Yindulula Mambote ya Beto Kebakaka na Organizasio ya Yehowa
Yindulula Mambote ya Beto Kebakaka na Organizasio ya Yehowa
“Beto ta mona kaka kiese na mambote yina kele na nzo na nge Nzambi.”—NKUNGA 65:5.
1, 2. (a) Tempelo ti kisalu yina vandaka kusalama zolaka kunatila bantu ya Nzambi inki? (b) Inki bima Davidi kupesaka sambu na kisalu ya kutunga tempelo?
DAVIDI, muntu ya Izraele ya ntama, kele na kati ya bantu ya kuluta nene yina Masonuku ya Kiebreo ketubilaka. Yandi vandaka ngungudi, muyimbi-bankunga, profete, mpi ntotila, mpi yandi vandaka kutula ntima na yandi yonso na Yehowa Nzambi. Kinduku ya ngolo yina Davidi kuvandaka na yo ti Yehowa kupesaka yandi mpusa ya kutungila Nzambi nzo. Nzo, to tempelo, yango zolaka kukuma kisika ya nene ya lusambu ya kyeleka na Izraele. Davidi kuzabaka nde tempelo ti kisalu yina vandaka kusalama zolaka kunatila bantu ya Nzambi kyese mpi balusakumunu mingi. Yo yina, yandi yimbaka nde: “Bantu yina ya nge me sola, bayina ya nge ke baka na kuvanda na nzo na nge, bo bakweto ke na kiese! Beto ta mona kaka kiese na mambote yina kele na nzo na nge Nzambi!”—Nkunga 65:5.
2 Yehowa kupesaka ve Davidi nswa ya kutwadisa kisalu ya kutunga nzo na yandi. Kansi, Yehowa kupesaka dibaku yango na Salomo, mwana ya Davidi. Ata mpidina, Davidi kubokutaka ve na mutindu Nzambi kupesaka dibaku yina ya yandi vandaka kuzola mingi na muntu yankaka. Kima kuvandaka mfunu mingi sambu na yandi kuvandaka nde bo tunga tempelo ya Nzambi. Sambu na kupesa maboko na kisalu yina, yandi pesaka Salomo bapula ya nzo yina Yehowa kupesaka yandi na mutindu ya bo zolaka kutunga tempelo yango. Dyaka, Davidi kukabisaka balevi na bimvuka mingi ya kisalu mpi yandi pesaka wolo mpi mbongo mingi kibeni sambu na kisalu ya kutunga tempelo.—1 Bansangu 17:1, 4, 11, 12; 23:3-6; 28:11, 12; 29:1-5.
3. Inki kikalulu bansadi ya Nzambi kevandaka na yo na yina metala bangidika ya lusambu ya kyeleka?
3 Bantu ya kwikama ya Izraele kupesaka maboko na bangidika yina bo bakaka sambu na lusambu ya kyeleka yina vandaka kusalama na nzo ya Nzambi. Bubu yai mpi, bansadi ya Yehowa kepesaka maboko na bangidika ya lusambu ya bo mebakaka na organizasio ya Yehowa yina kele na ntoto. Na ntangu beto kesalaka mutindu yina, beto kemonisaka nde beto kele ti mabanza ya mutindu mosi ti Davidi. Beto kebokutaka ve, kansi beto keyindululaka mambote ya beto kebakaka na organizasio ya Nzambi. Keti nge meyindulaka mambu mingi ya mbote yina beto lenda monisila mpenza ntonda? Bika beto tadila mwa mambu yango.
Monisa Ntonda Sambu na Bantu Yina Ketwadisaka Beto
4, 5. (a) Inki mutindu “mpika ya kwikama mpi ya mayele” kelungisaka mukumba na yandi? (b) Inki mutindu Bambangi yankaka ketadilaka madya ya kimpeve yina bo kebakaka?
4 Beto kele ti bikuma ya mbote ya kumonisa ntonda na “mpika ya kwikama mpi ya mayele” (NW) yina Yezu Kristu metulaka na zulu ya bima na yandi yina kele na ntoto. Bakristu ya kupakulama yina kesala kimvuka ya mpika ketwadisaka kisalu ya kusamuna nsangu ya mbote, keyidikaka balukutakanu sambu na lusambu, mpi kebasisaka mikanda ya ketendulaka Biblia na bandinga kuluta 400. Bantu mingi kibeni na ntoto ya mvimba kedyaka na ntonda yonso “madia” yai ya kimpeve “na ntangu ya mbote.” (Matayo 24:45-47) Beto kele mpenza ve ti kikuma ya kubokuta sambu na bangidika yai.
