Bangyufula Iya ya Metala Nsuka Mezwa Bamvutu

YEZU KRISTU kutubaka na ntwala nde kele ti kilumbu ‘nsuka zolaka kukwisa.’ Sambu na kutubila ntangu yina, yandi tubaka nde: “Na bilumbu yina, mpasi mingi ta vanda. Yo ta vanda mpasi mosi ya ngolo yina me bwaka ntete ve katuka kuna ya Nzambi salaka bima yonso tii bubu yai. Ata mpasi ya nkaka ya mutindu yina ta vanda diaka ve.”​—Matayo 24:14, 21.

Bangogo ya Yezu ya metala nsuka, mpi baverse yankaka ya Biblia ya ketubilaka dyambu yai, kebasisa bangyufula mingi ya mfunu. Sambu na nki ve kukangula Biblia na nge mpi kutanga mambu yina yo ketuba sambu na kupesa mvutu na bangyufula yina?

1 Inki Tasuka?

Biblia kelongaka ve nde ntoto yai ya beto kenyataka tafwa. Muyimbi-bankunga kusonikaka nde: “Ntoto [Nzambi] me tulaka yo na zulu ya bafondasio na yo na mpila nde yo nikana ve ata fioti.” (Nkunga 104:5) Biblia kelongaka mpi ve nde luzingu yonso tazika na ntoto ya mvimba yina tapya tiya. (Yezaya 45:18) Yezu yandi mosi kumonisaka nde bantu yankaka taguluka na nsuka. (Matayo 24:21, 22) Ebuna, Biblia kelonga nde inki tasuka?

Baguvernema ya bantu yina ke na kununga ve tasuka. Nzambi kupesaka profete Daniele mpeve sambu na kusonika nde: “Ntangu ya bantotila yina ta yala, Nzambi ya zulu ta tula ntotila mosi yina ta yalaka tii kuna; ntotila yina bantotila ya nkaka ta bedisaka yandi ve, kansi yandi ta fwa bantotila yonso ebuna yandi ta yalaka tii kuna.”​—Daniele 2:44.

Bitumba mpi kubeba ya ntoto tasuka. Sambu na kutendula mambu yina Nzambi tasala, Nkunga 46:10 ketuba nde: “Yandi ke sukisaka bitumba na nsi-ntoto yonso, yandi ke buka-bukaka babunduki ya tolotolo ti bamakonga, yandi ke tulaka tiya na mabaya ya kuditanina na batolotolo ya bambeni.” Biblia kelonga mpi nde Nzambi ‘tafwa bantu yina ke bebisaka ntoto.’​—Kusonga 11:18.

Nku mpi kukonda lunungu tasuka. Ndinga ya Nzambi kesila nde: “Bantu ya mbote ti ya kieleka ta zinga na ntoto na beto yai; kansi bantu yonso ya mbi, Nzambi ta katula bo na ntoto; yandi ta tumuna bo mutindu bo ke tumunaka matiti na ntoto.”​—Bingana 2:21, 22.

 2 Inki Ntangu Nsuka Takwisa?

Yehowa Nzambi metulaka “ntangu” sambu na kutula nsuka na mambi mpi kutula guvernema ya Kimfumu na yandi. (Marko 13:33) Kansi, Biblia kemonisa pwelele nde beto lenda sala ve bakalkile ya dati ya sikisiki ya nsuka. Yezu kutubaka nde: “Ata muntu mosi kuzaba ve kana nki kilumbu to nki ntangu mambu yina ta bwa, ata bawanzio ya zulu ata Mwana mpi kuzaba yo ve, kansi kaka Tata mpamba muntu kuzaba yo.” (Matayo 24:36) Kansi, Yezu ti balongoki na yandi kutubilaka na ntwala mambu yina tasalama na ntoto na ntwala nde Nzambi kunata nsuka. Nsuka tafinama ntangu mambu yonso yai ya melanda tasalama na ntangu mosi mpi na ntoto ya mvimba.

