BETO ke zinga na nsungi mosi ya kuluta mpasi kibeni. (2 Tim. 3:1-5) Konso kilumbu, zola na beto sambu na Yehowa mpi lukanu na beto ya kuzinga na kuwakana ti minsiku na yandi ya lunungu ke mekamaka. Yezu tubilaka na ntwala nsungi yai ya mpasi, mpi yandi zabisaka balongoki na yandi nde bo ta baka kikesa yina ta sadisa bo na kukanga ntima tii na nsuka. (Mat. 24:3, 13; 28:20) Sambu na kupesa balongoki kikesa, Yezu me tulaka mpika ya kwikama sambu na kupesa ‘madia ya kimpeve na ntangu ya me fwana.’—Mat. 24:45, 46.

Banda na 1919 mvula yina Yezu tulaka mpika ya kwikama, bamilio ya “bansadi” yina me katuka na bandinga yonso me kwisaka kuvukana na organizasio ya Nzambi mpi ke bakaka madia ya kimpeve. (Mat. 24:14; Kus. 22:17) Kansi, mikanda na beto ya nkaka ke basikaka ve na bandinga ya nkaka, mpi bantu yonso ve ke vandaka na makuki ya kutanga mikanda na nzila ya bamasini. Mu mbandu, bampangi mingi ke vandaka ve ti makuki ya kutala bavideo na beto to kutanga masolo ya nkaka yina ke basikaka na site na beto jw.org. Keti yo ke tendula nde bampangi yai ke bakaka ve madia yina bo kele na yo mfunu sambu na kubikala ngolo na kimpeve? Sambu na kubakisa, bika beto tadila bangiufula iya ya ke landa mpi kubaka bamvutu na yo.

Ntangu Satana mekaka Yezu na kukumisa matadi mampa, Yezu vutulaka nde: “Muntu fwete zinga na mampa mpamba ve, kansi na mambu yonso ya ke basikaka na munoko ya Yehowa.” (Mat. 4:3, 4) Ndinga ya Yehowa kele ya kusonika na Biblia. (2 Pie. 1:20, 21) Yo yina, Biblia kele kima ya ntete-ntete yina kele na kati ya madia na beto ya kimpeve.—2 Tim. 3:16, 17.

Organizasio ya Yehowa me salaka bikesa sambu nde Biblia—Mbalula ya Nsi-Ntoto ya Mpa kubasika na mvimba to na ndambu na bandinga kuluta 120, mpi konso mvula yo ke landa kaka kubasika na bandinga ya nkaka diaka. Katula mbalula yai, bamiliare ya Babiblia ya bambalula ya nkaka ke basikaka na mvimba to na ndambu na bandinga mingi kibeni. Kisalu yina ya ke yitukisa ke wakana ti luzolo ya Yehowa sambu “bantu ya mitindu yonso kuguluka mpi kubaka nzayilu ya sikisiki ya kieleka.” (1 Tim. 2:3, 4) Sambu ‘ata lugangu mosi ve kele ya kubumbana na meso ya Yehowa,’ beto lenda vanda ti kivuvu nde yandi ta benda “bantu yina kele na nzala ya mambu ya kimpeve” na organizasio na yandi mpi ta pesa bo madia ya kimpeve.—Baeb. 4:13; Mat. 5:3, 6; Yoa. 6:44; 10:14.

Katula kutanga Biblia, muntu ke vandaka na mfunu ya mambu mingi ya nkaka sambu na kukumisa lukwikilu na yandi ngolo. Yo ke lombaka nde yandi bakisa mambu yina yandi ke tanga mpi kusadila yo. (Yak. 1:22-25) Na mvu-nkama ya ntete, Tongu mosi ya Etiopia kutanaka ti diambu ya mutindu yai. Yandi vandaka kutanga Ndinga ya Nzambi, ebuna Filipo yina vandaka nsamuni yulaka yandi nde: “Keti nge ke bakisa kibeni mambu ya nge ke tanga?” Muntu yango vutulaka nde: “Ya kieleka, inki mutindu mono lenda bakisa yo, kana muntu kutwadisa mono ve?” (Bis. 8:26-31) Filipo sadisaka muntu yai na kubaka nzayilu ya sikisiki ya Ndinga ya Nzambi. Tongu sepelaka na mambu yina yandi bakisaka, yo yina yandi bakaka mbotika. (Bis. 8:32-38) Mutindu mosi, mikanda na beto yina ke tendulaka Biblia me sadisaka beto na kubaka nzayilu ya kieleka. Yo me pesaka beto kiese mpi me pusaka beto na kuzinga na kuwakana ti mambu yina beto ke longukaka.—Bakol. 1:9, 10.

Na nsadisa ya mikanda na beto yina ke tendulaka Biblia, bansadi ya Yehowa ke bakaka bima mingi ya kudia mpi ya kunwa na kimpeve. (Yez. 65:13) Mu mbandu, Nzozulu ya Nkengi yina ke basikaka na bandinga kuluta 210, ke tendulaka bambikudulu, ke yedisaka mayele na beto sambu na kubakisa bakieleka ya mudindu, mpi ke pusaka beto na kuzinga na kuwakana ti minsiku ya Nzambi. Réveillez-vous ! yina ke basikaka na bandinga kiteso ya 100, ke yedisaka nzayilu na beto na nsadisa ya bima yina Yehowa me salaka mpi ke monisaka mutindu beto lenda sadila bandongisila ya Biblia na luzingu na beto. (Bing. 3:21-23; Bar. 1:20) Mpika ya kwikama ke pesaka malongi yina me simbama na Biblia na bandinga kiteso ya 680! Keti nge ke bumbaka ntangu sambu na kutanga Biblia? Keti nge ke tangaka konso zulunalu ya mpa yina ke basikaka mpi konso mukanda ya mpa yina ke basikaka konso mvula na ndinga yina nge ke tubaka?

