KATHERINE yelaka na États-Unis, mpi na bamvula 16 yandi bakaka mbotika mpi kumaka mbangi ya Yehowa. Yandi vandaka kusamuna mingi, kansi bantu ya bwala yina vandaka ve kudipesa na nsangu ya Kimfumu. Yandi ke tuba nde: “Mono tangaka masolo ya bantu yina sambaka sambu Nzambi kutindila bo muntu yina lenda sadisa bo na kuzaba yandi. Mbala mingi, mono ke yindulaka nde mono lendaka mpi kukutana ti muntu ya mutindu yina, kansi mono ke kutanaka ve ata ti muntu ya mutindu yina.”

Na nima ya kusamuna bamvula mingi na teritware yina, Katherine kumaka ti bangindu ya kukwenda na kisika yina bantu lendaka kutula dikebi na nsangu ya Kimfumu. Yandi vandaka kudiyula kana kusala mpidina ta vanda mpasi sambu na yandi. Na luzingu na yandi, yandi me kabwanaka ti dibuta na yandi kaka mbala mosi, yo vandaka kaka na nsungi ya bamposo zole mpamba, mpi kuna konso kilumbu, yandi vandaka kuyindula nzo na bo. Ata mpidina, mpusa na yandi ya kuwa kiese ya kusadisa bantu yina kele na mfunu ya kuzaba Yehowa, kumaka mingi kibeni. Na nima ya kutadila babwala yina yandi lendaka kukwenda, yandi sonikilaka filiale ya Guam mpi bo tindilaka yandi bansangu yina yandi vandaka na mfunu ya kuzaba. Na Yuli 2007, ntangu yandi kumaka ti bamvula 26, Katherine kwendaka na Saipan, kisanga mosi ya Nzadi-Mungwa ya Pacifique, yina kele na kitamina ya bakilometre kiteso ya 10 000 ti bwala na bo. Inki mbutu basikaka ntangu yandi kwendaka na kisika yina?

Ntangu fioti na nima ya kukuma na dibundu yina ya mpa, Katherine kutanaka ti Doris, nkento mosi yina vandaka ti bamvula 40 ti ndambu, yina ndimaka na kulonguka Biblia. Ntangu bo manisaka kulonguka bakapu tatu ya ntete ya mukanda Biblia Kelongaka, Katherine kumaka kudiyangisa mingi. Katherine ke tuba nde: “Doris vandaka kulonguka mbote mpi mono vandaka ve kuzola ata fioti nde kulonguka yina kusuka.” Yandi ke yika nde: “Mono me twadisaka ntete ve longoki ya Biblia mpi mono vandaka kumona nde Doris vandaka na mfunu nde mpangi nkento mosi yina kele ti eksperiansi mingi kulonguka ti yandi, ziku mpangi-nkento mosi yina lenda vanda mvula mosi ti yandi.” Katherine lombaka Yehowa na kusadisa yandi na kuzwa mpangi-nkento mosi yina yandi lendaka kupesa yandi longoki yina sambu bo fula kulonguka ti yandi. Na nima, Katherine bakaka lukanu ya kuzabisa Doris nsoba yina ke zola kusalama na kulonguka na yandi.

Katherine ke tuba nde: “Na ntwala ya kuzabisa yandi diambu yina, Doris zabisaka mono nde yandi vandaka na mfunu ya kusolula ti mono sambu na diambu mosi buna. Na nima ya kuwidikila yandi, mono zabisaka yandi mutindu Yehowa sadisaka mono na kununga diambu mosi ya mutindu yina na luzingu na mono. Yandi pesaka mono mersi mingi.” Na nima, Doris zabisaka Katherine nde: “Yehowa ke sadila nge sambu na kusadisa mono. Mbala ya ntete yina nge kwisaka na nzo na mono,  mono vandaka kutanga Biblia na ntwala nde nge kwisa. Mono vandaka kudila mpi kubondila Nzambi na kutindila mono muntu mosi yina lendaka kusadisa mono na kubakisa Biblia. Na nima, nge kokulaka na kielo na mono. Yehowa pesaka mvutu na kisambu na mono!” Mansanga ke basikaka na meso ya Katherine ntangu yandi ke tubilaka disolo yai ya kitoko. Yandi ke tuba nde: “Bangogo ya Doris vandaka mvutu ya Yehowa na kisambu na mono. Yehowa ndimisaka mono nde mono vandaka na makuki ya kulanda kulonguka ti Doris.”

