▪ Kele ve ti kikuma ya kudiyangisa mingi sambu na kisika yina muntu ya bo me basisaka na dibundu fwete vanda na Nzo ya Kimfumu. Zulunalu yai me basisaka masolo mingi yina me siamisaka bibuti ya Bakristu nde kana mpila kele, bo fwete pesa lusadisu ya kimpeve na mwana na bo yina bo me basisaka na dibundu ya ke zingaka nzo mosi ti bo. Mutindu bo monisaka yo na Nzozulu ya Nkengi ya Kifalansa ya Novembri 15, 1988, balutiti 19 mpi 20, bibuti lenda longuka nkutu Biblia ti mwana yina bo me basisaka na dibundu ya me lungisa ntete ve bamvula 18, ya ke zingaka nzo mosi ti bo. Kivuvu kele nde bo lenda pesa mwana yina kikesa ya yandi kele na yo mfunu sambu na kuvutukila nzila ya mbote.

Na yina me tala bisika ya kuvanda na Nzo ya Kimfumu, yo ke monana nde yo kele mbi ve nde leke yina bo me basisa na dibundu ya me lungisa ntete ve bamvula 18, kuvanda pima kisika mosi ti bibuti na yandi. Sambu yo kele ve nsiku nde muntu yina bo me basisaka na dibundu kuvanda kaka na ban ya nsuka na Nzo ya Kimfumu, yo kele mbi ve kana mwana yina bo me basisaka na dibundu me vanda pene-pene ya bibuti na yandi, na konso kisika yina bo me vanda. Sambu bibuti ke langidila kimpeve ya mwana na bo, ntembe kele ve nde bo ta zola kuzikisa nde yandi ke tula dikebi na mambu yina ke longama na balukutakanu. Kuvanda kisika mosi ti mwana na bo na kisika ya kubika yandi na kuvanda kisika ya nkaka, lenda sadisa na diambu yai.

Kansi, inki beto lenda tuba kana mwana yina bo me basisaka na dibundu ke zingaka diaka ve nzo mosi ti bibuti? Keti yandi lenda vanda ve kisika mosi ti bo? Na ntama, zulunalu yai monisaka pwelele kikalulu yina Mukristu fwete sala bikesa na kumonisa na yina me tala kuvukana ti mpangi ya dibuta yina bo me basisaka na dibundu ya ke zingaka ve nzo mosi ti bo. * Na ntama, zulunalu yai monisaka pwelele mutindu ya mbote yina Mukristu fwete landa kusala mambu na yina me tala kuvukana ti mpangi ya dibuta yina bo me basisaka na dibundu ya ke zingaka ve nzo mosi ti bo. Kansi, kubika nde muntu mosi ya dibuta ya bo me basisaka na dibundu kuvanda ya pima na lweka na nge ntangu balukutakanu ke salama me swaswana kibeni ti ntangu yina bampangi ke sosa kukonda mfunu kuvukana ti muntu yina. Ntangu bantu ya dibuta yina kele ya kwikama kele ti nkadilu ya mbote na ntwala ya mpangi na bo ya kinsuni yina bo me basisaka na dibundu mpi ke sala bikesa sambu na kuzitisa bandongisila ya Masonuku ya me tala kuvukana ti yandi, yo ke monana nde yo kele ve ti kikuma ya kudiyangisa.—1 Bak. 5:11, 13; 2 Yoa. 11.

Yo yina, kana muntu yina bo me basisaka na dibundu ke kuditwadisa mbote, yo kele ve ti kikuma ya kudiyangisa kana yandi me vanda pene-pene ya mpangi na yandi ya dibuta to ya mpangi ya nkaka ya dibundu. Kutula bansiku na kisika yina muntu fwete vanda, lenda basisa mavwanga na bantangu ya nkaka. Kana bampangi yonso yina kele pana, tanga mpi bampangi ya dibuta ya kele ya kwikama, ke sala bikesa sambu na kuzitisa minsiku ya Biblia na yina me tala muntu yina bo me basisa na dibundu, mpi kana diambu yango ke budisa ve bampangi ya nkaka ya dibundu dibaku, mfunu kele ve na kudiyangisa sambu na kisika yina bantu ya ke kwisa na balukutakanu fwete vanda.