Kwenda Penepene na Nzambi

‘Mfumu Nzambi Kele Ngungudi na Mono’

TALA kifwanisu yina kele na lutiti yai. Keti nge lenda kudiwa mutindu mwana-dimeme yina kele na ntulu ya ngungudi na yandi kekudiwa na lutaninu? Na Nkunga 23, Biblia ketubila mbandu ya ngungudi mosi mpi ya mameme na yandi sambu na kutendula dikebi ya zola yina Yehowa kemonisilaka bansambidi na yandi. Yandi kezolaka nde beto kudiwa na lutaninu, bonso bantu yina kevandaka na lutaninu ya lenda tuba ti kivuvu yonso, bonso Davidi muyimbi-bankunga nde: ‘Mfumu Nzambi kele ngungudi na mono.’​—Verse 1.

Davidi, nsoniki ya nkunga yai, kuvandaka ngungudi ntangu yandi vandaka toko. Yandi zabaka bampusa ya mameme mpi mikumba ya ngungudi. Sambu Davidi kumonaka lutaninu ya Nzambi na luzingu na yandi, yandi sonikaka nkunga yina bo vandaka kubinga “nkunga ya kivuvu to ya kutudila ntima.” Na nkunga yango, zina ya Nzambi, Yehowa kele na luyantiku mpi na nsuka. (Baverse 1,, 6 NW) Bangogo yina kele na kati-kati ya baverse yina ketubila mitindu tatu yina kemonisa nde, Yehowa kekebaka bantu na yandi mutindu ngungudi kekebaka mameme na yandi.​—Nkunga 100:3.

Yehowa ketwadisaka mameme na yandi. Kana mameme ketambula kukonda ngungudi, bo lenda vila. Kiteso mosi, beto kele na mfunu ya lusadisu sambu na kumona nzila ya mbote na luzingu. (Yeremia 10:23) Davidi ketendula nde, Yehowa ketwadisaka bantu na yandi na “kisika ya mbote yina ke na matiti ya mubisu” mpi “na lweka ya mwa-masa yina kele pima ti madidi.” Yandi ketwadisaka bo “na nzila ya mbote.” (Baverse 2, 3) Mbandu yai ya ngungudi kendimisa beto nde, beto lenda tula ntima na Nzambi. Kana beto kelanda lutwadisu ya mpeve na yandi mutindu Biblia kemonisa yo, beto lenda vanda na luzingu ya kyese, ngemba, mpi lutaninu.

Yehowa ketaninaka mameme na yandi. Kana mameme ketambula kukonda ngungudi, bo lenda wa boma mpi kukonda lusadisu. Yehowa kesongaka bantu na yandi nde, bo fwete wa boma ve, ata bo ketambula “na nzila ya mpimpa mingi bonso lufwa” disongidila, bantangu ya mpasi na luzingu na bo. (Verse 4) Yehowa kelangidilaka bo, mpi kevandaka ya kuyilama sambu na kusadisa bo. Yandi lenda pesa bansambidi na yandi mayele mpi ngolo yina bo kele na yo mfunu sambu na kununga bampasi.​—Filipi 4:13; Yakobo 1:2-5.

Yehowa kedisaka mameme na yandi. Mameme kevandaka na mfunu ya ngungudi na bo sambu na kuzwa madya. Beto kevandaka ti mpusa ya madya ya kimpeve, mpusa yina lenda lungana kaka ti lusadisu ya Nzambi. (Matayo 5:3) Dyambu ya kyese kele nde, Yehowa kele Mupesi-Bima, mpi yandi kepesaka bansadi na yandi madya mingi ya kimpeve. (Verse 5) Biblia mpi bisadilu ya kulongukila Biblia, mu mbandu zulunalu yai ya nge ketanga, kele madya ya kimpeve yina kelungisaka mpusa na beto ya kuzaba ntendula ya luzingu mpi lukanu ya Nzambi sambu na beto.

Davidi kudiwaka na lutaninu, mpi yandi zabaka nde kana yandi bikala penepene ya ngungudi na yandi ya Zulu, Yehowa zolaka kumonisila yandi dikebi ya zola “na luzingu na [yandi] yonso.” (Verse 6) Keti nge kele na mpusa ya lutaninu ya mutindu yina? Kana yo kele mpidina, longuka mutindu yina nge lenda kwenda penepene na Yehowa. Ebuna, nge lenda kudiwa na lutaninu na maboko ya Ngungudi ya Nene, yina ketwadisaka, ketaninaka, mpi kedisaka bantu yina kebikalaka ya kwikama na yandi.​—Yezaya 40:11.