Doris bakaka mbotika na 2010, mpi bubu yai, yandi ke longukaka Biblia ti bantu mingi. Katherine ke tuba nde: “Mono ke vandaka na kiese na kumona nde mpusa na mono ya kusadisa muntu ya ntima-masonga na kukuma nsadi ya Yehowa me lunganaka!” Diambu ya kiese kele nde bubu yai, Katherine kele mupasudi-nzila ya nene na Kosrae, kisanga mosi ya Pacifique.

Bampangi-babakala mpi bankento kuluta nkama yina me katukaka na mputu (banda na bamvula 19 tii na 79) me kwendaka kusala na bisika yina mpusa kele mingi na Micronésie. Erica, mpangi-nkento mosi yina kwendaka na Guam na 2006 na bamvula 19, tubilaka kiese yina bansamuni yai ya kikesa ke waka. Yandi ke tuba nde: “Kusala kisalu ya kimupasudi-nzila na teritware yina bantu kele na mfunu ya kuzaba kieleka kele kiese mingi kibeni. Mono ke tondaka Yehowa mingi na mutindu yandi me sadisaka mono na kusala kisalu ya ntangu yonso. Yo kele luzingu ya kuluta mbote!” Bubu yai, Erica kele na kiese ya kuvanda mupasudi-nzila ya nene na Ebeye, na bisanga ya Marshall. Ya kieleka, bampangi yina ke kwendaka kusamuna na bansi ya nzenza ke kutanaka mpi ti mambu ya nkaka ya mpasi. Bika beto tadila mambu tatu na kati ya mambu yai ya mpasi mpi kumona mutindu bampangi yina me kwendaka na Micronésie me nungaka yo.

Bansoba ya luzingu. Na nima ya kukuma na kisanga ya Palau na 2007, Simon yina vandaka ti bamvula 22 bakisaka nde mbongo yina yandi kumaka kuzwa, vandaka fioti na kufwanisa ti yina yandi vandaka kuzwa na insi na yandi, Angletere. Yandi ke tuba nde: “Ntangu yai, mono me longukaka na kusumba ve bisumba-sumba. Mono ke ponaka madia yina mono fwete sumba, mpi mono ke tambulaka sambu na kusosa kusumba madia yina mono fwete sumba. Kana kima na mono mosi me beba, mono ke sumbaka ya ntama mpi ke sosaka muntu mosi yina lenda sadisa mono na kuyidika yo.” Inki mutindu Simon ke tadilaka luzingu yina? Yandi ke tuba nde: “Yo me sadisaka mono na kuzaba bima yina kele kibeni mfunu na luzingu mpi mutindu mono lenda sumba yo na mbongo fioti. Na mabaku mingi, mono me monaka kibeni lusadisu ya Yehowa. Na bamvula 7 yina mono me salaka awa; mbala yonso, mono ke kondaka ve madia mpi kisika ya kulala.” Ya kieleka, Yehowa ke sadisaka bampangi yina ke zingaka luzingu mosi ya kukonda mindondo sambu bo ke sosaka kutula Kimfumu na kisika ya ntete.—Mat. 6:32, 33.

Luzingu ya mpa. Erica ke tuba nde: “Mono me yikanaka ti bantu ya dibuta na beto, mpi mono vandaka kudiyangisa na kumonaka nde ntangu mono ta yindulaka bo, yo ta salaka nde mono samuna mbote ve.” Inki sadisaka yandi na kusoba mabanza na yandi? “Na ntwala ya kukwenda, mono tangaka masolo ya Nzozulu ya Nkengi yina vandaka kutubila mutindu bantu ke kudiyangisaka sambu na luzingu ya mpa. Disolo yai yidikaka ntima na mono na kununga mpasi yai. Na disolo mosi, mama mosi monisaka mwana na yandi nde, ‘Yehowa ta tanina  nge mbote kuluta mono.’ Bangogo yai pesaka mono kikesa kibeni.” Hanna ti bakala na yandi Patrick, kwendaka kusamuna na Majuro, na bisanga ya Marshall. Kusepela ti bampangi-babakala mpi bankento ya dibundu sadisaka Hanna na kununga mpasi ya kudiyangisa sambu na luzingu ya mpa. Yandi ke tuba nde: “Ntangu yonso, mono ke tondaka Yehowa sambu na dibuta ya bampangi ya ntoto ya mvimba sambu bo mpi kele bantu ya dibuta na beto. Kana bo pesaka mono ve lusadisu ya zola, mono lendaka ve kulanda na kusamuna na kisika yina mpusa vandaka mingi.”

