“Beno ta zaba mambu yina kele ya kieleka, ebuna mambu yina ta katula beno na kimpika.”​—YOANE 8:32.

BIBLIA ketubilaka kyeleka yina lenda katula beto na kimpika ya malongi ya kisakasaka to nkutu na malongi ya luvunu na yina metala Yezu. Ata mpidina, keti bamvutu kele mpenza mfunu na mambu yina beto kekwikilaka sambu na yandi? Ee, yo kele mfunu sambu na Yehowa mpi Yezu. Yo yina, yo fwete vanda mpi mfunu sambu na beto.

● Sambu na nki yo kele mfunu sambu na Yehowa? Sambu, ‘Nzambi kele zola.’ (1 Yoane 4:8) Yehowa kezolaka nde beto vanda na kyese kimakulu. Yezu tubaka nde: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi . . . kuvanda na moyo ya mvula na mvula.” (Yoane 3:16) Nzambi tindaka Mwana na yandi sambu na kugulusa beto mpi kukangudila beto nzila sambu na kuzinga kimakulu na Paladisu na ntoto, na kuwakana ti lukanu na yandi ya luyantiku. (Kuyantika 1:28) Nzambi kele ti mpusa ya ngolo ya kupesa luzingu ya mvula na mvula na bantu yina kelongukaka kyeleka ya metala Mwana na yandi mpi kezingaka na kuwakana ti kyeleka yina.​—Roma 6:23.

● Sambu na nki yo kele mfunu sambu na Yezu? Yezu zolaka mpi bantu. Yandi monisaka zola ya kuditambika ntangu yandi ndimaka kufwa sambu na beto. (Yoane 15:13) Yandi bakisaka nde kusala buna kele kaka mutindu mosi ya kukangudila bantu nzila ya luguluku. (Yoane 14:6) Keti yo keyitukisa beto na kumona nde Yezu kezola nde bantu mingi kubaka mambote ya kimenga ya nkudulu na yandi? Yo yina, yandi tumaka balongoki na yandi ya kyeleka na kulonga bantu luzolo mpi lukanu ya Nzambi na nsi-ntoto ya mvimba.​—Matayo 24:14; 28:19, 20.

● Sambu na nki yo kele mfunu sambu na beto? Yindula fyoti mambu yina kele mfunu sambu na nge​—mavimpi mpi dibuta na nge. Keti nge kevandaka ti mpusa ya mavimpi mpi luzingu ya mbote sambu na nge mpi bantu yina nge kezolaka? Na nzila ya Yezu, Yehowa kepesa nge mpi bantu yina nge kezolaka kivuvu ya kuvanda ti mavimpi ya kukuka mpi luzingu ya kukonda nsuka na nsi-ntoto ya mpa ya kukonda mpasi. (Nkunga 37:11, 29; Kusonga 21:3, 4) Keti kivuvu yina kesepedisaka nge? Kana yo kele buna, kele ti kima ya nge fwete sala.

Tala dyaka verse ya bo mevutukila na ntu-dyambu: “Beno ta zaba mambu yina kele ya kieleka, ebuna mambu yina ta katula beno na kimpika.” Kyeleka na yina metala Yezu mpi mukumba na yandi na kulungana ya lukanu ya Nzambi lenda katula beto na kimpika ya kuluta mbi disongidila kimpika ya masumu mpi ya lufwa. Kansi nge fwete “zaba mambu yina kele ya kieleka” sambu na kukatuka na kimpika yango. Yo tavanda mbote nde nge longuka mambu mingi ya metala kyeleka yai mpi kuzaba mutindu nge mpi bantu yina nge kezolaka lenda bakila yo mambote. Bambangi ya Yehowa tavanda na kyese ya kusadisa nge.