5 Tuka bamvula mingi, Mbangi mosi ya mununu na zina ya Elfi kebakaka kikesa mpi lusadisu sambu yandi kesadilaka bandongisila ya Biblia yina kevandaka na mikanda yina kimvuka ya mpika kebasisaka. Ntonda ya ngolo yina mpangi Elfi kele na yo kupusaka yandi na kusonika nde: “Kana organizasio ya Yehowa kuvandaka ve, inki mu zolaka kusala?” Piere ti nkento na yandi Irmgard mpi kesadilaka Nzambi tuka bamvula mingi. Irmgard kemonisa ntonda na yandi sambu na mikanda yonso yina “organizasio ya Yehowa ya kezolaka mpi kekebaka beto” kebasisaka. Na kati ya mikanda yango, kele mpi ti mikanda yina bo kebasisaka sambu na bifwa-meso ti bifwa-makutu.
6, 7. (a) Inki mutindu bo ketwadisaka bisalu ya mabundu yina kele na ntoto ya mvimba? (b) Inki bampangi yankaka metubaka sambu na kumonisa ntonda na bo sambu na organizasio ya Yehowa ya kele na ntoto?
6 Nto-Kimvuka ya Bambangi ya Yehowa (kibuka mosi ya fyoti ya Bakristu ya kupakulama yina kesalaka na ntu-mbanza ya Bambangi ya Yehowa na Brooklyn, na mbanza ya New York na États-Unis) kele mumonisi ya “mpika ya kwikama.” Nto-Kimvuka keponaka bansadi ya Yehowa yina kele ti eksperiansi sambu bo sala na babiro ya filiale yina ketwadisaka bisalu ya mabundu kuluta 98 000 yina kele na ntoto ya mvimba. Bo keponaka babakala yina kelungisaka mambu ya Biblia kelombaka sambu na kusala bonso bankuluntu mpi bansadi ya kisalu na mabundu yai. (1 Timoteo 3:1-9, 12, 13) Bankuluntu ketwadisaka mabundu mpi kegungulaka mameme ya Nzambi na zola yonso. Yo kele dikabu ya nene kibeni na kuvanda na kati ya mameme yina mpi na kumona zola ti bumosi yina kevandaka na kati ya ‘bampangi bakristo’!—1 Piere 2:17; 5:2, 3.
7 Na kisika ya kubokuta, mbala mingi bantu kemonisaka ntonda na bo sambu na lutwadisu ya kimpeve mpi ya zola yina bankuluntu kepesaka bo. Beto baka mbandu ya Brigitte, mpangi-nkento mosi ya kele ti bamvula 30 ti ndambu. Ntangu yandi vandaka toko, yandi bakaka banduku ya mbi mpi yandi kumaka nkutu penepene ya kusala disumu. Kansi, bandongisila ya pwelele yina bankuluntu kupesaka yandi na nsadisa ya Biblia mpi lusadisu ya Bakristu yankaka kusadisaka yandi na kukonda kusala disumu. Ntangu yai yandi ketuba nde: “Mu kele na kyese mingi kibeni na mutindu mu kele kaka na organizasio ya kitoko ya Yehowa.” Andreas, mwana-bakala mosi ya kele ti bamvula 17 ketuba nde: “Yai kele mpenza organizasio ya Yehowa. Yo kele organizasio ya kuluta mbote na inza.” Beto fwete monisa mpenza ntonda sambu na mambote ya beto kebakaka na organizasio ya Yehowa yina kele na ntoto!
Bantu Yina Ketwadisaka Beto Kele Bantu ya Kukonda Kukuka
8, 9. Inki mambu bantu yina kuzingaka na ntangu ya Davidi kusalaka, kansi Davidi kusalaka inki?
8 Ya kyeleka, bampangi yina bo keponaka sambu na kutwadisa beto kele bantu ya kukonda kukuka. Bo yonso kesalaka bifu, mpi bankaka kele ti bifu yina bo kesala ngolo na kumanisa. Keti beto fwete vidisa kyese na beto sambu na yo? Ata fyoti ve. Ata na Izraele ya ntama, bantu yina kuvandaka ti mikumba mingi kusalaka bifu ya nene. Mu mbandu, na ntangu Davidi kuvandaka ntete leke, bo lombaka yandi na kubudila Ntotila Saule miziki sambu na kulembika mabanza na yandi. Kansi na nima, Saule kumaka kusosa kufwa Davidi. Nsukansuka, yo lombaka nde Davidi kutina sambu na kutanina luzingu na yandi.—1 Samuele 16:4-23; 18:10-12; 19:18; 20:32, 33; 22:1-5.