Kusala kinduku. Simon ke tuba nde: “Kana nge kuma na insi ya nzenza, nge ta mona nde mambu mingi kele ya kuswaswana, bantangu ya nkaka, mono ke vandaka ve ti bantu yina mono lendaka kusala bansaka ti bo.” Erica ke tuba nde: “Na luyantiku, mono vandaka kudimona mono mosi, kansi mono vandaka kutadila kikuma yina mono me kwisaka awa. Mono kwisaka ve sambu na mambote na mono mosi, kansi sambu na kusadila Yehowa na mutindu ya mingi.” Yandi ke yika nde: “Na bilumbu yina landaka, mono zwaka banduku yina mono kumaka kuzola mingi.” Simon salaka bikesa sambu na kulonguka ndinga Palau yina sadisaka yandi na ‘kukangula nene kibeni ntima na yandi’ na bampangi-babakala mpi bankento ya bwala yina. (2 Bak. 6:13) Bikesa na yandi ya kulonguka ndinga yina salaka nde bampangi kukuma kuzola yandi mingi. Ntangu bampangi yina ke kwendaka na bansi ya nzenza ke salaka kumosi ti bampangi ya babwala yina bo ke kwendaka, bo yonso ke bakaka balusakumunu na mutindu bo ke salaka binduku ya ngolo na kati ya dibundu. Inki balusakumunu ya nkaka bampangi yina ke kudipesaka na luzolo yonso ke bakaka ntangu bo ke kwendaka kusamuna na bisika yina mpusa kele mingi?

Ntumwa Polo tubaka nde: “Muntu yina ke kuna bambuma fioti ta katula mpi bambuma fioti; mpi muntu yina ke kuna bambuma mingi ta katula mpi bambuma mingi.” (2 Bak. 9:6) Munsiku yina bo ke tubila na verse yai ke tadila mpi bampangi yina ke sosaka kukumisa nene kisalu na bo ya kusamuna. Inki bambuma bo ke ‘katulaka mingi’ na Micronésie?

Na Micronésie, mabaku kele mingi ya kuyantika kulonguka Biblia ti bantu mpi kumona mutindu bantu ya mitindu yonso ke longuka Ndinga ya Nzambi, ke sadila yo mpi ke yela na kimpeve. Patrick ti Hanna samunaka mpi na Angaur, kisanga mosi ya fioti yina kele ti bantu 320. Na nima ya kusamuna kuna bangonda zole, bo kutanaka ti mama mosi yina ke sansaka yandi mosi mwana na yandi ya bakala. Na mbala mosi, yandi ndimaka na kulonguka Biblia, sepelaka mingi na kieleka, mpi salaka bansoba ya nene na luzingu na yandi. Hanna ke tuba nde: “Na nsuka ya konso kulonguka, ntangu beto vandaka kumata na velo ti bakala na mono sambu na kukwenda, beto vandaka kutalana mpi kutuba nde: ‘Mersi Yehowa!’” Hanna ke yika nde: “Mono ke zaba nde Yehowa lendaka kusadila mitindu ya nkaka sambu na kubenda mama yai na lweka na yandi, kansi sambu beto kwendaka kusamuna na kisika yina mpusa vandaka mingi, beto zwaka dibaku ya kukutana mpi kusadisa dimeme yai na kuzaba Yehowa. Yai kele lusakumunu ya kuluta nene yina beto me bakaka na luzingu na beto!” Kaka mutindu Erica tubaka, “kana nge me sadisa muntu na kuzaba Yehowa, nge ta vanda na kiese ya mingi kibeni!”

Bansi mingi kele na mfunu ya bansamuni ya Kimfumu. Keti nge lenda vanda mpi na kati ya bampangi yina ke kwendaka na bisika yina mpusa kele mingi? Samba Yehowa na kusadisa nge na kukumisa nene kisalu na nge ya kusamuna. Solula ti bankuluntu ya dibundu, ti nkengi ya nziunga, to ti bampangi yina me kwendaka dezia kusamuna na bisika yina mpusa vandaka mingi. Ntangu mpusa na nge yina ke yela, sonikila filiale yina ke talaka kisalu na teritware yina nge ke zola kukwenda, mpi sosa kuzaba mambu mingi. * Mbala ya nkaka, nge mpi ta vanda na kati ya mafunda ya bampangi-babakala mpi bankento—baleke mpi bambuta, bampumpa to bankwelani —yina me kudipesaka na luzolo yonso mpi me waka kiese ya ‘kukatula bambuma mingi.’