Keti nge tangaka na dikebi yonso banimero ya Nzozulu ya Nkengi ya me katuka kubasika? Tala kana nge lenda pesa bamvutu na bangiufula yai ya ke landa:

Keti Bakristu lenda yoka mvumbi na tiya na kisika ya kuzika yo?

Kuyoka mvumbi na tiya to ve kele desizio ya konso muntu. Biblia kele ve ti nsiku mosi ya ke buyisa kuyoka mvumbi na kisika ya kuzika yo, yo ke monisa kaka nde bo yokaka nitu ya Ntotila Saule ti ya mwana na yandi Yonatani na tiya. (1 Sam. 31:2, 8-13)—6/15, lutiti 7.

Inki ke ndimisa beto nde Nzambi kele ve na kisina ya mambu ya mbi yina ke kuminaka beto?

Banzila ya Nzambi yonso kele ya lunungu. Yandi kele Nzambi ya lunungu, ya kwikama, mpi ya kusungama. Diaka, Yehowa kele Nzambi ya lutondo mpi ya ke wilaka bantu mawa. (Kul. 32:4; Nk. 145:17, NW; Yak. 5:11)—7/1, lutiti 4.

Inki mambu ya mpasi bampangi yina ke kwendaka kusamuna na bansi ya nzenza ke kutanaka ti yo?

Bo ke kutanaka ti mambu tatu ya mpasi: (1) kuyikana ti bansoba ya luzingu, (2) kuyantika luzingu ya mpa, mpi (3) kusala kinduku ti bampangi ya dibundu yina ya mpa. Bampangi mingi yina me ndimaka kukutana ti mambu yai ya mpasi me bakaka balusakumunu mingi.—7/15, balutiti 4-5.

Sambu na nki bampangi ya Yozefi wilaka yandi kimpala?

Kikuma mosi kele nde, sambu Yakobi tungilaka yandi mvwela mosi ya kitoko, yo monisaka nde yandi vandaka kuzola Yozefi mingi. Bampangi ya Yozefi wilaka yandi kimpala, yo yina bo tekaka yandi na kimpika.—8/1, balutiti 11-13.

Sambu na nki batrakiti ya mpa kele mbote mpi mpasi ve na kusadila?

Batrakiti yonso ya mpa me salamaka mutindu mosi. Konso trakiti ke vandaka dezia ti verse mosi na kati mpi ngiufula yina beto ta yula muwi. Ata muwi kupona konso mvutu yina, beto lenda kangula lutiti ya kati mpi kusonga yandi mambu yina Biblia ke tuba. Beto lenda songa yandi mpi ngiufula yina beto ta tadila na mbala ya nima.—8/15, balutiti 13-14.

Peshitta na Ndinga ya Siria kele nki?

Syriaque kele ndinga ya ba-arameye yina bantu mingi kumaka kusadila na mvu-nkama ya zole to ya tatu ya T.B. Yo ke monana nde Syriaque kele ndinga ya ntete yina bo sadilaka sambu na kubalula kitini ya Masonuku ya Kigreki ya Bukristu. Bo bingaka Biblia yina bo balulaka na ndinga Syriaque nde Peshitta.—9/1, balutiti 13-14.

Bibuti yina kele Bakristu lenda sala nki sambu na kugungula bana na bo?

Yo kele mfunu na kuwidikila bana ntangu bo ke tuba sambu na kuzaba bo. Sala bikesa sambu na kudisa bo na kimpeve. Twadisa bo na zola yonso; mu mbandu, ntangu bo ke kuma ti baketi-keti na mambu ya nkaka ya kimpeve.—9/15, balutiti 18-21.

Na nsi ya luyalu ya Kimfumu ya Nzambi, inki mambu ta vanda diaka ve?

Maladi, lufwa, kukonda kisalu, bitumba, nzala, mpi kinsukami ta vanda diaka ve.—10/1, balutiti 6-7.

Inki kuwakana Biblia ke tubila yina ke pesa bantu ya nkaka nzila ya kuyala ti Kristu?

Na nima ya kudia Paki ya nsuka ti bantumwa, Yezu salaka kuwakana ya Kimfumu ti balongoki na yandi ya kwikama. (Luka 22:28-30) Yo ndimisaka bo nde, bo ta yala ti Yezu na zulu.—10/15, balutiti 16-17.

Pesa bambandu zole yina kele na Biblia ya ke ndimisa nde Satana kele.

Masonuku ke tuba nde Satana solulaka ti Yezu sambu na kupukumuna yandi. Diaka, na bilumbu ya Yobi, Satana solulaka ti Nzambi. Masolo yai ke ndimisa nde Satana kele.—11/1, balutiti 4-5.

Banani vandaka ‘bantu yina Nzambi ponaka sambu na kunata zina na yandi’ yina Yakobo tubilaka na Bisalu 15:14?

Bayuda mpi Bantu ya Makanda yina kumaka Bakristu, yina Nzambi ponaka na kuvanda dikanda na yandi sambu na ‘kuzabisa bisika yonso bikalulu ya kuluta mbote’ ya muntu yina bingaka bo. (1 Pie. 2:9, 10)—11/15, balutiti 24-25.

Timgad vandaka na wapi, mpi nki bikalulu bantu ya nkaka ya mbanza yina vandaka na yo?

Timgad vandaka mbanza mosi ya nene na Nordi ya Afrika (bubu yai Algerie), na nsi ya luyalu ya Roma. Sambu na kumonisa mambu yina bantu ya nkaka ya mbanza yina vandaka kuyindula, mukanda mosi yina bo sengumunaka kuna kele ti bangogo yai: “Luzingu ke tendula Kuzomba, Kuyobila, Kusakana, mpi Kuseka!” Mambu yai kele kiteso mosi ti yina 1 Bakorinto 15:32 ke tubila.—12/1, balutiti 8-10.