Bansoba ya nene kesalama na mambu ya politiki, na nzyunga, mpi na luzingu ya bantu na kiteso yina mesalamaka ntete ve na disolo ya luzingu ya bantu. Na mvutu yina yandi pesaka balongoki na yandi na bangyufula yina bo yulaka na yina metala nsuka, Yezu kutubaka nde: “Bantu ya nsi ya nkaka ta kwisa kunwanisa bantu ya nsi ya nkaka, bantu ya kimfumu ya nkaka ta kwisa kunwanisa bantu ya kimfumu ya nkaka. Ntoto ta nikana na bisika ya mutindu na mutindu. Nzala ta vanda mingi mpenza. Mambu yina kele bonso luyantiku ya misongo ke simba nkento na ntangu ya kubuta mwana.” (Marko 13:8) Ntumwa Polo kusonikaka nde: “Na bilumbu ya nsuka ta vanda mpasi mingi. Bantu ta zolaka bantu ya nkaka ve, bo ta zolaka kaka mbongo; bo ta kuditulaka, bo ta vandaka lulendo mingi; bo ta vwenzaka Nzambi, bo ta tulaka ntu-ngolo na batata ti bamama na bo; bo ta zabaka kupesa mersi ve; bo ta zitisaka mambu ya Nzambi ve; bo ta vandaka nku mingi, bo ta zingaka kaka na kimbeni, bo ta kumaka songi-songi, bo ta waka makasi nswalu, bo ta zolaka kusala bantu ya nkaka mpasi, bo ta zolaka ve mambu ya mbote; bo ta zolaka kuteka bantu ya nkaka; bo ta vandaka na kifu ya kusala mambu kukonda kuyindula ntete; ntima na bo ta vanda me fuluka na lulendo mingi; bo ta zolaka kiese ya nsi-ntoto, kansi Nzambi ve.”​—2 Timoteo 3:1-5.

Kampanye mosi ya kusamuna na bandinga mingi ke na kusalama na nsi-ntoto ya mvimba. Yezu kutubaka nde: “Bo ta longaka nsangu yai ya mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.”​—Matayo 24:14.

3 Inki Tasalama na Nima ya Nsuka?

Biblia kelonga ve nde bo takatula bantu yonso ya mbote na ntoto sambu na kuzinga kimakulu na zulu. Kansi, Yezu kulongaka nde lukanu ya kisina ya Nzambi sambu na bantu talungana. Yandi tubaka nde: “Kiese na bantu yina kele pima, sambu bo ta baka ntoto yina ya Nzambi me silaka bo!” (Matayo 5:5; 6:9, 10) Sambu na bayina kefwa na ntwala nde nsuka kukwisa, Biblia kepesa lusilu ya lufutumuku na bilumbu kekwisa. (Yobi 14:14, 15; Yoane 5:28, 29) Inki tasalama na nima ya nsuka?

Banda na zulu, Yezu tayala bonso Ntotila ya Kimfumu ya Nzambi. Profete Daniele kusonikaka nde: “Kaka na ntangu yango yina na mpimpa, mono monaka kima mosi bonso muntu [Yezu ya mefutumukaka]; yandi ke kwisa penepene, matuti me ziunga yandi, ebuna bo ke kwisa kunata yandi na ntwala ya mbuta-muntu yina ya mununu [Yehowa Nzambi]. Ntangu yai yandi [Yezu] bakaka kiyeka, lukumu ti ngolo ya kimfumu na mpila nde bantu yonso ya nsi-ntoto ata bo kele nki dikanda to nki ndinga, bo sadila yandi. Ngolo na yandi ti kimfumu na yandi yo ta mana ve tii kuna, ata muntu mosi ve lenda botula kiyeka na yandi.”​—Daniele 7:13, 14; Luka 1:31, 32; Yoane 3:13-16.

