Longuka na Ndinga ya Nzambi

Keti Nzambi Ta Tula Luyalu Mosi Yina Ta Yala Ntoto ya Mvimba?

Disolo yai ke pesaka bamvutu na bangiufula yina ziku nge me yulaka mpi ke monisaka kisika nge lenda baka bamvutu na Biblia na nge. Bambangi ya Yehowa ta sepela na kutadila bamvutu yango ti nge.

1. Sambu na nki bantu kele na mfunu ya luyalu mosi yina ta yala ntoto ya mvimba?

Bubu yai, bantu ya nsi-ntoto ya mvimba ke kutana mbala mingi ti bampasi. Na bansi ya nkaka, bantu mingi kele bansukami mpi bo ke niokula bo. Na bisika ya nkaka, bantu mingi kele ti bima mingi kuluta yina bo kele na yo mfunu. Kaka luyalu mosi yina ta twadisa mambu ya ntoto ya mvimba lenda sala na mpila nde bantu yonso kuzwa kiteso mosi bima yina ntoto ke basisaka.​—Tanga Longi 4:1; 8:9.

2. Nani me fwana na kuyala ntoto ya mvimba?

Bantu ya nkaka ke sepelaka ve na dibanza ya kuvanda ti mfumu mosi yina ta yala ntoto ya mvimba, sambu kele ve ti muntu mosi yina lenda sala kisalu yango mbote. Ata muntu mosi ve lenda ndimama na bantu yonso. Diaka, nani kele ti makuki ya kusala mambu na masonga yonso ntangu yandi me kuma mfumu? Dibanza ya kuyindula nde mfumu mosi ya mbi kuyala bantu yonso ke pesaka boma.​—Tanga Bingana 29:2; Yeremia 10:23.

Yehowa Nzambi me ponaka mwana na yandi, Yezu, sambu na kuyala kimakulu. (Luka 1:32, 33) Yezu kutanaka ti mambu mingi ntangu yandi vandaka na ntoto. Yandi belulaka bantu ya maladi, longaka bantu ya kudikulumusa, mpi lutisaka ntangu kumosi ti bana-fioti. (Marko 1:40-42; 6:34; 10:13-16) Yo yina, Yezu kele Mfumu yina me fwana.​—Tanga Yoane 1:14.

  3. Keti yo lenda salama nde luyalu mosi kaka kuyala ntoto ya mvimba?

Nzambi me ponaka Mwana na yandi sambu na kuyala ntoto tuka na zulu. (Daniele 7:13, 14) Kaka mutindu yo ke lombaka ve nde mfumu kuvanda na bambanza yonso yina yandi ke yala, yo kele mpi mfunu ve nde Yezu kuvanda na ntoto sambu na kuyala bantu.​—Tanga Matayo 8:5-9, 13.

Keti bantu yonso ta ndima nde Yezu kuvanda Mfumu? Ve. Kaka bantu yina ke zolaka mambu ya mbote ta ndima yandi. Yehowa ta fwa bantu yina ke buya Mfumu ya zola mpi ya lunungu yina yandi me pona.​—Tanga Matayo 25:31-33, 46.

4. Mfumu yina ta yala ntoto ta sala nki?

Kaka mutindu ngungudi ke vukisaka mameme na yandi, Yezu yantikaka dezia kuvukisa bantu ya kudikulumusa ya me katuka na bansi yonso mpi yandi ke longa bo banzila ya Nzambi. (Yoane 10:16; 13:34) Bantu yango ke sepelaka kupesa maboko na Yezu mpi na luyalu na yandi. (Nkunga 72:8; Matayo 4:19, 20) Na ntoto ya mvimba, bantu yina kele ya kwikama na Yezu ke longa na bumosi nde Yezu me kuma Ntotila.​—Tanga Matayo 24:14.

Ntama mingi ve, Yezu ta sadila ngolo na yandi sambu na kukatula bantu na kimpika ya baluyalu ya mbi. Yandi me ponaka balongoki na yandi ya nkaka ya kwikama sambu na kuyala ntoto kumosi ti yandi tuka na zulu. (Daniele 2:44; 7:27) Kimfumu ya Yezu ta fulusa ntoto na nzayilu ya Yehowa mpi ta vutula paladisu yina vilaka na luyantiku ya disolo ya bantu.​—Tanga Yezaya 11:3, 9; Matayo 19:28.

Sambu na kuzaba mambu mingi, tala kapu 8 ya mukanda yai, Inki Biblia Kelongaka Mpenza?, yina Bambangi ya Yehowa me basisaka.