9 Bantu yankaka ya Izraele mpi kusalaka mambu ya mbi. Mu mbandu, Yoabi, mfumu ya basoda ya Davidi, kufwaka Abnere, mpangi ya Saule. Absalomi kusalaka komplo sambu na kubotula kimfumu ya tata na yandi Davidi. Ahitofele, ndongisi yina Davidi vandaka kutudila mpenza ntima, kutekaka Davidi. (2 Samuele 3:22-30; 15:1-17, 31; 16:15, 21) Ata mpidina, Davidi kukumaka ve ti kikalulu ya kubokuta. Yandi yambulaka mpi ve lusambu ya kyeleka. Nkutu, bampasi kusalaka nde Davidi kukangama dyaka ngolo na Yehowa mpi yo sadisaka yandi na kutanina mabanza ya mbote yina yandi vandaka na yo ntangu yandi vandaka kutina Saule. Na ntangu yina, Davidi kuyimbaka nde: “Nzambi, wila mono mawa pardo, wila mono mawa, sambu mono ke kwisa kubumbana na nge. Na nsi ya mapapu na nge nge tanina mono tii kuna kigonsa kuluta.”—Nkunga 57:2.
10, 11. Inki mambu Getrude kukutanaka ti yo ntangu yandi vandaka leke, mpi nki yandi tubaka sambu na yina metala bifu ya bampangi-Bakristu?
10 Bubu yai mpi, beto kele ve ata ti kikuma mosi ya kubokuta nde mambu kesalama ve mbote na organizasio ya Yehowa. Yehowa ti bawanzyo na yandi mpi bangungudi ya kimpeve kesepelaka ve nde bantu ya mbi kuvanda na dibundu. Dyaka, beto yonso kele bantu ya kukonda kukuka mpi beto kesalaka bifu.
11 Ntangu Getrude (mpangi-nkento mosi ya mesadilaka Yehowa tuka bamvula mingi) kuvandaka leke, bo kusilaka yandi makambu nde yandi vandaka ve Mukristu ya kyeleka, mpi nde yandi vandaka ve nsamuni ya ntangu yonso. Inki yandi salaka? Keti Getrude kubokutaka sambu na yo? Ve. Getrude kufwaka na mvu 2003, ti bamvula 91. Kansi, ntangu fyoti na ntwala ya kufwa, yandi yindulaka bamvula yina melutaka mpi yandi tubaka nde: “Mambu yina bo kusilaka munu mpi mambu yankaka ya mu kutanaka na yo na luzingu kulongaka munu nde ata bantu kesalaka bifu, Yehowa kesadilaka bantu ya kukonda kukuka sambu na kutwadisa kisalu na yandi ya mfunu.” Ntangu Getrude vandaka kukutana ti makambu na dibundu sambu na kukonda kukuka ya bansadi yankaka ya Nzambi, yandi vandaka kusamba Yehowa na masonga yonso.
12. (a) Inki mbandu ya mbi bampangi-Bakristu yankaka kupesaka na mvu-nkama ya ntete? (b) Na nki beto fwete tula mabanza na beto?
12 Kana mpangi mosi ya kele ti mikumba na dibundu mesala kifu, bika nde ‘beto bokuta ve’ sambu na yo, sambu ata Mukristu ya kwikama mpenza mpi yina mekudipesa mingi na Yehowa kele muntu ya kukonda kukuka. (Filipi 2:14) Yo tavanda mawa mingi kana beto landa mbandu ya mbi ya bampangi yankaka ya dibundu ya Bukristu na mvu-nkama ya ntete! Longoki Yude kutubaka nde balongi ya luvunu ya ntangu yina vandaka ‘kuvwenza kiyeka mpi kufinga bayina kuvandaka ti lukumu.’ Dyaka, bantu yina ya mbi vandaka ‘kubokuta mpi bo vandaka na kiese ve.’ (Yude 8, 16) Bika beto landa ve mbandu ya bantu yina vandaka kubokuta, kansi beto tula mabanza na beto kaka na mambu ya mbote ya beto kebakaka na nzila ya ‘mpika ya kwikama.’ Bika beto monisa mpenza ntonda sambu na mambote yina beto kebaka na organizasio ya Yehowa mpi beto ‘bokuta ve na mambu yonso ya beto kesala.’