Bantu yina Kimfumu ya Nzambi tayala tavanda ti mavimpi ya kukuka, lutaninu ya kimakulu, mpi luzingu ya mvula na mvula. Profete Yezaya kusonikaka nde: “Bo ta tunga banzo, bo ta zinga muna; bo ta kuna bilanga ya vinu, bo ta dia bambuma na yo. Banzo ya bo ta tunga ti bilanga ya bo ta kuna, yo ta vanda sambu na bo mosi kansi sambu na bantu ya nkaka diaka ve.” (Yezaya 65:21-23) Ntumwa Yoane kusonikaka  sambu na ntangu yina nde: “Ntangu yai Nzambi ke zinga na kati ya bantu! Yandi ta zinga ti bo, bo ta vanda bantu na yandi. Yandi mosi Nzambi ta vandaka ti bo, yandi ta vandaka Nzambi na bo. Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.”​—Kusonga 21:3, 4.

4 Inki Nge Fwete Sala Sambu na Kuguluka na Nsuka?

Ntumwa Piere kundimaka nde bantu yankaka yina kezinga na ntangu ya nsuka taseka ntangu bo tawa nde Nzambi takota na makambu ya bantu mpi tasukisa mambi na ntoto. (2 Piere 3:3, 4) Ata mpidina, Piere kesyamisa bantu yina kezinga na bilumbu na beto na kusala mambu yai ya kelanda.

Baka dilongi na mambu ya ntama. Piere kusonikaka nde: “Nzambi bikisaka mpi ve bantu ya ntama, kansi yandi tindilaka bantu yina ya mbi masa, ebuna yo fulukaka na ntoto; yandi gulusaka kaka Noa yina vandaka kulonga malongi ya Nzambi, ti bantu ya nkaka nsambwadi.” (2 Piere 2:5) Sambu na yina metala bantu yina kesekaka, Piere kutubaka nde: “Kana bo tuba mpidina, tuba nde bo me vila, nkutu bo zola ve kundima nde Nzambi salaka zulu ti ntoto katuka ntama. Yandi basisaka ntoto na masa, yandi salaka ntoto mpi na masa; kiteso mosi, Nzambi fwaka bantu ya ntama kaka na masa yina  fulukaka na ntoto yonso. Mambu yina ya Nzambi tubaka yo me bumbaka zulu ti ntoto * yai ke zingaka tii bubu yai, sambu na kufwa yo kimakulu na tiya, na kilumbu yina ya Nzambi ta sambisa bantu ya mbi ti kufwa bo.”​—2 Piere 3:5-7.

Zinga na kuwakana ti bansiku ya bikalulu ya mbote ya Nzambi. Piere kusonikaka nde bantu yina kezola kuguluka na nsuka tamonisa “bikalulu ya santu” mpi bisalu ya kukangama na Nzambi. (2 Piere 3:11) Simba nde Piere kemonisa mfunu ya “bikalulu ya santu” mpi bisalu ya kukangama na Nzambi. Yo yina, yo kelomba mambu mingi kuluta kumonisa lukwikilu ya zulu-zulu to kukinga minuta ya nsuka sambu na kusala bangwisana ya mbote ti Nzambi.

Inki bikalulu mpi bisalu ya sikisiki yina Nzambi kendimaka? Sambu na nki ve kufwanisa mambu yina nge mezaba ti yina Biblia kelongaka na dyambu yai? Bambangi ya Yehowa tavanda na kyese ya kusadisa nge. Lomba bo na kusonga nge na Biblia na nge kisika bamvutu na bo kekatukaka. Kusala mutindu yai lenda sadisa nge na kuvingila makwisa ti kikesa mpi kutula ntima, ata mambu ya kepesa boma kezyunga beto ntangu yai.

[Noti na Nsi ya lutiti]

[Bangogo sambu na kubenda dikebi ya kele na lutiti 7]

Ntoto tafwa ve, kansi bayina kebebisaka yo tafwa