Bangyufula ya Batangi

Inki mono fwete sala kana mono kele ti ngyufula na dyambu mosi yina mono metanga na Biblia to ntangu mono kele na mfunu ya ndongisila na dyambu mosi buna?

Bingana 2:1-5, kesyamisa beto yonso na ‘kulanda kusosa’ mayele mpi luswasukusu mutindu beto kesosaka ‘bima ya ntalu yina mebumbanaka.’ Yo ketendula nde, beto mosi fwete sosa bamvutu na bangyufula ya Biblia yina beto kekudiyulaka mpi kumanisa bampasi na beto. Inki mutindu beto lenda sala yo?

Mukanda Baka Mambote na Malongi ya Nzo-Nkanda ya Kisalu ya Teokrasi, lutiti 33 tii na 38, ketubila ntu-dyambu “Mutindu ya Kusosa Bansangu” na kusadilaka bisadilu yina “mpika ya kwikama mpi ya mayele” kepesaka beto. (Mat. 24:45, NW) Lutiti 36, ketendula mutindu ya kusadila Index des publications Watch Tower, yina kele ti bitini zole, index ya bantu-dyambu ya masolo ti index ya baverse. Yo kesadisaka beto na kusosa ngogo mosi to verse mosi, mpi na nima kumona mikanda yina ketubila yo. Vanda ntima-nda ntangu nge kesosa mvutu mosi ya sikisiki to lutwadisu mosi yina nge kele na yo mfunu. Yibuka nde, nge kele na kusosa ‘bima ya ntalu yina mebumbanaka,’ yina kelombaka ntangu mpi bikesa.

Ya kyeleka, yo kele ti mambu mpi baverse yankaka yina mikanda na beto ketubilaka ve na pwelele. Mpi ata ntangu beto ketubilaka verse mosi buna, mbala yankaka beto kebakaka ve mvutu ya sikisiki yina beto vandaka kuvingila. Dyaka, masolo yankaka ya Biblia kebasisaka bangyufula sambu Masonuku ketubilaka ve mambu yonso na pwelele. Yo yina, beto lenda mona ve na mbala mosi bamvutu ya bangyufula yonso yina beto kekudiyulaka. Kana yo kele mpidina, beto fwete buya kupesa bangindu na beto mosi na mambu yina kele ve ti bamvutu, kana ve beto tabasisa ‘bantembe ya mpamba na kisika ya kuzaba mambu yina Nzambi kezolaka ya kele na kuwakana ti lukwikilu.’ (1 Tim. 1:4; 2 Tim. 2:23; Tito 3:9) Yo vanda biro ya filiale to babiro yina ketwadisaka kisalu na ntoto ya mvimba kele ve ti kiyeka ya kutadila mpi kupesa mvutu na bangyufula yina mikanda na beto metubilaka ve. Beto lenda vanda na kyese sambu Biblia kele ti malongi yina mefwana sambu na kutwadisa beto na luzingu ya mvimba kansi mpi ketubilaka ve mambu yankaka ya fyoti yina lenda lomba beto na kuvanda ti lukwikilu ya ngolo na Nzambi yina kele Munkwa na yo.​—Tala balutiti 185 tii na 187 ya mukanda Kwenda Pene-Pene na Yehowa.

Inki beto lenda tuba kana nge mesala yonso yina nge lenda sala sambu na kusosa dyambu mosi yina keyangisa nge kansi nge memona ve lutwadisu to mvutu yina nge kele na yo mfunu? Kuwa nsoni ve na kusolula ti mpangi-Mukristu mosi ya kuyela, ziku nkuluntu mosi ya dibundu na beno. Bankuluntu kevandaka ti nzayilu ya mingi ya Biblia mpi bo mekutanaka ti mambu mingi na luzingu na bo. Lusadisu na bo ya bukati-kati tasadisa nge kana nge kesosa ndongisila na dyambu mosi buna to kezola kubaka lukanu mosi buna, sambu bo mezaba nge mbote-mbote mpi kezingaka kisika mosi ti nge. Mpi kuvila ve na kusamba Yehowa sambu na dyambu yina keyangisa nge mpi kulomba yandi na kutwadisa mabanza na nge na nzila ya mpeve santu na yandi, sambu Yehowa “ke pesaka mayele [mpi] ngangu.”​—Bingana 2:6; Luka 11:13.