“Malongi Yai Me Luta Ngolo Mingi”
13. Inki mambu bantu yankaka kusalaka na ntangu bo waka malongi yankaka ya Yezu Kristu?
13 Bampangi yankaka ya mvu-nkama ya ntete kubokutilaka bansadi yina kuvandaka ti mikumba na dibundu, ebuna bankaka kubokutaka sambu na malongi ya Yezu. Na Yoane 6:48-69, Yezu kutubaka nde: “Muntu yina ke diaka nitu na mono mpi ke nwaka menga na mono, yandi ke na moyo ya mvula na mvula.” Na ntangu bo waka mambu yina, “balonguki ya Yesu mingi . . . tubaka nde: ‘Malongi yai me luta ngolo mingi! Nani lenda ndima yo?’” Yezu kuzabaka nde “balonguki na yandi vandaka kubokuta sambu na mambu yina.” Dyaka, “sambu na mambu yina, balonguki na yandi mingi katukaka; bo kwendaka diaka ve ti yandi nzila mosi.” Kansi, balongoki yonso ve bantu kubokutaka. Tala mambu yina kusalamaka ntangu Yezu kuyulaka bantumwa na yandi 12 nde: “Beno mpi, keti beno ke zola kwenda?” Ntumwa Piere kutubaka nde: “Mfumu, na nani beto ta kwenda? Mambu ya nge ke tubaka yo ke pesaka moyo ya mvula na mvula. Ntangu yai, beto me ndima nge, beto me zaba nde nge kele muntu ya santu me katukaka na Nzambi.”
14, 15. (a) Sambu na nki Bakristu yankaka kebokutaka sambu na malongi yankaka ya Bukristu? (b) Inki dilongi beto lenda baka na mambu ya kukuminaka Emanuele?
14 Na ntangu na beto mpi, bansadi yankaka ya Nzambi kesepelaka ve ti malongi yankaka ya Bukristu mpi bo kebokutilaka organizasio ya Yehowa yina kele na ntoto. Sambu na nki dyambu yai kesalamaka? Sambu mbala mingi bantu yina kebokutaka kebakisaka mpenza ve mutindu Nzambi kesalaka mambu. Ngangi ketendudilaka bantu na yandi kyeleka malembe-malembe. Yo yina, yo kelombaka nde bo tomisa mutindu na beto ya kubakisa Masonuku mbala na mbala. Bansadi ya Yehowa mingi kibeni kesepelaka na bansoba yina. Kansi, bantu fyoti kemonaka nde bo kele ‘mbote mingi’ mpi bo kebuyaka kundima bansoba yango. (Longi 7:16) Kima kepusaka bo na kubuya bansoba yina lenda vanda lulendo, mpi bankaka kekumaka ti mabanza ya dipanda. Ata konso kikuma yina kepusa bantu na kukonda kundima bansoba yina, yo kele kigonsa na kubokuta, sambu yo lenda vutula beto na inza mpi na mitindu na kusala mambu.
15 Beto baka mbandu ya Emanuele, yina kundimaka ve mambu yankaka ya yandi tangaka na mikanda ya “mpika ya kwikama mpi ya mayele.” (Matayo 24:45, NW) Yo yina, yandi yambulaka kutanga mikanda na beto ya Bukristu mpi nsukansuka, yandi songaka bankuluntu nde yandi kezola dyaka ve kuvanda Mbangi ya Yehowa. Kansi, ntangu fyoti na nima, Emanuele kubakisaka nde mambu ya bo kelongaka na organizasio ya Yehowa kevandaka ya kyeleka kibeni. Yandi sosaka dyaka Bambangi, yandi ndimaka kifu na yandi, mpi bo vutulaka yandi na dibundu. Nsukansuka, yandi kumaka dyaka na kyese.
16. Inki lenda sadisa beto na kukatula badute yina beto lenda vanda na yo na malongi yankaka ya Bukristu?
16 Inki beto lenda sala kana beto kezola kubokuta sambu beto kele ti badute na malongi yankaka yina bansadi yonso ya Nzambi kendimaka? Beto fwete kanga ntima, sambu nsukansuka, “mpika ya kwikama” lenda basisa disolo mosi yina tapesa mvutu na bangyufula na beto mpi yina tamanisa badute na beto. Yo tavanda mpi mayele na kulomba lusadisu ya bankuluntu. (Yude 22, 23) Kisambu, kulonguka na beto mosi, mpi kuvukana ti bampangi Bakristu ya kuyela na kimpeve, lenda sadisa beto mpi na kumanisa badute na beto. Dyaka, yo lenda matisa mpi ntonda na beto na bakyeleka ya Biblia yina kekumisaka ngolo lukwikilu ya beto melongukaka na nsadisa ya nzila yina Yehowa kesadilaka sambu na kulonga beto.
