NA Aprili 28, 2013, lukutakanu mosi salamaka na mbanza Nagoya, na insi Japon. Mpangi Anthony Morris ya Nto-Kimvuka zabisaka kubasika ya mukanda mosi ya mpa: Biblia—Nsangu ya Mbote Yina Matayo Sonikaka, na ndinga Japonais. Nsangu yango sepedisaka bantu. Bantu kuluta 210 000, yina vandaka na lukutakanu mpi bayina landaka yo na nzila ya nsinga, bulaka maboko mingi.

Mukanda yai ya balutiti 128, ya ke tendula Nsangu ya Mbote yina Matayo sonikaka, ya bo balulaka na nsadisa ya Mbalula ya Nsi-Ntoto ya Mpa na Japonais, kele kitoko mpenza. Mpangi Morris tubaka nde, bo basisaka yo sambu na “kulungisa mpusa ya bantu ya Japon.” Inki mutindu bo sonikaka mukanda yango? Sambu na nki bo basisaka yo? Mpi nki mutindu bantu tadilaka mukanda yango?

Mutindu bo sonikaka mukanda Matayo sepedisaka bantu kibeni. Na Japon, bo ke sonikaka mikanda na mitindu zole. Bo lenda sonika bansa ya kulala to ya kutelama. Mikanda na bo ya nkaka, mpi mikanda na beto ya me katuka kubasika kele ti bansa ya kulala. Kansi, na mukanda yai ya mpa bansa kele ya kutelama, mutindu bo ke sonikaka bazulunalu mpi mikanda mingi na Japonais. Bantu mingi ya Japon ke monaka nde mutindu yai ya kusonika ke vandaka pete na kutanga. Diaka, bo tulaka mambu ya mfunu ya konso lutiti bonso tubantu-diambu sambu mutangi kumona mambu ya mfunu ya lutiti yina kukonda mpasi.

Bampangi ya Japon yikanaka nswalu ti mutindu yai ya kitoko ya bo sonikaka mukanda Matayo. Mpangi-nkento mosi ya bamvula 80 ke tuba nde: “Mono me tangaka mukanda ya Matayo mbala mingi, kansi mutindu yai ya kusonika bansa ya kutelama mpi kutula tubantu-diambu na kati ya balutiti me sadisa mono na kubakisa mbote disolo ya Yezu na Zulu ya Ngumba.” Mpangi-nkento mosi ya toko sonikaka nde: “Mono tangaka Mukanda Matayo ya mvimba na mbala mosi. Mono ke sepelaka mingi na bansa ya kulala, kansi bantu mingi ya Japon ke sepelaka na bansa ya kutelama.”

Sambu na nki mukanda yai ke lungisa kibeni bampusa ya bantu ya Japon? Ata bantu mingi ya Japon me yikanaka ve ti Biblia, bo ke sepelaka kutanga yo. Mukanda yai ya ke tendula Nsangu ya Mbote yina Matayo sonikaka, me pesa bantu yina me monaka ntete ve Biblia dibaku ya kusimba kitini yai ya Masonuku ya santu mpi kutanga yo.

Sambu na nki bo ponaka mukanda ya Matayo? Sambu na bantu mingi ya Japon, ngogo “Biblia” ke yibusaka bo Yezu Kristu. Yo yina, bo ponaka mukanda ya Matayo sambu yo ke tubilaka masolo yina ta benda dikebi ya bantu ya Japon, mu mbandu, ndonga ya ba-nkaka ya Yezu, lubutuku na yandi, disolo na yandi ya kitoko na Zulu ya Ngumba, mpi bambikudulu yina yandi tubaka na yina me tala bilumbu ya nsuka.

Na kikesa yonso, bansamuni ya Japon kabulaka mukanda yango na kisalu ya nzo na nzo mpi na bamvutukila ya mpa. Mpangi-nkento mosi sonikaka nde:  “Mono me kuma na mabaku mingi ya kukabula Ndinga ya Nzambi na bantu ya teritware na beto. Kaka na nkokila ya lukutakanu yina ya nene, mono pesaka dezia muntu mukanda Matayo.”

Inki bangogo bansamuni ke sadilaka sambu na kukabula mukanda Matayo? Bantu mingi ya Japon me yikanaka ti bangogo bonso “kielo ya fioti,” ‘mayaka na ntwala ya bangulu,’ mpi “kudiyangisa ve ata fioti sambu na kilumbu yina ke landa.” (Mat. 6:34; 7:6, 13) Bo ke yitukaka na kuzaba nde bangogo yai kele ya Yezu Kristu. Ntangu bo ke tangaka bangogo yina na Nsangu ya Mbote yina Matayo sonikaka, bantu mingi ke tubaka nde: “Mono vandaka kaka na mfunu ya kutanga Biblia ata mbala mosi.”

Ntangu bansamuni ke salaka bamvutukila ya mpa na bantu yina ndimaka mukanda Matayo, mbala mingi bantu ke tubaka nde kaka ntangu bo bakaka yo, bo tangaka yo yonso to ndambu. Tata mosi ya bamvula 60 zabisaka nsamuni mosi nde: “Mono tangaka yo mbala mingi mpi yo me pesa mono kikesa. Kana nge me zola, longa mono mambu ya nkaka ya Biblia.”

Bansamuni ke sadilaka mukanda Matayo ntangu bo ke taka kimbangi na bisika ya bantu mingi. Mpangi-nkento mosi yina vandaka kuta kimbangi, pesaka nkento mosi yina ndimaka mukanda Matayo adresi na yandi ya Internet. Na nima ya ngunga mosi, nkento yina sonikilaka mpangi-nkento nde, yandi tangaka kitini ya mukanda yina mpi yandi vandaka na mfunu ya kuzaba mambu ya nkaka. Na nima ya mposo mosi, yandi yantikaka kulonguka Biblia ti mpangi-nkento yina, mpi ntangu fioti na nima, yandi kumaka kukwenda na balukutakanu.

Bo tindaka bakopi kuluta 1 600 000 ya mukanda Biblia—Nsangu ya Mbote Yina Matayo Sonikaka na mabundu ya Japon, mpi konso ngonda, bansamuni ke kabulaka mafunda ya bakopi na yo. Bangogo ya luyantiku ya mukanda yango ke monisa mawi ya bambasisi. Bangogo yango ke tuba nde: “Beto kele ti kivuvu nde lutangu ya mukanda yai ta yedisa mpusa na beno ya kutanga Biblia.”