⁷ Beto fwete tonda mpenza Yehowa sambu na zola yina yandi kemonisilaka bantu ya kesalaka ngolo na kusala luzolo na yandi! Beto kele ve bantu ya kukuka, kaka mutindu babakala ti bankento yina Biblia ketubilaka kuvandaka ve bantu ya kukuka. Kansi, masolo ya mambu yina bo salaka kele mfunu mingi sambu na beto. Kana beto ketula dikebi na balukebisu ya Yehowa, beto lenda tina bifu ya nene, mpi beto lenda landa mbandu ya mbote ya bantu yina kutambulaka na nzila ya lunungu. Kana beto sala mutindu yina, beto takuka kuyimba ti muyimbi-bankunga nde: “Kiese na bayina ke landaka [bangibusa ya Yehowa] ti kusosa yandi na ntima na bo yonso. Mono ke landaka [bangibusa] na nge, mono ke zolaka yo mingi.”​—Nkunga 119:2, 167.

[Banoti na nsi ya lutiti]

Inki Mvutu Nge Tapesa?

• Inki dilongi beto lenda baka na mutindu Davidi kusalaka mambu ata Saule vandaka kumenga yandi?

• Disolo ya Ananiasi ti Safira kelonga beto inki?

• Sambu na nki disolo ya Yozefi kele mfunu mingi sambu na beto bubu yai?

[Bangyufula ya disolo ya kulonguka]

[Kifwanisu ya kele na lutiti 18]

Sambu na nki Davidi kupesaka ve nzila nde bo fwa Saule?

[Kifwanisu ya kele na lutiti 19]

Inki dilongi beto kebaka na disolo ya Ananiasi ti Safira?

[Kifwanisu ya kele na lutiti 20]

Inki kupusaka Yozefi na kubuya kusala pite?