Landa na Kuvanda ti Mabanza ya Mbote
17, 18. Na kisika ya kubokuta, inki mabanza beto fwete vanda ti yo, mpi sambu na inki?
17 Ya kyeleka, bantu ya kukonda kukuka kebutukaka ti kikalulu ya kusala masumu, mpi bankaka lenda vanda ti kikalulu ya kubokuta ata sambu na mambu ya kukonda mfunu. (Kuyantika 8:21; Roma 5:12) Kansi, kana beto kuma ti kikalulu yai, beto tatula bangwisana na beto ti Yehowa Nzambi na kigonsa. Yo yina, yo kele mfunu nde beto yala mpusa ya kubokuta yina lenda kwisila beto.
18 Na kisika ya kubokuta sambu na mambu ya keluta na dibundu, yo tavanda mbote nde beto landa na kuvanda ti mabanza ya mbote. Dyaka, beto fwete vanda ti manaka yina tasadisa beto na kudipesa mingi na bisalu ya kimpeve, na kuvanda na kyese, na kuzinga luzingu ya kinzambi, na kuvanda na bukatikati mpi ti lukwikilu ya ngolo. (1 Korinto 15:58; Tito 2:1-5) Yehowa ketwadisaka mambu yonso ya organizasio na yandi, mpi Yezu kezabaka mbote mambu yina kesalamaka na konso dibundu, kaka mutindu yandi vandaka kuzaba mambu ya mabundu ya mvu-nkama ya ntete. (Kusonga 1:10, 11) Kanga ntima mpi kinga Nzambi ti Kristu, yina kele Mfumu ya dibundu. Bo lenda sadila bankuluntu sambu na kuyidika mambu yina kelomba nde bo sungika.—Nkunga 43:5; Kolosai 1:18; Tito 1:5.
19. Tii kuna Kimfumu tayantika kutwadisa mambu yonso ya bantu, na nki beto fwete tula dikebi na beto?
19 Kubika fyoti, ngidika yai ya mbi tasuka, mpi Kimfumu ya Mesia tayantika kutwadisa mambu yonso ya ntoto. Kansi, tii kuna ntangu yango kulunga, yo kele mfunu kibeni nde konso muntu na kati na beto kulanda na kuvanda ti mabanza ya mbote! Yo tasadisa beto na kuzaba bikalulu ya mbote ya bampangi na beto Bakristu, na kisika ya kutula dikebi kaka na bifu na bo. Kana beto ketula dikebi kaka na bikalulu ya mbote ya bampangi na beto Bakristu, beto tavanda na kyese. Na kisika ya kubika nde kubokuta kulembisa mawi na beto, kusala mutindu yina tapesa beto kikesa mpi takumisa beto ngolo na lukwikilu.
20. Inki balusakumunu beto tabaka kana beto kele ti mabanza ya mbote?
20 Kuvanda ti mabanza ya mbote tasadisa beto mpi na kuyibuka balusakumunu mingi yina Yehowa kepesaka beto sambu beto kesala kumosi ti kitini ya organizasio na yandi yina kele na ntoto. Organizasio yai kele organizasio mosi mpamba ya kele ya kwikama na Mfumu ya luyalanganu ya mvimba. Kyeleka yai mpi dibaku ya mbote ya nge kele na yo ya kusambila Yehowa, Nzambi mosi kaka ya kyeleka, kepesa nge nki mawi? Bika nde nge vanda ti mabanza yina Davidi kuvandaka na yo. Yandi yimbaka nde: ‘Sambu nge ke ndimaka bisambu ya bantu, bantu yonso fweti kwisa na nge. Bantu yina ya nge me sola, bayina ya nge ke baka na kuvanda na nzo na nge, bo bakweto ke na kiese! Beto ta mona kaka kiese na mambote yina kele na nzo na nge Nzambi!’—Nkunga 65:3, 5.
Keti Nge Keyibuka?
• Sambu na nki beto fwete monisaka ntonda sambu na bampangi yina ketwadisaka dibundu?
• Inki beto fwete sala kana bampangi yina kele ti mikumba na dibundu mesala bifu?
• Inki mutindu beto fwete tadila bansoba ya bo kesalaka sambu beto bakisa Masonuku mbote?
• Inki lenda sadisa Mukristu na kununga badute yina lenda kwisila yandi?
[Bangyufula ya disolo ya kulonguka]
[Kifwanisu ya kele na lutiti 14]
Davidi kupesaka Salomo bapula ya tempelo mpi yandi pesaka mpenza maboko na lusambu ya kyeleka
[Kifwanisu ya kele na lutiti 17]
Bankuluntu kepesaka lusadisu ya kimpeve na kyese yonso