Katula kubasisa mikanda, organizasio ya Yehowa ke yidikaka badiskure yina bo ke salaka na balukutakanu na beto ya dibundu, ya nene, mpi ya distrike. Keti nge ke sepelaka na badiskure, badrame, bansonga mpi ba interview yina ke salamaka na balukutakanu yai? Ya kieleka, Yehowa ke yidikilaka beto kibeni bankinsi ya kimpeve!—Yez. 25:6.

Mvutu kele nde ve. Mpi yo lenda yitukisa beto ve na kumona nde na bantangu ya nkaka bansadi ya nkaka ya Yehowa kubaka madia mingi ya kimpeve kuluta bankaka. Beto baka mbandu ya bantumwa. Bo vandaka kubaka bantuma mingi kuluta balongoki ya nkaka ya mvu-nkama ya ntete. (Mar. 4:10; 9:35-37) Ata mpidina, yo tendulaka ve nde balongoki ya nkaka vandaka kudia ve mbote na kimpeve; sambu bo mpi vandaka kubaka madia ya kimpeve yina bo vandaka na yo mfunu.—Baef. 4:20-24; 1 Pie. 1:8.

Yo kele mpi mfunu na kuzaba nde na Baevanzile bo me sonikaka ve mambu yonso yina Yezu tubaka mpi salaka. Ntumwa Yoane sonikaka nde: “Ya kieleka, kele mpi ti mambu mingi ya nkaka yina Yezu salaka, yina, kana bo sonikaka yo na bunda, mono ke yindula nde, nsi-ntoto yo mosi zolaka kuvanda ve ti kisika ya kufwana sambu na kutula barulo yina ya kusonika.” (Yoa. 21:25) Ata balongoki ya Yezu ya mvu-nkama ya ntete zabaka mambu mingi kuluta beto na yina me tala Yezu, yina vandaka muntu ya kukuka, yo ke tendula ve nde beto me konda nzayilu ya sikisiki na yina me tala Yezu. Yehowa ke salaka yonso sambu beto zaba Yezu mbote-mbote mpidina beto lenda landa mbandu na yandi.—1 Pie. 2:20, 21.

Yindula diaka mikanda yina bantumwa vandaka kusonikila mabundu na mvu-nkama ya ntete. Yo ke monanaka nde mukanda mosi yina ntumwa Polo sonikaka kele ve na kati ya Biblia. (Bakol. 4:16) Keti madia na beto ya kimpeve kele ve ya kulunga sambu beto me tangaka ve mukanda yina? Ve. Yehowa me zaba mbote mambu yina beto kele na yo mfunu mpi yandi me pesaka beto bima mingi sambu beto vanda ngolo na kimpeve.—Mat. 6:8.

Bubu yai, bansadi ya Yehowa ya nkaka ke bakaka madia mingi ya kimpeve kuluta bankaka. Keti mikanda fioti mpamba ke basikaka na ndinga na nge? Kana mpidina, zaba nde Yehowa ke disaka nge. Longuka mikanda yina nge ke bakaka, kana mpila kele, kwendaka na balukutakanu yina ke salamaka na ndinga mosi yina nge ke bakisaka. Mpi vanda ti kivuvu nde Yehowa ta sadisa nge na kuvanda ngolo na kimpeve.—Nk. 1:2; Baeb. 10:24, 25.

Na site na beto, beto ke tulaka bazulunalu mpi mikanda ya nkaka. Yo ke vandaka mpi ti masolo yina ke sadisaka bankwelani, batoko mpi mabuta yina kele ti bana. Mabuta ke bakaka mambote ntangu bo ke longukaka masolo yai na Lusambu na bo ya Dibuta. Diaka, site na beto ya Internet ke pesaka bansangu ya mambu ya nkaka ya mfunu, mu mbandu kutubila mutindu bampangi me manisa Nzo-Nkanda ya Gileade, lukutakanu ya nsuka ya mvula, bisumbula ya lugangu mpi batribinale yina bansadi ya Yehowa ke sambaka. (1 Pie. 5:8, 9) Site yai kele mpi kisadilu mosi ya ngolo sambu na kulonga nsangu ya mbote ata na bansi yina bo me buyisaka kisalu na beto.

Kansi, nge lenda vanda ngolo na kimpeve ata nge kele ve ti makuki ya kusadila Site na beto ya Internet. Mpika ya kwikama ke salaka bikesa sambu na kubasisa masolo na mikanda na mpila nde konso nsadi kudia mbote na kimpeve. Yo yina, yo ke lomba ve kaka nde nge sumba appareil mosi yina ta sadisaka nge na kusadila Internet sambu nge kuma kusadila Site na beto jw.org. Bampangi ya nkaka lenda baka bangidika na mutindu na bo mosi sambu na kuniema masolo ya nkaka yina ke basikaka na Site na beto ya Internet sambu na kupesa yo na bampangi yina kele ve ti makuki ya kusadila Internet, kansi beto ke siamisa ve mabundu na kusala mpidina.

Beto ke tonda Yezu sambu yandi ke lungisaka lusilu na yandi ya kudisa beto na kimpeve. Sambu bilumbu ya nsuka ke kwenda kibeni na nsuka na yo, beto fwete vanda ti kivuvu nde Yehowa ta landa na kupesa beto ‘madia ya kimpeve na ntangu ya me fwana.’